← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62048: Gal

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


05:01 [ai]ܩܽܘܡܘ ܗܳܟܼܺܝܠ ܒܚܺܐܪܽܘܬܼܳܐ ܗܳܝ ܕܰܡܫܺܝܚܳܐ ܚܰܪܪܰܢ܃ ܘܠܳܐ ܬܿܶܬܼܟܰܕܼܢܽܘܢ ܬܽܘܒܼ ܒܢܺܝܪܳܐ ܕܥܰܒܼܕܿܽܘܬܼܳܐ ܿ܀ܿ܀ܿ
05:02 [ai]ܗܳܐ ܐܶܢܳܐ ܦܿܰܘܠܳܘܣ ܐܳܡܰܪ ܐ̱ܢܳܐ ܠܟܼܽܘܢ܃ ܕܶܐܢ ܬܶܬܼܓܿܰܙܪܽܘܢ܂ ܡܫܺܝܚܳܐ ܡܶܕܶܡ ܠܳܐ ܡܰܗܢܶܐ ܠܟܼܽܘܢ܂
05:03 [ai]ܡܣܰܗܶܕܼ ܐ̱ܢܳܐ ܕܶܝܢ ܬܽܘܒܼ ܠܟܼܽܠ ܒܰܪܢܳܫ ܕܡܶܬܼܓܿܙܰܪ܃ ܕܚܰܝܳܒܼ ܗ̱ܽܘ ܕܟܽܠܶܗ ܢܳܡܽܘܣܳܐ ܢܶܥܒܿܶܕܼ܂
05:04 [ai]ܐܶܬܼܒܿܰܛܰܠܬܿܽܘܢ ܠܟܼܽܘܢ ܡܶܢ ܡܫܺܝܚܳܐ܂ ܐܰܝܠܶܝܢ ܕܰܒܼܢܳܡܽܘܣܳܐ ܡܶܙܕܿܰܕܿܩܺܝܬܿܽܘܢ܂ ܘܡܶܢ ܛܰܝܒܿܽܘܬܼܳܐ ܢܦܼܰܠܬܿܽܘܢ܂
05:05 [ai]ܚܢܰܢ ܓܶܝܪ ܒܪܽܘܚܳܐ ܕܡܶܢ ܗܰܝܡܳܢܽܘܬܼܳܐ܂ ܠܣܰܒܼܪܳܐ ܕܙܰܕܿܺܝܩܽܘܬܼܳܐ ܡܩܰܘܶܝܢܰܢ܂
05:06 [ai]ܒܰܡܫܺܝܚܳܐ ܓܶܝܪ ܝܶܫܽܘܥ܃ ܠܳܐ ܓܙܽܘܪܬܳܐ ܡܶܕܶܡ ܐܺܝܬܼܶܝܗ܂ ܘܠܳܐ ܥܽܘܪܠܽܘܬܼܳܐ܃ ܐܶܠܳܐ ܗܰܝܡܳܢܽܘܬܼܳܐ ܕܡܶܬܼܓܿܰܡܪܳܐ ܒܚܽܘܒܿܳܐ܀
05:07 [ai]ܫܰܦܿܺܝܪ ܪܳܗܛܺܝܢ ܗܘܰܝܬܿܽܘܢ܃ ܡܰܢܽܘ ܕܰܘܶܕܼܟܼܽܘܢ܃ ܕܠܰܫܪܳܪܳܐ ܠܳܐ ܬܶܬܿܛܦܿܺܝܣܽܘܢ܂
05:08 [ai]ܦܝܳܣܟܼܽܘܢ ܠܳܐ ܗ̱ܘܳܐ ܡܶܢ ܗܰܘ ܕܰܩܪܳܟܼܽܘܢ܂
05:09 [ai]ܚܡܺܝܪܳܐ ܩܰܠܺܝܠ ܟܽܠܳܗ ܓܒܼܺܝܠܬܳܐ ܡܰܚܡܰܥ܂
05:10 [ai]ܐܶܢܳܐ ܬܟܼܺܝܠ ܐ̱ܢܳܐ ܥܠܰܝܟܿܽܘܢ ܒܡܳܪܰܢ܃ ܕܿܡܶܕܶܡ ܐ̱ܚܪܺܝܢ ܠܳܐ ܡܶܬܼܪܰܥܶܝܬܿܽܘܢ܂ ܘܰܐܝܢܳܐ ܕܕܼܳܠܰܚ ܠܟܼܽܘܢ܃ ܗܽܘ ܢܣܰܝܒܿܪܺܝܘܗ̱ܝ ܠܕܼܺܝܢܳܐ܂ ܡܰܢ ܕܺܐܝܬܼܰܘܗ̱ܝ܀
05:11 [ai]ܐܶܢܳܐ ܕܶܝܢ ܐܰܚܰܝ̈܃ ܐܶܠܽܘ ܥܕܼܰܟܿܺܝܠ ܓܙܽܘܪܬܳܐ ܡܰܟܼܪܶܙ ܗ̱ܘܺܝܬܼ܃ ܠܡܳܢܳܐ ܡܶܬܼܪܕܼܶܦܼ ܗ̱ܘܺܝܬܼ܂ ܕܰܠܡܳܐ ܐܶܬܼܒܿܰܛܰܠ ܠܶܗ ܟܶܫܠܶܗ ܕܰܙܩܺܝܦܼܳܐ܃
05:12 [ai]ܐܶܫܬܿܽܘܦܼ ܕܶܝܢ ܐܳܦܼ ܡܶܦܼܣܰܩ ܢܶܦܼܣܩܽܘܢ ܗܳܢܽܘܢ ܕܕܼܳܠܚܺܝܢ ܠܟܼܽܘܢ܂
05:13 [ai]ܐܰܢ̱ܬܿܽܘܢ ܕܶܝܢ ܠܚܺܐܪܽܘܬܼܳܐ ܗ̱ܘ ܐܶܬܼܩܪܺܝܬܿܽܘܢ ܐܰܚܰܝ̈܃ ܒܰܠܚܽܘܕܼ ܠܳܐ ܬܶܗܘܶܐ ܚܺܐܪܽܘܬܼܟܼܽܘܢ ܠܥܶܠܰܬܼ ܒܶܣܪܳܐ܂ ܐܶܠܳܐ ܒܚܽܘܒܿܳܐ ܗܘܰܝܬܿܽܘܢ ܡܶܫܬܿܰܥܒܿܕܼܺܝܢ ܚܰܕܼ ܠܚܰܕܼ܂
05:14 [ai]ܟܽܠܶܗ ܓܶܝܪ ܢܳܡܽܘܣܳܐ ܒܰܚܕܼܳܐ ܡܶܠܬܼܳܐ ܡܶܬܼܡܰܠܶܐ܃ ܒܗܳܝ܂ ܕܬܰܚܶܒܼ ܠܩܰܪܺܝܒܼܳܟܼ ܐܰܝܟܼ ܢܰܦܼܫܳܟܼ܂
05:15 [ai]ܐܶܢ ܕܶܝܢ ܚܰܕܼ ܠܚܰܕܼ ܡܢܰܟܿܬܼܺܝܬܿܽܘܢ ܘܳܐܟܼܠܺܝܬܿܽܘܢ܃ ܚܙܰܘ ܕܰܠܡܳܐ ܚܰܕܼ ܡܶܢ ܚܰܕܼ ܬܣܽܘܦܼܽܘܢ܀
05:16 [ai]ܐܳܡܰܪ ܐ̱ܢܳܐ ܕܶܝܢ ܕܰܒܼܪܽܘܚܳܐ ܗܘܰܝܬܿܽܘܢ ܡܗܰܠܟܼܺܝܢ܃ ܘܪܶܓܿܬܼܳܐ ܕܒܶܣܪܳܐ ܠܳܐ ܡܶܢ ܡܬܼܽܘܡ ܬܶܥܒܿܕܼܽܘܢ܂
05:17 [ai]ܒܶܣܪܳܐ ܓܶܝܪ ܪܳܐܶܓܼ ܡܶܕܶܡ ܕܢܳܟܼܶܐ ܠܪܽܘܚܳܐ܃ ܘܪܽܘܚܳܐ ܪܳܓܿܳܐ ܡܶܕܶܡ ܕܢܳܟܼܶܐ ܠܒܼܶܣܪܳܐ܂ ܘܰܬܼܪ̈ܰܝܗܽܘܢ ܣܰܩܽܘܒܼܠܶܐ̈ ܐܶܢܽܘܢ ܚܰܕܼ ܕܚܰܕܼ܃ ܕܠܳܐ ܡܶܕܶܡ ܕܨܳܒܼܶܝܬܿܽܘܢ ܬܶܗܘܽܘܢ ܥܳܒܼܕܺܝܢ܂
05:18 [ai]ܐܶܢ ܕܶܝܢ ܒܪܽܘܚܳܐ ܡܶܬܿܕܿܰܒܿܪܺܝܢ ܐܢ̱ܬܿܽܘܢ܃ ܠܳܐ ܗܘܰܝܬܿܽܘܢ ܬܚܶܝܬܼ ܢܳܡܽܘܣܳܐ܂
05:19 [ai]ܺܝܕܼܺܝܥܺܝܢ ܐܶܢܽܘܢ ܓܶܝܪ ܥܒܼܳܕܼܰܘܗ̱ܝ̈ ܕܒܶܣܪܳܐ܂ ܕܺܐܝܬܼܰܝܗܽܘܢ܃ ܙܳܢܝܽܘܬܼܳܐ܂ ܛܰܢܦܼܽܘܬܼܳܐ܂ ܨܰܚܢܽܘܬܼܳܐ܂
05:20 [ai]ܦܽܘܠܚܳܢܳܐ ܕܿܰܦܼܬܼܰܟܼܪ̈ܶܐ܂ ܚܰܪܳܫܽܘܬܼܳܐ܂ ܒܥܶܠܕܿܒܼܳܒܼܽܘܬܼܳܐ܂ ܚܶܪܝܳܢܳܐ܂ ܛܢܳܢܳܐ܂ ܚܶܡܬܳܐ܂ ܥܶܨܝܳܢܳܐ܂ ܦܳܠܰܓܼܘܳܬܼܳܐ̈܂ ܣܶܕܼܩܶܐ̈܂
05:21 [ai]ܚܣܳܡܳܐ܂ ܩܶܛܠܳܐ܂ ܪܰܘܳܝܽܘܬܼܳܐ܂ ܙܡܳܪܳܐ܂ ܘܟܼܽܠ ܕܰܠܗܳܠܶܝܢ ܕܳܡܶܝܢ܂ ܘܰܐܝܠܶܝܢ ܕܗܳܠܶܝܢ ܣܳܥܪܺܝܢ܂ ܐܰܝܟܼ ܕܡܶܢ ܠܽܘܩܕܼܰܡ ܐܶܡܪܶܬܼ ܠܟܼܽܘܢ܃ ܐܳܦܼ ܗܳܫܳܐ ܐܳܡܰܪܺܐ̱ܢܳܐ܃ ܕܡܰܠܟܿܽܘܬܼܶܗ ܕܰܐܠܳܗܳܐ ܠܳܐ ܝܳܪܬܿܺܝܢ܀
05:22 [ai]ܦܿܺܐܪ̈ܶܐ ܕܶܝܢ ܕܪܽܘܚܳܐ ܐܺܝܬܼܰܝܗܽܘܢ܃ ܚܽܘܒܿܳܐ܂ ܚܰܕܼܽܘܬܼܳܐ܂ ܫܠܳܡܳܐ܂ ܡܰܓܿܪܰܬܼ܂ ܪܽܘܚܳܐ܂ ܒܰܣܺܝܡܽܘܬܼܳܐ܂ ܛܳܒܼܽܘܬܼܳܐ܂ ܗܰܝܡܳܢܽܘܬܼܳܐ܂
05:23 [ai]ܡܰܟܿܺܝܟܼܽܘܬܼܳܐ܂ ܡܣܰܝܒܿܪܳܢܽܘܬܼܳܐ܂ ܥܰܠ ܗܳܠܶܝܢ ܢܳܡܽܘܣܳܐ ܠܳܐ ܣܺܝܡ܂
05:24 [ai]ܐܰܝܠܶܝܢ ܕܶܝܢ ܕܕܼܰܡܫܺܝܚܳܐ ܐܶܢܽܘܢ܃ ܒܶܣܪܗܽܘܢ ܙܩܰܦܼܘ܂ ܥܰܡ ܟܽܠܗܽܘܢ ܟܺܐܒܼܰܘܗ̱ܝ̈ ܘܰܪ̈ܓܼܺܝܓܼܳܬܼܶܗ܂
05:25 [ai]ܢܺܚܶܐ ܗܳܟܼܺܝܠ ܒܪܽܘܚܳܐ܃ ܘܰܠܪܽܘܚܳܐ ܢܶܫܠܰܡ܂
05:26 [ai]ܘܠܳܐ ܢܶܗܘܶܐ ܣܪ̈ܺܝܩܰܝ ܫܽܘܒܼܚܳܐ܃ ܕܡܰܩܠܺܝܢ ܚܰܕܼ ܥܰܠ ܚܰܕܼ܂ ܘܚܳܣܡܺܝܢ ܚܰܕܼ ܒܚܰܕܼ܀

next chapter