The Comprehensive Aramaic Lexicon

13:01 [ai]	ܗܳܕܼܶܐ ܕܰܬܼܠܳܬܼ ܗ̱ܺܝ ܙܰܒܼܢܺܝܢ̈ ܕܺܐܬܼܶܐ ܐ̱ܢܳܐ ܠܘܳܬܼܟܼܽܘܢ܃ ܕܥܰܠ ܦܽܘܡ ܬܿܪ̈ܶܝܢ ܘܰܬܼܠܳܬܼܳܐ ܣܳܗܕܺܝܢ ܬܩܽܘܡ ܟܽܠ ܡܶܠܳܐ܂
13:02 [ai]	ܡܶܢ ܩܕܼܺܝܡ ܐܶܡܪܶܬܼ ܗ̱ܘܺܝܬܼ ܠܟܼܽܘܢ܃ ܘܬܼܽܘܒܼ ܡܩܰܕܶܡ ܐ̱ܢܳܐ ܐܳܡܰܪ ܐ̱ܢܳܐ ܠܟܼܽܘܢ܃ ܐܰܝܟܼ ܕܳܐܦܼ ܬܿܰܪ̈ܬܿܶܝܢ ܙܰܒܼܢܺܝܢ̈ ܕܰܗܘܺܝܬܼ ܠܘܳܬܼܟܼܽܘܢ ܐܶܡܪܶܬܼ ܠܟܼܽܘܢ܃ ܘܳܐܦܼ ܗܳܫܳܐ ܟܰܕܼ ܪܰܚܺܝܩ ܐ̱ܢܳܐ ܟܳܬܼܶܒܼܢܳܐ܃ ܠܗܳܠܶܝܢ ܕܰܚܛܰܘ̈܃ ܘܰܠܫܰܪܟܿܳܐ ܕܰܐ̱ܚܪ̈ܳܢܶܐ܃ ܕܶܐܢ ܐܺܬܼܶܐ ܬܽܘܒܼ܂ ܠܳܐ ܐܶܚܽܘܣ܂
13:03 [ai]	ܡܶܛܽܠ ܕܒܽܘܩܝܳܐ ܒܿܳܥܶܝܬܿܽܘܢ ܕܰܡܫܺܝܚܳܐ ܕܰܡܡܰܠܶܠ ܒܺܝ܂ ܗܰܘ ܕܠܳܐ ܗܘܳܐ ܡܚܺܝܠ ܒܟܽܘܢ܃ ܐܶܠܳܐ ܚܰܝܠܬܼܳܢ ܗ̱ܽܘ ܒܟܽܘܢ܂
13:04 [ai]	ܐܳܦܼܶܢ ܐܶܙܕܿܩܶܦܼ ܓܶܝܪ ܒܰܡܚܺܝܠܽܘܬܼܳܐ܃ ܐܶܠܳܐ ܚܰܝ ܗ̱ܽܘ ܒܚܰܝܠܳܐ ܕܰܐܠܳܗܳܐ܂ ܘܳܐܦܼ ܚܢܰܢ ܡܚܺܝܠܺܝܢܰܢ ܥܰܡܶܗ܃ ܐܶܠܳܐ ܚܰܝܺܝܢ ܚ̱ܢܰܢ ܥܰܡܶܗ ܒܚܰܝܠܳܐ ܕܰܐܠܳܗܳܐ ܕܰܒܼܟܼܽܘܢ܂
13:05 [ai]	ܢܰܦܼܫܟܼܽܘܢ ܒܩܰܘ܃ ܐܶܢ ܒܿܳܗ ܒܗܰܝܡܳܢܽܘܬܼܳܐ ܩܳܝܡܺܝܢ ܐܢ̱ܬܿܽܘܢ܂ ܢܰܦܼܫܟܼܽܘܢ ܐܰܣܰܘ܂ ܐܰܘ ܠܳܐ ܡܶܫܬܰܘܕܿܥܺܝܬܿܽܘܢ ܕܝܶܫܽܘܥ ܡܫܺܝܚܳܐ ܒܟܽܘܢ ܗ̱ܽܘ܃ ܘܶܐܢ ܠܳܐ ܡܰܣܠܰܝܳܐ̈ ܐܢ̱ܬܿܽܘܢ܂
13:06 [ai]	ܡܣܰܒܰܪ ܐ̱ܢܳܐ ܕܶܝܢ ܕܬܶܕܿܥܽܘܢ܃ ܕܰܚܢܰܢ ܠܳܐ ܗ̱ܘܰܝܢ ܡܰܣܠܶܝܢ܂
13:07 [ai]	ܒܿܳܥܶܐ ܐ̱ܢܳܐ ܕܶܝܢ ܡܶܢ ܐܰܠܳܗܳܐ܃ ܕܠܳܐ ܢܶܗܘܶܐ ܒܟܽܘܢ ܡܶܕܶܡ ܕܒܺܝܫ܃ ܐܰܝܟܼ ܕܒܽܘܩܝܰܢ ܕܺܝܠܰܢ ܢܶܬܼܚܙܶܐ܃ ܐܶܠܳܐ ܕܰܐܢ̱ܬܿܽܘܢ ܬܶܗܘܽܘܢ ܣܳܥܪܺܝܢ ܛܳܒܼܳܬܼܳܐ̈܃ ܘܰܚܢܰܢ ܢܶܗܘܶܐ ܐܰܝܟܼ ܡܰܣܠܰܝܳܐ̈܂
13:08 [ai]	ܠܳܐ ܓܶܝܪ ܡܶܫܟܿܚܺܝܢܰܢ ܕܢܶܥܒܿܶܕܼ ܡܶܕܶܡ ܠܽܘܩܒܼܰܠ ܩܽܘܫܬܳܐ܃ ܐܶܠܳܐ ܚܠܳܦܼ ܩܽܘܫܬܳܐ܂
13:09 [ai]	ܚܳܕܼܶܝܢܰܢ ܕܶܝܢ ܡܳܐ ܕܰܚܢܰܢ ܟܪܺܝܗܺܝܢ܃ ܘܰܐܢ̱ܬܿܽܘܢ ܚܰܝܠܬܼܳܢܺܝܢ܂ ܗܳܕܼܶܐ ܓܶܝܪ ܐܳܦܼ ܡܨܰܠܶܝܢܰܢ܂ ܕܰܐܢ̱ܬܿܽܘܢ ܬܶܬܿܓܿܰܡܪܽܘܢ܂
13:10 [ai]	ܡܶܛܽܠ ܗܳܢܳܐ ܟܰܕܼ ܪܰܚܺܝܩ ܐ̱ܢܳܐ ܗܳܠܶܝܢ ܟܳܬܼܶܒܼ ܐ̱ܢܳܐ܃ ܕܠܳܐ ܡܳܐ ܕܶܐܬܼܺܝܬܼ ܩܰܫܝܳܐܺܝܬܼ ܐܶܣܥܽܘܪ ܐܰܝܟܼ ܫܽܘܠܛܳܢܳܐ ܕܝܰܗ̱ܒܼ ܠܺܝ ܡܳܪܝ܃ ܠܒܼܶܢܝܳܢܟܼܽܘܢ ܘܠܳܐ ܠܣܽܘܚܳܦܼܟܼܽܘܢ܀
13:11 [ai]	ܡܶܟܿܺܝܠ ܐܰܚܰܝ̈܃ ܚܕܼܰܘ܂ ܘܶܐܬܼܓܿܰܡ̱ܪܘ܂ ܘܶܐܬܼܒܰܝܰܐܘ܃ ܘܰܐܘܝܽܘܬܼܳܐ ܘܫܰܝܢܳܐ ܢܶܗܘܶܐ ܒܟܽܘܢ܂ ܘܰܐܠܳܗܳܐ ܕܚܽܘܒܿܳܐ ܘܰܕܼܫܰܠܡܽܘܬܼܳܐ ܢܶܗܘܶܐ ܥܰܡܟܼܽܘܢ܀
13:12 [ai]	ܫܰܐܠܘ ܒܰܫܠܳܡܳܐ ܚܰܕܼ ܕܚܰܕܼ ܒܢܽܘܫܰܩܬܳܐ ܩܰܕܿܺܝܫܬܳܐ܂
13:13 [ai]	ܫܳܐܠܺܝܢ ܒܰܫܠܳܡܟܼܽܘܢ ܟܽܠܗܽܘܢ ܩܰܕܿܺܝܫܶܐ̈܂
13:14 [ai]	ܫܠܳܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂ ܘܚܽܘܒܶܗ ܕܰܐܠܳܗܳܐ܂ ܘܫܰܘܬܿܳܦܼܽܘܬܼܳܐ ܕܪܽܘܚܳܐ ܕܩܽܘܕܼܫܳܐ܂ ܥܰܡ ܟܽܠܟܼܽܘܢ܂ ܐܰܡܺܝܢ ܿ܀ܿ܀ܿ