← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62047: 2Cor

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


05:01 [ai]ܝܳܕܼܥܺܝܢܰܢ ܓܶܝܪ ܕܶܐܢ ܒܰܝܬܿܰܢ ܕܒܰܐܪܥܳܐ ܗܳܢܳܐ ܕܦܰܓܼܪܳܐ ܢܶܫܬܿܪܶܐ܃ ܐܶܠܳܐ ܐܺܝܬܼ ܠܰܢ ܒܶܢܝܳܢܳܐ ܕܡܶܢ ܐܰܠܳܗܳܐ܃ ܒܰܝܬܳܐ ܕܠܳܐ ܒܰܥܒܼܳܕܼ ܐܺܝܕܼܰܝܳܐ̈ ܒܰܫܡܰܝܳܐ ܠܥܳܠܰܡ܂
05:02 [ai]ܐܳܦܼ ܥܰܠ ܗܳܕܼܶܐ ܓܶܝܪ ܡܶܬܿܬܿܰܢܚܺܝܢܰܢ܃ ܘܰܣܘܶܝܢܰܢ ܕܢܶܠܒܿܰܫ ܒܰܝܬܿܰܢ ܕܡܶܢ ܫܡܰܝܳܐ܃
05:03 [ai]ܐܶܠܳܐ ܐܳܦܼ ܡܳܐ ܕܰܠܒܼܶܫܢ܂ ܢܶܫܬܿܟܼܰܚ ܠܰܢ ܥܰܪܛܶܠ܂
05:04 [ai]ܟܰܕܼ ܐܺܝܬܼܰܝܢ ܓܶܝܪ ܗܳܫܳܐ ܒܗܳܢܳܐ ܒܰܝܬܳܐ܃ ܡܶܬܿܬܿܰܢܚܺܝܢܰܢ ܡܶܢ ܝܽܘܩܪܶܗ܂ ܘܠܳܐ ܨܳܒܼܶܝܢܰܢ ܠܡܶܫܠܚܶܗ܃ ܐܶܠܳܐ ܕܢܶܠܒܿܰܫ ܠܥܶܠ ܡܶܢܶܗ܃ ܕܬܶܬܼܒܿܠܰܥ ܡܺܝܬܼܽܘܬܼܶܗ ܒܚܰܝ̈ܶܐ܂
05:05 [ai]ܘܕܼܰܡܥܰܬܿܶܕܼ ܠܰܢ ܠܳܗ ܠܗܳܕܼܶܐ܂ ܐܰܠܳܗܳܐ ܗܽܘ܂ ܗܰܘ ܕܝܰܗ̱ܒܼ ܠܰܢ ܪܰܗܒܼܽܘܢܳܐ ܕܪܽܘܚܶܗ܀
05:06 [ai]ܡܶܛܽܠ ܕܝܳܕܼܥܺܝܢܰܢ ܗܳܟܼܺܝܠ ܘܰܡܦܿܳܣܺܝܢܰܢ܃ ܕܰܟܼܡܳܐ ܕܰܒܼܦܼܰܓܼܪܳܐ ܫܪܶܝܢܰܢ܂ ܥܰܢܺܝܕܼܺܝܢܰܢ ܡܶܢ ܡܳܪܰܢ܃
05:07 [ai]ܒܗܰܝܡܳܢܽܘܬܼܳܐ ܗܽܘ ܓܶܝܪ ܡܗܰܠܟܼܺܝܢܰܢ ܘܠܳܐ ܒܰܚܙܳܝܳܐ܃
05:08 [ai]ܡܶܛܽܠ ܗܳܢܳܐ ܬܟܼܺܝܠܺܝܢܰܢ ܘܰܡܣܰܘܚܺܝܢܰܢ܃ ܕܢܶܥܢܰܕܼ ܡܶܢ ܦܰܓܼܪܳܐ܂ ܘܢܶܗܘܶܐ ܠܘܳܬܼ ܡܳܪܰܢ܂
05:09 [ai]ܘܡܶܬܼܚܰܦܿܛܺܝܢܰܢ܂ ܕܶܐܢ ܥܳܢܽܘܕܼܶܐ̈ ܚܢܰܢ܂ ܘܶܐܢ ܥܳܡܽܘܪ̈ܶܐ܃ ܠܶܗ ܗܘܰܝܢ ܫܳܦܼܪܺܝܢ܂
05:10 [ai]ܟܽܠܰܢ ܓܶܝܪ ܥܬܼܺܝܕܼܺܝܢܰܢ ܠܰܡܩܳܡ ܩܕܼܳܡ ܒܺܝܡ ܕܰܡܫܺܝܚܳܐ܃ ܕܢܶܬܼܦܪܰܥ ܐ̱ܢܳܫ ܐ̱ܢܳܫ ܒܦܰܓܼܪܶܗ ܡܶܕܶܡ ܕܰܥܒܼܺܝܕܼ ܠܶܗ܃ ܐܶܢ ܕܛܳܒܼ ܘܶܐܢ ܕܒܺܝܫ܀
05:11 [ai]ܡܶܛܽܠ ܕܝܳܕܼܥܺܝܢܰܢ ܗܳܟܼܺܝܠ ܕܶܚܠܬܼܶܗ ܕܡܳܪܰܢ܃ ܠܰܒܼܢܰܝܢܳܫܳܐ ܗܽܘ ܡܦܿܺܝܣܺܝܢܰܢ܂ ܠܰܐܠܳܗܳܐ ܕܶܝܢ ܓܠܶܝܢܰܢ܂ ܣܳܒܼܰܪ ܐ̱ܢܳܐ ܕܶܝܢ ܕܳܐܦܼ ܠܡܰܕܿܥܰܝܟܿܽܘܢ̈ ܕܺܝܠܟܼܽܘܢ ܓܠܶܝܢܰܢ܂
05:12 [ai]ܠܳܐ ܗ̱ܘܳܐ ܬܽܘܒܼ ܢܰܦܼܫܰܢ ܡܫܰܒܿܚܺܝܢܰܢ ܠܟܼܽܘܢ܂ ܐܶܠܳܐ ܥܶܠܬܼܳܐ ܗܽܘ ܝܳܗܒܺܝܢܰܢ ܠܟܼܽܘܢ܃ ܕܰܗܘܰܝܬܿܽܘܢ ܡܶܫܬܿܰܒܼܗܪܺܝܢ ܒܰܢ܃ ܠܘܳܬܼ ܗܳܢܽܘܢ ܕܒܰܐܦܿܶܐ̈ ܗ̱ܘ ܡܶܫܬܿܰܒܼܗܪܺܝܢ܂ ܘܠܳܐ ܒܠܶܒܿܳܐ܂
05:13 [ai]ܐܶܢ ܓܶܝܪ ܫܳܛܶܝܢܰܢ܂ ܠܰܐܠܳܗܳܐ܂ ܘܶܐܢ ܬܰܩܢܺܝܢܰܢ܂ ܠܟܼܽܘܢ܂
05:14 [ai]ܚܽܘܒܶܗ ܓܶܝܪ ܕܰܡܫܺܝܚܳܐ ܐܳܠܶܨ ܠܰܢ܃ ܕܪܳܢܶܝܢܰܢ ܗܳܕܼܶܐ܂ ܕܚܰܕܼ ܚܠܳܦܼ ܟܽܠܢܳܫ ܡܺܝܬܼ܂ ܡܳܕܼܶܝܢ ܟܽܠܢܳܫ ܡܺܝܬܼ ܠܶܗ܂
05:15 [ai]ܘܰܚܠܳܦܼ ܟܽܠܢܳܫ ܗܽܘ ܡܺܝܬܼ܃ ܕܰܐܝܠܶܝܢ ܕܚܰܝܺܝܢ ܠܳܐ ܠܢܰܦܼܫܗܽܘܢ ܢܺܚܽܘܢ܃ ܐܶܠܳܐ ܠܗܰܘ ܐܰܝܢܳܐ ܕܥܰܠ ܐܰܦܿܰܝܗܽܘܢ̈ ܡܺܝܬܼ ܘܩܳܡ܂
05:16 [ai]ܘܡܶܟܿܺܝܠ ܚܢܰܢ ܠܐ̱ܢܳܫ ܒܰܦܼܓܼܰܪ ܠܳܐ ܝܳܕܼܥܺܝܢܰܢ܂ ܘܶܐܢ ܺܝܕܼܰܥܢ ܒܰܦܼܓܼܰܪ ܠܰܡܫܺܝܚܳܐ܃ ܐܶܠܳܐ ܡܶܢ ܗܳܫܳܐ ܠܳܐ ܝܳܕܼܥܺܝܢܰܢ܂
05:17 [ai]ܟܽܠ ܡܰܢ ܕܒܰܡܫܺܝܚܳܐ ܗܽܘ ܗܳܟܼܺܝܠ܃ ܒܪܺܝܬܼܳܐ ܗܽܘ ܚܕܼܰܬܼܳܐ܂ ܥܰܬܿܺܝܩܳܬܼܳܐ̈ ܥܒܼܰܪ ܠܗܶܝܢ܃
05:18 [ai]ܘܟܼܽܠ ܡܶܕܶܡ ܗܘܳܐ ܚܰܕܼ̱ܬܼܳܐ ܡܶܢ ܐܰܠܳܗܳܐ܃ ܗܰܘ ܕܪܰܥܝܰܢ ܠܶܗ ܒܰܡܫܺܝܚܳܐ܃ ܘܝܰܗ̱ܒܼ ܠܰܢ ܬܿܶܫܡܶܫܬܳܐ ܕܬܰܪܥܽܘܬܼܳܐ܂
05:19 [ai]ܐܰܠܳܗܳܐ ܗ̱ܘܳܐ ܓܶܝܪ ܒܰܡܫܺܝܚܳܐ܃ ܗܰܘ ܕܪܰܥܺܝ ܠܥܳܠܡܳܐ ܥܰܡ ܪܰܒܿܽܘܬܼܶܗ܂ ܘܠܳܐ ܚܫܰܒܼ ܠܗܽܘܢ ܚܛܳܗܰܝܗܽܘܢ̈܃ ܘܣܳܡ ܒܰܢ ܕܺܝܠܰܢ ܡܶܠܬܼܳܐ ܕܬܰܪܥܽܘܬܼܳܐ܂
05:20 [ai]ܐܺܝܙܓܿܰܕܿܶܐ̈ ܚܢܰܢ ܗܳܟܼܺܝܠ ܚܠܳܦܼ ܡܫܺܝܚܳܐ܂ ܘܰܐܝܟܼ ܗܰܘ ܕܰܐܠܳܗܳܐ ܒܿܳܥܶܐ ܡܶܢܟܼܽܘܢ ܒܺܐܝܕܼܰܢ܃ ܚܠܳܦܼ ܡܫܺܝܚܳܐ ܗܳܟܼܺܝܠ ܒܿܳܥܶܝܢܰܢ܂ ܐܶܬܼܪܰܥܰܘ ܠܰܐܠܳܗܳܐ܂
05:21 [ai]ܗܰܘ ܓܶܝܪ ܕܠܳܐ ܝܳܕܼܰܥ ܗ̱ܘܳܐ ܚܛܺܝܬܼܳܐ܃ ܡܶܛܽܠܳܬܼܟܼܽܘܢ ܚܛܺܝܬܼܳܐ ܥܰܒܼܕܿܶܗ܃ ܕܰܚܢܰܢ ܢܶܗܘܶܐ ܒܶܗ ܙܰܕܿܺܝܩܽܘܬܼܳܐ ܕܰܐܠܳܗܳܐ܀

next chapter