The Comprehensive Aramaic Lexicon

02:01 [ai]	ܕܳܢܶܬܼ ܕܶܝܢ ܗܳܕܼܶܐ ܒܢܰܦܼܫܝ܃ ܕܠܳܐ ܬܽܘܒܼ ܒܟܰܪܝܽܘܬܼܳܐ ܐܺܬܼܶܐ ܠܘܳܬܼܟܼܽܘܢ܂
02:02 [ai]	ܐܶܢ ܐܶܢܳܐ ܓܶܝܪ ܡܰܟܼܪܶܐ ܐ̱ܢܳܐ ܠܟܼܽܘܢ܃ ܡܰܢܽܘ ܢܚܰܕܶܝܢܝ܃ ܐܶܠܳܐ ܗܰܘ ܕܶܐܢܳܐ ܐܰܟܼܪܺܝܬܼ ܠܶܗ܂
02:03 [ai]	ܘܰܕܼܟܼܶܬܼܒܿܶܬܼ ܠܟܼܽܘܢ ܗܺܝ ܗܳܕܼܶܐ܃ ܕܠܳܐ ܟܰܕܼ ܐܺܬܼܶܐ ܢܰܟܼܪܽܘܢ ܠܺܝ܃ ܗܳܢܽܘܢ ܐܰܝܠܶܝܢ ܕܘܳܠܶܐ ܗ̱ܘܳܐ ܠܗܽܘܢ ܕܗܶܢܽܘܢ ܢܚܰܕܿܽܘܢܳܢܝ܂ ܬܟܼܺܝܠ ܐ̱ܢܳܐ ܕܶܝܢ ܥܰܠ ܟܽܠܟܼܽܘܢ܃ ܕܚܰܕܼܘܰܬܼܝ ܕܟܽܠܟܼܽܘܢ ܗ̱ܺܝ܂
02:04 [ai]	ܘܡܶܢ ܐܽܘܠܨܳܢܳܐ ܪܰܒܿܳܐ܂ ܘܡܶܢ ܐܰܢܽܘܣܝܳܐ ܕܠܶܒܿܳܐ ܟܶܬܼܒܿܶܬܼ ܠܟܼܽܘܢ ܗܳܠܶܝܢ ܒܕܶܡܥܶܐ̈ ܣܰܓܿܺܝܳܐܬܼܳܐ̈܂ ܠܳܐ ܡܶܛܽܠ ܕܬܶܟܼܪܶܐ ܠܟܼܽܘܢ܂ ܐܶܠܳܐ ܡܶܛܽܠ ܕܬܶܕܿܥܽܘܢ ܚܽܘܒܿܳܐ ܝܰܬܿܺܝܪܳܐ ܕܺܐܝܬܼ ܠܺܝ ܠܘܳܬܼܟܼܽܘܢ܂
02:05 [ai]	ܐܶܢ ܕܶܝܢ ܐ̱ܢܳܫ ܐܰܟܼܪܺܝ܃ ܠܳܐ ܗ̱ܘܳܐ ܠܺܝ ܐܰܟܼܪܺܝ܃ ܐܶܠܳܐ ܒܨܺܝܪܳܐ ܩܰܠܺܝܠ ܠܟܼܽܠܟܼܽܘܢ܂ ܕܠܳܐ ܬܺܐܩܰܪ ܡܶܠܬܼܳܐ ܥܠܰܝܟܿܽܘܢ܂
02:06 [ai]	ܟܰܕܿܽܘ ܠܶܗ ܕܶܝܢ ܠܗܳܢܳܐ ܟܳܐܬܼܳܐ ܕܡܶܢ ܣܰܓܿܺܝܶܐܐ̈܂
02:07 [ai]	ܘܡܶܟܿܺܝܠ ܐ̱ܚܪܳܢܝܳܐܺܝܬܼ ܘܳܠܶܐ ܕܬܶܫܒܿܩܽܘܢ ܠܶܗ ܘܰܬܼܒܼܰܝܐܘܽܢܶܗ܃ ܕܰܠܡܳܐ ܒܟܰܪܝܽܘܬܼܳܐ ܝܰܬܿܺܝܪܬܳܐ ܢܶܬܼܒܿܠܰܥ ܠܶܗ ܗܰܘ ܡܰܢ ܕܗܳܟܼܰܢܳܐ ܗܽܘ܂
02:08 [ai]	ܡܶܛܽܠ ܗܳܢܳܐ ܒܿܳܥܶܐ ܐ̱ܢܳܐ ܡܶܢܟܼܽܘܢ܂ ܕܰܬܼܫܰܪܪܽܘܢ ܒܶܗ ܚܽܘܒܟܽܘܢ܂
02:09 [ai]	ܡܶܛܽܠ ܗܳܢܳܐ ܓܶܝܪ ܟܶܬܼܒܿܶܬܼ ܐܳܦܼ ܕܶܐܕܿܰܥ ܒܢܶܣܝܳܢܳܐ܃ ܐܶܢ ܒܟܽܠܡܶܕܶܡ ܡܶܫܬܿܰܡܥܺܝܢ ܐܢ̱ܬܿܽܘܢ܂
02:10 [ai]	ܠܡܰܢ ܕܰܐܢ̱ܬܿܽܘܢ ܕܶܝܢ ܫܳܒܼܩܺܝܢ ܐܢ̱ܬܿܽܘܢ܂ ܐܳܦܼ ܐܶܢܳܐ܂ ܐܳܦܼ ܐܶܢܳܐ ܓܶܝܪ ܡܶܕܶܡ ܕܫܶܒܼܩܶܬܼ ܠܡܰܢ ܕܫܶܒܼܩܶܬܼ܃ ܡܶܛܽܠܳܬܼܟܼܽܘܢ ܗ̱ܽܘ ܫܶܒܼܩܶܬܼ ܒܦܰܪܨܽܘܦܿܶܗ ܕܰܡܫܺܝܚܳܐ܂
02:11 [ai]	ܕܠܳܐ ܢܶܥܠܒܼܰܢ ܣܳܛܳܢܳܐ܂ ܝܳܕܼܥܺܝܢܰܢ ܓܶܝܪ ܡܰܚܫܒܼܳܬܼܶܗ̈ ܿ܀ܿ܀ܿ
02:12 [ai]	ܟܰܕܼ ܐܶܬܼܺܝܬܼ ܕܶܝܢ ܠܰܛܪܳܘܰܐܣ ܒܰܣܒܼܰܪܬܼܶܗ ܕܰܡܫܺܝܚܳܐ܃ ܘܶܐܬܼܦܬܼܰܚ ܠܺܝ ܬܰܪܥܳܐ ܒܡܳܪܝܳܐ܃
02:13 [ai]	ܠܳܐ ܗ̱ܘܳܐ ܠܺܝ ܢܝܳܚܳܐ ܒܪܽܘܚܝ܃ ܕܠܳܐ ܐܶܫܟܿܚܶܬܼ ܠܛܺܛܳܘܣ ܐܳܚܝ܂ ܐܶܠܳܐ ܫܪܺܝܬܼ ܐܶܢܽܘܢ܂ ܘܢܶܦܼܩܶܬܼ ܠܺܝ ܠܡܰܩܶܕܼܳܘܢܳܝܶܐ̈܂
02:14 [ai]	ܛܰܝܒܿܽܘ ܕܶܝܢ ܠܰܐܠܳܗܳܐ܃ ܕܰܒܼܟܼܽܠ ܙܒܼܰܢ ܚܙܳܬܼܳܐ ܥܳܒܼܶܕܼ ܠܰܢ ܒܰܡܫܺܝܚܳܐ܃ ܘܓܼܳܠܶܐ ܒܰܢ ܪܺܝܚܳܐ ܕܺܝܕܼܰܥܬܼܶܗ ܒܟܽܠ ܐܰܬܼܰܪ܂
02:15 [ai]	ܪܺܝܚܳܐ ܚܢܰܢ ܓܶܝܪ ܒܰܣܺܝܡܳܐ ܒܰܡܫܺܝܚܳܐ ܠܰܐܠܳܗܳܐ܃ ܒܰܐܝܠܶܝܢ ܕܚܳܐܶܝܢ܃ ܘܒܼܰܐܝܠܶܝܢ ܕܳܐܒܼܕܺܝܢ܂
02:16 [ai]	ܠܰܐܝܠܶܝܢ܂ ܕܪܺܝܚܳܐ ܕܡܰܘܬܳܐ ܠܡܰܘܬܳܐ܂ ܘܠܰܐܝܠܶܝܢ܂ ܕܪܺܝܚܳܐ ܕܚܰܝ̈ܶܐ ܠܚܰܝ̈ܶܐ܂ ܘܰܠܗܳܠܶܝܢ ܡܰܢܽܘ ܢܶܫܘܶܐ܂
02:17 [ai]	ܠܳܐ ܗ̱ܘܰܝܢ ܓܶܝܪ ܐܰܝܟܼ ܫܰܪܟܿܳܐ܂ ܕܰܡܡܰܙܓܼܺܝܢ ܡܶܠܰܘܗ̱ܝ̈ ܕܰܐܠܳܗܳܐ܂ ܐܶܠܳܐ ܐܰܝܟܼ ܕܒܰܫܪܳܪܳܐ܂ ܘܰܐܝܟܼ ܕܡܶܢ ܐܰܠܳܗܳܐ܂ ܩܕܼܳܡ ܐܰܠܳܗܳܐ ܒܰܡܫܺܝܚܳܐ ܡܡܰܠܠܺܝܢܰܢ܂

next chapter