The Comprehensive Aramaic Lexicon

13:01 [ai]	ܐܶܢ ܒܟܽܠ ܠܶܫܳܢ ܕܿܰܒܼܢܰܝܢܳܫܳܐ ܐܶܡܰܠܶܠ ܘܒܼܰܕܼܡܰܠܰܐܟܼܶܐ̈܃ ܘܚܽܘܒܿܳܐ ܠܳܐ ܢܶܗܘܶܐ ܒܺܝ܃ ܗܘܺܝܬܼ ܠܺܝ ܢܚܳܫܳܐ ܕܙܳܐܶܡ܃ ܐܰܘ ܨܺܨܠܳܐ ܕܝܳܗܶܒܼ ܩܳܠܳܐ܂
13:02 [ai]	ܘܶܐܢ ܬܶܗܘܶܐ ܒܺܝ ܢܒܼܺܝܽܘܬܼܳܐ܃ ܘܶܐܕܿܰܥ ܐ̱ܪ̈ܳܙܶܐ ܟܽܠܗܽܘܢ ܘܟܼܽܠܳܗ ܺܝܕܼܰܥܬܼܳܐ܃ ܘܶܐܢ ܬܶܗܘܶܐ ܒܺܝ ܟܽܠܳܗ ܗܰܝܡܳܢܽܘܬܼܳܐ܂ ܐܰܝܟܿܰܢܳܐ ܕܛܽܘܪܳܐ ܐܶܫܰܢܶܐ܃ ܘܚܽܘܒܿܳܐ ܠܰܝܬܿ ܒܺܝ܃ ܠܳܐ ܗ̱ܘܺܝܬܼ ܡܶܕܶܡ܂
13:03 [ai]	ܘܶܐܢ ܐܰܘܟܿܶܠ ܟܽܠ ܕܺܐܝܬܼ ܠܺܝ ܠܡܶܣܟܿܺܢܶܐ̈܃ ܘܶܐܢ ܐܰܫܠܶܡ ܦܰܓܼܪܝ ܕܢܺܐܩܰܕܼ܃ ܘܚܽܘܒܿܳܐ ܠܳܐ ܢܶܗܘܶܐ ܒܺܝ܃ ܡܶܕܶܡ ܠܳܐ ܝܳܬܼܰܪ ܐ̱ܢܳܐ܂
13:04 [ai]	ܚܽܘܒܿܳܐ ܢܰܓܿܺܝܪܳܐ ܗ̱ܝ ܪܽܘܚܶܗ܂ ܘܒܼܰܣܺܝܡ܂ ܚܽܘܒܿܳܐ ܠܳܐ ܚܳܣܶܡ܂ ܚܽܘܒܿܳܐ ܠܳܐ ܡܶܫܬܿܓܼܶܫ܂ ܘܠܳܐ ܡܶܬܼܚܬܼܰܪ܂
13:05 [ai]	ܘܠܳܐ ܣܳܥܰܪ ܕܒܶܗܬܿܬܼܳܐ܂ ܘܠܳܐ ܒܿܳܥܶܐ ܕܺܝܠܶܗ܂ ܘܠܳܐ ܡܶܬܿܬܿܦܼܺܝܪ܂ ܘܠܳܐ ܡܶܬܼܪܰܥܶܐ ܕܒܺܝܫ܂
13:06 [ai]	ܠܳܐ ܚܳܕܼܶܐ ܒܥܰܘܠܳܐ܃ ܐܶܠܳܐ ܚܳܕܼܶܐ ܒܩܽܘܫܬܳܐ܂
13:07 [ai]	ܟܽܠ ܡܶܕܶܡ ܡܣܰܝܒܰܪ܂ ܟܽܠܡܶܕܶܡ ܡܗܰܝܡܶܢ܂ ܟܽܠ ܡܣܰܒܰܪ܂ ܟܽܠ ܣܳܒܼܶܠ܂
13:08 [ai]	ܚܽܘܒܿܳܐ ܡܶܡܬܼܽܘܡ ܠܳܐ ܢܳܦܼܶܠ܂ ܢܒܼܺܝܰܘܳܬܼܳܐ̈ ܓܶܝܪ ܢܶܬܼܒܿܰܛܠܳܢ̈܂ ܘܠܶܫܳܢܶܐ̈ ܢܶܫܬܿܰܬܿܩܽܘܢ܂ ܘܺܝܕܼܰܥܬܼܳܐ ܬܶܬܼܒܿܰܛܰܠ܂
13:09 [ai]	ܩܰܠܺܝܠ ܗ̱ܽܘ ܓܶܝܪ ܡܶܢ ܣܰܓܿܺܝ ܝܳܕܼܥܺܝܢܰܢ܂ ܘܩܰܠܺܝܠ ܡܶܢ ܣܰܓܿܺܝ ܡܶܬܼܢܰܒܿܶܝܢܰܢ܂
13:10 [ai]	ܐܶܡܰܬܼܝ ܕܶܝܢ ܕܬܺܐܬܼܶܐ ܓܡܺܝܪܽܘܬܼܳܐ܃ ܗܳܝܕܶܝܢ ܢܶܬܼܒܿܰܛܰܠ ܗܰܘ ܡܶܕܶܡ ܕܩܰܠܺܝܠ ܗ̱ܘܳܐ܀
13:11 [ai]	ܟܰܕܼ ܝܰܠܽܘܕܼܳܐ ܗ̱ܘܺܝܬܼ܃ ܐܰܝܟܼ ܝܰܠܽܘܕܼܳܐ ܡܡܰܠܶܠ ܗ̱ܘܺܝܬܼ܂ ܘܰܐܝܟܼ ܝܰܠܽܘܕܼܳܐ ܡܶܬܼܪܰܥܶܐ ܗ̱ܘܺܝܬܼ܂ ܘܰܐܝܟܼ ܝܰܠܽܘܕܼܳܐ ܡܶܬܼܚܰܫܰܒܼ ܗ̱ܘܺܝܬܼ܂ ܟܰܕܼ ܗܘܺܝܬܼ ܕܶܝܢ ܓܰܒܼܪܳܐ܃ ܒܰܛܠܶܬܼ ܗܳܠܶܝܢ ܕܛܰܠܝܽܘܬܼܳܐ܂
13:12 [ai]	ܗܳܫܳܐ ܐܰܝܟܼ ܕܰܒܼܡܰܚܙܺܝܬܼܳܐ ܚܳܙܶܝܢܰܢ܂ ܒܦܶܠܶܐܬܼܳܐ܃ ܗܳܝܕܶܝܢ ܕܶܝܢ ܐܰܦܿܺܝܢ̈ ܠܽܘܩܒܼܰܠ ܐܰܦܿܺܝܢ̈܂ ܗܳܫܳܐ ܝܳܕܼܰܥ ܐ̱ܢܳܐ ܩܰܠܺܝܠ ܡܶܢ ܣܰܓܿܺܝ܃ ܗܳܝܕܶܝܢ ܕܶܝܢ ܐܶܕܿܰܥ ܐܰܝܟܼ ܡܳܐ ܕܶܐܬܼܝܰܕܼܥܶܬܼ܂
13:13 [ai]	ܗܳܠܶܝܢ ܐܶܢܶܝܢ̈ ܓܶܝܪ ܬܠܳܬܼ ܕܰܡܟܼܰܬܿܪ̈ܳܢ܃ ܗܰܝܡܳܢܽܘܬܼܳܐ܂ ܘܣܰܒܼܪܳܐ܂ ܘܚܽܘܒܿܳܐ܂ ܕܪܰܒܿ ܕܶܝܢ ܡܶܢܗܶܝܢ ܚܽܘܒܿܳܐ܂

next chapter