The Comprehensive Aramaic Lexicon

04:01 [ai]	ܒܿܳܥܶܐ ܐ̱ܢܳܐ ܗܳܟܼܺܝܠ ܡܶܢܟܼܽܘܢ ܐܶܢܳܐ ܐܰܣܺܝܪܳܐ ܒܡܳܪܰܢ܃ ܕܰܬܼܗܰܠܟܼܽܘܢ ܐܰܝܟܿܰܢܳܐ ܕܝܳܐܶܐ ܠܩܶܪܝܳܢܳܐ ܕܶܐܬܼܩܪܺܝܬܿܽܘܢ܃
04:02 [ai]	ܒܟܽܠܳܗ ܡܰܟܿܺܝܟܼܽܘܬܼ ܪܶܥܝܳܢܳܐ܃ ܘܢܺܝܚܽܘܬܼܳܐ ܘܢܰܓܿܺܝܪܽܘܬܼ ܪܽܘܚܳܐ܂ ܘܰܗܘܰܝܬܿܽܘܢ ܡܣܰܝܒܿܪܺܝܢ ܚܰܕܼ ܠܚܰܕܼ ܒܚܽܘܒܿܳܐ܂
04:03 [ai]	ܘܰܗܘܰܝܬܿܽܘܢ ܚܦܼܺܝܛܺܝܢ ܠܡܶܛܰܪ ܐܰܘܝܽܘܬܼܳܐ ܕܪܽܘܚܳܐ܂ ܒܰܚܙܳܩܳܐ ܕܰܫܠܳܡܳܐ܃
04:04 [ai]	ܕܬܶܗܘܽܘܢ ܒܚܰܕܼ ܦܰܓܼܪܳܐ ܘܒܼܰܚܕܼܳܐ ܪܽܘܚܳܐ܃ ܐܰܝܟܼ ܡܳܐ ܕܶܐܬܼܩܪܺܝܬܿܽܘܢ ܒܚܰܕܼ ܣܰܒܼܪܳܐ ܕܩܶܪܝܳܢܟܼܽܘܢ܂
04:05 [ai]	ܚܰܕܼ ܗ̱ܽܘ ܓܶܝܪ ܡܳܪܝܳܐ܂ ܘܰܚܕܼܳܐ ܗܰܝܡܳܢܽܘܬܼܳܐ܂ ܘܰܚܕܼܳܐ ܡܰܥܡܽܘܕܼܺܝܬܼܳܐ܂
04:06 [ai]	ܘܚܰܕܼ ܐܰܠܳܗܳܐ ܐܰܒܼܳܐ ܕܟܽܠ܂ ܘܥܰܠ ܟܽܠ ܘܰܒܝܰܕܼ ܟܽܠ ܘܰܒܟܼܽܠܰܢ܂
04:07 [ai]	ܠܚܰܕܼ ܚܰܕܼ ܡܶܢܰܢ ܕܶܝܢ ܐܶܬܼܝܰܗܒܿܰܬܼ ܛܰܝܒܿܽܘܬܼܳܐ܃ ܐܰܝܟܼ ܡܫܽܘܚܬܼܳܐ ܕܡܰܘܗܰܒܼܬܼܶܗ ܕܰܡܫܺܝܚܳܐ܂
04:08 [ai]	ܡܶܛܽܠ ܗܳܢܳܐ ܐܰܡܺܝܪ܃ ܕܰܣܠܶܩ ܠܰܡܪܰܘܡܳܐ ܘܰܫܒܼܳܐ ܫܒܼܺܝܬܼܳܐ܃ ܘܝܰܗ̱ܒܼ ܡܰܘܗܒܼܳܬܼܳܐ̈ ܠܰܒܼܢܰܝܢܳܫܳܐ܂
04:09 [ai]	ܕܰܣܠܶܩ ܕܶܝܢ܂ ܡܳܢܳܐ ܗ̱ܝ܃ ܐܶܠܳܐ ܐܶܢ ܕܳܐܦܼ ܢܚܶܬܼ ܠܽܘܩܕܼܰܡ ܠܬܼܰܚܬܿܳܝܳܬܼܳܗ̈ ܕܰܐܪܥܳܐ܂
04:10 [ai]	ܗܰܘ ܕܰܢܚܶܬܼ܃ ܗܽܘܝܽܘ ܗܰܘ ܕܳܐܦܼ ܣܠܶܩ܃ ܠܥܶܠ ܡܶܢ ܟܽܠܗܽܘܢ ܫܡܰܝܳܐ܂ ܕܰܢܫܰܠܶܡ ܟܽܠ܂
04:11 [ai]	ܘܗܽܘ ܝܰܗ̱ܒܼ܃ ܐܺܝܬܼ ܕܰܫܠܺܝܚܶܐ̈܂ ܘܺܐܝܬܼ ܕܰܢܒܼܺܝܶܐ̈܂ ܘܺܐܝܬܼ ܕܰܡܣܰܒܿܪ̈ܳܢܶܐ܂ ܘܺܐܝܬܼ ܕܿܪ̈ܳܥܰܘܳܬܼܳܐ܂ ܘܺܐܝܬܼ ܕܡܰܠܦܼܳܢܶܐ̈܃
04:12 [ai]	ܠܰܓܼܡܳܪܳܐ ܕܩܰܕܿܺܝܫܶܐ̈܂ ܠܰܥܒܼܳܕܼܳܐ ܕܬܶܫܡܶܫܬܳܐ܂ ܠܒܼܶܢܝܳܢܳܐ ܕܦܰܓܼܪܳܐ ܕܰܡܫܺܝܚܳܐ܃
04:13 [ai]	ܥܕܼܰܡܳܐ ܕܟܽܠܰܢ ܢܶܗܘܶܐ ܚܰܕܼ ܡܶܕܶܡ܂ ܒܗܰܝܡܳܢܽܘܬܼܳܐ ܘܒܼܺܝܕܼܰܥܬܼܳܐ ܕܰܒܼܪܶܗ ܕܰܐܠܳܗܳܐ܃ ܘܚܰܕܼ ܓܰܒܼܪܳܐ ܓܡܺܝܪܳܐ ܒܰܡܫܽܘܚܬܼܳܐ ܕܩܰܘܡܬܼܳܐ ܕܫܽܘܡܠܳܝܶܗ ܕܰܡܫܺܝܚܳܐ܃
04:14 [ai]	ܘܠܳܐ ܢܶܗܘܶܐ ܝܰܠܽܘܕܼܶܐ̈܂ ܕܡܶܙܕܿܰܥܙܥܺܝܢ ܘܡܶܫܬܿܰܢܶܝܢ ܠܟܼܽܠ ܪܽܘܚ ܕܝܽܘܠܦܿܳܢܶܐ̈ ܢܟܼܺܝܠܶܐ̈ ܕܿܰܒܼܢܰܝܢܳܫܳܐ܃ ܗܳܢܽܘܢ ܕܰܒܼܚܳܪܥܽܘܬܼܗܽܘܢ ܡܶܨܛܰܢܥܺܝܢ ܕܢܰܛܥܽܘܢ܃
04:15 [ai]	ܐܶܠܳܐ ܗܘܰܝܢ ܫܰܪܺܝܪܺܝܢ ܒܿܚܽܘܒܰܢ܃ ܕܟܽܘܠ ܡܶܕܶܡ ܕܺܝܠܰܢ ܢܶܪܒܿܶܐ ܒܰܡܫܺܝܚܳܐ܂ ܕܗܽܘܝܽܘ ܪܺܫܳܐ܃
04:16 [ai]	ܘܡܶܢܶܗ ܟܽܠܶܗ ܦܰܓܼܪܳܐ ܡܶܬܼܪܰܟܿܰܒܼ ܘܡܶܬܼܩܰܛܰܪ ܒܟܽܠ ܫܳܪ̈ܝܳܢ܃ ܐܰܝܟܼ ܡܰܘܗܰܒܼܬܳܐ ܕܡܶܬܼܝܰܗܒܿܳܐ ܒܰܡܫܽܘܚܬܼܳܐ ܠܟܼܽܠ ܗܰܕܿܳܡ܃ ܠܬܼܰܪܒܺܝܬܼܳܐ ܕܺܝܠܶܗ ܕܦܰܓܼܪܳܐ܂ ܕܰܒܼܚܽܘܒܿܳܐ ܢܶܫܬܿܰܠܰܡ ܒܶܢܝܳܢܶܗ܀
04:17 [ai]	ܗܳܕܼܶܐ ܕܶܝܢ ܐܳܡܰܪ ܐ̱ܢܳܐ ܘܰܡܣܰܗܶܕܼ ܐ̱ܢܳܐ ܒܡܳܪܝܳܐ܃ ܕܡܶܢ ܗܳܫܳܐ ܠܳܐ ܬܶܗܘܽܘܢ ܡܗܰܠܟܼܺܝܢ ܐܰܝܟܼ ܫܰܪܟܿܳܐ ܕܥܰܡ̱ܡܶܐ̈܃ ܕܰܡܗܰܠܟܼܺܝܢ ܒܰܣܪܺܝܩܽܘܬܼ ܪܶܥܝܳܢܗܽܘܢ܂
04:18 [ai]	ܘܚܶܫܽܘܟܼܺܝܢ ܒܡܰܕܿܥܰܝܗܽܘܢ̈܂ ܘܢܽܘܟܼܪ̈ܳܝܺܝܢ ܐܶܢܽܘܢ ܡܶܢ ܚܰܝܰܘܗ̱ܝ̈ ܕܰܐܠܳܗܳܐ܃ ܡܶܛܽܠ ܕܠܰܝܬܿ ܒܗܽܘܢ ܺܝܕܼܰܥܬܼܳܐ܂ ܘܡܶܛܽܠ ܥܘܺܝܪܽܘܬܼ ܠܶܒܗܽܘܢ܂
04:19 [ai]	ܗܳܢܽܘܢ ܕܰܦܼܣܰܩܘ ܣܰܒܼܪܗܽܘܢ܃ ܘܰܐܫܠܶܡܘ ܢܰܦܼܫܗܽܘܢ ܠܦܼܰܚܙܽܘܬܼܳܐ܂ ܘܰܠܦܼܽܘܠܚܳܢܳܐ ܕܟܽܠܳܗ ܛܰܢܦܼܽܘܬܼܳܐ ܒܝܰܥܢܽܘܬܼܗܽܘܢ܂
04:20 [ai]	ܐܰܢ̱ܬܿܽܘܢ ܕܶܝܢ ܠܳܐ ܗ̱ܘܳܐ ܗܳܟܼܰܢܳܐ ܺܝܠܶܦܼܬܿܽܘܢܳܝܗ̱ܝ ܠܰܡܫܺܝܚܳܐ܃
04:21 [ai]	ܐܶܢ ܫܰܪܺܝܪܳܐܺܝܬܼ ܫܡܰܥܬܿܽܘܢܳܝܗ̱ܝ ܘܒܼܶܗ ܺܝܠܶܦܼܬܿܽܘܢ܃ ܐܰܝܟܼ ܡܳܐ ܕܺܐܝܬܼܰܘܗ̱ܝ ܩܽܘܫܬܳܐ ܒܝܶܫܽܘܥ܃
04:22 [ai]	ܐܶܠܳܐ ܕܰܬܼܢܺܝܚܽܘܢ ܡܶܢܟܼܽܘܢ ܗܽܘܦܿܳܟܼܰܝܟܿܽܘܢ̈ ܩܰܕܼܡܳܝ̈ܶܐ܃ ܠܒܼܰܪܢܳܫܳܐ ܗܰܘ ܥܰܬܿܺܝܩܳܐ܂ ܕܡܶܬܼܚܰܒܿܰܠ ܒܰܪ̈ܓܼܺܝܓܼܳܬܼܳܐ ܕܛܽܘܥܝܰܝ܃
04:23 [ai]	ܘܬܼܶܬܼܚܰܕܿܬܼܽܘܢ ܒܪܽܘܚܳܐ ܕܡܰܕܿܥܰܝܟܿܽܘܢ̈܃
04:24 [ai]	ܘܬܼܶܠܒܿܫܽܘܢ ܠܒܼܰܪܢܳܫܳܐ ܚܰܕܼ̱ܬܼܳܐ܂ ܗܰܘ ܕܒܰܐܠܳܗܳܐ ܐܶܬܼܒܿܪܺܝ܂ ܒܙܰܕܿܺܝܩܽܘܬܼܳܐ܂ ܘܰܒܚܰܣܝܽܘܬܼܳܐ ܕܩܽܘܫܬܳܐ܀
04:25 [ai]	ܡܶܛܽܠ ܗܳܢܳܐ ܐܰܢܺܝܚܘ ܡܶܢܟܼܽܘܢ ܟܰܕܿܳܒܼܽܘܬܼܳܐ ܘܡܰܠܶܠܘ ܩܽܘܫܬܳܐ ܐ̱ܢܳܫ ܥܰܡ ܩܰܪܺܝܒܼܶܗ܂ ܗܰܕܳܡܶܐ̈ ܚܢܰܢ ܓܶܝܪ ܚܰܕܼ ܕܚܰܕܼ܂
04:26 [ai]	ܪܓܼܰܙܘ ܘܠܳܐ ܬܶܚܛܽܘܢ܃ ܘܫܶܡܫܳܐ ܥܰܠ ܪܽܘܓܼܙܟܼܽܘܢ ܠܳܐ ܢܶܥܪܰܒܼ܂
04:27 [ai]	ܘܠܳܐ ܬܶܬܿܠܽܘܢ ܐܰܬܼܪܳܐ ܠܳܐܟܼܶܠ ܩܰܪܨܳܐ܂
04:28 [ai]	ܘܰܐܝܢܳܐ ܕܓܳܢܶܒܼ ܗ̱ܘܳܐ܂ ܡܶܟܿܺܝܠ ܠܳܐ ܢܶܓܼܢܽܘܒܼ܃ ܐܶܠܳܐ ܢܶܠܐܶܐ ܒܺܐܝܕܼܰܘܗ̱ܝ̈ ܘܢܶܦܼܠܽܘܚ ܛܳܒܼܳܬܼܳܐ̈܃ ܕܢܶܗܘܶܐ ܠܶܗ ܠܡܶܬܿܰܠ ܠܡܰܢ ܕܰܣܢܺܝܩ ܿ܀ܿ܀ܿ
04:29 [ai]	ܟܽܠ ܡܶܠܳܐ ܣܰܢܝܳܐ ܡܶܢ ܦܽܘܡܟܼܽܘܢ ܠܳܐ ܬܿܶܦܽܘܩ܃ ܐܶܠܳܐ ܐܰܝܕܼܳܐ ܕܫܰܦܿܺܝܪܳܐ ܘܚܳܫܚܳܐ ܠܒܼܶܢܝܳܢܳܐ܃ ܕܬܶܬܿܶܠ ܛܰܝܒܿܽܘܬܼܳܐ ܠܰܐܝܠܶܝܢ ܕܫܳܡܥܺܝܢ܂
04:30 [ai]	ܘܠܳܐ ܬܶܗܘܽܘܢ ܡܥܺܝܩܺܝܢ ܠܪܽܘܚܳܐ ܩܰܕܿܺܝܫܬܳܐ ܕܰܐܠܳܗܳܐ܃ ܕܶܐܬܼܚܬܼܶܡܬܿܽܘܢ ܒܶܗ ܠܝܰܘܡܳܐ ܕܦܽܘܪܩܳܢܳܐ܂
04:31 [ai]	ܟܽܠܳܗ ܡܰܪܺܝܪܽܘܬܼܳܐ܂ ܘܚܶܡܬܼܳܐ܂ ܘܪܽܘܓܼܙܳܐ܂ ܘܪܰܘܒܿܳܐ܂ ܘܓܼܽܘܕܿܳܦܼܳܐ ܢܶܫܬܿܰܩܠܳܢ ܡܶܢܟܼܽܘܢ܃ ܥܰܡ ܟܽܠܳܗ ܒܺܝܫܽܘܬܼܳܐ܂
04:32 [ai]	ܘܰܗܘܰܝܬܿܽܘܢ ܒܰܣܺܝܡܺܝܢ ܚܰܕܼ ܠܘܳܬܼ ܚܰܕܼ܂ ܘܰܡܪܰܚܡܳܢܺܝܢ܃ ܘܰܗܘܰܝܬܿܽܘܢ ܫܳܒܼܩܺܝܢ ܚܰܕܼ ܠܚܰܕܼ܃ ܐܰܝܟܿܰܢܳܐ ܕܰܐܠܳܗܳܐ ܒܰܡܫܺܝܚܳܐ ܫܒܼܰܩ ܠܰܢ܂

next chapter