← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62047: 2Cor

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


10:01 [ai]ܐܶܢܳܐ ܕܶܝܢ ܦܿܰܘܠܳܘܣ ܒܿܳܥܶܐ ܐ̱ܢܳܐ ܡܶܢܟܼܽܘܢ܃ ܒܢܺܝܚܽܘܬܼܶܗ ܘܰܒܡܰܟܿܺܝܟܼܽܘܬܼܶܗ ܕܰܡܫܺܝܚܳܐ܃ ܕܳܐܦܼܶܢ ܒܰܐܦܿܺܝܢ̈ ܡܰܟܿܺܝܟܼ ܐ̱ܢܳܐ ܠܘܳܬܼܟܼܽܘܢ܃ ܐܶܠܳܐ ܟܰܕܼ ܪܰܚܺܝܩ ܐ̱ܢܳܐ ܬܟܼܺܝܠ ܐ̱ܢܳܐ ܥܠܰܝܟܿܽܘܢ܂
10:02 [ai]ܒܿܳܥܶܐ ܐ̱ܢܳܐ ܕܶܝܢ ܡܶܢܟܼܽܘܢ܃ ܕܠܳܐ ܡܳܐ ܕܶܐܬܼܺܝܬܼ܂ ܐܶܬܼܶܐܠܶܨ ܒܬܽܘܟܼܠܳܢܳܐ ܕܺܐܝܬܼ ܠܺܝ܃ ܕܰܐܫܺܝܚ ܐܰܝܟܼ ܕܡܶܬܼܪܰܥܶܐ ܐ̱ܢܳܐ܃ ܥܰܠ ܐ̱ܢܳܫܳܐ ܐܰܝܠܶܝܢ ܕܿܚܳܫܒܺܝܢ ܠܰܢ ܕܰܐܝܟܼ ܕܒܰܒܼܣܰܪ ܡܗܰܠܟܼܺܝܢܰܢ܂
10:03 [ai]ܐܳܦܼܶܢ ܒܰܒܼܣܰܪ ܓܶܝܪ ܡܗܰܠܟܼܺܝܢ ܚ̱ܢܰܢ܃ ܐܶܠܳܐ ܠܳܐ ܗ̱ܘܳܐ ܕܒܶܣܪܳܐ ܦܳܠܚܺܝܢܰܢ܂
10:04 [ai]ܙܰܝܢܳܐ ܓܶܝܪ ܕܦܳܠܚܽܘܬܼܰܢ܂ ܠܳܐ ܗ̱ܘܳܐ ܕܒܶܣܪܳܐ܃ ܐܶܠܳܐ ܕܚܰܝܠܳܐ ܕܰܐܠܳܗܳܐ܂ ܘܒܼܶܗ ܟܳܒܼܫܺܝܢܰܢ ܚܶܣܢܶܐ̈ ܡܪ̈ܺܝܕܼܶܐ܂
10:05 [ai]ܘܣܳܬܼܪܺܝܢܰܢ ܡܰܚܫܒܼܳܬܼܳܐ̈܂ ܘܟܼܽܠ ܪܰܘܡܳܐ ܕܡܶܬܿܬܿܪܺܝܡ ܠܽܘܩܒܼܰܠ ܺܝܕܼܰܥܬܼܶܗ ܕܰܐܠܳܗܳܐ܃ ܘܫܳܒܼܶܝܢܰܢ ܟܽܠ ܬܿܰܪ̈ܥܝܳܢ ܠܡܰܫܡܰܥܬܼܶܗ ܕܰܡܫܺܝܚܳܐ܂
10:06 [ai]ܘܰܡܛܰܝܒܼܺܝܢܰܢ ܠܡܶܥܒܿܰܕܼ ܬܒܼܰܥܬܼܳܐ ܡܶܢ ܐܰܝܠܶܝܢ ܕܠܳܐ ܡܶܫܬܿܰܡܥܺܝܢ܃ ܡܳܐ ܕܶܐܬܼܡܰܠܝܰܬܼ ܡܶܫܬܿܰܡܥܳܢܽܘܬܼܟܼܽܘܢ܀
10:07 [ai]ܒܦܿܰܪ̈ܨܽܘܦܿܶܐ ܚܳܝܪܺܝܢ ܐܢ̱ܬܿܽܘܢ܂ ܐܶܢ ܐ̱ܢܳܫ ܬܟܼܺܝܠ ܥܰܠ ܢܰܦܼܫܶܗ܂ ܕܕܼܰܡܫܺܝܚܳܐ ܗܽܘ܃ ܗܳܢܳܐ ܢܶܕܿܰܥ ܡܶܢ ܢܰܦܼܫܶܗ܂ ܕܰܐܝܟܼ ܕܗܽܘ ܕܰܡܫܺܝܚܳܐ܃ ܗܳܟܼܰܢܳܐ ܐܳܦܼ ܚܢܰܢ܂
10:08 [ai]ܐܶܢ ܓܶܝܪ ܐܳܦܼ ܡܶܕܶܡ ܝܰܬܿܺܝܪ ܐܶܫܬܿܰܒܼܗܰܪ ܥܰܠ ܫܽܘܠܛܳܢܳܐ ܕܝܰܗ̱ܒܼ ܠܺܝ ܡܳܪܰܢ܃ ܠܳܐ ܒܳܗܶܬܼ ܐ̱ܢܳܐ܂ ܡܶܛܽܠ ܕܰܠܒܼܶܢܝܳܢܳܐ ܗܽܘ ܕܺܝܠܟܼܽܘܢ ܝܰܗ̱ܒܼ ܠܰܢ܂ ܘܠܳܐ ܠܣܽܘܚܳܦܼܟܼܽܘܢ܂
10:09 [ai]ܡܰܗܡܶܐ ܐ̱ܢܳܐ ܕܶܝܢ܃ ܕܠܳܐ ܐܶܣܬܿܒܼܰܪ ܐܰܝܟܼ ܗܰܘ ܕܰܡܕܼܰܚܳܠܽܘ ܡܕܼܰܚܶܠ ܐ̱ܢܳܐ ܠܟܼܽܘܢ ܒܶܐܓܿܪ̈ܳܬܼܝ܂
10:10 [ai]ܡܶܛܽܠ ܕܺܐܝܬܼ ܐ̱ܢܳܫܳܐ ܕܳܐܡܪܺܝܢ܃ ܕܿܶܐܓܿܪ̈ܳܬܼܳܐ ܝܰܩܺܝܪ̈ܳܢ ܘܚܰܣܺܝܢܳܢ̈܂ ܡܶܐܬܼܝܶܗ ܕܶܝܢ ܕܓܽܘܫܡܳܐ ܟܪܺܝܗ܂ ܘܡܶܠܬܼܶܗ ܫܺܝܛܳܐ܂
10:11 [ai]ܐܶܠܳܐ ܗܳܕܼܶܐ ܢܶܬܼܪܰܥܶܐ ܡܰܢ ܕܗܳܟܼܰܢܳܐ ܐܳܡܰܪ܂ ܕܰܐܝܟܿܰܢܳܐ ܕܺܐܝܬܼܰܝܢ ܒܡܶܠܬܼܳܐ ܕܶܐܓܿܰܪܬܿܰܢ ܟܰܕܼ ܪܰܚܺܝܩܺܝܢܰܢ܃ ܗܳܟܼܰܢܳܐ ܐܺܝܬܼܰܝܢ ܐܳܦܼ ܡܳܐ ܕܩܰܪܺܝܒܼܺܝܢܰܢ ܒܰܥܒܼܳܕܼܳܐ܂
10:12 [ai]ܠܳܐ ܓܶܝܪ ܡܰܡܪܚܺܝܢܰܢ ܕܢܶܚܫܽܘܒܼ܂ ܐܰܘ ܕܰܢܦܼܰܚܶܡ ܢܰܦܼܫܰܢ ܥܰܡ ܗܳܢܽܘܢ ܕܰܡܫܰܒܼܗܪܺܝܢ ܢܰܦܼܫܗܽܘܢ܃ ܐܶܠܳܐ ܡܶܛܽܠ ܕܗܶܢܽܘܢ ܒܗܽܘܢ ܠܗܽܘܢ ܡܦܼܰܚܡܺܝܢ܂ ܠܳܐ ܡܶܣܬܿܰܟܠܺܝܢ܂
10:13 [ai]ܚܢܰܢ ܕܶܝܢ ܠܳܐ ܡܶܫܬܿܰܒܼܗܪܺܝܢܰܢ ܝܰܬܿܺܝܪ ܡܶܢ ܡܫܽܘܚܬܼܰܢ܃ ܐܶܠܳܐ ܒܰܡܫܽܘܚܬܼܳܐ ܕܰܬܼܚܽܘܡܳܐ ܕܰܦܼܠܰܓܼ ܠܰܢ ܐܰܠܳܗܳܐ܃ ܕܢܶܡܛܶܐ ܐܳܦܼ ܥܕܼܰܡܳܐ ܠܘܳܬܼܟܼܽܘܢ܂
10:14 [ai]ܠܳܐ ܗ̱ܘܳܐ ܓܶܝܪ ܐܰܝܟܼ ܕܠܳܐ ܡܶܬܼܡܰܛܶܝܢܰܢ ܠܘܳܬܼܟܼܽܘܢ܂ ܡܳܬܼܚܺܝܢܰܢ ܢܰܦܼܫܰܢ܂ ܥܕܼܰܡܳܐ ܓܶܝܪ ܠܘܳܬܼܟܼܽܘܢ ܡܰܛܺܝܢ ܒܰܣܒܼܰܪܬܼܶܗ ܕܰܡܫܺܝܚܳܐ܂
10:15 [ai]ܘܠܳܐ ܡܶܫܬܿܰܒܼܗܪܺܝܢܰܢ ܠܒܼܰܪ ܡܶܢ ܡܫܽܘܚܬܼܰܢ ܒܥܰܡܠܳܐ ܕܰܐ̱ܚܪ̈ܳܢܶܐ܃ ܐܶܠܳܐ ܐܺܝܬܼ ܠܰܢ ܣܰܒܼܪܳܐ܃ ܕܟܰܕܼ ܪܳܒܼܝܳܐ ܗܰܝܡܳܢܽܘܬܼܟܼܽܘܢ ܒܟܽܘܢ܂ ܢܶܬܼܪܰܘܪܰܒܼ ܐܰܝܟܼ ܡܫܽܘܚܬܼܰܢ܂ ܘܢܶܬܼܝܰܬܿܰܪ
10:16 [ai]ܐܳܦܼ ܠܗܰܠ ܡܶܢܟܼܽܘܢ ܠܰܡܣܰܒܿܳܪܽܘ܃ ܠܳܐ ܒܰܡܫܽܘܚܬܼܳܐ ܕܰܐ̱ܚܪ̈ܳܢܶܐ܃ ܒܰܐܝܠܶܝܢ ܕܡܰܬܼܩܢܳܢ̈ ܢܶܫܬܿܰܒܼܗܰܪ܂
10:17 [ai]ܗܰܘ ܕܶܝܢ ܕܡܶܫܬܿܰܒܼܗܰܪ܂ ܒܡܳܪܝܳܐ ܢܶܫܬܿܰܒܼܗܰܪ܂
10:18 [ai]ܠܳܐ ܗ̱ܘܳܐ ܓܶܝܪ ܡܰܢ ܕܢܰܦܼܫܶܗ ܡܫܰܒܿܰܚ܂ ܗܰܘ ܗ̱ܽܘ ܒܩܶܐ܃ ܐܶܠܳܐ ܡܰܢ ܕܡܳܪܝܳܐ ܢܫܰܒܿܚܺܝܘܗ̱ܝ ܿ܀ܿ܀ܿ

next chapter