The Comprehensive Aramaic Lexicon

07:01 [ai]	ܡܶܛܽܠ ܕܺܐܝܬܼ ܠܰܢ ܗܳܟܼܺܝܠ ܗܳܠܶܝܢ ܡܽܘܠܟܿܳܢܶܐ̈ ܚܰܒܺܝܒܼܝ܃ ܢܕܼܰܟܿܶܐ ܢܰܦܼܫܰܢ ܡܶܢ ܟܽܠܳܗ ܛܰܡܐܘܽܬܼܳܐ ܕܒܶܣܪܳܐ ܘܰܕܼܪܽܘܚܳܐ܃ ܘܢܶܦܼܠܽܘܚ ܩܰܕܿܺܝܫܽܘܬܼܳܐ ܒܕܶܚܠܬܼܳܐ ܕܰܐܠܳܗܳܐ܂
07:02 [ai]	ܣܰܝܒܰܪܽܘܢ ܐܰܚܰܝܢ̈܃ ܒܐ̱ܢܳܫ ܠܳܐ ܐܰܥܘܶܠܢ܂ ܠܐ̱ܢܳܫ ܠܳܐ ܚܰܒܿܶܠܢ܂ ܠܐ̱ܢܳܫ ܠܳܐ ܥܠܰܒܼܢ܂
07:03 [ai]	ܠܳܐ ܗ̱ܘܳܐ ܠܰܡܚܰܝܳܒܼܽܘܬܼܟܼܽܘܢ ܐܳܡܰܪ ܐ̱ܢܳܐ܂ ܩܰܕܿܡܶܬܼ ܓܶܝܪ ܐܶܡܪܶܬܼ܂ ܕܿܰܒܼܠܶܒܰܢ ܐܰܢ̱ܬܿܽܘܢ ܠܰܡܡܳܬܼ ܐܰܟܼܚܕܼܳܐ܂ ܘܰܠܡܶܚܳܐ܂
07:04 [ai]	ܦܰܪܶܗ̱ܣܺܝܰܐ ܣܰܓܿܺܝܐܬܼܳܐ ܐܺܝܬܼ ܠܺܝ ܠܘܳܬܼܟܼܽܘܢ܂ ܘܣܰܓܿܺܝ ܐܺܝܬܼ ܠܺܝ ܒܟܽܘܢ ܫܽܘܒܼܗܳܪܳܐ܂ ܘܰܡܠܶܐ ܐ̱ܢܳܐ ܒܽܘܝܳܐܳܐ܂ ܘܣܽܘܓܼܳܐܐ ܡܶܬܼܝܰܬܿܪܳܐ ܒܺܝ ܚܰܕܼܽܘܬܼܳܐ ܒܟܽܠܗܽܘܢ ܐܽܘܠܨܳܢܰܝ̈܂
07:05 [ai]	ܐܳܦܼ ܡܶܢ ܕܶܐܬܼܰܝܢ ܓܶܝܪ ܠܡܰܩܶܕܼܳܘܢܳܝܶܐ̈܃ ܐܳܦܼܠܳܐ ܚܰܕܼ ܢܝܳܚ ܗܘܳܐ ܠܦܼܰܓܼܪܰܢ܃ ܐܶܠܳܐ ܒܟܽܠ ܡܶܕܶܡ ܐܶܬܼܶܐܠܶܨܢ܃ ܡܶܢ ܠܒܼܰܪ ܩܪܳܒܼܳܐ܂ ܘܡܶܢ ܠܓܼܰܘ ܕܶܚܠܬܼܳܐ܂
07:06 [ai]	ܐܶܠܳܐ ܐܰܠܳܗܳܐ܂ ܗܰܘ ܕܰܡܒܼܰܝܰܐ ܠܡܰܟܿܺܝܟܼܶܐ̈܃ ܒܰܝܰܐܢ ܒܡܶܐܬܼܺܝܬܼܶܗ ܕܛܺܛܳܘܣ܂
07:07 [ai]	ܘܠܳܐ ܒܰܠܚܽܘܕܼ ܒܡܶܐܬܼܺܝܬܼܶܗ܃ ܐܶܠܳܐ ܐܳܦܼ ܒܰܢܝܳܚܶܗ ܗܰܘ ܕܶܐܬܿܢܺܝܚ ܒܟܽܘܢ܂ ܣܰܒܪܰܢ ܓܶܝܪ ܥܰܠ ܚܽܘܒܟܽܘܢ ܕܰܠܘܳܬܼܰܢ܃ ܘܥܰܠ ܐܶܒܼܠܟܼܽܘܢ ܘܰܛܢܳܢܟܼܽܘܢ ܕܥܰܠ ܐܰܦܿܰܝܢ̈܂ ܘܟܼܰܕܼ ܫܶܡܥܶܬܼ܃ ܚܰܕܼܽܘܬܼܳܐ ܣܰܓܿܺܝܐܬܼܳܐ ܗܘܳܬܼ ܠܺܝ܂
07:08 [ai]	ܕܳܐܦܼܶܢ ܐܰܟܼܪܺܝܬܼ ܠܟܼܽܘܢ ܒܶܐܓܿܰܪܬܳܐ܃ ܠܳܐ ܬܳܘܝܳܐ ܠܺܝ ܢܰܦܼܫܝ܃ ܐܳܦܼܶܢ ܬܳܘܝܳܐ ܗ̱ܘܳܬܼ܂ ܚܳܙܶܐ ܐ̱ܢܳܐ ܓܶܝܪ ܕܗܺܝ ܐܶܓܿܰܪܬܳܐ܂ ܐܳܦܼܶܢ ܕܫܳܥܬܼܳܐ ܐܰܟܼܪܝܰܬܼ ܠܟܼܽܘܢ܃
07:09 [ai]	ܐܶܠܳܐ ܚܰܕܼܽܘܬܼܳܐ ܣܰܓܿܺܝܐܬܼܳܐ ܥܶܒܼܕܿܰܬܼ ܠܺܝ܂ ܠܳܐ ܥܰܠ ܕܟܶܪܝܰܬܼ ܠܟܼܽܘܢ܃ ܐܶܠܳܐ ܡܶܛܽܠ ܕܟܰܪܝܽܘܬܼܟܼܽܘܢ ܠܰܬܼܝܳܒܼܽܘܬܼܳܐ ܐܰܝܬܿܝܰܬܼܟܼܽܘܢ܂ ܟܶܪܝܰܬܼ ܠܟܼܽܘܢ ܓܶܝܪ ܒܕܰܐܠܳܗܳܐ܃ ܐܰܝܟܿܰܢܳܐ ܕܰܒܼܡܶܕܶܡ ܠܳܐ ܬܶܚܣܪܽܘܢ ܡܶܢܰܢ܂
07:10 [ai]	ܟܰܪܝܽܘܬܼܳܐ ܓܶܝܪ ܕܡܶܛܽܠ ܐܰܠܳܗܳܐ܂ ܬܘܳܬܼ ܢܰܦܼܫܳܐ ܥܳܒܼܕܿܳܐ ܕܠܳܐ ܗܳܦܼܟܿܳܐ܂ ܘܡܰܦܼܢܝܳܐ ܠܚܰܝ̈ܶܐ܃ ܟܰܪܝܽܘܬܼܳܐ ܕܶܝܢ ܕܥܳܠܡܳܐ ܡܰܘܬܳܐ ܗܽܘ ܥܳܒܼܕܿܳܐ܂
07:11 [ai]	ܗܳܐ ܓܶܝܪ ܗܺܝ ܗܳܕܼܶܐ ܕܶܐܬܿܬܿܥܺܝܩܬܿܽܘܢ ܡܶܛܽܠ ܐܰܠܳܗܳܐ܃ ܟܡܳܐ ܐܰܥܒܿܕܼܰܬܼ ܒܟܽܘܢ ܚܦܼܺܝܛܽܘܬܼܳܐ܂ ܘܡܰܦܿܰܩ ܒܪܽܘܚܳܐ܂ ܘܪܽܘܓܼܙܳܐ܂ ܘܕܼܶܚܠܬܼܳܐ܂ ܘܚܽܘܒܿܳܐ܂ ܘܰܛܢܳܢܳܐ܂ ܘܰܬܼܒܼܰܥܬܼܳܐ܂ ܘܰܒܟܼܽܠܡܶܕܶܡ ܚܰܘܺܝܬܿܽܘܢ ܢܰܦܼܫܟܼܽܘܢ܃ ܕܰܕܼܟܼܶܝܢ ܐܢ̱ܬܿܽܘܢ ܒܿܳܗ ܒܰܨܒܼܽܘܬܼܳܐ܂
07:12 [ai]	ܬܶܗܘܶܐ ܕܶܝܢ ܗܳܕܼܶܐ ܕܟܶܬܼܒܿܶܬܼ ܠܟܼܽܘܢ܃ ܕܠܳܐ ܗ̱ܘܳܐ ܡܶܛܽܠ ܡܰܣܟܠܳܢܳܐ܃ ܐܳܦܼܠܳܐ ܡܶܛܽܠ ܗܰܘ ܡܰܢ ܕܡܰܣܟܿܰܠ ܒܶܗ܃ ܐܶܠܳܐ ܡܶܛܽܠ ܕܬܶܬܼܺܝܕܼܰܥ ܩܕܼܳܡ ܐܰܠܳܗܳܐ ܚܦܼܺܝܛܽܘܬܼܟܼܽܘܢ ܕܡܶܛܽܠܳܬܼܰܢ܂
07:13 [ai]	ܡܶܛܽܠ ܗܳܢܳܐ ܐܶܬܼܒܰܝܰܐܢ܂ ܘܥܰܡ ܒܽܘܝܳܐܰܢ ܝܰܬܿܺܝܪܳܐܺܝܬܼ ܚܕܼܺܝܢ ܒܚܰܕܼܽܘܬܼܶܗ ܕܛܺܛܳܘܣ܃ ܕܶܐܬܿܢܺܝܚܰܬܼ ܪܽܘܚܶܗ ܥܰܡ ܟܽܠܟܼܽܘܢ܂
07:14 [ai]	ܕܰܒܼܡܶܕܶܡ ܕܶܐܫܬܿܰܒܼܗܪܶܬܼ ܠܶܗ ܥܰܠ ܐܰܦܿܰܝܟܿܽܘܢ̈܂ ܠܳܐ ܒܶܗܬܿܶܬܼ܂ ܐܶܠܳܐ ܐܰܝܟܼ ܕܟܽܠܡܶܕܶܡ ܩܽܘܫܬܳܐ ܡܰܠܶܠܢ ܥܰܡܟܼܽܘܢ܃ ܗܳܟܼܰܢܳܐ ܐܳܦܼ ܫܽܘܒܼܗܳܪܰܢ ܕܰܠܘܳܬܼ ܛܺܛܳܘܣ ܒܩܽܘܫܬܳܐ ܐܶܫܬܿܟܼܰܚ܂
07:15 [ai]	ܐܳܦܼ ܪ̈ܰܚܡܰܘܗ̱ܝ ܝܰܬܿܺܝܪܳܐܺܝܬܼ ܣܓܼܺܝܘ ܥܠܰܝܟܿܽܘܢ܃ ܟܰܕܼ ܡܶܬܿܕܿܟܼܰܪ ܡܶܫܬܿܰܡܥܳܢܽܘܬܼܳܐ ܕܟܽܠܟܼܽܘܢ܃ ܕܰܒܼܕܼܶܚܠܬܼܳܐ ܘܒܼܰܪܬܼܺܝܬܼܳܐ ܩܰܒܿܶܠܬܿܽܘܢܳܝܗ̱ܝ܂
07:16 [ai]	ܚܳܕܼܶܐ ܐ̱ܢܳܐ ܕܰܒܼܟܼܽܠ ܡܶܕܶܡ ܬܟܼܺܝܠ ܐ̱ܢܳܐ ܥܠܰܝܟܿܽܘܢ܀

next chapter