The Comprehensive Aramaic Lexicon

10:01 [ai]	ܨܳܒܼܶܐ ܐ̱ܢܳܐ ܕܶܝܢ ܕܬܶܕܿܥܽܘܢ ܐܰܚܰܝ̈܃ ܕܰܐܒܼܳܗܰܝܢ̈ ܟܽܠܗܽܘܢ ܬܚܶܝܬܼ ܥܢܳܢܳܐ ܗܘܰܘ܂ ܘܟܼܽܠܗܽܘܢ ܒܝܰܡܳܐ ܥܒܼܰܪܘ܂
10:02 [ai]	ܘܟܼܽܠܗܽܘܢ ܒܝܰܕܼ ܡܽܘܫܶܐ ܥܡܰܕܼܘ ܒܰܥܢܳܢܳܐ ܘܰܒܝܰܡܳܐ܂
10:03 [ai]	ܘܟܼܽܠܗܽܘܢ ܚܕܼܳܐ ܡܶܐܟܼܽܘܠܬܳܐ ܕܪܽܘܚܳܐ ܐܶܟܼܰܠܘ܂
10:04 [ai]	ܘܟܼܽܠܗܽܘܢ ܚܰܕܼ ܡܰܫܬܿܝܳܐ ܕܪܽܘܚܳܐ ܐܶܫܬܿܺܝܘ܂ ܫܳܬܼܶܝܢ ܗ̱ܘܰܘ ܓܶܝܪ ܡܶܢ ܟܺܐܦܼܳܐ ܕܪܽܘܚܳܐ ܕܳܐܬܼܝܳܐ ܗ̱ܘܳܬܼ ܥܰܡܗܽܘܢ܃ ܟܺܐܦܼܳܐ ܕܶܝܢ ܗܳܝ܂ ܗܽܘ ܗܘܳܐ ܡܫܺܝܚܳܐ܂
10:05 [ai]	ܐܶܠܳܐ ܠܳܐ ܗ̱ܘܳܐ ܒܣܽܘܓܼܐܗܽܘܢ ܐܶܨܛܒܼܺܝ ܐܰܠܳܗܳܐ܃ ܢܦܼܰܠܘ ܓܶܝܪ ܒܡܰܕܼܒܪܳܐ܂
10:06 [ai]	ܗܳܠܶܝܢ ܕܶܝܢ ܛܽܘܦܼܣܳܐ ܠܰܢ ܗ̱ܽܘ ܗܘܰܘ܃ ܕܠܳܐ ܗܘܰܝܢ ܪܳܓܿܺܝܢ ܒܺܝܫܳܬܼܳܐ̈܂ ܐܰܝܟܿܰܢܳܐ ܕܗܶܢܽܘܢ ܪܰܓܼܘ܂
10:07 [ai]	ܘܳܐܦܼܠܳܐ ܢܶܗܘܶܐ ܦܳܠܚܰܝ̈ ܦܿܬܼܰܟܼܪ̈ܶܐ܃ ܐܰܝܟܿܰܢܳܐ ܕܳܐܦܼ ܡܶܢܗܽܘܢ ܦܠܰܚܘ܂ ܐܰܝܟܼ ܕܰܟܼܬܼܺܝܒܼ܃ ܕܺܝܬܼܶܒܼ ܥܰܡܳܐ ܠܡܶܐܟܼܰܠ ܘܰܠܡܶܫܬܳܐ܃ ܘܩܳܡܘ ܠܡܶܫܬܿܥܳܝܽܘ܂
10:08 [ai]	ܘܳܐܦܼܠܳܐ ܢܙܰܢܶܐ܂ ܐܰܝܟܿܰܢܳܐ ܕܡܶܢܗܽܘܢ ܙܰܢܺܝܘ܃ ܘܰܢܦܼܰܠܘ ܒܚܰܕܼ ܝܰܘܡܳܐ ܥܶܣܪܺܝܢ ܘܰܬܼܠܳܬܼܳܐ ܐܰܠܦܼܺܝܢ̈܂
10:09 [ai]	ܘܠܳܐ ܢܢܰܣܶܐ ܠܰܡܫܺܝܚܳܐ܂ ܐܰܝܟܿܰܢܳܐ ܕܡܶܢܗܽܘܢ ܢܰܣܺܝܘ܃ ܘܰܐܘܒܿܶܕܼܘ ܐܶܢܽܘܢ ܚܘܰܘܳܬܼܳܐ̈܂
10:10 [ai]	ܘܳܐܦܼܠܳܐ ܬܶܪܛܢܽܘܢ܂ ܐܰܝܟܿܰܢܳܐ ܕܡܶܢܗܽܘܢ ܪܛܶܢܘ܃ ܘܶܐܒܼܰܕܼܘ ܒܺܐܝܕܼܰܝ̈ ܡܚܰܒܿܠܳܢܳܐ܂
10:11 [ai]	ܗܳܠܶܝܢ ܕܶܝܢ ܟܽܠܗܶܝܢ ܕܰܓܼܕܼܰܫ ܠܗܽܘܢ܂ ܠܛܽܘܦܼܣܰܢ ܗܘܰܝ̈܂ ܘܶܐܬܼܟܿܬܼܶܒܼ ܡܶܛܽܠ ܡܰܪܕܿܽܘܬܼܳܐ ܕܺܝܠܰܢ܃ ܕܚܰܪܬܼܗܽܘܢ ܕܥܳܠܡܶܐ̈ ܥܠܰܝܢ ܡܰܛܝܰܬܼ܀
10:12 [ai]	ܡܶܟܿܺܝܠ ܡܰܢ ܕܣܳܒܼܰܪ ܕܩܳܡ܃ ܢܶܙܕܿܗܰܪ ܕܠܳܐ ܢܶܦܿܶܠ܂
10:13 [ai]	ܢܶܣܝܽܘܢܳܐ ܠܳܐ ܡܰܛܺܝܟܼܽܘܢ܂ ܐܶܠܳܐ ܕܿܰܒܼܢܰܝܢܳܫܳܐ܂ ܡܗܰܝܡܰܢ ܗ̱ܽܘ ܕܶܝܢ ܐܰܠܳܗܳܐ܃ ܕܠܳܐ ܢܰܪܦܿܶܝܟܼܽܘܢ ܕܬܶܬܼܢܰܣܽܘܢ ܝܰܬܿܺܝܪ ܡܰܢ ܡܶܕܶܡ ܕܰܡܨܶܝܢ ܐܢ̱ܬܿܽܘܢ܂ ܐܶܠܳܐ ܢܶܥܒܿܶܕܼ ܠܢܶܣܝܽܘܢܟܼܽܘܢ ܡܰܦܿܩܳܢܳܐ܃ ܐܰܝܟܿܰܢܳܐ ܕܬܶܫܟܿܚܽܘܢ ܠܰܡܣܰܝܒܿܳܪܽܘ܀
10:14 [ai]	ܡܶܛܽܠ ܗܳܢܳܐ ܚܰܒܺܝܒܼܰܝ̈܃ ܥܪܽܘܩܘ ܡܶܢ ܦܽܘܠܚܳܢܳܐ ܕܿܰܦܼܬܼܰܟܼܪ̈ܶܐ܂
10:15 [ai]	ܐܰܝܟܼ ܕܰܠܚܰܟܿܺܝܡܶܐ̈ ܐܳܡܰܪ ܐ̱ܢܳܐ܂ ܕܽܘܢܘ ܐܰܢ̱ܬܿܽܘܢ ܡܶܕܶܡ ܕܳܐܡܰܪ ܐ̱ܢܳܐ܂
10:16 [ai]	ܟܳܣܳܐ ܗܰܘ ܕܬܰܘܕܿܺܝܬܼܳܐ ܕܰܡܒܼܰܪܟܼܺܝܢܰܢ܃ ܠܳܐ ܗ̱ܘܳܐ ܫܰܘܬܿܳܦܼܽܘܬܼܳܐ ܐܺܝܬܼܰܘܗ̱ܝ ܕܰܕܼܡܶܗ ܕܰܡܫܺܝܚܳܐ܃ ܘܠܰܚܡܳܐ ܗܰܘ ܕܩܳܨܶܝܢܰܢ܃ ܠܳܐ ܗ̱ܘܳܐ ܫܰܘܬܿܳܦܼܽܘܬܼܳܐ ܐܺܝܬܼܰܘܗ̱ܝ ܕܦܰܓܼܪܶܗ ܕܰܡܫܺܝܚܳܐ܃
10:17 [ai]	ܐܰܝܟܿܰܢܳܐ ܕܚܰܕܼ ܗ̱ܽܘ ܠܰܚܡܳܐ ܗܰܘ܃ ܗܳܟܼܰܢܳܐ ܟܽܠܰܢ ܚܰܕܼ ܚܢܰܢ ܦܓܼܰܪ܂ ܟܽܠܰܢ ܓܶܝܪ ܡܶܢ ܗܰܘ ܗ̱ܽܘ ܚܰܕܼ ܠܰܚܡܳܐ ܢܳܣܒܺܝܢܰܢ܂
10:18 [ai]	ܚܙܰܘ ܠܺܐܝܣܪܳܝܶܠ ܕܒܰܒܼܣܰܪ܂ ܠܳܐ ܗ̱ܘܳܐ ܐܰܝܠܶܝܢ ܕܳܐܟܼܠܺܝܢ ܕܶܒܼܚܶܐ̈܃ ܗܳܘܶܝܢ ܫܰܘܬܿܳܦܼܶܐ̈ ܠܡܰܕܼܒܿܚܳܐ܃
10:19 [ai]	ܡܳܢܳܐ ܗܳܟܼܺܝܠ ܐܳܡܰܪ ܐ̱ܢܳܐ܂ ܕܰܦܼܬܼܰܟܼܪܳܐ ܡܶܕܶܡ ܐܺܝܬܼܰܘܗ̱ܝ܃ ܐܰܘ ܕܶܒܼܚܳܐ ܕܰܦܼܬܼܰܟܼܪܳܐ ܡܶܕܶܡ ܗ̱ܽܘ܃ ܠܳܐ܂
10:20 [ai]	ܐܶܠܳܐ ܗܰܘ ܡܶܕܶܡ ܕܕܼܳܒܼܚܺܝܢ ܚܰܢܦܼܶܐ̈܃ ܠܫܺܐܕܼܶܐ̈ ܗ̱ܘ ܕܳܒܼܚܺܝܢ܂ ܘܠܳܐ ܠܰܐܠܳܗܳܐ܂ ܠܳܐ ܕܶܝܢ ܨܳܒܼܶܐ ܐ̱ܢܳܐ ܕܬܶܗܘܽܘܢ ܫܰܘܬܿܳܦܼܶܐ̈ ܠܫܺܐܕܼܶܐ̈܂
10:21 [ai]	ܠܳܐ ܡܶܫܟܿܚܺܝܢ ܐܢ̱ܬܿܽܘܢ ܕܬܶܫܬܿܽܘܢ ܟܳܣܳܐ ܕܡܳܪܰܢ܂ ܘܟܼܳܣܳܐ ܕܫܺܐܕܼܶܐ̈܂ ܘܠܳܐ ܡܶܫܟܿܚܺܝܢ ܐܢ̱ܬܿܽܘܢ ܕܬܶܫܬܰܘܬܿܦܼܽܘܢ ܒܦܳܬܼܽܘܪܳܐ ܕܡܳܪܰܢ܂ ܘܰܒܦܼܳܬܼܽܘܪܳܐ ܕܫܺܐܕܼܶܐ̈܂
10:22 [ai]	ܐܰܘ ܕܰܠܡܳܐ ܡܰܛܳܢܽܘ ܡܰܛܢܺܝܢܰܢ ܠܡܳܪܰܢ܃ ܕܰܠܡܳܐ ܚܰܣܺܝܢܺܝܢܰܢ ܡܶܢܶܗ܀
10:23 [ai]	ܟܽܠ ܡܶܕܶܡ ܫܰܠܺܝܛ ܠܺܝ܃ ܐܶܠܳܐ ܠܳܐ ܟܽܠ ܡܶܕܶܡ ܦܰܩܳܚ܂ ܟܽܠ ܡܶܕܶܡ ܫܰܠܺܝܛ ܠܺܝ܃ ܐܶܠܳܐ ܠܳܐ ܟܽܠ ܡܶܕܶܡ ܡܒܼܰܢܶܐ܂
10:24 [ai]	ܠܳܐ ܐ̱ܢܳܫ ܕܢܰܦܼܫܶܗ ܢܶܗܘܶܐ ܒܿܳܥܶܐ܃ ܐܶܠܳܐ ܟܽܠܢܳܫ ܐܳܦܼ ܕܚܰܒܼܪܶܗ܂
10:25 [ai]	ܟܽܠܡܶܕܶܡ ܕܿܡܶܙܕܿܰܒܰܢ ܒܡܰܩܶܠܳܘܢ ܗܘܰܝܬܿܽܘܢ ܐܳܟܼܠܺܝܢ܃ ܕܠܳܐ ܥܽܘܩܳܒܼܳܐ ܡܶܛܽܠ ܬܿܺܐܪܬܳܐ܂
10:26 [ai]	ܕܡܳܪܝܳܐ ܗ̱ܝ ܓܶܝܪ ܐܰܪܥܳܐ ܒܰܡܠܳܐܳܗ܂
10:27 [ai]	ܐܶܢ ܐ̱ܢܳܫ ܕܶܝܢ ܡܶܢ ܚܰܢܦܼܶܐ̈܂ ܩܳܪܶܐ ܠܟܼܽܘܢ܃ ܘܨܳܒܼܶܝܢ ܐܢ̱ܬܿܽܘܢ ܠܡܺܐܙܰܠ܃ ܟܽܠܡܶܕܶܡ ܕܡܶܬܣܺܝܡ ܩܕܼܳܡܰܝܟܿܽܘܢ ܐܰܟܼܽܘܠܘ܃ ܕܠܳܐ ܥܽܘܩܳܒܼܳܐ ܡܶܛܽܠ ܬܿܺܐܪܬܳܐ܂
10:28 [ai]	ܐܶܢ ܐ̱ܢܳܫ ܕܶܝܢ ܢܺܐܡܰܪ ܠܟܼܽܘܢ܂ ܕܗܳܢܳܐ ܕܰܕܼܒܼܺܝܚܳܐ ܗܽܘ܃ ܠܳܐ ܬܶܐܟܼܠܽܘܢ܂ ܡܶܛܽܠ ܗܰܘ ܕܳܐܡܰܪ ܠܟܼܽܘܢ܂ ܘܡܶܛܽܠ ܬܿܺܐܪܬܳܐ܂
10:29 [ai]	ܬܿܺܐܪܬܳܐ ܕܶܝܢ ܐܳܡܰܪ ܐ̱ܢܳܐ܂ ܠܳܐ ܗ̱ܘܳܐ ܕܺܝܠܟܼܽܘܢ܃ ܐܶܠܳܐ ܕܗܰܘ ܕܳܐܡܰܪ܂ ܠܡܳܢܳܐ ܓܶܝܪ ܚܺܐܪܽܘܬܼܝ ܡܶܬܿܕܼܺܝܢܳܐ ܡܶܢ ܬܿܺܐܪܬܳܐ ܕܰܐ̱ܚܪ̈ܳܢܶܐ܂
10:30 [ai]	ܐܶܢ ܐܶܢܳܐ ܒܛܰܝܒܿܽܘܬܼܳܐ ܡܶܬܼܚܰܫܰܚ ܐ̱ܢܳܐ܃ ܡܳܢܳܐ ܡܶܬܼܓܿܰܕܿܰܦܼ ܐ̱ܢܳܐ ܥܰܠ ܡܶܕܶܡ ܕܶܐܢܳܐ ܡܰܘܕܶܐܢܳܐ܂
10:31 [ai]	ܐܶܢ ܐܳܟܼܠܺܝܢ ܐܢ̱ܬܿܽܘܢ ܗܳܟܼܺܝܠ܂ ܘܶܐܢ ܫܳܬܼܶܝܢ ܐܢ̱ܬܿܽܘܢ܃ ܘܶܐܢ ܡܶܕܶܡ ܥܳܒܼܕܺܝܢ ܐܢ̱ܬܿܽܘܢ܃ ܟܽܠܡܶܕܶܡ ܠܬܼܶܫܒܿܽܘܚܬܳܐ ܕܰܐܠܳܗܳܐ ܗܘܰܝܬܿܽܘܢ ܥܳܒܼܕܺܝܢ܂
10:32 [ai]	ܕܠܳܐ ܬܽܘܩܠܳܐ ܗܘܰܘ ܠܺܝܗܽܘܕܼܳܝܶܐ̈ ܘܠܰܐܪ̈ܡܳܝܶܐ ܘܰܠܥܺܕ̱ܿܬܿܶܗ ܕܰܐܠܳܗܳܐ܂
10:33 [ai]	ܐܰܝܟܼ ܕܳܐܦܼ ܐܶܢܳܐ ܒܟܽܠ ܡܶܕܶܡ ܠܟܼܽܠܢܳܫ ܫܳܦܼܰܪ ܐ̱ܢܳܐ܃ ܘܠܳܐ ܒܿܳܥܶܐ ܐ̱ܢܳܐ ܡܶܕܶܡ ܕܠܺܝ ܦܰܩܳܚ܃ ܐܶܠܳܐ ܡܶܕܶܡ ܕܰܠܣܰܓܿܺܝܶܐܐ̈ ܦܰܩܳܚ܂ ܕܢܺܚܽܘܢ܂

next chapter