← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62048: Gal

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


02:01 [ai]ܬܽܘܒܼ ܕܶܝܢ ܡܶܢ ܒܳܬܼܰܪ ܐܰܪܒܿܰܥܶܣܪܶܐ ܫܢܺܝܢ̈܃ ܣܶܠܩܶܬܼ ܠܽܐܘܪܺܫܠܶܡ܂ ܥܰܡ ܒܰܪܢܰܒܼܰܐ܂ ܘܕܼܶܒܼܪܶܬܼ ܥܰܡܝ ܠܛܺܛܳܘܣ܂
02:02 [ai]ܣܶܠܩܶܬܼ ܕܶܝܢ ܒܓܶܠܝܳܢܳܐ܂ ܘܰܓܼܠܺܝܬܼ ܠܗܽܘܢ ܣܒܼܰܪܬܼܳܐ ܕܡܰܟܼܪܶܙ ܐ̱ܢܳܐ ܒܥܰܡ̱ܡܶܐ̈܂ ܘܚܰܘܺܝܬܼܳܗ ܠܰܐܝܠܶܝܢ ܕܡܶܣܬܿܰܒܼܪܺܝܢ ܗ̱ܘܰܘ ܕܿܡܶܕܶܡ ܐܺܝܬܼܰܝܗܽܘܢ ܒܰܝܢܰܝ ܘܰܠܗܽܘܢ܃ ܕܰܡ ܣܪܺܝܩܳܐܺܝܬܼ ܪܶܗܛܶܬܼ܂ ܐܰܘ ܪܳܗܶܛ ܐ̱ܢܳܐ܂
02:03 [ai]ܐܳܦܼ ܛܺܛܳܘܣ ܕܥܰܡܝ ܕܰܐܪܡܳܝܳܐ ܗ̱ܘܳܐ܃ ܠܳܐ ܐܶܬܼܶܐܢܶܣ ܕܢܶܓܼܙܽܘܪ܂
02:04 [ai]ܡܶܛܽܠ ܕܶܝܢ ܐܰܚܶܐ̈ ܕܰܓܳܠܶܐ̈ ܕܥܰܠܘ ܥܠܰܝܢ܃ ܕܢܶܓܿܫܽܘܢ ܚܺܐܪܽܘܬܼܳܐ ܕܺܐܝܬܼ ܠܰܢ ܒܝܶܫܽܘܥ ܡܫܺܝܚܳܐ܂ ܐܰܝܟܿܰܢܳܐ ܕܰܢܫܰܥܒܿܕܼܽܘܢܳܢܝ܂
02:05 [ai]ܐܳܦܼܠܳܐ ܡܠܶܐ ܫܳܥܳܐ ܐܶܬܼܪܡܺܝܢ ܠܫܽܘܥܒܿܳܕܼܗܽܘܢ܃ ܕܰܫܪܳܪܳܗ ܕܰܣܒܼܰܪܬܼܳܐ ܢܩܰܘܶܐ ܠܘܳܬܼܟܼܽܘܢ܂
02:06 [ai]ܗܳܢܽܘܢ ܕܶܝܢ ܕܡܶܣܬܿܰܒܼܪܺܝܢ ܕܺܐܝܬܼܰܝܗܽܘܢ ܡܶܕܶܡ܃ ܡܰܢ ܕܶܝܢ ܐܺܝܬܼܰܝܗܽܘܢ ܠܳܐ ܒܛܺܝܠ ܠܺܝ܃ ܐܰܠܳܗܳܐ ܓܶܝܪ ܒܰܐܦܿܰܝ̈ ܒܢܰܝܢܳܫܳܐ ܠܳܐ ܢܳܣܶܒܼ܃ ܗܶܢܽܘܢ ܕܶܝܢ ܗܳܠܶܝܢ܃ ܡܶܕܶܡ ܠܳܐ ܐܰܘܣܶܦܼܘ ܠܺܝ܂
02:07 [ai]ܐܶܠܳܐ ܐ̱ܚܪܳܢܝܳܐܺܝܬܼ܂ ܚܙܰܘ ܓܶܝܪ ܕܶܐܬܼܗܰܝܡܢܶܬܼ ܣܒܼܰܪܬܼܳܐ ܕܥܽܘܪܠܽܘܬܼܳܐ܃ ܐܰܝܟܼ ܕܶܐܬܼܗܰܝܡܰܢ ܟܺܐܦܼܳܐ ܒܰܓܼܙܽܘܪܬܳܐ܂
02:08 [ai]ܗܰܘ ܓܶܝܪ ܕܚܰܦܿܶܛ ܠܟܼܺܐܦܼܳܐ ܒܰܫܠܺܝܚܽܘܬܼܳܐ ܕܰܓܼܙܽܘܪܬܳܐ܃ ܚܰܦܿܶܛ ܐܳܦܼ ܠܺܝ ܒܰܫܠܺܝܚܽܘܬܼܳܐ ܕܥܰܡ̱ܡܶܐ̈܂
02:09 [ai]ܘܟܼܰܕܼ ܺܝܕܼܰܥܘ ܛܰܝܒܿܽܘܬܼܳܐ ܕܶܐܬܼܝܰܗܒܿܰܬܼ ܠܺܝ܃ ܝܰܥܩܽܘܒܼ ܘܟܼܺܐܦܼܳܐ ܘܝܽܘܚܰܢܳܢ܃ ܗܳܢܽܘܢ ܕܡܶܣܬܿܰܒܼܪܺܝܢ ܗ̱ܘܰܘ ܕܺܐܝܬܼܰܝܗܽܘܢ ܥܰܡܽܘܕܼܶܐ̈܃ ܝܰܡܺܝܢܳܐ ܕܫܰܘܬܿܳܦܼܽܘܬܼܳܐ ܝܰܗ̱ܒܼܘ ܠܺܝ ܘܰܠܒܼܰܪܢܰܒܼܰܐ܂ ܕܰܚܢܰܢ ܒܥܰܡ̱ܡܶܐ̈܂ ܘܗܶܢܽܘܢ ܒܰܓܼܙܽܘܪܬܳܐ܂
02:10 [ai]ܒܰܠܚܽܘܕܼ ܕܰܠܡܶܣܟܿܺܢܶܐ̈ ܗܘܰܝܢ ܥܳܗܕܺܝܢܰܢ܂ ܘܶܐܬܼܒܿܛܶܠ ܠܺܝ ܕܗܺܝ ܗܳܕܼܶܐ ܐܶܥܒܿܕܼܺܝܗ܀
02:11 [ai]ܟܰܕܼ ܐܶܬܼܳܐ ܕܶܝܢ ܟܺܐܦܼܳܐ ܠܰܐܢܛܺܝܳܘܟܼܺܝ܃ ܒܰܐܦܿܰܘܗ̱ܝ̈ ܐܰܟܿܶܣܬܿܶܗ܂ ܡܶܛܽܠ ܕܡܶܬܿܬܿܰܩܠܺܝܢ ܗ̱ܘܰܘ ܒܶܗ܂
02:12 [ai]ܕܥܰܕܼܠܳܐ ܢܺܐܬܼܽܘܢ ܐ̱ܢܳܫܳܐ ܡܶܢ ܠܘܳܬܼ ܝܰܥܩܽܘܒܼ܃ ܥܰܡ ܥܰܡ̱ܡܶܐ̈ ܐܳܟܼܶܠ ܗ̱ܘܳܐ܂ ܟܰܕܼ ܐܶܬܼܰܘ ܕܶܝܢ܃ ܢܓܼܰܕܼ ܗ̱ܘܳܐ ܢܰܦܼܫܶܗ܂ ܘܰܦܼܪܰܫ܂ ܡܶܛܽܠ ܕܕܼܳܚܶܠ ܗ̱ܘܳܐ ܡܶܢ ܗܳܢܽܘܢ ܕܡܶܢ ܓܙܽܘܪܬܳܐ܂
02:13 [ai]ܘܶܐܬܼܪܡܺܝܘ ܗ̱ܘܰܘ ܥܰܡܶܗ ܠܗܳܕܼܶܐ ܐܳܦܼ ܫܰܪܟܿܳܐ ܕܺܝܗܽܘܕܼܳܝܶܐ̈܃ ܗܳܟܼܰܢܳܐ ܕܳܐܦܼ ܒܰܪܢܰܒܼܰܐ ܐܶܬܼܕܒܰܪ ܗ̱ܘܳܐ ܠܡܶܣܰܒܼ ܒܰܐܦܿܰܝܗܽܘܢ̈ ܿ܀ܿ܀ܿ
02:14 [ai]ܘܟܼܰܕܼ ܚܙܺܝܬܼ ܕܠܳܐ ܐܳܙܺܠ̱ܝܢ ܬܪܺܝܨܳܐܺܝܬܼ ܒܰܫܪܳܪܶܗ ܕܶܐܘܰܢܓܿܶܠܺܝܳܘܢ܃ ܐܶܡܪܶܬܼ ܠܟܼܺܐܦܼܳܐ ܠܥܺܝܢ ܟܽܠܗܽܘܢ܂ ܐܶܢ ܐܰܢ̱ܬܿ ܕܺܝܗܽܘܕܼܳܝܳܐ ܐܰܢ̱ܬܿ ܐܰܪܡܳܐܺܝܬܼ ܚܳܝܶܐ ܐܰܢ̱ܬܿ܂ ܘܠܳܐ ܺܝܗܽܘܕܼܳܐܺܝܬܼ܃ ܐܰܝܟܿܰܢܳܐ ܐܳܠܶܨ ܐܰܢ̱ܬܿ ܠܥܰܡ̱ܡܶܐ̈ ܕܺܝܗܽܘܕܼܳܐܺܝܬܼ ܢܺܚܽܘܢ܂
02:15 [ai]ܚܢܰܢ ܓܶܝܪ ܕܡܶܢ ܟܝܳܢܰܢ ܺܝܗܽܘܕܼܳܝܶܐ̈ ܚ̱ܢܰܢ܂ ܘܠܳܐ ܗܘܰܝܢ ܡܶܢ ܥܰܡ̱ܡܶܐ̈ ܚܰܛܳܝܶܐ̈܃
02:16 [ai]ܡܶܛܽܠ ܕܝܳܕܼܥܺܝܢܰܢ ܕܠܳܐ ܡܶܙܕܿܰܕܿܰܩ ܒܰܪܢܳܫܳܐ ܡܶܢ ܥܒܼܳܕܼܶܐ̈ ܕܢܳܡܽܘܣܳܐ܃ ܐܶܠܳܐ ܒܗܰܝܡܳܢܽܘܬܼܳܐ ܕܝܶܫܽܘܥ ܡܫܺܝܚܳܐ܂ ܐܳܦܼ ܚܢܰܢ ܒܶܗ ܒܝܶܫܽܘܥ ܡܫܺܝܚܳܐ ܗܰܝܡܶܢܢ܃ ܕܡܶܢ ܗܰܝܡܳܢܽܘܬܼܶܗ ܕܰܡܫܺܝܚܳܐ ܢܶܙܕܿܰܕܿܰܩ܃ ܘܠܳܐ ܡܶܢ ܥܒܼܳܕܼܶܐ̈ ܕܢܳܡܽܘܣܳܐ܂ ܡܶܛܽܠ ܕܡܶܢ ܥܒܼܳܕܼܶܐ̈ ܕܢܳܡܽܘܣܳܐ܂ ܠܳܐ ܡܶܙܕܿܰܕܿܰܩ ܟܽܠ ܒܣܰܪ܂
02:17 [ai]ܐܶܢ ܕܶܝܢ ܟܰܕܼ ܒܿܳܥܶܝܢܰܢ ܕܢܶܙܕܿܰܕܿܰܩ ܒܰܡܫܺܝܚܳܐ܃ ܐܶܫܬܿܟܼܰܚܢ ܠܰܢ ܐܳܦܼ ܚܢܰܢ ܚܰܛܳܝܶܐ̈܃ ܡܳܕܼܶܝܢ ܝܶܫܽܘܥ ܡܫܺܝܚܳܐ ܡܫܰܡܫܳܢܳܐ ܗ̱ܘ ܕܰܚܛܺܝܬܼܳܐ܂ ܚܳܣ܂
02:18 [ai]ܐܶܢ ܓܶܝܪ ܠܰܐܝܠܶܝܢ ܕܣܶܬܼܪܶܬܼ ܬܽܘܒܼ ܠܗܶܝܢ ܒܳܢܶܐ ܐ̱ܢܳܐ܃ ܚܰܘܺܝܬܼ ܥܰܠ ܢܰܦܼܫܝ ܕܥܳܒܼܰܪ ܥܰܠ ܦܽܘܩܕܳܢܳܐ ܐ̱ܢܳܐ܂
02:19 [ai]ܐܶܢܳܐ ܓܶܝܪ ܒܢܳܡܽܘܣܳܐ ܠܢܳܡܽܘܣܳܐ ܡܺܝܬܼܶܬܼ܂ ܕܠܰܐܠܳܗܳܐ ܐܺܚܶܐ܂
02:20 [ai]ܘܥܰܡ ܡܫܺܝܚܳܐ ܙܩܺܝܦܼ ܐ̱ܢܳܐ܂ ܘܡܶܟܿܺܝܠ ܠܳܐ ܗ̱ܘܳܐ ܐܶܢܳܐ ܚܰܝ ܐ̱ܢܳܐ܃ ܐܶܠܳܐ ܚܰܝ ܒܺܝ ܡܫܺܝܚܳܐ܂ ܘܗܳܢܳܐ ܕܗܳܫܳܐ ܚܰܝ ܐ̱ܢܳܐ ܒܰܒܼܣܰܪ܃ ܒܗܰܝܡܳܢܽܘܬܼܳܐ ܗ̱ܘ ܕܰܒܼܪܶܗ ܕܰܐܠܳܗܳܐ ܚܰܝ ܐ̱ܢܳܐ܂ ܗܰܘ ܕܰܐܚܒܼܰܢ܂ ܘܝܰܗ̱ܒܼ ܢܰܦܼܫܶܗ ܚܠܳܦܼܰܝܢ܂
02:21 [ai]ܠܳܐ ܛܳܠܶܡ ܐ̱ܢܳܐ ܛܰܝܒܿܽܘܬܼܶܗ ܕܰܐܠܳܗܳܐ܂ ܐܶܢ ܓܶܝܪ ܒܝܰܕܼ ܢܳܡܽܘܣܳܐ ܗ̱ܝ ܙܰܕܿܺܝܩܽܘܬܼܳܐ܃ ܡܫܺܝܚܳܐ ܡܰܓܿܳܢ ܡܺܝܬܼ܀

next chapter