← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62048: Gal

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


04:01 [ai]ܐܳܡܰܪ ܐ̱ܢܳܐ ܕܶܝܢ ܕܰܟܼܡܳܐ ܙܰܒܼܢܳܐ ܕܝܳܪܬܳܐ ܛܠܶܐ܃ ܠܳܐ ܦܪܺܝܫ ܡܶܢ ܥܰܒܼܕܿܶܐ̈܃ ܟܰܕܼ ܡܳܪܶܐ ܗ̱ܽܘ ܕܟܽܠܗܽܘܢ܂
04:02 [ai]ܐܶܠܳܐ ܬܚܶܝܬܼ ܐܶܦܿܺܛܪ̈ܳܘܦܿܶܐ ܐܺܝܬܼܰܘܗ̱ܝ܂ ܘܪ̈ܰܒܰܝ ܒܳܬܿܶܐ̈܃ ܥܕܼܰܡܳܐ ܠܙܰܒܼܢܳܐ ܕܣܳܡ ܐܰܒܼܽܘܗ̱ܝ܂
04:03 [ai]ܗܳܟܼܰܢܳܐ ܐܳܦܼ ܚܢܰܢ܂ ܟܰܕܼ ܝܰܠܽܘܕܼܶܐ̈ ܗ̱ܘܰܝܢ܃ ܬܚܶܝܬܼ ܐܶܣܛܽܘܟܿܣܰܘܗ̱ܝ̈ ܕܥܳܠܡܳܐ ܡܫܰܥܒܿܕܼܺܝܢ ܗܘܰܝܢ܂
04:04 [ai]ܟܰܕܼ ܡܛܳܐ ܕܶܝܢ ܫܽܘܠܳܡܶܗ ܕܙܰܒܼܢܳܐ܃ ܫܰܕܿܰܪ ܐܰܠܳܗܳܐ ܠܰܒܼܪܶܗ܃ ܘܰܗܘܳܐ ܡܶܢ ܐܰܢ̱ܬܿܬܼܳܐ܃ ܘܰܗܘܳܐ ܬܚܶܝܬܼ ܢܳܡܽܘܣܳܐ܃
04:05 [ai]ܕܠܰܐܝܠܶܝܢ ܕܰܬܼܚܶܝܬܼ ܢܳܡܽܘܣܳܐ ܐܶܢܽܘܢ ܢܶܙܒܿܶܢ܂ ܘܰܢܩܰܒܿܶܠ ܣܺܝܡܰܬܼ ܒܢܰܝܳܐ܂
04:06 [ai]ܘܕܼܺܐܝܬܼܰܝܟܿܽܘܢ ܕܶܝܢ ܒܢܰܝܳܐ܃ ܫܰܕܿܰܪ ܐܰܠܳܗܳܐ ܪܽܘܚܳܐ ܕܰܒܼܪܶܗ ܠܠܶܒܿܰܘܳܬܼܟܼܽܘܢ̈܂ ܗܳܝ ܕܩܳܪܝܳܐ ܐܰܒܼܰܐ ܐܰܒܼܽܘܢ܀
04:07 [ai]ܡܶܟܿܺܝܠ ܠܳܐ ܗܘܰܝܬܿܽܘܢ ܥܰܒܼܕܿܶܐ̈܂ ܐܶܠܳܐ ܒܢܰܝܳܐ܂ ܘܶܐܢ ܒܢܰܝܳܐ܂ ܐܳܦܼ ܝܳܪ̈ܬܿܶܐ ܕܰܐܠܳܗܳܐ ܒܝܰܕܼ ܝܶܫܽܘܥ ܡܫܺܝܚܳܐ܂
04:08 [ai]ܗܳܝܕܶܝܢ ܓܶܝܪ ܟܰܕܼ ܠܳܐ ܝܳܕܼܥܺܝܢ ܗ̱ܘܰܝܬܿܽܘܢ ܠܰܐܠܳܗܳܐ܃ ܦܠܰܚܬܿܽܘܢ ܠܗܳܢܽܘܢ܂ ܕܡܶܢ ܟܝܳܢܗܽܘܢ ܠܳܐ ܗ̱ܘܰܘ ܐܰܠܳܗܶܐ̈܂
04:09 [ai]ܗܳܫܳܐ ܕܶܝܢ ܕܺܝܕܼܰܥܬܿܽܘܢ ܠܰܐܠܳܗܳܐ܃ ܘܝܰܬܿܺܝܪܳܐܺܝܬܼ ܕܶܐܬܼܺܝܕܼܰܥܬܿܽܘܢ ܡܶܢ ܐܰܠܳܗܳܐ܃ ܬܽܘܒܼ ܗܦܼܰܟܼܬܿܽܘܢ ܠܟܼܽܘܢ ܥܰܠ ܗܳܢܽܘܢ ܐܶܣܛܽܘܟܿܣܶܐ̈ ܡܰܪ̈ܥܶܐ ܘܡܶܣܟܿܺܢܶܐ̈܃ ܘܡܶܢ ܕܪܺܝܫ ܨܳܒܼܶܝܬܿܽܘܢ ܠܡܶܫܬܿܰܥܒܿܳܕܼܽܘ ܠܗܽܘܢ܃
04:10 [ai]ܝܰܘܡܶܐ̈܂ ܘܝܰܪ̈ܚܶܐ܂ ܘܙܰܒܼܢܶܐ̈܂ ܘܰܫܢܰܝܳܐ̈܂ ܢܳܛܪܺܝܬܿܽܘܢ܂
04:11 [ai]ܕܳܚܶܠ ܐ̱ܢܳܐ܂ ܕܰܠܡܳܐ ܣܪܺܝܩܳܐܺܝܬܼ ܠܺܐܝܬܼ ܒܟܽܘܢ܂
04:12 [ai]ܗܘܰܘ ܐܰܟܼܘܳܬܼܝ܃ ܡܶܛܽܠ ܕܳܐܦܼ ܐܶܢܳܐ ܐܰܟܼܘܳܬܼܟܼܽܘܢ ܗܘܺܝܬܼ܀ ܐܰܚܰܝ̈܃ ܒܿܳܥܶܐ ܐ̱ܢܳܐ ܡܶܢܟܼܽܘܢ܂ ܠܳܐ ܡܶܕܶܡ ܐܰܣܟܿܶܠܬܿܽܘܢ ܒܺܝ܂
04:13 [ai]ܝܳܕܼܥܺܝܢ ܐܢ̱ܬܿܽܘܢ ܓܶܝܪ ܕܒܰܟܼܪܺܝܗܽܘܬܼ ܒܶܣܪܝ ܣܰܒܰܪܬܿܟܼܽܘܢ ܗ̱ܘܺܝܬܼ ܡܶܢ ܩܕܼܺܝܡ܂
04:14 [ai]ܘܢܶܣܝܽܘܢܳܐ ܕܒܶܣܪܝ ܠܳܐ ܫܳܛܬܿܽܘܢ܂ ܘܠܳܐ ܢܰܕܿܬܿܽܘܢ܂ ܐܶܠܳܐ ܐܰܝܟܼ ܕܰܠܡܰܠܰܐܟܼܳܐ ܕܰܐܠܳܗܳܐ ܩܰܒܿܶܠܬܿܽܘܢܳܢܝ܃ ܘܰܐܝܟܼ ܕܰܠܝܶܫܽܘܥ ܡܫܺܝܚܳܐ܂
04:15 [ai]ܐܰܝܟܿܰܘ ܗܳܟܼܺܝܠ ܛܽܘܒܼܟܼܽܘܢ܂ ܣܳܗܶܕܼ ܐ̱ܢܳܐ ܓܶܝܪ ܥܠܰܝܟܿܽܘܢ܂ ܕܶܐܠܽܘ ܡܶܫܟܿܚܳܐ ܗ̱ܘܳܬܼ܃ ܥܰܝܢܰܝܟܿܽܘܢ̈ ܚܳܨܶܝܢ ܗܘܰܝܬܿܽܘܢ܂ ܘܝܳܗܒܺܝܢ ܠܺܝ܂
04:16 [ai]ܕܰܠܡܳܐ ܒܥܶܠܕܿܒܼܳܒܼܳܐ ܗ̱ܘܺܝܬܼ ܠܟܼܽܘܢ܂ ܕܰܐܟܼܪܙܶܬܼ ܠܟܼܽܘܢ ܫܪܳܪܳܐ܂
04:17 [ai]ܚܳܣܡܺܝܢ ܒܟܽܘܢ܂ ܠܳܐ ܗ̱ܘܳܐ ܠܫܰܦܿܺܝܪܬܳܐ܂ ܐܶܠܳܐ ܠܡܶܚܒܿܰܫܟܼܽܘܢ ܗ̱ܽܘ ܨܳܒܼܶܝܢ܃ ܕܰܐܢ̱ܬܿܽܘܢ ܬܶܗܘܽܘܢ ܚܳܣܡܺܝܢ ܒܗܽܘܢ܂
04:18 [ai]ܫܰܦܿܺܝܪ ܗ̱ܽܘ ܕܶܝܢ ܕܬܶܬܼܚܰܣܡܽܘܢ ܒܫܰܦܿܺܝܪ̈ܳܬܼܳܐ ܒܟܽܠܙܒܼܰܢ܃ ܘܠܳܐ ܐܶܡܰܬܼܝ ܕܰܠܘܳܬܼܟܼܽܘܢ ܐ̱ܢܳܐ ܒܰܠܚܽܘܕܼ܀
04:19 [ai]ܒܢܰܝ܃ ܐܰܝܠܶܝܢ ܕܡܶܢ ܕܪܺܝܫ ܡܚܰܒܿܶܠ ܐ̱ܢܳܐ܃ ܥܕܼܰܡܳܐ ܕܢܶܬܿܬܿܨܺܝܪ ܒܟܽܘܢ ܡܫܺܝܚܳܐ܃
04:20 [ai]ܨܳܒܼܶܐ ܗ̱ܘܺܝܬܼ ܕܶܝܢ ܕܶܐܗܘܶܐ ܠܘܳܬܼܟܼܽܘܢ ܗܳܫܳܐ܃ ܘܶܐܫܰܚܠܶܦܼ ܒܰܪ̱ܬܼ ܩܳܠܝ܃ ܡܶܛܽܠ ܕܬܰܡܺܝܗ ܐ̱ܢܳܐ ܒܟܽܘܢ܂
04:21 [ai]ܐܶܡܰܪܘ ܠܺܝ܂ ܐܰܢ̱ܬܿܽܘܢ ܐܰܝܠܶܝܢ ܕܨܳܒܼܶܝܢ ܕܢܶܗܘܽܘܢ ܬܚܶܝܬܼ ܢܳܡܽܘܣܳܐ܃ ܠܶܗ ܠܢܳܡܽܘܣܳܐ ܠܳܐ ܫܳܡܥܺܝܢ ܐܢ̱ܬܿܽܘܢ܃
04:22 [ai]ܟܬܼܺܝܒܼ ܓܶܝܪ ܕܠܰܐܒܼܪܳܗܳܡ ܬܿܪ̈ܶܝܢ ܒܢܺܝܢ ܗܘܰܘ ܠܶܗ܂ ܚܰܕܼ ܡܶܢ ܐܰܡܬܼܳܐ܂ ܘܚܰܕܼ ܡܶܢ ܚܺܐܪܬܳܐ܂
04:23 [ai]ܐܶܠܳܐ ܗܰܘ ܕܡܶܢ ܐܰܡܬܼܳܐ ܒܰܒܼܣܰܪ ܐܶܬܼܺܝܠܶܕܼ܂ ܗܰܘ ܕܶܝܢ ܕܡܶܢ ܚܺܐܪܬܳܐ ܒܡܽܘܠܟܿܳܢܳܐ ܗܘܳܐ܂
04:24 [ai]ܗܳܠܶܝܢ ܕܶܝܢ ܐܺܝܬܼܰܝܗܶܝܢ ܦܶܠܳܐܬܼܳܐ̈ ܕܿܬܼܰܪ̈ܬܿܶܝܢ ܕܺܝܰܬܼܺܩܰܣ̈܂ ܚܕܼܳܐ ܕܡܶܢ ܛܽܘܪ ܣܺܝܢܰܝ܂ ܝܳܠܕܿܳܐ ܠܥܰܒܼܕܿܽܘܬܼܳܐ܂ ܕܺܐܝܬܼܶܝܗ ܗܳܓܼܳܪ܂
04:25 [ai]ܗܳܓܼܳܪ ܓܶܝܪ ܛܽܘܪܳܐ ܗܽܘ ܕܣܺܝܢܰܝ܃ ܕܒܰܐܪܰܒܼܺܝܰܐ܃ ܘܫܳܠܡܳܐ ܠܗܳܕܼܶܐ ܐܽܘܪܺܫܠܶܡ܃ ܘܦܼܳܠܚܳܐ ܥܰܒܼܕܿܽܘܬܼܳܐ ܗܺܝ ܘܰܒܢܶܝܗ܂
04:26 [ai]ܗܳܝ ܕܶܝܢ ܐܽܘܪܺܫܠܶܡ ܥܶܠܳܝܬܳܐ܂ ܚܺܐܪܬܳܐ ܗ̱ܝ܃ ܕܺܐܝܬܼܶܝܗ ܐܶܡܰܢ܂
04:27 [ai]ܟܬܼܺܝܒܼ ܓܶܝܪ܃ ܕܶܐܬܼܒܿܰܣܰܡܝ ܥܩܰܪܬܼܳܐ܂ ܗܳܝ ܕܠܳܐ ܝܳܠܕܿܳܐ܂ ܘܶܐܬܼܦܿܰܨܚܝ ܘܰܓܼܥܳܝ܂ ܗܳܝ ܕܠܳܐ ܡܚܰܒܠܳܐ܂ ܡܶܛܽܠ ܕܰܣܓܼܺܝܘ ܒܢܶܝܗ ܕܨܳܕܼܺܝܬܼܳܐ܂ ܝܰܬܿܺܝܪ ܡܶܢ ܒܢܶܝܗ ܕܰܒܼܥܺܝܠܬܳܐ܀
04:28 [ai]ܚܢܰܢ ܕܶܝܢ ܐܰܚܰܝ̈܃ ܐܰܝܟܼ ܐܺܝܣܚܳܩ܂ ܒܢܰܝ ܡܽܘܠܟܿܳܢܳܐ ܚܢܰܢ܂
04:29 [ai]ܘܰܐܝܟܼ ܕܗܳܝܕܶܝܢ܂ ܗܰܘ ܕܺܝܠܺܝܕܼ ܗ̱ܘܳܐ ܒܒܼܶܣܪܳܐ ܪܳܕܼܶܦܼ ܗ̱ܘܳܐ ܠܗܰܘ ܕܰܒܼܪܽܘܚܳܐ܃ ܗܳܟܼܰܢܳܐ ܐܳܦܼ ܗܳܫܳܐ܂
04:30 [ai]ܐܶܠܳܐ ܡܳܢܳܐ ܐܶܡܰܪ ܟܬܼܳܒܼܳܐ܂ ܐܰܦܿܶܩܶܝܗ ܠܰܐܡܬܼܳܐ ܘܠܰܒܼܪܳܗ܃ ܡܶܛܽܠ ܕܠܳܐ ܢܺܐܪܰܬܼ ܒܪܳܗ ܕܰܐܡܬܼܳܐ ܥܰܡ ܒܪܳܗ ܕܚܺܐܪܬܳܐ܂
04:31 [ai]ܚܢܰܢ ܗܳܟܼܺܝܠ ܐܰܚܰܝ̈܃ ܠܳܐ ܗܘܰܝܢ ܒܢܰܝ ܐܰܡܬܼܳܐ ܐܶܠܳܐ ܒܢܰܝ ܚܺܐܪܬܳܐ܂

next chapter