← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62047: 2Cor

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܦܿܰܘܠܳܘܣ ܫܠܺܝܚܳܐ ܕܝܶܫܽܘܥ ܡܫܺܝܚܳܐ ܒܨܶܒܼܝܳܢܶܗ ܕܰܐܠܳܗܳܐ܂ ܘܛܺܝܡܳܬܼܶܐܳܘܣ ܐܰܚܳܐ܃ ܠܥܺܕ̱ܿܬܳܐ ܕܰܐܠܳܗܳܐ ܕܺܐܝܬܼ ܒܩܳܘܪܺܢܬܼܳܘܣ܃ ܘܰܠܟܼܽܠܗܽܘܢ ܩܰܕܿܺܝܫܶܐ̈ ܕܺܐܝܬܼ ܒܰܐܟܼܰܐܺܝܰܐ ܟܽܠܳܗ܂
01:02 [ai]ܛܰܝܒܿܽܘܬܼܳܐ ܥܰܡܟܼܽܘܢ܂ ܘܰܫܠܳܡܳܐ ܡܶܢ ܐܰܠܳܗܳܐ ܐܰܒܼܽܘܢ܃ ܘܡܶܢ ܡܳܪܰܢ ܝܶܫܽܘܥ ܡܫܺܝܚܳܐ܀
01:03 [ai]ܡܒܼܰܪܰܟܼ ܗ̱ܽܘ ܐܰܠܳܗܳܐ ܐܰܒܼܽܘܗ̱ܝ ܕܡܳܪܰܢ ܝܶܫܽܘܥ ܡܫܺܝܚܳܐ܃ ܐܰܒܼܳܐ ܕܿܪ̈ܰܚܡܶܐ܃ ܘܰܐܠܳܗܳܐ ܕܟܽܠ ܒܽܘܝܳܐ܂
01:04 [ai]ܗܰܘ ܕܰܡܒܼܰܝܰܐ ܠܰܢ ܒܟܽܠܗܽܘܢ ܐܽܘܠܨܳܢܰܝܢ̈܂ ܕܳܐܦܼ ܚܢܰܢ ܢܶܫܟܿܰܚ ܢܒܼܰܝܰܐ ܠܰܐܝܠܶܝܢ ܕܰܒܼܟܼܽܠ ܐܽܘܠܨܳܢܰܝܢ̈ ܐܶܢܽܘܢ܃ ܒܗܰܘ ܒܽܘܝܳܐܳܐ ܕܰܚܢܰܢ ܡܶܬܼܒܰܝܐܺܝܢܰܢ ܡܶܢ ܐܰܠܳܗܳܐ܂
01:05 [ai]ܐܰܝܟܿܰܢܳܐ ܓܶܝܪ ܕܡܶܬܼܝܰܬܿܪܺܝܢ ܒܰܢ ܚܰܫܰܘܗ̱ܝ̈ ܕܰܡܫܺܝܚܳܐ܃ ܗܳܟܼܰܢܳܐ ܒܝܰܕܼ ܡܫܺܝܚܳܐ ܡܶܬܼܝܰܬܿܰܪ ܐܳܦܼ ܒܽܘܝܳܐܰܢ܂
01:06 [ai]ܐܳܦܼܶܢ ܕܶܝܢ ܡܶܬܼܰܐܠܨܺܝܢܰܢ܃ ܥܰܠ ܐܰܦܿܰܝ̈ ܒܽܘܝܳܐܟܼܽܘܢ ܗ̱ܽܘ܂ ܘܥܰܠ ܐܰܦܿܰܝ̈ ܚܰܝܰܝܟܿܽܘܢ̈ ܡܶܬܼܰܐܠܨܺܝܢܰܢ܂ ܘܶܐܢ ܡܶܬܼܒܰܝܐܺܝܢܰܢ܃ ܡܶܛܽܠ ܕܰܐܢ̱ܬܿܽܘܢ ܬܿܶܬܼܒܰܝܐܘܽܢ܃ ܘܬܼܶܗܘܶܐ ܒܟܽܘܢ ܚܦܼܺܝܛܽܘܬܼܳܐ ܕܰܬܼܣܰܝܒܿܪܽܘܢ ܐܶܢܽܘܢ ܠܚܰܫܶܐ̈܃ ܗܳܢܽܘܢ ܕܳܐܦܼ ܚܢܰܢ ܚܳܫܺܝܢܰܢ ܠܗܽܘܢ܂
01:07 [ai]ܘܣܰܒܼܪܰܢ ܕܰܥܠܰܝܟܿܽܘܢ ܫܰܪܺܝܪ ܗ̱ܽܘ܂ ܝܳܕܼܥܺܝܢܰܢ ܓܶܝܪ ܕܶܐܢ ܫܰܘܬܿܳܦܼܺܝܢ ܐܢ̱ܬܿܽܘܢ ܒܚܰܫܶܐ̈܃ ܫܰܘܬܿܳܦܼܺܝܢ ܐܢ̱ܬܿܽܘܢ ܐܳܦܼ ܒܒܼܽܘܝܳܐܳܐ܀
01:08 [ai]ܨܳܒܼܶܝܢܰܢ ܕܶܝܢ ܕܬܶܕܿܥܽܘܢ ܐܰܚܰܝܢ̈܃ ܥܰܠ ܐܽܘܠܨܳܢܳܐ ܕܰܗܘܳܐ ܠܰܢ ܒܰܐܣܺܝܰܐ܃ ܕܪܰܘܪܒܼܳܐܺܝܬܼ ܐܶܬܼܶܐܠܶܨܢ܂ ܝܰܬܿܺܝܪ ܡܶܢ ܚܰܝܠܰܢ܂ ܥܕܼܰܡܳܐ ܕܩܰܪܺܝܒܼܺܝܢ ܗ̱ܘܰܘ ܚܰܝܰܝܢ̈ ܠܡܶܬܿܛܰܠܳܩܽܘ܂
01:09 [ai]ܘܥܰܠ ܢܰܦܼܫܰܢ ܦܣܰܩܢ ܡܰܘܬܳܐ܃ ܕܠܳܐ ܢܶܗܘܶܐ ܠܰܢ ܬܽܘܟܼܠܳܢܳܐ ܥܰܠ ܢܰܦܼܫܰܢ܃ ܐܶܠܳܐ ܥܰܠ ܐܰܠܳܗܳܐ܂ ܗܰܘ ܕܰܡܩܺܝܡ ܡܺܝܬܼܶܐ̈܂
01:10 [ai]ܗܰܘ ܕܡܶܢ ܡܰܘܬܿܶܐ̈ ܚܰܣܺܝܢܶܐ̈ ܦܰܪܩܰܢ܂ ܘܬܼܽܘܒܼ ܡܣܰܒܿܪܺܝܢܰܢ ܕܦܳܪܶܩ ܠܰܢ܂
01:11 [ai]ܒܰܡܥܰܕܿܪܳܢܽܘܬܼܳܐ ܕܒܳܥܽܘܬܼܟܼܽܘܢ ܕܥܰܠ ܐܰܦܿܰܝܢ̈܂ ܕܬܶܗܘܶܐ ܡܰܘܗܰܒܼܬܼܶܗ ܕܰܠܘܳܬܼܰܢ ܛܰܝܒܿܽܘܬܼܳܐ ܕܰܥܒܼܺܝܕܼܳܐ ܒܰܐܦܿܰܝ̈ ܣܰܓܿܺܝܶܐܐ̈܂ ܘܣܰܓܿܺܝܶܐܐ̈ ܢܰܘܕܿܽܘܢ ܠܶܗ ܥܰܠ ܐܰܦܿܰܝܢ̈܂
01:12 [ai]ܫܽܘܒܼܗܳܪܰܢ ܓܶܝܪ ܗܳܢܰܘ܃ ܣܳܗܕܿܽܘܬܼܳܐ ܕܪܶܥܝܳܢܰܢ܂ ܕܒܰܦܼܫܺܝܛܽܘܬܼܳܐ ܘܰܒܕܼܰܟܼܝܽܘܬܼܳܐ ܘܰܒܛܰܝܒܿܽܘܬܼܳܐ ܕܰܐܠܳܗܳܐ ܐܶܬܼܗܰܦܿܰܟܼܢ ܒܥܳܠܡܳܐ܂ ܘܠܳܐ ܒܚܶܟܼܡܬܼܳܐ ܕܦܰܓܼܪܳܐ܂ ܘܝܰܬܿܺܝܪܳܐܺܝܬܼ ܠܘܳܬܼܟܼܽܘܢ ܕܺܝܠܟܼܽܘܢ܂
01:13 [ai]ܠܳܐ ܗ̱ܘܳܐ ܐ̱ܚܪ̈ܳܢܝܳܢ ܟܿܳܬܼܒܺܝܢܰܢ ܠܟܼܽܘܢ܃ ܐܶܠܳܐ ܐܰܝܠܶܝܢ ܕܝܳܕܼܥܺܝܢ ܐܢ̱ܬܿܽܘܢ܂ ܐܳܦܼ ܡܶܫܬܰܘܕܥܺܝܢ ܐܢ̱ܬܿܽܘܢ܂ ܬܟܼܺܝܠ ܐ̱ܢܳܐ ܕܶܝܢ ܕܰܥܕܼܰܡܳܐ ܠܰܐ̱ܚܪܳܝܬܳܐ ܬܿܶܫܬܰܘܕܿܥܽܘܢ܂
01:14 [ai]ܐܰܝܟܿܰܢܳܐ ܕܳܐܦܼ ܐܶܫܬܰܘܕܿܰܥܬܿܽܘܢ ܩܰܠܺܝܠ ܡܶܢ ܣܰܓܿܺܝ܂ ܕܫܽܘܒܼܗܳܪܟܼܽܘܢ ܚܢܰܢ܂ ܐܰܝܟܼ ܕܳܐܦܼ ܐܰܢ̱ܬܿܽܘܢ ܕܺܝܠܰܢ܂ ܒܝܰܘܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂
01:15 [ai]ܘܰܒܗܳܢܳܐ ܬܽܘܟܼܠܳܢܳܐ ܨܳܒܼܶܐ ܗ̱ܘܺܝܬܼ ܡܶܢ ܩܕܼܺܝܡ ܕܺܐܬܼܶܐ ܠܘܳܬܼܟܼܽܘܢ܃ ܕܰܐܥܺܝܦܼܳܐܺܝܬܼ ܬܩܰܒܿܠܽܘܢ ܛܰܝܒܿܽܘܬܼܳܐ܂
01:16 [ai]ܘܶܐܥܒܰܪ ܥܠܰܝܟܿܽܘܢ ܠܡܰܩܶܕܼܳܘܢܳܝܶܐ̈܂ ܘܬܼܽܘܒܼ ܡܶܢ ܡܰܩܶܕܼܳܘܢܺܝܰܐ ܐܺܬܼܶܐ܂ ܐܺܬܼܶܐ܂ ܘܰܐܢ̱ܬܿܽܘܢ ܬܠܰܘܽܘܢܳܢܝ ܠܺܝܗܽܘܕܼ܂
01:17 [ai]ܗܳܕܼܶܐ ܗܳܟܼܺܝܠ ܕܶܐܬܼܪܰܥܺܝܬܼ܃ ܠܡܳܐ ܐܰܝܟܼ ܡܣܰܪܗܒܼܳܐ ܐܶܬܼܪܰܥܺܝܬܼ܂ ܐܰܘ ܕܰܠܡܳܐ ܕܰܒܼܣܰܪ ܐܶܢܶܝܢ̈܂ ܐܰܝܠܶܝܢ ܕܡܶܬܼܪܰܥܶܐ ܐ̱ܢܳܐ܂ ܡܶܛܽܠ ܕܘܳܠܶܐ ܗ̱ܘܳܐ ܕܢܶܗܘܶܐ ܒܗܶܝܢ ܐܺܝܢ ܐܺܝܢ܂ ܘܠܳܐ ܠܳܐ܂
01:18 [ai]ܡܗܰܝܡܰܢ ܗ̱ܽܘ ܐܰܠܳܗܳܐ܃ ܕܠܳܐ ܗܘܳܬܼ ܡܶܠܬܼܰܢ ܕܰܠܘܳܬܼܟܼܽܘܢ ܐܺܝܢ ܘܠܳܐ܂
01:19 [ai]ܒܪܶܗ ܓܶܝܪ ܕܰܐܠܳܗܳܐ ܝܶܫܽܘܥ ܡܫܺܝܚܳܐ܂ ܗܰܘ ܕܒܺܐܝܕܼܰܢ ܐܶܬܼܟܿܪܶܙ ܠܟܼܽܘܢ܃ ܒܺܝ ܘܰܒܣܺܠܘܰܢܳܘܣ ܘܰܒܛܺܝܡܳܬܼܶܐܳܘܣ܃ ܠܳܐ ܗ̱ܘܳܐ ܐܺܝܢ܂ ܘܠܳܐ܂ ܐܶܠܳܐ ܐܺܝܢ ܗܘܳܐ ܒܶܗ܂
01:20 [ai]ܟܽܠܗܽܘܢ ܓܶܝܪ ܡܽܘܠܟܿܳܢܰܘܗ̱ܝ̈ ܕܰܐܠܳܗܳܐ܃ ܒܶܗ ܗܽܘ ܒܰܡܫܺܝܚܳܐ ܐܺܝܢ ܗܘܰܘ܂ ܡܶܛܽܠ ܗܳܢܳܐ ܒܺܐܝܕܼܶܗ ܝܳܗܒܺܝܢܰܢ ܐܰܡܺܝܢ܂ ܠܬܼܶܫܒܿܽܘܚܬܿܶܗ ܕܰܐܠܳܗܳܐ܂
01:21 [ai]ܐܰܠܳܗܳܐ ܗܽܘ ܕܶܝܢ ܡܫܰܪܰܪ ܠܰܢ ܥܰܡܟܼܽܘܢ ܒܰܡܫܺܝܚܳܐ܃ ܗܰܘ ܕܗܽܘ ܡܰܫܚܰܢ܂
01:22 [ai]ܘܚܰܬܿܡܰܢ܃ ܘܝܰܗ̱ܒܼ ܪܰܗܒܼܽܘܢܳܐ ܕܪܽܘܚܶܗ ܒܠܶܒܿܰܘܳܬܼܰܢ̈܀
01:23 [ai]ܐܶܢܳܐ ܕܶܝܢ ܠܰܐܠܳܗܳܐ ܡܰܣܗܶܕܼ ܐ̱ܢܳܐ ܥܰܠ ܢܰܦܼܫܝ܃ ܕܡܶܛܽܠ ܕܚܳܐܶܣ ܐ̱ܢܳܐ ܥܠܰܝܟܿܽܘܢ ܠܳܐ ܐܶܬܼܺܝܬܼ ܠܩܳܘܪܺܢܬܼܳܘܣ܂
01:24 [ai]ܠܳܐ ܗ̱ܘܳܐ ܡܶܛܽܠ ܕܿܡܳܪ̈ܰܝ ܗܰܝܡܳܢܽܘܬܼܟܼܽܘܢ ܚܢܰܢ܂ ܐܶܠܳܐ ܡܥܰܕܿܪ̈ܳܢܶܐ ܚܢܰܢ ܕܚܰܕܼܘܰܬܼܟܼܽܘܢ܂ ܒܗܰܝܡܳܢܽܘܬܼܳܐ ܗܽܘ ܓܶܝܪ ܩܳܝܡܺܝܢ ܐܢ̱ܬܿܽܘܢ܂

next chapter