The Comprehensive Aramaic Lexicon

14:01 [ai]	ܗܰܪ̱ܛܘ ܒܳܬܼܰܪ ܚܽܘܒܿܳܐ܂ ܘܛܰܢܘ ܒܡܰܘܗܒܼܳܬܼܳܐ̈ ܕܪܽܘܚܳܐ܂ ܝܰܬܿܺܝܪܳܐܺܝܬܼ ܕܶܝܢ ܕܬܶܬܼܢܰܒܿܽܘܢ܂
14:02 [ai]	ܡܰܢ ܕܰܡܡܰܠܶܠ ܓܶܝܪ ܒܠܶܫܳܢܳܐ܃ ܠܳܐ ܗ̱ܘܳܐ ܠܰܒܼܢܰܝܢܳܫܳܐ ܡܡܰܠܶܠ܂ ܐܶܠܳܐ ܠܰܐܠܳܗܳܐ܂ ܠܳܐ ܓܶܝܪ ܐ̱ܢܳܫ ܫܳܡܰܥ ܡܶܕܶܡ ܕܰܡܡܰܠܶܠ܃ ܐܶܠܳܐ ܒܪܽܘܚ ܐ̱ܪܳܙܳܐ ܡܡܰܠܶܠ܂
14:03 [ai]	ܐܰܝܢܳܐ ܕܶܝܢ ܕܡܶܬܼܢܰܒܿܶܐ܃ ܠܰܒܼܢܰܝܢܳܫܳܐ ܡܡܰܠܶܠ ܒܶܢܝܳܢܳܐ܂ ܘܠܽܘܒܿܳܒܼܳܐ܂ ܘܒܼܽܘܝܳܐܳܐ܂
14:04 [ai]	ܕܰܡܡܰܠܶܠ ܒܠܶܫܳܢܳܐ܂ ܢܰܦܼܫܶܗ ܗܽܘ ܒܳܢܶܐ܂ ܘܰܕܼܡܶܬܼܢܰܒܿܶܐ܂ ܥܺܕ̱ܿܬܳܐ ܒܳܢܶܐ܂
14:05 [ai]	ܨܳܒܼܶܐ ܐ̱ܢܳܐ ܕܶܝܢ܂ ܕܟܽܠܟܼܽܘܢ ܬܡܰܠܠܽܘܢ ܒܠܶܫܳܢܶܐ̈܃ ܝܰܬܿܺܝܪܳܐܺܝܬܼ ܕܶܝܢ ܕܬܶܬܼܢܰܒܿܽܘܢ܂ ܪܰܒܼ ܗ̱ܽܘ ܓܶܝܪ ܐܰܝܢܳܐ ܕܡܶܬܼܢܰܒܿܶܐ܃ ܡܶܢ ܗܰܘ ܕܰܡܡܰܠܶܠ ܒܠܶܫܳܢܳܐ܃ ܐܶܢ ܠܳܐ ܡܦܼܰܫܶܩ܂ ܐܶܢ ܕܶܝܢ ܡܦܼܰܫܶܩ܃ ܥܺܕ̱ܿܬܳܐ ܒܳܢܶܐ܀
14:06 [ai]	ܘܗܳܫܳܐ ܐܰܚܰܝ̈܃ ܐܶܢ ܐܺܬܼܶܐ ܠܘܳܬܼܟܼܽܘܢ܂ ܘܶܐܡܰܠܶܠ ܥܰܡܟܼܽܘܢ ܒܠܶܫܳܢܶܐ̈܃ ܡܳܢܳܐ ܡܰܘܬܿܰܪ ܐ̱ܢܳܐ ܠܟܼܽܘܢ܃ ܐܶܠܳܐ ܐܶܢ ܐܶܡܰܠܶܠ ܥܰܡܟܼܽܘܢ܂ ܐܰܘ ܒܓܶܠܝܳܢܳܐ܂ ܐܰܘ ܒܺܝܕܼܰܥܬܼܳܐ܂ ܐܰܘ ܒܰܢܒܼܺܝܽܘܬܼܳܐ܂ ܐܰܘ ܒܝܽܘܠܦܿܳܢܳܐ܂
14:07 [ai]	ܐܳܦܼ ܨܶܒܼܘܳܬܼܳܐ̈ ܓܶܝܪ ܐܰܝܠܶܝܢ ܕܠܰܝܬܿ ܒܗܶܝܢ ܢܰܦܼܫܳܐ܂ ܘܝܳܗܒܿܳܢ̈ ܩܳܠܳܐ܃ ܐܶܢ ܐܰܒܿܽܘܒܼܳܐ܂ ܘܶܐܢ ܩܺܝܬܼܳܪܳܐ܃ ܐܶܢ ܦܽܘܪܫܳܢܳܐ ܠܳܐ ܥܳܒܼܕܳܢ̈ ܒܶܝܬܼ ܩܺܝܢܬܳܐ ܠܰܚܒܼܰܪܬܼܳܗ܃ ܐܰܝܟܿܰܢܳܐ ܡܶܬܼܺܝܕܼܰܥ܂ ܡܶܕܶܡ ܕܡܶܙܕܿܡܰܪ܂ ܐܰܘ ܡܶܕܶܡ ܕܡܶܬܼܢܩܶܫ܂
14:08 [ai]	ܘܶܐܢ ܩܰܪܢܳܐ ܬܶܩܪܶܐ ܩܳܠܳܐ ܕܠܳܐ ܦܪܺܝܫ܃ ܡܰܢܽܘ ܢܶܬܿܛܰܝܰܒܼ ܠܰܩܪܳܒܼܳܐ܂
14:09 [ai]	ܗܳܟܼܰܢܳܐ ܐܳܦܼ ܐܰܢ̱ܬܿܽܘܢ܃ ܐܶܢ ܬܺܐܡܪܽܘܢ ܡܶܠܬܼܳܐ ܒܠܶܫܳܢܳܐ܂ ܘܠܳܐ ܬܶܗܘܶܐ ܡܦܼܰܫܩܳܐ܃ ܐܰܝܟܿܰܢܳܐ ܡܶܬܼܺܝܕܼܰܥ ܡܶܕܶܡ ܕܳܐܡܪܺܝܢ ܐܢ̱ܬܿܽܘܢ܂ ܗܳܘܶܝܬܿܽܘܢ ܠܟܼܽܘܢ܂ ܐܰܝܟܼ ܗܰܘ ܕܥܰܡ ܐܳܐܰܪ ܡܡܰܠܠܺܝܢ ܐܢ̱ܬܿܽܘܢ܂
14:10 [ai]	ܗܳܐ ܓܶܝܪ ܓܶܢܣܶܐ̈ ܕܠܶܫܳܢܶܐ̈ ܣܰܓܿܺܝܶܐܐ̈ ܐܺܝܬܼ ܒܥܳܠܡܳܐ܂ ܘܠܰܝܬܿ ܚܰܕܼ ܡܶܢܗܽܘܢ ܕܠܳܐ ܩܳܠܳܐ܂
14:11 [ai]	ܘܶܐܢ ܠܳܐ ܝܳܕܼܰܥ ܐ̱ܢܳܐ ܚܰܝܠܶܗ ܕܩܳܠܳܐ܃ ܗܳܘܶܐ ܐ̱ܢܳܐ ܠܺܝ ܒܰܪܒܿܪܳܝܳܐ ܠܗܰܘ ܕܰܡܡܰܠܶܠ܃ ܘܳܐܦܼ ܗܰܘ ܕܰܡܡܰܠܶܠ ܗܳܘܶܐ ܠܶܗ ܠܺܝ ܒܰܪܒܿܪܳܝܳܐ܂
14:12 [ai]	ܗܳܟܼܰܢܳܐ ܐܳܦܼ ܐܰܢ̱ܬܿܽܘܢ܃ ܡܶܛܽܠ ܕܛܰܢܳܢܶܐ̈ ܐܰܢ̱ܬܿܽܘܢ ܕܡܰܘܗܒܼܳܬܼܳܐ̈ ܕܪܽܘܚܳܐ܂ ܠܒܼܶܢܝܳܢܳܐ ܕܥܺܕ̱ܿܬܳܐ܃ ܒܥܰܘ ܕܬܶܬܼܝܰܬܿܪܽܘܢ܂
14:13 [ai]	ܘܗܰܘ ܕܰܡܡܰܠܶܠ ܒܠܶܫܳܢܳܐ܃ ܢܨܰܠܶܐ ܕܰܢܦܼܰܫܶܩ܂
14:14 [ai]	ܐܶܢ ܗܽܘ ܓܶܝܪ ܕܰܗܘܺܝܬܼ ܡܨܰܠܶܐ ܒܠܶܫܳܢܳܐ܃ ܪܽܘܚܝ ܗ̱ܽܘ ܡܨܰܠܝܳܐ܃ ܡܰܕܿܰܥܝ ܕܶܝܢ ܕܠܳܐ ܦܿܺܐܪ̈ܺܝܢ ܗ̱ܽܘ܂
14:15 [ai]	ܡܳܢܳܐ ܗܳܟܼܺܝܠ ܐܶܥܒܿܶܕܼ܃ ܐܶܨܰܠܶܐ ܒܪܽܘܚܝ܃ ܘܶܐܨܰܠܶܐ ܐܳܦܼ ܒܡܰܕܿܰܥܝ܂ ܘܶܐܙܰܡܰܪ ܒܪܽܘܚܝ܃ ܘܶܐܙܰܡܰܪ ܐܳܦܼ ܒܡܰܕܿܰܥܝ܂
14:16 [ai]	ܘܶܐܢ ܠܳܐ ܐܶܢ ܡܒܼܰܪܶܟܼ ܐܰܢ̱ܬܿ ܒܪܽܘܚ܃ ܗܰܘ ܕܰܡܡܰܠܶܐ ܕܽܘܟܿܬܼܶܗ ܕܗܶܕܼܝܽܘܛܳܐ܃ ܐܰܝܟܿܰܢܳܐ ܢܺܐܡܰܪ ܐܰܡܺܝܢ܂ ܥܰܠ ܬܰܘܕܿܺܝܬܼܳܟܼ ܕܺܝܠܳܟܼ܂ ܡܶܛܽܠ ܕܡܳܢܳܐ ܐܳܡܰܪ ܐܰܢ̱ܬܿ ܠܳܐ ܝܳܕܼܰܥ܂
14:17 [ai]	ܐܰܢ̱ܬܿ ܓܶܝܪ ܫܰܦܿܺܝܪ ܡܒܼܰܪܶܟܼ ܐܰܢ̱ܬܿ܃ ܐܶܠܳܐ ܚܰܒܼܪܳܟܼ ܠܳܐ ܡܶܬܼܒܰܢܶܐ܂
14:18 [ai]	ܡܰܘܕܿܶܐ ܐ̱ܢܳܐ ܠܰܐܠܳܗܳܐ܂ ܕܝܰܬܿܺܝܪ ܡܶܢ ܟܽܠܟܼܽܘܢ ܡܡܰܠܶܠ ܐ̱ܢܳܐ ܒܠܶܫܳܢܶܐ̈܂
14:19 [ai]	ܐܶܠܳܐ ܒܥܺܕ̱ܿܬܳܐ ܨܳܒܼܶܐ ܐ̱ܢܳܐ ܕܚܰܡܶܫ ܡܶܠܺܝܢ̈ ܒܡܰܕܿܰܥܝ ܐܶܡܰܠܶܠ܃ ܕܳܐܦܼ ܐ̱ܚܪ̈ܳܢܶܐ ܐܰܠܶܦܼ܃ ܝܰܬܿܺܝܪ ܡܶܢ ܪܶܒܿܽܘ ܡܶܠܺܝܢ̈ ܒܠܶܫܳܢܳܐ܀
14:20 [ai]	ܐܰܚܰܝ̈܃ ܠܳܐ ܗܘܰܝܬܿܽܘܢ ܛܠܶܝܢ ܒܪ̈ܶܥܝܳܢܰܝܟܿܽܘܢ܂ ܐܶܠܳܐ ܠܒܼܺܝܫܳܬܼܳܐ̈ ܗܘܰܘ ܝܰܠܽܘܕܼܶܐ̈܃ ܘܰܒܪ̈ܶܥܝܳܢܰܝܟܿܽܘܢ ܗܘܰܘ ܓܡܺܝܪܺܝܢ܂
14:21 [ai]	ܒܢܳܡܽܘܣܳܐ ܟܬܼܺܝܒܼ܃ ܕܰܒܼܡܰܡܠ̱ܠܳܐ ܢܽܘܟܼܪܳܝܳܐ܂ ܘܰܒܠܶܫܳܢܳܐ ܐ̱ܚܪܺܢܳܐ܂ ܐܶܡܰܠܶܠ ܥܰܡܶܗ ܥܰܡ ܥܰܡܳܐ ܗܳܢܳܐ܂ ܐܳܦܼܠܳܐ ܗܳܟܼܰܢܳܐ ܢܶܫܡܥܽܘܢܳܢܝ܃ ܐܳܡܰܪ ܡܳܪܝܳܐ܂
14:22 [ai]	ܡܳܕܼܶܝܢ ܠܶܫܳܢܶܐ̈ ܠܳܐܬܼܳܐ ܗܽܘ ܣܺܝܡܺܝܢ܃ ܠܳܐ ܠܰܡܗܰܝܡܢܶܐ̈܂ ܐܶܠܳܐ ܠܰܐܝܠܶܝܢ ܕܠܳܐ ܡܗܰܝܡܢܺܝܢ܃ ܢܒܼܺܝܰܘܳܬܼܳܐ̈ ܕܶܝܢ܂ ܠܳܐ ܗ̱ܘܳܐ ܠܰܐܝܠܶܝܢ ܕܠܳܐ ܡܗܰܝܡܢܺܝܢ܃ ܐܶܠܳܐ ܠܰܐܝܠܶܝܢ ܕܰܡܗܰܝܡܢܺܝܢ܂
14:23 [ai]	ܐܶܢ ܗܽܘ ܗܳܟܼܺܝܠ ܕܬܶܬܼܟܿܰܢܰܫ ܟܽܠܳܗ ܥܺܕ̱ܿܬܳܐ܃ ܘܟܼܽܠܗܽܘܢ ܒܠܶܫܳܢܶܐ̈ ܢܡܰܠܠܽܘܢ܃ ܘܢܶܥܠܽܘܢ ܗܶܕܼܝܽܘܛܶܐ̈܂ ܐܰܘ ܐܰܝܠܶܝܢ ܕܠܳܐ ܡܗܰܝܡܢܺܝܢ܃ ܠܳܐ ܐܳܡܪܺܝܢ܂ ܕܗܳܠܶܝܢ ܫܢܰܘ ܠܗܽܘܢ܂
14:24 [ai]	ܘܶܐܢ ܟܽܠܟܼܽܘܢ ܬܶܗܘܽܘܢ ܡܶܬܼܢܰܒܿܶܝܢ܃ ܘܢܶܥܽܘܠ ܠܘܳܬܼܟܼܽܘܢ ܗܶܕܼܝܽܘܛܳܐ܂ ܐܰܘ ܡܰܢ ܕܠܳܐ ܡܗܰܝܡܶܢ܃ ܡܶܬܼܒܿܨܶܐ ܡܶܢ ܟܽܠܟܼܽܘܢ܃ ܘܡܶܬܼܟܿܰܘܰܢ ܡܶܢ ܟܽܠܟܼܽܘܢ܂
14:25 [ai]	ܘܟܼܰܣܝܳܬܼܳܐ̈ ܕܿܠܶܒܶܗ ܡܶܬܼܓܿܰܠܝܳܢ̈܂ ܘܗܳܝܕܶܝܢ ܢܶܦܿܶܠ ܥܰܠ ܐܰܦܿܰܘܗ̱ܝ̈܃ ܘܢܶܣܓܿܽܘܕܼ ܠܰܐܠܳܗܳܐ܂ ܘܢܺܐܡܰܪ܃ ܫܰܪܺܝܪܳܐܺܝܬܼ ܐܰܠܳܗܳܐ ܐܺܝܬܼ ܒܟܽܘܢ ܿ܀ܿ܀ܿ
14:26 [ai]	ܐܳܡܰܪ ܐ̱ܢܳܐ ܗܳܟܼܺܝܠ ܐܰܚܰܝ̈܃ ܕܶܐܡܰܬܼܝ ܕܡܶܬܼܟܿܰܢܫܺܝܢ ܐܢ̱ܬܿܽܘܢ܃ ܠܰܐܝܢܳܐ ܡܶܢܟܼܽܘܢ ܕܺܐܝܬܼ ܠܶܗ ܡܰܙܡܽܘܪܳܐ ܢܺܐܡܰܪ܂ ܘܰܐܝܢܳܐ ܕܺܐܝܬܼ ܠܶܗ ܝܽܘܠܦܿܳܢܳܐ܂ ܘܰܐܝܢܳܐ ܕܺܐܝܬܼ ܠܶܗ ܓܶܠܝܳܢܳܐ܂ ܘܰܐܝܢܳܐ ܕܺܐܝܬܼ ܠܶܗ ܠܶܫܳܢܳܐ܂ ܘܰܐܝܢܳܐ ܕܺܐܝܬܼ ܠܶܗ ܦܽܘܫܳܩܳܐ܃ ܟܽܠܗܶܝܢ ܠܒܼܶܢܝܳܢܳܐ ܢܶܗܘܝܳܢ̈܂
14:27 [ai]	ܘܶܐܢ ܒܠܶܫܳܢܳܐ ܐ̱ܢܳܫ ܢܡܰܠܶܠ܃ ܬܿܪ̈ܶܝܢ ܢܡܰܠܠܽܘܢ܂ ܘܟܼܰܕܼ ܣܰܓܿܺܝ ܬܠܳܬܼܳܐ܂ ܘܚܰܕܼ ܚܰܕܼ ܢܡܰܠܠܽܘܢ܂ ܘܚܰܕܼ ܢܦܼܰܫܶܩ܂
14:28 [ai]	ܘܶܐܢ ܠܰܝܬܿ ܕܰܡܦܼܰܫܶܩ܃ ܢܶܫܬܿܽܘܩ ܠܶܗ ܒܥܺܕ̱ܿܬܳܐ ܗܰܘ ܕܰܡܡܰܠܶܠ ܒܠܶܫܳܢܳܐ܂ ܘܒܼܰܝܢܰܘܗ̱ܝ ܠܢܰܦܼܫܶܗ ܘܠܰܐܠܳܗܳܐ ܢܡܰܠܶܠ܂
14:29 [ai]	ܢܒܼܺܝܶܐ̈ ܕܶܝܢ ܬܿܪ̈ܶܝܢ ܐܰܘ ܬܠܳܬܼܳܐ ܢܡܰܠܠܽܘܢ܃ ܘܫܰܪܟܿܳܐ ܢܦܼܰܪܫܽܘܢ܂
14:30 [ai]	ܘܶܐܢ ܠܰܐ̱ܚܪܺܢܳܐ ܢܶܬܼܓܠܶܐ ܟܰܕܼ ܝܳܬܼܶܒܼ܃ ܩܰܕܼܡܳܝܳܐ ܢܶܫܬܿܽܘܩ ܠܶܗ܂
14:31 [ai]	ܡܶܫܟܿܚܺܝܢ ܐܢ̱ܬܿܽܘܢ ܓܶܝܪ ܟܽܠܟܼܽܘܢ ܕܚܰܕܼ ܚܰܕܼ ܬܶܬܼܢܰܒܿܽܘܢ܃ ܕܟܽܠܢܳܫ ܢܺܐܠܰܦܼ܂ ܘܟܼܽܠܢܳܫ ܢܶܬܼܒܰܝܰܐ܂
14:32 [ai]	ܪܽܘܚܳܐ ܓܶܝܪ ܕܰܢܒܼܺܝܶܐ̈ ܠܰܢܒܼܺܝܶܐ̈ ܡܶܫܬܿܰܥܒܿܕܼܳܐ܂
14:33 [ai]	ܡܶܛܽܠ ܕܰܐܠܳܗܳܐ ܠܳܐ ܗ̱ܘܳܐ ܕܰܫܓܼܽܘܫܝܳܐ܃ ܐܶܠܳܐ ܕܰܫܠܳܡܳܐ܂ ܐܰܝܟܼ ܕܰܒܼܟܼܽܠܗܶܝܢ ܥܺܕܼܳܬܼܳܐ̈ ܕܩܰܕܿܺܝܫܶܐ̈܂
14:34 [ai]	ܢܶܫܰܝܟܿܽܘܢ̈ ܒܥܺܕ̱ܿܬܳܐ ܢܶܗܘܝܳܢ̈ ܫܰܬܿܺܝܩܳܢ̈܂ ܠܳܐ ܓܶܝܪ ܡܰܦܿܰܣ ܠܗܶܝܢ ܕܰܢܡܰܠܠܳܢ̈܃ ܐܶܠܳܐ ܕܢܶܫܬܿܰܥܒܿܕܼܳܢ̈܃ ܐܰܝܟܿܰܢܳܐ ܕܳܐܦܼ ܢܳܡܽܘܣܳܐ ܐܶܡܰܪ܂
14:35 [ai]	ܘܶܐܢ ܡܶܕܶܡ ܨܳܒܼܝܳܢ̈ ܕܢܺܐܠܦܿܳܢ̈܃ ܒܒܼܳܬܿܰܝܗܶܝܢ̈ ܢܫܰܐܠܳܢ̈ ܠܒܼܰܥܠܰܝܗܶܝܢ̈܂ ܒܶܗܬܿܬܼܳܐ ܗ̱ܝ ܓܶܝܪ ܕܢܶܫܶܐ̈ ܒܥܺܕ̱ܿܬܳܐ ܢܡܰܠܠܳܢ̈܂
14:36 [ai]	ܐܰܘ ܕܰܠܡܳܐ ܡܶܢܟܼܽܘܢ ܗ̱ܘ ܢܶܦܼܩܰܬܼ ܡܶܠܬܼܶܗ ܕܰܐܠܳܗܳܐ܂ ܐܰܘ ܠܘܳܬܼܟܼܽܘܢ ܗ̱ܘ ܒܰܠܚܽܘܕܼ ܡܛܳܬܼ܃
14:37 [ai]	ܐܶܢ ܐ̱ܢܳܫ ܕܶܝܢ ܡܶܢܟܼܽܘܢ ܣܳܒܼܰܪ ܕܰܢܒܼܺܝܳܐ ܗܽܘ܂ ܐܰܘ ܕܪܽܘܚܳܐ ܗܽܘ܃ ܢܶܕܿܰܥ ܗܳܠܶܝܢ ܕܟܳܬܼܶܒܼ ܐ̱ܢܳܐ ܠܟܼܽܘܢ܃ ܕܦܽܘܩܕܳܢܶܐ̈ ܐܶܢܽܘܢ ܕܡܳܪܰܢ܂
14:38 [ai]	ܐܶܢ ܐ̱ܢܳܫ ܕܶܝܢ ܠܳܐ ܝܳܕܼܰܥ܃ ܠܳܐ ܢܶܕܿܰܥ܂
14:39 [ai]	ܛܰܢܘ ܗܳܟܼܺܝܠ ܐܰܚܰܝ̈ ܠܡܶܬܼܢܰܒܿܳܝܽܘ܃ ܘܠܰܡܡܰܠܳܠܽܘ ܒܠܶܫܳܢܶܐ̈ ܠܳܐ ܬܶܟܼܠܽܘܢ܂
14:40 [ai]	ܟܽܠܡܶܕܶܡ ܕܶܝܢ ܒܶܐܣܟܿܺܡܳܐ ܘܰܒܛܶܟܿܣܳܐ ܢܶܗܘܶܐ܀

next chapter