← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62047: 2Cor

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


04:01 [ai]ܡܶܛܽܠ ܗܳܢܳܐ ܠܳܐ ܡܳܐܢܳܐ ܠܰܢ ܒܬܶܫܡܶܫܬܳܐ ܗܳܕܼܶܐ ܕܰܐܚܺܝܕܼܺܝܢܰܢ܃ ܐܰܝܟܼ ܪ̈ܰܚܡܶܐ ܕܰܗܘܰܘ܂ ܥܠܰܝܢ܂
04:02 [ai]ܐܶܠܳܐ ܐܰܣܠܺܝܢܰܢ ܟܰܣܝܳܬܼܳܗ̈ ܕܒܶܗܬܿܬܼܳܐ܂ ܘܠܳܐ ܡܗܰܠܟܼܺܝܢܰܢ ܒܚܳܪܥܽܘܬܼܳܐ܂ ܘܠܳܐ ܢܳܟܼܠܺܝܢܰܢ ܡܶܠܬܼܶܗ ܕܰܐܠܳܗܳܐ܂ ܐܶܠܳܐ ܒܓܰܠܝܽܘܬܼܳܐ ܕܰܫܪܳܪܳܐ ܡܚܰܘܶܝܢܰܢ ܢܰܦܼܫܰܢ܂ ܠܟܼܽܠܗܽܘܢ ܪ̈ܶܥܝܳܢܶܐ ܕܿܰܒܼܢܰܝܢܳܫܳܐ ܩܕܼܳܡ ܐܰܠܳܗܳܐ܂
04:03 [ai]ܘܶܐܢ ܕܶܝܢ ܡܟܼܰܣܰܝ ܗ̱ܽܘ ܐܶܘܰܢܓܿܶܠܺܝܳܘܢ ܕܺܝܠܰܢ܃ ܠܰܐܝܠܶܝܢ ܕܳܐܒܼܕܺܝܢ ܗ̱ܽܘ ܡܟܼܰܣܰܝ܂
04:04 [ai]ܐܰܝܠܶܝܢ ܕܰܐܠܳܗܶܗ ܕܥܳܠܡܳܐ ܗܳܢܳܐ ܥܰܘܰܪ ܡܰܕܿܥܰܝܗܽܘܢ̈܂ ܥܰܠ ܕܠܳܐ ܡܗܰܝܡܢܺܝܢ܃ ܕܠܳܐ ܢܶܕܼܢܰܚ ܠܗܽܘܢ ܢܽܘܗܪܶܗ ܕܶܐܘܰܢܓܿܶܠܺܝܳܘܢ ܕܫܽܘܒܼܚܶܗ ܕܰܡܫܺܝܚܳܐ܃ ܕܗܽܘܝܽܘ ܕܡܽܘܬܼܶܗ ܕܰܐܠܳܗܳܐ܂
04:05 [ai]ܠܳܐ ܗ̱ܘܳܐ ܓܶܝܪ ܢܰܦܼܫܰܢ ܡܰܟܼܪܙܺܝܢܰܢ܃ ܐܶܠܳܐ ܠܰܡܫܺܝܚܳܐ ܝܶܫܽܘܥ ܡܳܪܰܢ܂ ܠܢܰܦܼܫܰܢ ܕܶܝܢ܂ ܕܥܰܒܼܕܿܰܝܟܿܽܘܢ̈ ܚܢܰܢ ܡܶܛܽܠ ܝܶܫܽܘܥ܂
04:06 [ai]ܡܶܛܽܠ ܕܰܐܠܳܗܳܐ ܗܽܘ ܕܶܐܡܰܪ ܕܡܶܢ ܚܶܫܽܘܟܼܳܐ ܢܽܘܗܪܳܐ ܢܶܕܼܢܰܚ܂ ܗܽܘ ܕܢܰܚ ܒܠܶܒܿܰܘܳܬܼܰܢ̈܃ ܕܢܶܬܼܢܰܗܰܪ ܒܺܝܕܼܰܥܬܼܳܐ ܕܫܽܘܒܼܚܶܗ ܕܰܐܠܳܗܳܐ܃ ܒܦܰܪܨܽܘܦܿܶܗ ܕܝܶܫܽܘܥ ܡܫܺܝܚܳܐ܀
04:07 [ai]ܐܺܝܬܼ ܠܰܢ ܕܶܝܢ ܣܺܝܡܬܼܳܐ ܗܳܕܼܶܐ ܒܡܳܐܢܳܐ ܕܚܶܨܦܿܳܐ܃ ܕܪܰܒܿܽܘܬܼܳܐ ܕܚܰܝܠܳܐ ܡܶܢ ܐܰܠܳܗܳܐ ܬܶܗܘܶܐ܂ ܘܠܳܐ ܡܶܢܰܢ܂
04:08 [ai]ܒܟܽܠܡܶܕܶܡ ܓܶܝܪ ܡܶܬܼܰܐܠܨܺܝܢܰܢ܂ ܐܶܠܳܐ ܠܳܐ ܡܶܬܼܚܰܢܩܺܝܢܰܢ܂ ܡܶܬܿܛܰܪܦܼܺܝܢܰܢ܂ ܐܶܠܳܐ ܠܳܐ ܚܰܝܳܒܼܺܝܢ ܚ̱ܢܰܢ܂
04:09 [ai]ܡܶܬܼܪܰܕܼܦܿܺܝܢܰܢ܂ ܐܶܠܳܐ ܠܳܐ ܡܶܫܬܿܰܒܼܩܺܝܢܰܢ܂ ܡܶܣܬܿܰܚܦܿܺܝܢܰܢ܂ ܐܶܠܳܐ ܠܳܐ ܐܳܒܼܕܺܝܢܰܢ܂
04:10 [ai]ܒܟܽܠܙܒܼܰܢ ܡܺܝܬܼܽܘܬܼܶܗ ܕܝܶܫܽܘܥ ܒܦܰܓܼܪ̈ܰܝܢ ܫܩܺܝܠܺܝܢܰܢ܃ ܕܳܐܦܼ ܚܰܝܰܘܗ̱ܝ̈ ܕܝܶܫܽܘܥ ܒܦܰܓܼܪ̈ܰܝܢ ܢܶܬܼܓܿܠܽܘܢ܂
04:11 [ai]ܐܶܢ ܚܢܰܢ ܓܶܝܪ ܚܰܝ̈ܶܐ ܠܡܰܘܬܳܐ ܡܶܫܬܿܰܠܡܺܝܢܰܢ܂ ܡܶܛܽܠ ܝܶܫܽܘܥ܃ ܗܳܟܼܰܢܳܐ ܐܳܦܼ ܚܰܝܰܘܗ̱ܝ̈ ܕܝܶܫܽܘܥ ܢܶܬܼܓܿܠܽܘܢ ܒܦܰܓܼܪܰܢ ܗܳܢܳܐ ܕܡܳܐܶܬܼ܂
04:12 [ai]ܗܳܫܳܐ ܡܰܘܬܳܐ ܒܰܢ ܡܶܬܼܚܰܦܿܰܛ܃ ܘܚܰܝ̈ܶܐ ܒܟܽܘܢ܂
04:13 [ai]ܐܳܦܼ ܚܢܰܢ ܗܳܟܼܺܝܠ ܕܰܚܕܼܳܐ ܗ̱ܝ ܪܽܘܚܳܐ ܕܗܰܝܡܳܢܽܘܬܼܳܐ ܐܺܝܬܼ ܠܰܢ܂ ܐܰܝܟܼ ܕܰܟܼܬܼܺܝܒܼ܃ ܕܗܰܝܡܢܶܬܼ܂ ܡܶܛܽܠ ܗܳܢܳܐ ܐܳܦܼ ܡܰܠܠܶܬܼ܂ ܡܗܰܝܡܢܺܝܢܰܢ܃ ܡܶܛܽܠ ܗܳܢܳܐ ܐܳܦܼ ܡܡܰܠܠܺܝܢܰܢ܂
04:14 [ai]ܘܝܳܕܼܥܺܝܢܰܢ ܕܗܰܘ ܡܰܢ ܕܰܐܩܺܝܡ ܠܡܳܪܰܢ ܝܶܫܽܘܥ܃ ܐܳܦܼ ܠܰܢ ܒܝܰܕܼ ܝܶܫܽܘܥ ܢܩܺܝܡ܃ ܘܰܢܩܰܪܒܼܰܢ ܥܰܡܟܼܽܘܢ ܠܘܳܬܼܶܗ܂
04:15 [ai]ܟܽܠܡܶܕܶܡ ܓܶܝܪ ܡܶܛܽܠܳܬܼܟܼܽܘܢ ܗ̱ܽܘ܂ ܕܟܰܕܼ ܡܶܬܼܝܰܬܿܪܳܐ ܛܰܝܒܿܽܘܬܼܳܐ ܒܝܰܕܼ ܣܰܓܿܺܝܶܐܐ̈܃ ܬܶܣܓܿܶܐ ܬܰܘܕܿܺܝܬܼܳܐ ܠܫܽܘܒܼܚܶܗ ܕܰܐܠܳܗܳܐ ܿ܀ܿ܀ܿ
04:16 [ai]ܡܶܛܽܠ ܗܳܢܳܐ ܠܳܐ ܡܳܐܢܳܐ ܠܰܢ܂ ܐܳܦܼ ܐܶܢ ܒܰܪܢܳܫܰܢ ܓܶܝܪ ܒܰܪܳܝܳܐ ܡܶܬܼܚܰܒܿܰܠ܃ ܐܶܠܳܐ ܕܡܶܢ ܠܓܼܰܘ ܡܶܬܼܚܰܕܿܰܬܼ ܝܽܘܡ ܡܶܢ ܝܽܘܡ܂
04:17 [ai]ܐܽܘܠܨܳܢܶܗ ܓܶܝܪ ܕܙܰܒܼܢܳܐ ܗܳܢܳܐ܂ ܟܰܕܼ ܛܳܒܼ ܙܥܽܘܪ ܘܩܰܠܺܝܠ܃ ܫܽܘܒܼܚܳܐ ܪܰܒܿܳܐ ܕܠܳܐ ܣܳܟܼܳܐ ܠܥܳܠܰܡ ܥܳܠܡܺܝܢ ܡܛܰܝܶܒܼ ܠܰܢ܂
04:18 [ai]ܕܠܳܐ ܚܳܕܼܶܝܢܰܢ ܒܗܳܠܶܝܢ ܕܡܶܬܼܚܰܙܝܳܢ̈܃ ܐܶܠܳܐ ܒܗܳܠܶܝܢ ܕܠܳܐ ܡܶܬܼܚܰܙܝܳܢ̈܂ ܕܡܶܬܼܚܰܙܝܳܢ̈ ܓܶܝܪ ܕܙܰܒܼܢܳܐ ܐܶܢܶܝܢ̈܃ ܕܠܳܐ ܡܶܬܼܚܰܙܝܳܢ̈ ܕܶܝܢ ܕܰܠܥܳܠܰܡ ܐܶܢܶܝܢ̈܀

next chapter