The Comprehensive Aramaic Lexicon

12:01 [ai]	ܥܰܠ ܪ̈ܽܘܚܳܢܝܳܬܼܳܐ ܕܶܝܢ ܐܰܚܰܝ̈܃ ܨܳܒܼܶܐ ܐ̱ܢܳܐ ܕܬܶܕܿܥܽܘܢ܂
12:02 [ai]	ܕܚܰܢܦܼܶܐ̈ ܗ̱ܘܰܝܬܿܽܘܢ܃ ܘܠܰܦܼܬܼܰܟܼܪ̈ܶܐ ܐܰܝܠܶܝܢ ܕܠܰܝܬܿ ܠܗܽܘܢ ܩܳܠܳܐ܂ ܕܠܳܐ ܦܽܘܪܫܳܢ ܡܶܬܿܕܿܰܒܼܪܺܝܢ ܗ̱ܘܰܝܬܿܽܘܢ܂
12:03 [ai]	ܡܶܛܽܠ ܗܳܢܳܐ ܡܰܘܕܿܰܥ ܐ̱ܢܳܐ ܠܟܼܽܘܢ܃ ܕܠܰܝܬܿ ܐ̱ܢܳܫ ܕܰܒܼܪܽܘܚܳܐ ܕܰܐܠܳܗܳܐ ܡܡܰܠܶܠ܃ ܘܳܐܡܰܪ ܕܰܚܪܶܡ ܗ̱ܽܘ ܝܶܫܽܘܥ܂ ܘܳܐܦܼܠܳܐ ܐ̱ܢܳܫ ܡܶܫܟܿܰܚ ܠܡܺܐܡܰܪ ܕܡܳܪܝܳܐ ܗܽܘ ܝܶܫܽܘܥ܃ ܐܶܠܳܐ ܐܶܢ ܒܪܽܘܚܳܐ ܕܩܽܘܕܼܫܳܐ܂
12:04 [ai]	ܦܽܘܠܳܓܼܶܐ̈ ܕܶܝܢ ܕܡܰܘܗܒܼܳܬܼܳܐ̈ ܐܺܝܬܼܰܝܗܽܘܢ܂ ܐܶܠܳܐ ܚܕܼܳܐ ܗ̱ܝ ܪܽܘܚܳܐ܂
12:05 [ai]	ܘܦܼܽܘܠܳܓܼܶܐ̈ ܕܬܶܫܡܫܳܬܼܳܐ̈ ܐܺܝܬܼܰܝܗܽܘܢ܂ ܐܶܠܳܐ ܚܰܕܼ ܗ̱ܽܘ ܡܳܪܝܳܐ܂
12:06 [ai]	ܘܦܼܽܘܠܳܓܼܶܐ̈ ܕܚܰܝܠܰܘܳܬܼܳܐ̈ ܐܺܝܬܼ܂ ܐܶܠܳܐ ܚܰܕܼ ܗ̱ܽܘ ܐܰܠܳܗܳܐ܂ ܕܡܰܥܒܿܶܕܼ ܟܽܠ ܒܟܽܠܢܳܫ܂
12:07 [ai]	ܠܐ̱ܢܳܫ ܐ̱ܢܳܫ ܕܶܝܢ܃ ܡܶܬܼܺܝܗܶܒܼ ܠܶܗ ܓܶܠܝܳܢܳܐ ܕܪܽܘܚܳܐ܂ ܐܰܝܟܼ ܕܥܳܕܼܪܳܐ ܠܶܗ܂
12:08 [ai]	ܐܺܝܬܼ ܕܺܝܗܺܝܒܼܳܐ ܠܶܗ ܒܪܽܘܚܳܐ ܡܶܠܬܼܳܐ ܕܚܶܟܼܡܬܼܳܐ܂ ܠܰܐ̱ܚܪܺܢܳܐ ܕܶܝܢ ܡܶܠܬܼܳܐ ܕܺܝܕܼܰܥܬܼܳܐ܂ ܒܿܳܗ ܒܪܽܘܚܳܐ܂
12:09 [ai]	ܠܰܐ̱ܚܪܺܢܳܐ ܗܰܝܡܳܢܽܘܬܼܳܐ܂ ܒܿܳܗ ܒܪܽܘܚܳܐ܂ ܠܰܐ̱ܚܪܺܢܳܐ ܡܰܘܗܒܼܳܬܼܳܐ̈ ܕܳܐܣܝܽܘܬܼܳܐ܂ ܒܿܳܗ ܒܪܽܘܚܳܐ܂
12:10 [ai]	ܠܰܐ̱ܚܪܺܢܳܐ ܕܶܝܢ ܚܰܝܠܶܐ̈܂ ܠܰܐ̱ܚܪܺܢܳܐ ܕܶܝܢ ܢܒܼܺܝܽܘܬܼܳܐ܂ ܠܰܐ̱ܚܪܺܢܳܐ ܕܶܝܢ ܦܳܪܽܘܫܽܘܬܼܳܐ ܕܿܪ̈ܽܘܚܶܐ܂ ܠܰܐ̱ܚܪܺܢܳܐ ܕܶܝܢ ܙܢܰܝܳܐ̈ ܕܠܶܫܳܢܶܐ̈܂ ܠܰܐ̱ܚܪܺܢܳܐ ܕܶܝܢ ܦܽܘܫܳܩܳܐ ܕܠܶܫܳܢܶܐ̈܂
12:11 [ai]	ܟܽܠܗܶܝܢ ܕܶܝܢ ܗܳܠܶܝܢ ܚܕܼܳܐ ܗ̱ܝ ܪܽܘܚܳܐ ܣܳܥܪܳܐ܂ ܘܰܡܦܼܰܠܓܼܳܐ ܠܟܼܽܠܢܳܫ ܐܰܝܟܼ ܕܗܺܝ ܨܳܒܼܝܳܐ܂
12:12 [ai]	ܐܰܟܼܙܢܳܐ ܓܶܝܪ ܕܦܰܓܼܪܳܐ ܚܰܕܼ ܗ̱ܽܘ܃ ܘܺܐܝܬܼ ܒܶܗ ܗܰܕܳܡܶܐ̈ ܣܰܓܿܺܝܶܐܐ̈܂ ܟܽܠܗܽܘܢ ܕܶܝܢ ܗܰܕܳܡܶܐ̈ ܕܦܰܓܼܪܳܐ܂ ܟܰܕܼ ܣܰܓܿܺܝܶܐܐ̈܂ ܐܺܝܬܼܰܝܗܽܘܢ ܚܰܕܼ ܐܶܢܽܘܢ ܦܓܼܰܪ܃ ܗܳܟܼܰܢܳܐ ܐܳܦܼ ܡܫܺܝܚܳܐ܂
12:13 [ai]	ܐܳܦܼ ܚܢܰܢ ܓܶܝܪ ܟܽܠܰܢ܃ ܒܰܚܕܼܳܐ ܪܽܘܚ ܠܚܰܕܼ ܦܓܼܰܪ ܥܡܰܕܼܢ܃ ܐܶܢ ܺܝܗܽܘܕܼܳܝܶܐ̈܂ ܘܶܐܢ ܐܰܪ̈ܡܳܝܶܐ܃ ܘܶܐܢ ܥܰܒܼܕܿܶܐ̈܂ ܘܶܐܢ ܒܢܰܝ ܚܺܐܪ̈ܶܐ܂ ܘܟܼܽܠܰܢ ܚܕܼܳܐ ܪܽܘܚܳܐ ܐܶܫܬܿܺܝܢ܂
12:14 [ai]	ܐܳܦܼ ܦܰܓܼܪܳܐ ܓܶܝܪ ܠܳܐ ܗ̱ܘܳܐ ܚܰܕܼ ܗܰܕܿܳܡ܂ ܐܶܠܳܐ ܣܰܓܿܺܝܶܐܐ̈܂
12:15 [ai]	ܐܶܢ ܬܺܐܡܰܪ ܓܶܝܪ ܪܶܓܼܠܳܐ܃ ܕܡܶܛܽܠ ܕܠܳܐ ܗܘܺܝܬܼ ܐܺܝܕܼܳܐ܂ ܠܳܐ ܗܘܺܝܬܼ ܡܶܢܶܗ ܡܶܢ ܦܰܓܼܪܳܐ܃ ܠܰܘ ܡܶܛܽܠ ܗܳܕܼܶܐ ܠܰܝܬܿܶܝܗ ܡܶܢܶܗ ܡܶܢ ܦܰܓܼܪܳܐ܃
12:16 [ai]	ܘܶܐܢ ܬܺܐܡܰܪ ܐܶܕܼܢܳܐ܃ ܥܰܠ ܕܠܳܐ ܗܘܺܝܬܼ ܥܰܝܢܳܐ܂ ܠܳܐ ܗܘܺܝܬܼ ܡܶܢܶܗ ܡܶܢ ܦܰܓܼܪܳܐ܃ ܠܰܘ ܡܶܛܽܠ ܗܳܕܼܶܐ ܠܰܝܬܿܶܝܗ ܡܶܢܶܗ ܡܶܢ ܦܰܓܼܪܳܐ܃
12:17 [ai]	ܐܶܠܽܘ ܓܶܝܪ ܟܽܠܶܗ ܦܰܓܼܪܳܐ ܥܰܝܢܶܐ̈ ܗ̱ܘܳܐ܃ ܐܰܝܟܿܳܐ ܗ̱ܘܳܬܼ ܡܰܫܡܰܥܬܼܳܐ܂ ܘܶܐܠܽܘ ܟܽܠܶܗ ܡܰܫܡܰܥܬܼܳܐ ܗ̱ܘܳܐ܃ ܐܰܝܟܿܰܢܳܐ ܡܪܺܝܚ ܗ̱ܘܳܐ܂
12:18 [ai]	ܗܳܫܳܐ ܕܶܝܢ ܐܰܠܳܗܳܐ ܣܳܡ ܟܽܠ ܚܰܕܼ ܚܰܕܼ ܡܶܢ ܗܰܕܳܡܶܐ̈ ܒܦܰܓܼܪܳܐ܃ ܐܰܝܟܿܰܢܳܐ ܕܗܽܘ ܨܒܼܳܐ܂
12:19 [ai]	ܐܶܠܽܘ ܕܶܝܢ ܟܽܠܗܽܘܢ ܚܰܕܼ ܗ̱ܘܰܘ ܗܰܕܿܳܡܳܐ܃ ܐܰܝܟܿܳܐ ܗ̱ܘܳܐ ܦܰܓܼܪܳܐ܂
12:20 [ai]	ܗܳܫܳܐ ܕܶܝܢ ܗܰܕܳܡܶܐ̈ ܐܺܝܬܼܰܝܗܽܘܢ ܣܰܓܿܺܝܶܐܐ̈܃ ܚܰܕܼ ܗ̱ܽܘ ܕܶܝܢ ܦܰܓܼܪܳܐ܂
12:21 [ai]	ܠܳܐ ܡܶܫܟܿܚܳܐ ܥܰܝܢܳܐ ܕܬܺܐܡܰܪ ܠܺܐܝܕܼܳܐ܂ ܕܠܳܐ ܡܶܬܼܒܿܰܥܝܳܐ ܐܰܢ̱ܬܿܝ ܠܺܝ܂ ܐܳܦܼܠܳܐ ܪܺܫܳܐ ܡܶܫܟܿܰܚ ܕܢܺܐܡܰܪ ܠܪ̈ܶܓܼܠܶܐ܂ ܕܠܳܐ ܡܶܬܼܒܿܰܥܝܳܢ̈ ܐܢ̱ܬܿܶܝܢ ܠܺܝ܂
12:22 [ai]	ܐܶܠܳܐ ܝܰܬܿܺܝܪܳܐܺܝܬܼ ܐܰܝܠܶܝܢ ܗܰܕܳܡܶܐ̈ ܕܡܶܣܬܿܰܒܼܪܺܝܢ ܕܰܡܚܺܝܠܺܝܢ܃ ܥܠܰܝܗܽܘܢ ܗ̱ܽܘ ܣܽܘܢܩܳܢܳܐ܂
12:23 [ai]	ܘܰܐܝܠܶܝܢ ܕܣܳܒܼܪܺܝܢܰܢ ܕܰܡܨܰܥܪܺܝܢ ܐܶܢܽܘܢ ܒܦܰܓܼܪܳܐ܃ ܠܗܳܠܶܝܢ ܐܺܝܩܳܪܳܐ ܝܰܬܿܺܝܪܳܐ ܡܰܣܓܿܶܝܢܰܢ܂ ܘܰܐܝܠܶܝܢ ܕܰܕܼܢܽܘܟܿܳܦܼܳܐ ܐܶܢܽܘܢ܃ ܐܶܣܟܿܺܡܳܐ ܝܰܬܿܺܝܪܳܐ ܥܳܒܼܕܺܝܢܰܢ ܠܗܽܘܢ܂
12:24 [ai]	ܐܰܝܠܶܝܢ ܕܶܝܢ ܗܰܕܳܡܶܐ̈ ܕܺܐܝܬܼ ܒܰܢ ܕܰܡܝܰܩܪܺܝܢ܃ ܠܳܐ ܡܶܬܼܒܿܥܶܐ ܠܗܽܘܢ ܐܺܝܩܳܪܳܐ܂ ܐܰܠܳܗܳܐ ܓܶܝܪ ܡܰܙܓܼܶܗ ܠܦܼܰܓܼܪܳܐ܂ ܘܝܰܗ̱ܒܼ ܐܺܝܩܳܪܳܐ ܝܰܬܿܺܝܪܳܐ ܠܗܰܕܿܳܡܳܐ ܐܰܝܢܳܐ ܕܰܙܥܽܘܪ܃
12:25 [ai]	ܕܠܳܐ ܬܶܗܘܶܐ ܦܳܠܓܿܽܘܬܼܳܐ ܒܦܰܓܼܪܳܐ܃ ܐܶܠܳܐ ܟܽܠܗܽܘܢ ܗܰܕܳܡܶܐ̈ ܫܰܘܝܳܐܺܝܬܼ܂ ܚܰܕܼ ܥܰܠ ܚܰܕܼ ܢܶܗܘܽܘܢ ܝܳܨܦܿܺܝܢ܂
12:26 [ai]	ܕܶܐܡܰܬܼܝ ܕܚܰܕܼ ܗܰܕܿܳܡ ܢܶܗܘܶܐ ܟܳܐܶܒܼ܃ ܟܽܠܗܽܘܢ ܢܶܗܘܽܘܢ ܚܳܫܺܝܢ܂ ܘܶܐܢ ܡܶܫܬܿܰܒܿܰܚ ܚܰܕܼ ܗܰܕܿܳܡ܃ ܟܽܠܗܽܘܢ ܗܰܕܳܡܶܐ̈ ܢܶܗܘܽܘܢ ܡܶܫܬܿܰܒܿܚܺܝܢ܂
12:27 [ai]	ܐܰܢ̱ܬܿܽܘܢ ܕܶܝܢ ܦܰܓܼܪܶܗ ܐܰܢ̱ܬܿܽܘܢ ܕܰܡܫܺܝܚܳܐ܂ ܘܗܰܕܳܡܶܐ̈ ܒܕܽܘܟܿܰܬܼܟܼܽܘܢ ܿ܀ܿ܀ܿ
12:28 [ai]	ܣܳܡ ܓܶܝܪ ܐܰܠܳܗܳܐ ܒܥܺܕ̱ܿܬܿܶܗ܃ ܠܽܘܩܕܼܰܡ ܫܠܺܝܚܶܐ̈܂ ܒܳܬܼܰܪܗܽܘܢ ܢܒܼܺܝܶܐ̈܂ ܒܳܬܼܰܪܗܽܘܢ ܡܰܠܦܼܳܢܶܐ̈܂ ܒܳܬܼܰܪܗܽܘܢ ܥܳܒܼܕܿܰܝ̈ ܚܰܝܠܶܐ̈܂ ܒܳܬܼܰܪܗܽܘܢ ܡܰܘܗܒܼܳܬܼܳܐ̈ ܕܳܐܣܝܽܘܬܼܳܐ܂ ܘܰܡܥܰܕܿܪ̈ܳܢܶܐ ܘܰܡܕܼܰܒܿܪ̈ܳܢܶܐ܂ ܘܰܙܢܰܝܳܐ̈ ܕܠܶܫܳܢܶܐ̈܂
12:29 [ai]	ܕܰܠܡܳܐ ܟܽܠܗܽܘܢ ܫܠܺܝܚܶܐ̈܃ ܕܰܠܡܳܐ ܟܽܠܗܽܘܢ ܢܒܼܺܝܶܐ̈܃ ܠܡܳܐ ܟܽܠܗܽܘܢ ܡܰܠܦܼܳܢܶܐ̈܃ ܠܡܳܐ ܟܽܠܗܽܘܢ ܣܳܥܪ̈ܰܝ ܚܰܝܠܶܐ̈܃
12:30 [ai]	ܠܡܳܐ ܠܟܼܽܠܗܽܘܢ ܐܺܝܬܼ ܠܗܽܘܢ ܡܰܘܗܒܼܳܬܼܳܐ̈ ܕܳܐܣܝܽܘܬܼܳܐ܃ ܠܡܳܐ ܟܽܠܗܽܘܢ ܒܠܶܫܳܢܶܐ̈ ܡܡܰܠܠܺܝܢ܃ ܐܰܘ ܕܰܠܡܳܐ ܟܽܠܗܽܘܢ ܡܦܼܰܫܩܺܝܢ܃
12:31 [ai]	ܐܶܢ ܕܶܝܢ ܛܳܢܺܝܢ ܐܢ̱ܬܿܽܘܢ ܒܡܰܘܗܒܼܳܬܼܳܐ̈ ܪ̈ܰܘܪܒܼܳܬܼܳܐ܃ ܐܶܢܳܐ ܬܽܘܒܼ ܐܶܚܰܘܶܝܟܼܽܘܢ ܐܽܘܪܚܳܐ ܕܰܡܝܰܬܿܪܳܐ܂

next chapter