← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62047: 2Cor

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


03:01 [ai]ܡܫܰܪܶܝܢܰܢ ܠܰܢ ܬܽܘܒܼ ܡܶܢ ܕܪܺܝܫ ܕܰܢܚܰܘܶܝܟܼܽܘܢ ܡܳܢܳܐ ܚܢܰܢ܃ ܐܰܘ ܕܰܠܡܳܐ ܣܢܺܝܩܺܝܢܰܢ ܐܰܝܟܼ ܐ̱ܚܪ̈ܳܢܶܐ܃ ܕܿܶܐܓܿܪ̈ܳܬܼܳܐ ܕܦܽܘܩܳܕܼܶܐ̈ ܢܶܬܼܟܿܰܬܼܒܿܳܢ̈ ܠܟܼܽܘܢ ܥܠܰܝܢ܃ ܐܰܘ ܕܰܐܢ̱ܬܿܽܘܢ ܬܶܟܼܬܿܒܼܽܘܢ ܬܦܼܰܩܕܼܽܘܢ ܥܠܰܝܢ܂
03:02 [ai]ܐܶܓܿܰܪܬܿܰܢ ܕܶܝܢ ܕܺܝܠܰܢ ܐܰܢ̱ܬܿܽܘܢ ܐܶܢܽܘܢ܃ ܕܰܟܼܬܼܺܝܒܼܳܐ ܒܿܠܶܒܰܢ܂ ܘܺܝܕܼܺܝܥܳܐ ܘܡܶܬܼܩܰܪܝܳܐ ܡܶܢ ܟܽܠܢܳܫ܂
03:03 [ai]ܝܳܕܼܥܺܝܬܿܽܘܢ ܓܶܝܪ ܕܶܐܓܿܰܪܬܿܶܗ ܐܰܢ̱ܬܿܽܘܢ ܕܰܡܫܺܝܚܳܐ܂ ܕܶܐܫܬܿܰܡܫܰܬܼ ܡܶܢܰܢ܂ ܕܰܟܼܬܼܺܝܒܼܳܐ܂ ܠܳܐ ܒܰܕܼܝܽܘܬܼܳܐ܃ ܐܶܠܳܐ ܒܪܽܘܚܳܐ ܕܰܐܠܳܗܳܐ ܚܰܝܳܐ܂ ܠܳܐ ܒܠܽܘܚܶܐ̈ ܕܟܺܐܦܼܳܐ܃ ܐܶܠܳܐ ܒܠܽܘܚܶܐ̈ ܕܠܶܒܿܳܐ ܕܒܶܣܪܳܐ܀
03:04 [ai]ܬܽܘܟܼܠܳܢܳܐ ܕܶܝܢ ܗܳܟܼܰܢܳܐ ܐܺܝܬܼ ܠܰܢ ܒܰܡܫܺܝܚܳܐ ܠܘܳܬܼ ܐܰܠܳܗܳܐ܂
03:05 [ai]ܠܰܘ ܕܰܚܢܰܢ ܣܳܦܼܩܺܝܢܰܢ ܕܢܶܬܼܪܰܥܶܐ ܡܶܕܶܡ ܐܰܝܟܼ ܕܡܶܢ ܢܰܦܼܫܰܢ܃ ܐܶܠܳܐ ܚܰܝܠܰܢ ܡܶܢ ܐܰܠܳܗܳܐ ܗܽܘ܂
03:06 [ai]ܗܰܘ ܕܰܐܫܘܰܝܢ ܕܢܶܗܘܶܐ ܡܫܰܡܫܳܢܶܐ̈ ܕܕܼܺܝܰܬܼܺܩܺܐ ܚܕܼܰܬܼܳܐ܃ ܠܳܐ ܒܰܟܼܬܼܳܒܼܳܐ܂ ܐܶܠܳܐ ܒܪܽܘܚܳܐ܂ ܟܬܼܳܒܼܳܐ ܓܶܝܪ ܩܳܛܶܠ܂ ܪܽܘܚܳܐ ܕܶܝܢ ܡܰܚܝܳܐ܂
03:07 [ai]ܐܶܢ ܕܶܝܢ ܬܿܶܫܡܶܫܬܳܐ ܕܡܰܘܬܳܐ ܒܰܟܼܬܼܳܒܼܳܐ ܐܶܬܼܪܰܫܡܰܬܼ ܒܟܺܐܦܼܶܐ̈܂ ܘܰܗܘܳܬܼ ܒܬܶܫܒܿܽܘܚܬܳܐ܃ ܐܰܝܟܿܰܢܳܐ ܕܠܳܐ ܢܶܫܟܿܚܽܘܢ ܒܢܰܝ ܐܺܝܣܪܳܝܶܠ ܠܰܡܚܳܪ ܒܦܰܪܨܽܘܦܿܶܗ ܕܡܽܘܫܶܐ܃ ܡܶܛܽܠ ܫܽܘܒܼܚܳܐ ܕܦܰܪܨܽܘܦܿܶܗ ܗܰܘ ܕܶܐܬܼܒܿܰܛܰܠ܃
03:08 [ai]ܐܰܝܟܿܰܢܳܐ ܗܳܟܼܺܝܠ ܬܿܶܫܡܶܫܬܳܐ ܕܪܽܘܚܳܐ܃ ܠܳܐ ܝܰܬܿܺܝܪܳܐܺܝܬܼ ܬܶܗܘܶܐ ܒܫܽܘܒܼܚܳܐ܃
03:09 [ai]ܐܶܢ ܓܶܝܪ ܠܬܼܶܫܡܶܫܬܳܐ ܕܚܽܘܝܳܒܼܳܐ ܗܘܳܐ ܫܽܘܒܼܚܳܐ܃ ܚܰܕܼ ܟܡܳܐ ܬܶܬܼܝܰܬܿܰܪ ܬܿܶܫܡܶܫܬܳܐ ܕܙܰܕܿܺܝܩܽܘܬܼܳܐ ܒܫܽܘܒܼܚܳܐ܂
03:10 [ai]ܐܰܝܟܼ ܗܰܘ ܓܶܝܪ ܕܳܐܦܼܠܳܐ ܡܫܰܒܿܚܳܐ ܗܳܝ ܕܶܐܫܬܿܰܒܿܚܰܬܼ܃ ܒܦܽܘܚܳܡܳܐ ܕܗܳܢܳܐ ܫܽܘܒܼܚܳܐ ܡܝܰܬܿܪܳܐ܂
03:11 [ai]ܐܶܢ ܓܶܝܪ ܡܶܕܶܡ ܕܶܐܬܼܒܿܰܛܰܠ ܒܫܽܘܒܼܚܳܐ ܗܘܳܐ܃ ܝܰܬܿܺܝܪܳܐܺܝܬܼ ܐܰܝܢܳܐ ܕܰܡܩܰܘܶܐ ܒܫܽܘܒܼܚܳܐ ܢܶܗܘܶܐ܀
03:12 [ai]ܡܶܛܽܠ ܕܺܐܝܬܼ ܠܰܢ ܗܳܟܼܺܝܠ ܗܳܢܳܐ ܣܰܒܼܪܳܐ܃ ܝܰܬܿܺܝܪܳܐܺܝܬܼ ܒܰܓܼܠܶܐ ܥܺܝܢ ܡܶܬܿܕܿܰܒܿܪܺܝܢܰܢ܂
03:13 [ai]ܘܠܳܐ ܐܰܝܟܼ ܡܽܘܫܶܐ܂ ܕܪܳܡܶܐ ܗ̱ܘܳܐ ܬܰܚܦܿܺܝܬܼܳܐ ܥܰܠ ܐܰܦܿܰܘܗ̱ܝ̈܃ ܕܠܳܐ ܢܚܽܘܪܽܘܢ ܒܢܰܝ ܐܺܝܣܪܳܝܶܠ ܒܫܽܘܠܳܡܶܗ ܕܗܰܘ ܕܡܶܬܼܒܿܰܛܰܠ܂
03:14 [ai]ܐܶܠܳܐ ܐܶܬܼܥܰܘܰܪܘ ܒܡܰܕܿܥܰܝܗܽܘܢ̈܂ ܥܕܼܰܡܳܐ ܓܶܝܪ ܠܝܰܘܡܳܢܳܐ܃ ܐܶܡܰܬܼܝ ܕܕܼܺܝܰܬܼܺܩܺܐ ܥܰܬܿܺܝܩܬܳܐ ܡܶܬܼܩܰܪܝܳܐ܃ ܗܺܝ ܗܳܝ ܬܰܚܦܿܺܝܬܼܳܐ ܩܳܝܡܳܐ ܥܠܰܝܗܽܘܢ܂ ܘܠܳܐ ܡܶܬܼܓܰܠܝܳܐ܂ ܕܒܰܡܫܺܝܚܳܐ ܗܽܘ ܡܶܬܼܒܿܰܛܠܳܐ܂
03:15 [ai]ܘܰܥܕܼܰܡܳܐ ܠܝܰܘܡܳܢܳܐ܃ ܐܶܡܰܬܼܝ ܕܡܶܬܼܩܪܶܐ ܡܽܘܫܶܐ܃ ܬܰܚܦܿܺܝܬܼܳܐ ܥܰܠ ܠܶܒܗܽܘܢ ܪܰܡܝܳܐ܂
03:16 [ai]ܘܶܐܡܰܬܼܝ ܕܐ̱ܢܳܫ ܡܶܢܗܽܘܢ ܢܶܬܼܦܿܢܶܐ ܠܘܳܬܼ ܡܳܪܝܳܐ܃ ܡܶܫܬܿܰܩܠܳܐ ܡܶܢܶܗ ܬܰܚܦܿܺܝܬܼܳܐ܂
03:17 [ai]ܡܳܪܝܳܐ ܕܶܝܢ ܗܽܘܝܽܘ ܪܽܘܚܳܐ܃ ܘܰܐܬܼܰܪ ܕܪܽܘܚܶܗ ܕܡܳܪܝܳܐ܂ ܚܺܐܪܽܘܬܼܳܐ ܗ̱ܝ܂
03:18 [ai]ܚܢܰܢ ܕܶܝܢ ܟܽܠܰܢ ܒܰܐܦܿܶܐ̈ ܓܰܠܝܳܬܼܳܐ̈܃ ܬܶܫܒܿܽܘܚܬܿܶܗ ܕܡܳܪܝܳܐ ܐܰܝܟܼ ܕܰܒܼܡܰܚܙܺܝܬܼܳܐ ܚܳܙܶܝܢܰܢ܂ ܘܠܳܗ ܠܰܕܼܡܽܘܬܼܳܐ ܡܶܫܬܿܰܚܠܦܼܺܝܢܰܢ܃ ܡܶܢ ܫܽܘܒܼܚܳܐ ܠܫܽܘܒܼܚܳܐ܃ ܐܰܝܟܼ ܕܡܶܢ ܡܳܪܝܳܐ ܪܽܘܚܳܐ܀

next chapter