The Comprehensive Aramaic Lexicon

06:01 [ai]	ܐܰܚܰܝ̈܃ ܐܶܢ ܐ̱ܢܳܫ ܡܶܢܟܼܽܘܢ ܢܶܬܼܩܰܕܰܡ ܒܣܰܟܼܠܽܘܬܼܳܐ܃ ܐܰܢ̱ܬܿܽܘܢ ܐܰܝܠܶܝܢ ܕܰܒܼܪܽܘܚ ܐܰܢ̱ܬܿܽܘܢ܃ ܐܰܬܼܩܢܽܘܗ̱ܝ ܒܪܽܘܚܳܐ ܡܰܟܿܺܝܟܼܬܳܐ܂ ܘܰܗܘܰܝܬܿܽܘܢ ܙܗܺܝܪܺܝܢ܃ ܕܕܼܰܠܡܳܐ ܐܳܦܼ ܐܰܢ̱ܬܿܽܘܢ ܬܶܬܼܢܰܣܽܘܢ܂
06:02 [ai]	ܘܰܛܥܰܢܘ ܝܽܘܩܪܳܐ ܕܰܚܕܼܳܕܼܶܐ̈܃ ܕܗܳܟܼܰܢܳܐ ܡܡܰܠܶܝܬܿܽܘܢ ܢܳܡܽܘܣܶܗ ܕܰܡܫܺܝܚܳܐ܂
06:03 [ai]	ܐܶܢ ܓܶܝܪ ܐ̱ܢܳܫ ܣܳܒܼܰܪ ܕܺܐܝܬܼܰܘܗ̱ܝ ܡܶܕܶܡ܂ ܟܰܕܼ ܠܳܐ ܐܺܝܬܼܰܘܗ̱ܝ܃ ܢܰܦܼܫܶܗ ܡܰܛܥܶܐ܂
06:04 [ai]	ܐܶܠܳܐ ܐ̱ܢܳܫ ܥܒܼܳܕܼܶܗ ܢܶܗܘܶܐ ܒܳܩܶܐ܃ ܘܗܳܝܕܶܝܢ ܒܰܝܢܰܘܗ̱ܝ ܠܢܰܦܼܫܶܗ ܢܶܗܘܶܐ ܫܽܘܒܼܗܳܪܶܗ܂ ܘܠܳܐ ܒܰܐ̱ܚܪ̈ܳܢܶܐ܂
06:05 [ai]	ܟܽܠܢܳܫ ܓܶܝܪ ܡܰܘܒܠܳܐ ܕܢܰܦܼܫܶܗ ܢܶܫܩܽܘܠ܂
06:06 [ai]	ܢܶܫܬܰܘܬܿܰܦܼ ܕܶܝܢ ܗܰܘ ܕܫܳܡܰܥ ܡܶܠܬܼܳܐ ܠܗܰܘ ܡܰܢ ܕܡܰܫܡܰܥ ܠܶܗ܂ ܒܟܽܠܗܶܝܢ ܛܳܒܼܳܬܼܳܐ̈܂
06:07 [ai]	ܠܳܐ ܬܶܛܥܽܘܢ܂ ܐܰܠܳܗܳܐ ܠܳܐ ܡܶܬܼܒܿܰܙܰܚ܂ ܡܶܕܶܡ ܕܙܳܪܰܥ ܓܶܝܪ ܒܰܪ ܐ̱ܢܳܫܳܐ܂ ܗܰܘ ܗ̱ܽܘ ܚܳܨܶܕܼ܂
06:08 [ai]	ܡܰܢ ܕܒܰܒܼܣܰܪ ܙܳܪܰܥ܃ ܡܶܢ ܒܶܣܪܳܐ ܚܒܼܳܠܳܐ ܗ̱ܘ ܚܳܨܶܕܼ܂ ܘܡܰܢ ܕܰܒܼܪܽܘܚ ܙܳܪܰܥ܃ ܡܶܢ ܪܽܘܚܳܐ ܚܰܝ̈ܶܐ ܕܰܠܥܳܠܰܡ ܢܶܚܨܽܘܕܼ܂
06:09 [ai]	ܘܟܼܰܕܼ ܥܳܒܼܕܺܝܢܰܢ ܕܛܳܒܼ܃ ܠܳܐ ܗ̱ܘܳܬܼ ܡܳܐܢܳܐ ܠܰܢ܂ ܢܶܗܘܶܐ ܓܶܝܪ ܙܰܒܼܢܳܐ ܕܢܶܚܨܽܘܕܼ܃ ܘܠܳܐ ܬܶܡܰܐܢ ܠܰܢ܂
06:10 [ai]	ܗܳܫܳܐ ܗܳܟܼܺܝܠ ܥܰܕܼ ܙܰܒܼܢܳܐ ܐܺܝܬܼ ܠܰܢ܃ ܢܶܦܼܠܽܘܚ ܛܳܒܼܳܬܼܳܐ̈ ܠܘܳܬܼ ܟܽܠܢܳܫ܂ ܝܰܬܿܺܝܪܳܐܺܝܬܼ ܠܘܳܬܼ ܒܢܰܝ ܒܰܝܬܳܐ ܕܗܰܝܡܳܢܽܘܬܼܳܐ܂
06:11 [ai]	ܚܙܰܘ ܐܰܝܠܶܝܢ ܟܬܼܺܝܒܼܳܢ̈ ܟܶܬܼܒܿܶܬܼ ܠܟܼܽܘܢ ܒܺܐܝܕܼܰܝ̈܂
06:12 [ai]	ܐܰܝܠܶܝܢ ܕܨܳܒܼܶܝܢ ܕܢܶܫܬܿܰܒܼܗܪܽܘܢ ܒܒܼܶܣܪܳܐ܃ ܗܶܢܽܘܢ ܐܳܠܨܺܝܢ ܠܟܼܽܘܢ ܕܬܶܬܼܓܿܰܙܪܽܘܢ܃ ܕܒܰܠܚܽܘܕܼ ܒܰܙܩܺܝܦܼܶܗ ܕܰܡܫܺܝܚܳܐ ܠܳܐ ܢܶܬܼܪܰܕܼܦܿܽܘܢ܂
06:13 [ai]	ܐܳܦܼܠܳܐ ܓܶܝܪ ܗܶܢܽܘܢ ܗܳܠܶܝܢ ܕܓܳܙܪܺܝܢ ܢܳܛܪܺܝܢ ܢܳܡܽܘܣܳܐ܃ ܐܶܠܳܐ ܨܳܒܼܶܝܢ ܕܬܶܬܼܓܿܰܙܪܽܘܢ܃ ܕܰܒܼܒܼܶܣܪܟܼܽܘܢ ܕܺܝܠܟܼܽܘܢ ܢܶܫܬܿܰܒܼܗܪܽܘܢ܂
06:14 [ai]	ܠܺܝ ܕܶܝܢ ܠܳܐ ܢܶܗܘܶܐ ܠܺܝ ܕܶܐܫܬܿܰܒܼܗܰܪ܃ ܐܶܠܳܐ ܒܰܙܩܺܝܦܼܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂ ܕܒܶܗ ܥܳܠܡܳܐ ܙܩܺܝܦܼ ܠܺܝ܃ ܘܶܐܢܳܐ ܙܩܺܝܦܼ ܐ̱ܢܳܐ ܠܥܳܠܡܳܐ܂
06:15 [ai]	ܠܳܐ ܓܶܝܪ ܓܙܽܘܪܬܳܐ ܐܺܝܬܼܶܝܗ ܡܶܕܶܡ܂ ܘܠܳܐ ܥܽܘܪܠܽܘܬܼܳܐ܃ ܐܶܠܳܐ ܒܪܺܝܬܼܳܐ ܚܕܼܰܬܼܳܐ܂
06:16 [ai]	ܘܰܐܝܠܶܝܢ ܕܰܠܗܳܢܳܐ ܫܒܼܺܝܠܳܐ ܫܳܠܡܺܝܢ܃ ܫܠܳܡܳܐ ܢܶܗܘܶܐ ܥܠܰܝܗܽܘܢ ܘܪ̈ܰܚܡܶܐ܃ ܘܥܰܠ ܐܺܝܣܪܳܝܶܠ ܕܰܐܠܳܗܳܐ܀
06:17 [ai]	ܡܶܟܿܺܝܠ ܠܺܝ ܐ̱ܢܳܫ ܥܰܡܠܳܐ ܠܳܐ ܢܰܪܡܶܐ܃ ܐܶܢܳܐ ܓܶܝܪ ܟܽܘܬܼܡܳܬܼܶܗ̈ ܕܡܳܪܰܢ ܝܶܫܽܘܥ ܒܦܰܓܼܪܝ ܫܩܺܝܠ ܐ̱ܢܳܐ܂
06:18 [ai]	ܛܰܝܒܿܽܘܬܼܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܥܰܡ ܪܽܘܚܟܼܽܘܢ ܐܰܚܰܝ̈܂ ܐܰܡܺܝܢ