← Back
The Comprehensive Aramaic Lexicon
← Return to the Text Browser
click on the file description for more information
62046: 1Cor

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


15:01 [ai]ܡܰܘܕܿܰܥ ܐ̱ܢܳܐ ܠܟܼܽܘܢ ܕܶܝܢ ܐܰܚܰܝ̈܃ ܐܶܘܰܢܓܿܶܠܺܝܳܘܢ ܕܿܣܰܒܰܪܬܿܟܼܽܘܢ܂ ܘܩܰܒܿܶܠܬܿܽܘܢܳܝܗ̱ܝ܂ ܘܩܳܡܬܿܽܘܢ ܒܶܗ܂
15:02 [ai]ܘܒܼܶܗ ܚܳܐܶܝܢ ܐܢ̱ܬܿܽܘܢ܂ ܒܰܐܝܕܼܳܐ ܡܶܠܬܼܳܐ ܣܰܒܰܪܬܿܟܼܽܘܢ܃ ܐܶܢ ܥܳܗܕܺܝܢ ܐܢ̱ܬܿܽܘܢ܃ ܐܶܢ ܠܳܐ ܗ̱ܘܳܐ ܣܪܺܝܩܳܐܺܝܬܼ ܗܰܝܡܶܢܬܿܽܘܢ܂
15:03 [ai]ܐܰܫܠܡܶܬܼ ܠܟܼܽܘܢ ܓܶܝܪ ܡܶܢ ܠܽܘܩܕܼܰܡ ܐܰܝܟܼ ܡܶܕܶܡ ܕܩܰܒܿܠܶܬܼ܃ ܕܰܡܫܺܝܚܳܐ ܡܺܝܬܼ ܥܰܠ ܐܰܦܿܰܝ̈ ܚܛܳܗܰܝܢ̈܃ ܐܰܝܟܿܰܢܳܐ ܕܰܟܼܬܼܺܝܒܼ܂
15:04 [ai]ܘܕܼܶܐܬܼܩܒܼܰܪ܂ ܘܩܳܡ ܠܰܬܼܠܳܬܼܳܐ ܝܰܘܡܺܝܢ̈܃ ܐܰܝܟܼ ܕܰܟܼܬܼܺܝܒܼ܂
15:05 [ai]ܘܶܐܬܼܚܙܺܝ ܠܟܼܺܐܦܼܳܐ܂ ܘܒܼܳܬܼܪܶܗ ܠܰܬܼܪܶܥܣܰܪ܂
15:06 [ai]ܘܒܼܳܬܼܰܪܟܿܶܢ ܐܶܬܼܚܙܺܝ ܠܝܰܬܿܺܝܪ ܡܶܢ ܚܰܡܶܫܡܳܐܐ ܐܰܚܺܝܢ̈ ܐܰܟܼܚܕܼܳܐ܃ ܕܣܰܓܿܺܝܶܐܐ̈ ܡܶܢܗܽܘܢ ܩܰܝܳܡܺܝܢ ܐܶܢܽܘܢ ܥܕܼܰܡܳܐ ܠܗܳܫܳܐ܃ ܘܡܶܢܗܽܘܢ ܕܡܶܟܼܘ܂
15:07 [ai]ܘܡܶܢ ܒܳܬܼܰܪ ܗܳܠܶܝܢ ܐܶܬܼܚܙܺܝ ܠܝܰܥܩܽܘܒܼ܂ ܘܒܼܳܬܼܪܶܗ ܠܰܫܠܺܝܚܶܐ̈ ܟܽܠܗܽܘܢ܂
15:08 [ai]ܠܚܰܪܬܼܳܐ ܕܶܝܢ ܕܟܽܠܗܽܘܢ܃ ܐܰܝܟܼ ܕܰܠܝܰܚܛܳܐ܂ ܐܶܬܼܚܙܺܝ ܐܳܦܼ ܠܺܝ܂
15:09 [ai]ܐܶܢܳܐ ܐ̱ܢܳܐ ܓܶܝܪ ܙܥܽܘܪܗܽܘܢ ܕܰܫܠܺܝܚܶܐ̈܂ ܘܠܳܐ ܫܳܘܶܐ ܐ̱ܢܳܐ ܕܶܐܬܼܩܪܶܐ ܫܠܺܝܚܳܐ܂ ܡܶܛܽܠ ܕܪܶܕܼܦܿܶܬܼ ܥܺܕ̱ܿܬܿܶܗ ܕܰܐܠܳܗܳܐ܂
15:10 [ai]ܒܛܰܝܒܿܽܘܬܼܶܗ ܕܶܝܢ ܕܰܐܠܳܗܳܐ ܐܺܝܬܼܰܝ ܡܶܕܶܡ ܕܺܐܝܬܼܰܝ܂ ܘܛܰܝܒܿܽܘܬܼܶܗ ܕܒܺܝ܂ ܠܳܐ ܗܘܳܬܼ ܣܪܺܝܩܳܐ܃ ܐܶܠܳܐ ܝܰܬܿܺܝܪ ܡܶܢ ܟܽܠܗܽܘܢ ܠܺܐܝܬܼ܂ ܠܳܐ ܐܶܢܳܐ܂ ܐܶܠܳܐ ܛܰܝܒܿܽܘܬܼܶܗ ܕܥܰܡܝ܂
15:11 [ai]ܐܶܢ ܐܶܢܳܐ ܗܳܟܼܺܝܠ܂ ܘܶܐܢ ܗܶܢܽܘܢ܃ ܗܳܟܼܰܢܳܐ ܡܰܟܼܪܙܺܝܢܰܢ܂ ܘܗܳܟܼܰܢܳܐ ܗܰܝܡܶܢܬܿܽܘܢ܂
15:12 [ai]ܐܶܢ ܕܶܝܢ ܡܫܺܝܚܳܐ ܡܶܬܼܟܿܪܶܙ ܕܩܳܡ ܡܶܢ ܒܶܝܬܼ ܡܺܝܬܼܶܐ̈܃ ܐܰܝܟܿܰܢܳܐ ܐܺܝܬܼ ܒܟܽܘܢ ܐ̱ܢܳܫܳܐ ܕܳܐܡܪܺܝܢ܂ ܠܰܝܬܿ ܚܰܝܰܬܼ ܡܺܝܬܼܶܐ̈܂
15:13 [ai]ܘܶܐܢ ܚܰܝܰܬܼ ܡܺܝܬܼܶܐ̈ ܠܰܝܬܿ܃ ܐܳܦܼܠܳܐ ܡܫܺܝܚܳܐ ܩܳܡ܂
15:14 [ai]ܘܶܐܢ ܡܫܺܝܚܳܐ ܠܳܐ ܩܳܡ܃ ܣܪܺܝܩܳܐ ܗ̱ܝ ܟܳܪܽܘܙܽܘܬܼܰܢ܂ ܣܪܺܝܩܳܐ ܐܳܦܼ ܗܰܝܡܳܢܽܘܬܼܟܼܽܘܢ܂
15:15 [ai]ܡܶܫܬܿܰܟܼܚܺܝܢ ܚ̱ܢܰܢ ܕܶܝܢ ܐܳܦܼ ܣܳܗܕܿܶܐ̈ ܕܰܓܳܠܶܐ̈ ܕܰܐܠܳܗܳܐ܃ ܕܰܐܣܗܶܕܼܢ ܥܰܠ ܐܰܠܳܗܳܐ܂ ܕܰܐܩܺܝܡ ܠܰܡܫܺܝܚܳܐ܂ ܟܰܕܼ ܠܳܐ ܐܰܩܺܝܡ܂
15:16 [ai]ܐܶܢ ܡܺܝܬܼܶܐ̈ ܓܶܝܪ ܠܳܐ ܩܳܝܡܺܝܢ܃ ܐܳܦܼܠܳܐ ܡܫܺܝܚܳܐ ܩܳܡ܂
15:17 [ai]ܘܶܐܢ ܡܫܺܝܚܳܐ ܠܳܐ ܩܳܡ܃ ܒܰܛܳܠܳܐ ܗ̱ܝ ܗܰܝܡܳܢܽܘܬܼܟܼܽܘܢ܂ ܘܰܥܕܼܰܟܿܺܝܠ ܒܰܚܛܳܗܰܝܟܿܽܘܢ̈ ܐܰܢ̱ܬܿܽܘܢ܂
15:18 [ai]ܘܰܟܼܒܼܰܪ ܐܳܦܼ ܐܰܝܠܶܝܢ ܕܰܕܼܡܶܟܼܘ ܒܰܡܫܺܝܚܳܐ܂ ܐܶܒܼܰܕܼܘ ܠܗܽܘܢ܂
15:19 [ai]ܘܶܐܢ ܒܗܳܠܶܝܢ ܗ̱ܽܘ ܚܰܝ̈ܶܐ ܒܰܠܚܽܘܕܼ ܡܣܰܒܿܪܺܝܢܰܢ ܒܰܡܫܺܝܚܳܐ܃ ܕܳܘܶܝܢܰܢ ܗ̱ܽܘ ܡܶܢ ܟܽܠܗܽܘܢ ܒܢܰܝܢܳܫܳܐ܀
15:20 [ai]ܗܳܫܳܐ ܕܶܝܢ ܡܫܺܝܚܳܐ ܩܳܡ ܡܶܢ ܒܶܝܬܼ ܡܺܝܬܼܶܐ̈܂ ܘܰܗܘܳܐ ܪܺܫܺܝܬܼܳܐ ܕܕܼܰܡܟܿܶܐ̈܂
15:21 [ai]ܘܰܐܝܟܿܰܢܳܐ ܕܰܒܼܝܰܕܼ ܒܰܪܢܳܫܳܐ ܗܘܳܐ ܡܰܘܬܳܐ܃ ܗܳܟܼܰܢܳܐ ܐܳܦܼ ܒܝܰܕܼ ܒܰܪܢܳܫܳܐ ܗܳܘܝܳܐ ܚܰܝܰܬܼ ܡܺܝܬܼܶܐ̈܂
15:22 [ai]ܐܰܝܟܿܰܢܳܐ ܓܶܝܪ ܕܒܳܐܕܼܳܡ ܟܽܠܗܽܘܢ ܒܢܰܝܢܳܫܳܐ ܡܳܝܬܿܺܝܢ܃ ܗܳܟܼܰܢܳܐ ܐܳܦܼ ܒܰܡܫܺܝܚܳܐ ܟܽܠܗܽܘܢ ܚܳܐܶܝܢ܂
15:23 [ai]ܐ̱ܢܳܫ ܐ̱ܢܳܫ ܒܛܶܟܿܣܶܗ܂ ܪܺܫܺܝܬܼܳܐ ܗܘܳܐ ܡܫܺܝܚܳܐ܂ ܒܳܬܼܰܪܟܿܶܢ ܐܰܝܠܶܝܢ ܕܕܼܰܡܫܺܝܚܳܐ ܐܶܢܽܘܢ ܒܡܶܐܬܼܺܝܬܼܶܗ܂
15:24 [ai]ܘܗܳܝܕܶܝܢ ܬܶܗܘܶܐ ܚܰܪܬܼܳܐ܃ ܡܳܐ ܕܡܰܫܠܶܡ ܡܰܠܟܿܽܘܬܼܳܐ ܠܰܐܠܳܗܳܐ ܐܰܒܼܳܐ܂ ܡܳܐ ܕܒܰܛܶܠ ܟܽܠ ܪܺܝܫ܂ ܘܟܼܽܠ ܫܽܘܠܛܳܢ܂ ܘܟܼܽܠ ܚܰܝܠܺܝܢ̈܂
15:25 [ai]ܥܬܼܺܝܕܼ ܗ̱ܽܘ ܓܶܝܪ ܕܢܰܡܠܶܟܼ܂ ܥܕܼܰܡܳܐ ܕܰܢܣܺܝܡ ܒܥܶܠܕܿܒܼܳܒܼܰܘܗ̱ܝ̈ ܟܽܠܗܽܘܢ ܬܚܶܝܬܼ ܪ̈ܶܓܼܠܰܘܗ̱ܝ܂
15:26 [ai]ܘܰܐ̱ܚܪܳܝܳܐ ܒܥܶܠܕܿܒܼܳܒܼܳܐ ܡܶܬܼܒܿܰܛܰܠ܂ ܡܰܘܬܳܐ܂
15:27 [ai]ܟܽܠ ܓܶܝܪ ܫܰܥܒܿܶܕܼ ܬܚܶܝܬܼ ܪ̈ܶܓܼܠܰܘܗ̱ܝ܂ ܡܳܐ ܕܶܐܡܰܪ ܕܶܝܢ܂ ܕܟܽܠܡܶܕܶܡ ܡܶܫܬܿܰܥܒܿܰܕܼ ܠܶܗ܃ ܺܝܕܼܺܝܥܳܐ ܕܰܣܛܰܪ ܡܶܢ ܗܰܘ ܕܫܰܥܒܿܶܕܼ ܠܶܗ ܟܽܠ܂
15:28 [ai]ܘܡܳܐ ܕܶܐܫܬܿܰܥܒܿܰܕܼ ܠܶܗ ܟܽܠ܃ ܗܳܝܕܶܝܢ ܗܽܘ ܒܪܳܐ ܢܶܫܬܿܰܥܒܿܰܕܼ ܠܗܰܘ ܕܫܰܥܒܿܶܕܼ ܠܶܗ ܟܽܠ܃ ܕܢܶܗܘܶܐ ܐܰܠܳܗܳܐ ܟܽܠ ܒܟܽܠ܂
15:29 [ai]ܘܶܐܠܳܐ ܡܳܢܳܐ ܢܶܥܒܿܕܼܽܘܢ ܗܳܢܽܘܢ ܕܥܳܡܕܺܝܢ ܚܠܳܦܼ ܡܺܝܬܼܶܐ̈܃ ܐܶܢ ܡܺܝܬܼܶܐ̈ ܠܳܐ ܩܳܝܡܺܝܢ܃ ܡܳܢܳܐ ܥܳܡܕܺܝܢ ܚܠܳܦܼ ܡܺܝܬܼܶܐ̈܂
15:30 [ai]ܘܰܠܡܳܢܳܐ ܐܳܦܼ ܚܢܰܢ ܒܟܽܠ ܫܳܥܳܐ ܒܩܽܢܕܼܺܝܢܳܘܣ ܩܳܝܡܺܝܢܰܢ܂
15:31 [ai]ܝܳܡܶܐ ܐ̱ܢܳܐ ܒܫܽܘܒܼܗܳܪܟܼܽܘܢ ܐܰܚܰܝ̈܃ ܕܺܐܝܬܼ ܠܺܝ ܒܡܳܪܰܢ ܝܶܫܽܘܥ ܡܫܺܝܚܳܐ܃ ܕܟܽܠܝܽܘܡ ܡܳܐܶܬܼ ܐ̱ܢܳܐ܂
15:32 [ai]ܐܶܢ ܐܰܝܟܼ ܕܒܶܝܬܼ ܒܢܰܝܢܳܫܳܐ܃ ܐܶܫܬܿܕܼܺܝܬܼ ܠܚܰܝܘܳܬܼܳܐ̈ ܒܶܐܦܼܶܣܳܘܣ܃ ܡܳܢܳܐ ܐܶܬܼܗܢܺܝܬܼ܂ ܐܶܢ ܡܺܝܬܼܶܐ̈ ܠܳܐ ܩܳܝܡܺܝܢ܂ ܢܶܐܟܼܽܘܠ ܘܢܶܫܬܿܶܐ܂ ܡܚܳܪ ܓܶܝܪ ܡܳܝܬܿܺܝܢܰܢ܂
15:33 [ai]ܠܳܐ ܬܶܛܥܽܘܢ܂ ܡܚܰܒܿܠܳܢ̈ ܪ̈ܶܥܝܳܢܶܐ ܒܰܣܺܝܡܶܐ̈ ܫܽܘܥܝܳܬܼܳܐ̈ ܒܺܝܫܳܬܼܳܐ̈ ܿ܀ܿ܀ܿ
15:34 [ai]ܐܰܥܺܝܪܘ ܠܶܒܟܽܘܢ ܙܰܕܿܺܝܩܳܐܺܝܬܼ܂ ܘܠܳܐ ܬܶܚܛܽܘܢ܂ ܐܺܝܬܼ ܓܶܝܪ ܐ̱ܢܳܫܳܐ ܕܺܝܕܼܰܥܬܼܳܐ ܕܰܐܠܳܗܳܐ ܠܰܝܬܿ ܒܗܽܘܢ܂ ܠܒܼܶܗܬܿܰܬܼܟܼܽܘܢ ܗ̱ܽܘ ܐܳܡܰܪ ܐ̱ܢܳܐ܂
15:35 [ai]ܢܺܐܡܰܪ ܐ̱ܢܳܫ ܡܶܢܟܼܽܘܢ܃ ܕܰܐܝܟܿܰܢܳܐ ܩܳܝܡܺܝܢ ܡܺܝܬܼܶܐ̈܃ ܘܒܼܰܐܝܢܳܐ ܦܰܓܼܪܳܐ ܐܳܬܼܶܝܢ܂
15:36 [ai]ܣܰܟܼܠܳܐ܃ ܙܰܪܥܳܐ ܕܙܳܪܰܥ ܐܰܢ̱ܬܿ܃ ܐܶܢ ܠܳܐ ܡܳܐܶܬܼ܂ ܠܳܐ ܚܳܝܶܐ܂
15:37 [ai]ܘܗܰܘ ܡܶܕܶܡ ܕܙܳܪܰܥ ܐܰܢ̱ܬܿ܃ ܠܳܐ ܗ̱ܘܳܐ ܗܰܘ ܦܰܓܼܪܳܐ ܕܰܥܬܼܺܝܕܼ ܠܡܶܗܘܳܐ܂ ܙܳܪܰܥ ܐܰܢ̱ܬܿ܃ ܐܶܠܳܐ ܦܪܶܕܿܬܳܐ ܥܰܪܛܶܠܳܝܬܳܐ ܕܚܶܛܶܐ̈܂ ܐܰܘ ܕܿܰܣܥܳܪ̈ܶܐ܂ ܐܰܘ ܕܫܰܪܟܿܳܐ ܕܿܙܰܪ̈ܥܽܘܢܶܐ܂
15:38 [ai]ܐܰܠܳܗܳܐ ܕܶܝܢ ܝܳܗܶܒܼ ܠܶܗ ܦܰܓܼܪܳܐ܂ ܐܰܝܟܿܰܢܳܐ ܕܨܳܒܼܶܐ܂ ܘܰܠܚܰܕܼ ܚܰܕܼ ܡܶܢ ܙܰܪ̈ܥܽܘܢܶܐ ܦܰܓܼܪܳܐ ܕܰܟܼܝܳܢܶܗ܂
15:39 [ai]ܠܳܐ ܗ̱ܘܳܐ ܕܶܝܢ ܟܽܠ ܦܓܼܰܪ ܫܘܶܐ܂ ܐ̱ܚܪܺܝܢ ܗ̱ܽܘ ܓܶܝܪ ܦܰܓܼܪܳܐ ܕܒܰܪ ܐ̱ܢܳܫܳܐ܂ ܘܰܐ̱ܚܪܺܝܢ ܕܰܒܼܥܺܝܪܳܐ܂ ܘܰܐ̱ܚܪܺܝܢ ܕܦܳܪܰܚܬܼܳܐ܂ ܘܰܐ̱ܚܪܺܝܢ ܕܢܽܘܢܶܐ̈܂
15:40 [ai]ܘܺܐܝܬܼ ܦܿܰܓܼܪ̈ܶܐ ܫܡܰܝܳܢܶܐ̈܂ ܘܺܐܝܬܼ ܦܿܰܓܼܪ̈ܶܐ ܐܰܪ̈ܥܳܢܳܝܶܐ܂ ܐܶܠܳܐ ܐ̱ܚܪܺܝܢ ܗ̱ܽܘ ܫܽܘܒܼܚܳܐ ܕܰܫܡܰܝܳܢܶܐ̈܃ ܘܰܐ̱ܚܪܺܝܢ ܕܿܰܐܪ̈ܥܳܢܳܝܶܐ܂
15:41 [ai]ܘܰܐ̱ܚܪܺܝܢ ܗ̱ܽܘ ܫܽܘܒܼܚܳܐ ܕܫܶܡܫܳܐ܂ ܘܰܐ̱ܚܪܺܝܢ ܫܽܘܒܼܚܳܐ ܕܣܰܗܪܳܐ܂ ܘܰܐ̱ܚܪܺܝܢ ܫܽܘܒܼܚܳܐ ܕܟܰܘܟܿܒܼܶܐ̈܂ ܘܟܼܰܘܟܿܒܼܳܐ ܡܶܢ ܟܰܘܟܿܒܼܳܐ ܡܝܰܬܿܰܪ ܗ̱ܽܘ ܒܫܽܘܒܼܚܳܐ܂
15:42 [ai]ܗܳܟܼܰܢܳܐ ܐܳܦܼ ܚܰܝܰܬܼ ܡܺܝܬܼܶܐ̈܂ ܡܶܙܕܿܰܪܥܺܝܢ ܒܰܚܒܼܳܠܳܐ܃ ܩܳܝܡܺܝܢ ܕܠܳܐ ܚܒܼܳܠܳܐ܂
15:43 [ai]ܡܶܙܕܿܰܪܥܺܝܢ ܒܨܰܥܪܳܐ܃ ܩܳܝܡܺܝܢ ܒܫܽܘܒܼܚܳܐ܂ ܡܶܙܕܿܰܪܥܺܝܢ ܒܰܟܼܪܺܝܗܽܘܬܼܳܐ܃ ܩܳܝܡܺܝܢ ܒܚܰܝܠܳܐ܂
15:44 [ai]ܡܶܙܕܿܰܪܥܺܝܢ ܦܰܓܼܪܳܐ ܢܰܦܼܫܳܢܳܝܳܐ܃ ܩܳܐܶܡ ܦܰܓܼܪܳܐ ܪܽܘܚܳܢܳܝܳܐ܂ ܐܺܝܬܼ ܓܶܝܪ ܦܰܓܼܪܳܐ ܕܰܢܦܼܶܫ܃ ܘܺܐܝܬܼ ܦܰܓܼܪܳܐ ܕܪܽܘܚ܂
15:45 [ai]ܗܳܟܼܰܢܳܐ ܐܳܦܼ ܟܬܼܺܝܒܼ܂ ܗܘܳܐ ܐܳܕܼܳܡ ܒܰܪܢܳܫܳܐ ܩܰܕܼܡܳܝܳܐ ܠܰܢܦܼܶܫ ܚܰܝܳܐ܃ ܘܳܐܕܼܳܡ ܐ̱ܚܪܳܝܳܐ ܠܪܽܘܚܳܐ ܡܰܚܝܳܢܺܝܬܼܳܐ܂
15:46 [ai]ܐܶܠܳܐ ܠܳܐ ܗ̱ܘܳܐ ܠܽܘܩܕܼܰܡ ܪܽܘܚܳܢܳܝܳܐ܃ ܐܶܠܳܐ ܢܰܦܼܫܳܢܳܝܳܐ܂ ܘܗܳܝܕܶܝܢ ܪܽܘܚܳܢܳܝܳܐ܂
15:47 [ai]ܒܰܪܢܳܫܳܐ ܩܰܕܼܡܳܝܳܐ ܥܰܦܼܪܳܢܳܐ ܕܡܶܢ ܐܰܪܥܳܐ܃ ܒܰܪܢܳܫܳܐ ܕܿܰܬܼܪ̈ܶܝܢ ܡܳܪܝܳܐ ܡܶܢ ܫܡܰܝܳܐ܂
15:48 [ai]ܐܰܝܟܿܰܢܳܐ ܕܺܐܝܬܼܰܘܗ̱ܝ ܗܰܘ ܥܰܦܼܪܳܢܳܐ܃ ܗܳܟܼܰܢܳܐ ܐܳܦܼ ܥܰܦܼܪ̈ܳܢܶܐ܂ ܘܰܐܝܟܿܰܢܳܐ ܕܺܐܝܬܼܰܘܗ̱ܝ ܗܰܘ ܕܡܶܢ ܫܡܰܝܳܐ܃ ܗܳܟܼܰܢܳܐ ܐܳܦܼ ܫܡܰܝܳܢܶܐ̈܂
15:49 [ai]ܘܰܐܝܟܼ ܕܰܠܒܼܶܫܢ ܕܡܽܘܬܼܳܐ ܕܗܰܘ ܕܡܶܢ ܥܰܦܼܪܳܐ܃ ܗܳܟܼܰܢܳܐ ܢܶܠܒܿܰܫ ܕܡܽܘܬܼܳܐ ܕܗܰܘ ܕܡܶܢ ܫܡܰܝܳܐ܂
15:50 [ai]ܗܳܕܼܶܐ ܕܶܝܢ ܐܳܡܰܪ ܐ̱ܢܳܐ ܐܰܚܰܝ̈܃ ܕܒܶܣܪܳܐ ܘܰܕܼܡܳܐ ܡܰܠܟܿܽܘܬܼܳܐ ܕܰܫܡܰܝܳܐ ܠܡܺܐܪܰܬܼ܂ ܠܳܐ ܡܶܫܟܿܚܺܝܢ܂ ܘܠܳܐ ܚܒܼܳܠܳܐ ܝܳܪܶܬܼ ܠܳܐ ܡܶܬܼܚܰܒܿܠܳܢܽܘܬܼܳܐ܂
15:51 [ai]ܗܳܐ ܐܳܡܰܪ ܐ̱ܢܳܐ ܠܟܼܽܘܢ ܐ̱ܪܳܙܳܐ܂ ܠܰܘ ܟܽܠܰܢ ܢܶܕܼܡܰܟܼ܃ ܟܽܠܰܢ ܕܶܝܢ ܢܶܬܼܚܰܠܰܦܼ܃
15:52 [ai]ܚܰܪܺܝܦܼܳܐܺܝܬܼ܂ ܐܰܝܟܼ ܪܦܼܳܦܼ ܥܰܝܢܳܐ܂ ܒܩܰܪܢܳܐ ܐ̱ܚܪܳܝܬܳܐ ܟܰܕܼ ܬܶܩܪܶܐ܃ ܘܰܢܩܽܘܡܽܘܢ ܡܺܝܬܼܶܐ̈ ܕܠܳܐ ܚܒܼܳܠܳܐ ܘܰܚܢܰܢ ܢܶܬܼܚܰܠܰܦܼ܂
15:53 [ai]ܥܬܼܺܝܕܼ ܗ̱ܽܘ ܓܶܝܪ ܗܳܢܳܐ ܕܡܶܬܼܚܰܒܿܰܠ܂ ܕܢܶܠܒܿܰܫ ܠܳܐ ܡܶܬܼܚܰܒܿܠܳܢܽܘܬܼܳܐ܃ ܘܗܳܢܳܐ ܕܡܳܐܶܬܼ܂ ܕܢܶܠܒܿܰܫ ܠܳܐ ܡܳܝܽܘܬܼܽܘܬܼܳܐ܂
15:54 [ai]ܡܳܐ ܕܠܳܒܼܶܫ ܕܶܝܢ ܗܳܢܳܐ ܕܡܶܬܼܚܰܒܿܰܠ ܠܳܐ ܡܶܬܼܚܰܒܿܠܳܢܽܘܬܼܳܐ܃ ܘܗܳܢܳܐ ܕܡܳܐܶܬܼ ܠܳܐ ܡܳܝܽܘܬܼܽܘܬܼܳܐ܃ ܗܳܝܕܶܝܢ ܬܶܗܘܶܐ ܡܶܠܬܼܳܐ ܗ̱ܝ ܕܰܟܼܬܼܺܝܒܼܳܐ܃ ܕܶܐܬܼܒܿܠܰܥ ܡܰܘܬܳܐ ܒܙܳܟܼܽܘܬܼܳܐ܂
15:55 [ai]ܐܰܝܟܿܰܘ ܥܽܘܩܣܳܟܼ܂ ܡܰܘܬܳܐ܃ ܐܳܘ ܐܰܝܟܿܳܐ ܗ̱ܝ ܙܳܟܼܽܘܬܼܶܟܼܝ܂ ܫܝܽܘܠ܂
15:56 [ai]ܥܽܘܩܣܶܗ ܕܶܝܢ ܕܡܰܘܬܳܐ ܚܛܺܝܬܼܳܐ ܗ̱ܝ܂ ܘܚܰܝܠܳܐ ܕܰܚܛܺܝܬܼܳܐ ܢܳܡܽܘܣܳܐ ܗܽܘ܂
15:57 [ai]ܛܰܝܒܿܽܘ ܕܶܝܢ ܠܰܐܠܳܗܳܐ܃ ܕܝܰܗ̱ܒܼ ܠܰܢ ܙܳܟܼܽܘܬܼܳܐ ܒܝܰܕܼ ܡܳܪܰܢ ܝܶܫܽܘܥ ܡܫܺܝܚܳܐ܀
15:58 [ai]ܡܶܟܿܺܝܠ ܐܰܚܰܝ̈ ܘܚܰܒܺܝܒܼܰܝ̈܃ ܗܘܰܘ ܡܫܰܪܪܺܝܢ܂ ܘܠܳܐ ܬܶܗܘܽܘܢ ܡܶܬܿܙܺܝܥܺܝܢ܃ ܐܶܠܳܐ ܗܘܰܘ ܡܶܬܼܝܰܬܿܪܺܝܢ ܒܟܽܠܙܒܼܰܢ ܒܰܥܒܼܳܕܼܶܗ ܕܡܳܪܝܳܐ܂ ܟܰܕܼ ܝܳܕܼܥܺܝܢ ܐܢ̱ܬܿܽܘܢ܃ ܕܥܰܡܠܟܼܽܘܢ ܠܳܐ ܗ̱ܘܳܐ ܣܪܺܝܩ ܒܡܳܪܝܳܐ܀

next chapter