The Comprehensive Aramaic Lexicon

08:01 [ai]	ܡܰܘܕܥܺܝܢܰܢ ܠܟܼܽܘܢ ܕܶܝܢ ܐܰܚܰܝܢ̈܃ ܛܰܝܒܿܽܘܬܼܶܗ ܕܰܐܠܳܗܳܐ ܕܶܐܬܼܝܰܗܒܿܰܬܼ ܒܥܺܕܼܳܬܼܳܐ̈ ܕܡܰܩܶܕܼܳܘܢܳܝܶܐ̈܂
08:02 [ai]	ܕܰܒܼܒܼܽܘܩܝܳܐ ܣܰܓܿܺܝܳܐܐ ܕܽܐܘܠܨܳܢܗܽܘܢ܂ ܝܰܬܿܺܝܪܽܘܬܼܳܐ ܗܘܳܬܼ ܠܚܰܕܼܘܰܬܼܗܽܘܢ܃ ܘܥܽܘܡܩܳܐ ܕܡܶܣܟܿܺܢܽܘܬܼܗܽܘܢ ܐܶܬܼܝܰܬܿܰܪ ܒܥܽܘܬܼܪܳܐ ܕܰܦܼܫܺܝܛܽܘܬܼܗܽܘܢ܂
08:03 [ai]	ܣܳܗܶܕܼ ܐ̱ܢܳܐ ܓܶܝܪ ܕܰܐܝܟܼ ܚܰܝܠܗܽܘܢ ܘܝܰܬܿܺܝܪ ܡܶܢ ܚܰܝܠܗܽܘܢ܃ ܒܨܶܒܼܝܳܢ ܢܰܦܼܫܗܽܘܢ
08:04 [ai]	ܒܥܰܘ ܡܶܢܰܢ ܒܒܼܳܥܽܘܬܼܳܐ ܣܰܓܿܺܝܐܬܼܳܐ܃ ܕܢܶܫܬܰܘܬܿܦܼܽܘܢ ܒܛܰܝܒܿܽܘܬܼܳܐ ܕܬܶܫܡܶܫܬܳܐ ܕܩܰܕܿܺܝܫܶܐ̈܂
08:05 [ai]	ܘܠܳܐ ܐܰܝܟܼ ܡܳܐ ܕܣܳܒܼܪܺܝܢ ܗ̱ܘܰܝܢ܃ ܐܶܠܳܐ ܢܰܦܼܫܗܽܘܢ ܐܰܫܠܶܡܘ ܠܽܘܩܕܼܰܡ ܠܡܳܪܰܢ܂ ܘܳܐܦܼ ܠܰܢ ܒܨܶܒܼܝܳܢܶܗ ܕܰܐܠܳܗܳܐ܂
08:06 [ai]	ܕܰܚܢܰܢ ܢܶܒܼܥܶܐ ܡܶܢ ܛܺܛܳܘܣ܃ ܕܰܐܝܟܼ ܕܫܰܪܺܝ܂ ܗܳܟܼܰܢܳܐ ܢܫܰܠܶܡ ܒܟܽܘܢ ܐܳܦܼ ܛܰܝܒܿܽܘܬܼܳܐ ܗܳܕܼܶܐ܂
08:07 [ai]	ܐܶܠܳܐ ܐܰܝܟܿܰܢܳܐ ܕܰܒܼܟܼܽܠܡܶܕܶܡ ܡܶܬܼܝܰܬܿܪܺܝܢ ܐܢ̱ܬܿܽܘܢ ܒܗܰܝܡܳܢܽܘܬܼܳܐ܂ ܘܰܒܡܶܠܬܼܳܐ܂ ܘܒܼܺܝܕܼܰܥܬܼܳܐ܂ ܘܰܒܟܼܽܠ ܚܦܼܺܝܛܘ܂ ܘܰܒܚܽܘܒܰܢ ܕܰܠܘܳܬܼܟܼܽܘܢ܃ ܗܳܟܼܰܢܳܐ ܐܳܦܼ ܒܗܳܕܼܶܐ ܛܰܝܒܿܽܘܬܼܳܐ ܬܶܬܼܝܰܬܿܪܽܘܢ܂
08:08 [ai]	ܠܳܐ ܗ̱ܘܳܐ ܡܶܦܼܩܰܕܼ ܦܳܩܶܕܼ ܐ̱ܢܳܐ ܠܟܼܽܘܢ܃ ܐܶܠܳܐ ܒܰܚܦܼܺܝܛܽܘܬܼܳܐ ܕܿܚܰܒܼܪ̈ܰܝܟܿܽܘܢ܂ ܫܪܳܪܳܐ ܕܿܚܽܘܒܟܽܘܢ ܡܢܰܣܶܐ ܐ̱ܢܳܐ܂
08:09 [ai]	ܝܳܕܼܥܺܝܢ ܐܢ̱ܬܿܽܘܢ ܓܶܝܪ ܛܰܝܒܿܽܘܬܼܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܃ ܕܡܶܛܽܠܳܬܼܟܼܽܘܢ ܐܶܬܼܡܰܣܟܿܰܢ܂ ܟܰܕܼ ܐܺܝܬܼܰܘܗ̱ܝ ܥܰܬܿܺܝܪܳܐ܃ ܕܰܐܢ̱ܬܿܽܘܢ ܒܡܶܣܟܿܺܢܽܘܬܼܶܗ ܬܶܥܬܿܪܽܘܢ܂
08:10 [ai]	ܡܶܡܠܰܟܼ ܕܶܝܢ ܡܳܠܶܟܼ ܐ̱ܢܳܐ ܠܟܼܽܘܢ ܗܳܕܼܶܐ ܕܰܡܥܰܕܿܪܳܐ ܠܟܼܽܘܢ܃ ܡܶܛܽܠ ܕܡܶܢ ܐܶܫܬܿܩܰܕܼܝ ܫܰܪܺܝܬܿܽܘܢ܃ ܠܰܘ ܠܡܶܨܒܿܳܐ ܒܰܠܚܽܘܕܼ܂ ܐܶܠܳܐ ܐܳܦܼ ܠܡܶܥܒܿܰܕܼ܂
08:11 [ai]	ܗܳܫܳܐ ܕܶܝܢ ܫܰܠܶܡܘ ܒܰܥܒܼܳܕܼܳܐ ܗܰܘ ܡܶܕܶܡ ܕܰܨܒܼܰܝܬܿܽܘܢ܂ ܕܰܐܝܟܿܰܢܳܐ ܕܰܗܘܳܐ ܠܟܼܽܘܢ ܣܽܘܘܳܚܳܐ ܠܡܶܨܒܿܳܐ܃ ܗܳܟܼܰܢܳܐ ܒܰܥܒܼܳܕܼܳܐ ܬܫܰܠܡܽܘܢ ܡܶܢ ܡܳܐ ܕܺܐܝܬܼ ܠܟܼܽܘܢ܂
08:12 [ai]	ܐܶܢ ܓܶܝܪ ܨܶܒܼܝܳܢܳܐ ܐܺܝܬܼܰܘܗ̱ܝ܃ ܐܰܝܟܼ ܡܳܐ ܕܺܐܝܬܼ ܠܶܗ܂ ܗܳܟܼܘܳܬܼ ܡܶܬܼܩܰܒܿܰܠ܃ ܠܳܐ ܗ̱ܘܳܐ ܐܰܝܟܼ ܡܳܐ ܕܠܰܝܬܿ ܠܶܗ܂
08:13 [ai]	ܠܳܐ ܗ̱ܘܳܐ ܓܶܝܪ ܕܠܰܐ̱ܚܪ̈ܳܢܶܐ ܬܶܗܘܶܐ ܪܘܳܚܬܳܐ ܘܰܠܟܼܽܘܢ ܐܽܘܠܨܳܢܳܐ܃
08:14 [ai]	ܐܶܠܳܐ ܒܫܰܘܝܽܘܬܼܳܐ ܗܘܰܘ ܒܙܰܒܼܢܳܐ ܗܳܢܳܐ܃ ܕܝܰܬܿܺܝܪܽܘܬܼܟܼܽܘܢ ܕܺܝܠܟܼܽܘܢ ܬܶܗܘܶܐ ܠܚܰܣܺܝܪܽܘܬܼܗܽܘܢ ܕܗܳܠܶܝܢ܂ ܕܳܐܦܼ ܝܰܬܿܺܝܪܽܘܬܼܗܽܘܢ ܕܗܳܢܽܘܢ ܬܶܗܘܶܐ ܠܚܰܣܺܝܪܽܘܬܼܟܼܽܘܢ ܕܺܝܠܟܼܽܘܢ܂ ܕܬܶܗܘܶܐ ܫܰܘܝܽܘܬܼܳܐ܂
08:15 [ai]	ܐܰܝܟܼ ܕܰܟܼܬܼܺܝܒܼ܃ ܕܗܰܘ ܕܰܐܣܓܿܺܝ ܫܩܰܠ܂ ܠܳܐ ܐܶܬܼܝܰܬܿܰܪ ܠܶܗ܂ ܘܗܰܘ ܕܩܰܠܺܝܠ ܫܩܰܠ܂ ܠܳܐ ܐܶܬܼܒܿܰܨܰܪ ܠܶܗ܂
08:16 [ai]	ܛܰܝܒܿܽܘ ܕܶܝܢ ܠܰܐܠܳܗܳܐ ܕܝܰܗܒܿܳܗ ܚܦܼܺܝܛܽܘܬܼܳܐ ܗܳܕܼܶܐ ܚܠܳܦܼܰܝܟܿܽܘܢ ܒܿܠܶܒܶܗ ܕܛܺܛܳܘܣ܂
08:17 [ai]	ܒܳܥܽܘܬܼܰܢ ܓܶܝܪ ܩܰܒܿܶܠ܂ ܘܡܶܛܽܠ ܕܛܳܒܼ ܒܛܺܝܠ ܠܶܗ܃ ܡܶܢ ܨܶܒܼܝܳܢܶܗ ܢܦܼܰܩ ܨܶܐܕܼܰܝܟܿܽܘܢ܂
08:18 [ai]	ܫܰܕܿܰܪܢ ܕܶܝܢ ܥܰܡܶܗ ܠܰܐܚܽܘܢ܃ ܐܰܝܢܳܐ ܕܬܶܫܒܿܽܘܚܬܿܶܗ ܒܶܐܘܰܢܓܿܶܠܺܝܳܘܢ܂ ܒܟܽܠܗܶܝܢ ܥܺܕܼܳܬܼܳܐ̈܂
08:19 [ai]	ܗܳܟܼܰܢܳܐ ܕܳܐܦܼ ܡܶܓܼܒܿܳܐ ܓܒܼܶܐ ܡܶܢ ܥܺܕܼܳܬܼܳܐ̈܃ ܕܢܶܦܽܘܩ ܥܰܡܰܢ ܒܛܰܝܒܿܽܘܬܼܳܐ ܗܳܕܼܶܐ ܕܡܶܫܬܿܰܡܫܳܐ ܡܶܢܰܢ܂ ܠܫܽܘܒܼܚܶܗ ܕܺܝܠܶܗ ܕܰܐܠܳܗܳܐ܂ ܘܰܠܠܽܘܒܿܳܒܼܰܢ ܕܺܝܠܰܢ܂
08:20 [ai]	ܩܰܢܺܝܛܺܝܢܰܢ ܕܶܝܢ ܒܗܳܕܼܶܐ܃ ܕܠܳܐ ܐ̱ܢܳܫ ܢܣܺܝܡ ܒܰܢ ܡܽܘܡܳܐ ܒܗܳܕܼܶܐ ܪܰܒܿܽܘܬܼܳܐ܂ ܕܡܶܫܬܿܰܡܫܳܐ ܡܶܢܰܢ܂
08:21 [ai]	ܝܰܨܺܝܦܼܺܝܢܰܢ ܓܶܝܪ ܕܫܰܦܿܺܝܪ̈ܳܬܼܳܐ܂ ܠܳܐ ܩܕܼܳܡ ܐܰܠܳܗܳܐ ܒܰܠܚܽܘܕܼ܃ ܐܶܠܳܐ ܐܳܦܼ ܩܕܼܳܡ ܒܢܰܝܢܳܫܳܐ܂
08:22 [ai]	ܫܰܕܿܰܪܢ ܕܶܝܢ ܥܰܡܗܽܘܢ ܐܳܦܼ ܠܰܐܚܽܘܢ܃ ܐܰܝܢܳܐ ܕܠܰܢ ܒܩܶܐ ܒܟܽܠܙܒܼܰܢ ܒܣܰܓܿܺܝܳܐܬܼܳܐ̈܂ ܕܰܚܦܼܺܝܛܳܐ ܗܽܘ܂ ܗܳܫܳܐ ܕܶܝܢ ܝܰܬܿܺܝܪܳܐܺܝܬܼ ܚܦܼܺܝܛ ܒܬܽܘܟܼܠܳܢܳܐ ܣܰܓܿܺܝܳܐܐ ܕܰܥܠܰܝܟܿܽܘܢ܂
08:23 [ai]	ܐܶܢ ܗܳܟܼܺܝܠ ܛܺܛܳܘܣ܃ ܫܰܘܬܿܳܦܼܳܐ ܗܽܘ ܕܺܝܠܝ ܘܰܡܥܰܕܿܪܳܢܳܐ ܒܟܽܘܢ܂ ܘܶܐܢ ܐܰܚܰܝܢ̈ ܐ̱ܚܪ̈ܳܢܶܐ܃ ܫܠܺܝܚܶܐ̈ ܐܶܢܽܘܢ ܕܥܺܕܼܳܬܼܳܐ̈ ܕܫܽܘܒܼܚܶܗ ܕܰܡܫܺܝܚܳܐ܂
08:24 [ai]	ܡܶܟܿܺܝܠ ܬܰܚܘܺܝܬܼܳܐ ܕܿܚܽܘܒܟܽܘܢ ܘܫܽܘܒܼܗܳܪܰܢ ܕܰܒܼܟܼܽܘܢ܂ ܒܗܽܘܢ ܚܰܘܰܘ ܒܦܿܰܪܨܽܘܦܿ ܥܺܕܼܳܬܼܳܐ̈ ܟܽܠܗܶܝܢ ܿ܀ܿ܀ܿ

next chapter