The Comprehensive Aramaic Lexicon

05:01 [ai]	ܗܘܰܝܬܿܽܘܢ ܗܳܟܼܺܝܠ ܡܶܬܿܕܰܡܶܝܢ ܒܰܐܠܳܗܳܐ܂ ܐܰܝܟܼ ܒܢܰܝܳܐ ܚܰܒܺܝܒܼܶܐ̈܂
05:02 [ai]	ܘܗܰܠܶܟܼܘ ܒܚܽܘܒܿܳܐ܃ ܐܰܝܟܼ ܕܳܐܦܼ ܡܫܺܝܚܳܐ ܐܰܚܒܼܰܢ ܘܰܐܫܠܶܡ ܢܰܦܼܫܶܗ ܥܰܠ ܐܰܦܿܰܝܢ̈܃ ܩܽܘܪܒܿܳܢܳܐ ܘܕܼܶܒܼܚܳܐ ܠܰܐܠܳܗܳܐ ܠܪܺܝܚܳܐ ܒܰܣܺܝܡܳܐ܀
05:03 [ai]	ܙܳܢܝܽܘܬܼܳܐ ܕܶܝܢ܂ ܘܟܼܽܠܳܗ ܛܰܢܦܼܽܘܬܼܳܐ܂ ܘܥܳܠܽܘܒܼܽܘܬܼܳܐ܃ ܐܳܦܼܠܳܐ ܡܶܫܬܿܰܡܳܗܽܘ ܬܶܫܬܿܰܡܰܗ ܒܰܝܢܳܬܼܟܼܽܘܢ܃ ܐܰܝܟܼ ܕܝܳܐܶܐ ܠܩܰܕܿܺܝܫܶܐ̈܂
05:04 [ai]	ܘܠܳܐ ܨܽܘܚܝܳܬܼܳܐ̈܂ ܘܠܳܐ ܡܶܠܶܐ̈ ܕܫܳܛܝܽܘܬܼܳܐ܂ ܐܰܘ ܕܒܶܙܚܳܐ܂ ܐܰܘ ܕܫܶܥܝܳܐ܂ ܗܳܠܶܝܢ ܕܠܳܐ ܡܶܬܼܒܿܰܥܝܳܢ̈܃ ܐܶܠܳܐ ܚܠܳܦܼ ܗܳܠܶܝܢ ܬܰܘܕܿܺܝܬܼܳܐ܀
05:05 [ai]	ܗܳܕܼܶܐ ܕܶܝܢ ܗܘܰܝܬܿܽܘܢ ܝܳܕܼܥܺܝܢ܃ ܕܟܽܠܢܳܫ ܕܺܐܝܬܼܰܘܗ̱ܝ ܙܰܢܳܝܳܐ܂ ܐܰܘ ܛܰܢܦܼܳܐ܂ ܐܰܘ ܥܳܠܽܘܒܼܳܐ܂ ܕܺܐܝܬܼܰܘܗ̱ܝ ܦܳܠܰܚ ܦܿܬܼܰܟܼܪ̈ܶܐ܃ ܠܰܝܬܿ ܠܶܗ ܝܳܪܬܿܽܘܬܼܳܐ ܒܡܰܠܟܿܽܘܬܼܶܗ ܕܰܡܫܺܝܚܳܐ ܘܕܼܰܐܠܳܗܳܐ܀
05:06 [ai]	ܕܰܠܡܳܐ ܐ̱ܢܳܫ ܢܰܛܥܶܝܟܼܽܘܢ ܒܡܶܠܶܐ̈ ܣܪ̈ܺܝܩܳܬܼܳܐ܃ ܡܶܛܽܠ ܗܳܠܶܝܢ ܗ̱ܽܘ ܓܶܝܪ ܐܳܬܼܶܐ ܪܽܘܓܼܙܶܗ ܕܰܐܠܳܗܳܐ ܥܰܠ ܒܢܰܝܳܐ ܕܠܳܐ ܡܶܬܿܛܦܿܺܝܣܳܢܽܘܬܼܳܐ܂
05:07 [ai]	ܠܳܐ ܗܳܟܼܺܝܠ ܬܶܗܘܽܘܢ ܠܗܽܘܢ ܫܰܘܬܿܳܦܼܶܐ̈܃
05:08 [ai]	ܐܺܝܬܼܰܝܟܿܽܘܢ ܗ̱ܘܰܝܬܿܽܘܢ ܓܶܝܪ ܡܶܢ ܠܽܘܩܕܼܰܡ ܚܶܫܽܘܟܼܳܐ܃ ܗܳܫܳܐ ܕܶܝܢ ܢܽܘܗܪܳܐ ܐܰܢ̱ܬܿܽܘܢ ܒܡܳܪܰܢ܂ ܐܰܝܟܼ ܒܢܰܝ ܢܽܘܗܪܳܐ ܗܳܟܼܺܝܠ܂ ܗܳܟܼܰܢܳܐ ܗܰܠܶܟܼܘ܂
05:09 [ai]	ܦܿܺܐܪ̈ܰܘܗ̱ܝ ܓܶܝܪ ܕܢܽܘܗܪܳܐ܃ ܒܟܽܠܳܗ ܐܶܢܽܘܢ ܛܳܒܼܽܘܬܼܳܐ܂ ܘܙܰܕܿܺܝܩܽܘܬܼܳܐ܂ ܘܩܽܘܫܬܳܐ܂
05:10 [ai]	ܘܰܗܘܰܝܬܿܽܘܢ ܦܳܪܫܺܝܢ܃ ܡܳܢܳܐ ܫܰܦܿܺܝܪ ܩܕܼܳܡ ܡܳܪܰܢ܂
05:11 [ai]	ܘܠܳܐ ܗܘܰܝܬܿܽܘܢ ܡܶܫܬܰܘܬܿܦܼܺܝܢ ܠܘܳܬܼ ܥܒܼܳܕܼܶܐ̈ ܕܚܶܫܽܘܟܼܳܐ܃ ܕܿܦܼܺܐܪ̈ܶܐ ܠܰܝܬܿ ܒܗܽܘܢ܃ ܐܶܠܳܐ ܗܘܰܝܬܿܽܘܢ ܡܟܼܰܘܢܺܝܢ ܠܗܽܘܢ܂
05:12 [ai]	ܡܶܕܶܡ ܓܶܝܪ ܕܰܒܼܛܽܘܫܝܰܝ ܥܳܒܼܕܺܝܢ܃ ܢܕܼܺܝܕܼ ܗ̱ܽܘ ܐܳܦܼ ܠܰܡܡܰܠܳܠܽܘܬܼܶܗ܂
05:13 [ai]	ܟܽܠ ܡܶܕܶܡ ܓܶܝܪ ܡܶܬܼܟܿܰܘܰܢ ܡܶܢ ܢܽܘܗܪܳܐ܂ ܘܡܶܬܼܓܠܶܐ܃ ܘܟܼܽܠܡܶܕܶܡ ܕܰܓܼܠܶܐ ܢܽܘܗܪܳܐ ܗ̱ܘ
05:14 [ai]	ܡܶܛܽܠ ܗܳܢܳܐ ܐܰܡܺܝܪ܃ ܕܶܐܬܿܬܿܥܺܝܪ ܕܰܡܟܿܳܐ ܘܩܽܘܡ ܡܶܢ ܒܶܝܬܼ ܡܺܝܬܼܶܐ̈܃ ܘܢܰܢܗܰܪ ܠܳܟܼ ܡܫܺܝܚܳܐ܀
05:15 [ai]	ܚܙܰܘ ܗܳܟܼܺܝܠ ܐܰܝܟܿܰܢܳܐ ܬܗܰܠܟܼܽܘܢ ܙܰܗܝܳܐܺܝܬܼ܃ ܠܳܐ ܐܰܝܟܼ ܣܰܟܼܠܶܐ̈܃ ܐܶܠܳܐ ܐܰܝܟܼ ܚܰܟܿܺܝܡܶܐ̈܂
05:16 [ai]	ܕܙܳܒܼܢܺܝܢ ܩܺܐܪܣܗܽܘܢ܃ ܡܶܛܽܠ ܕܝܰܘܡܳܬܼܳܐ̈ ܒܺܝܫܶܐ̈ ܐܶܢܽܘܢ܂
05:17 [ai]	ܡܶܛܽܠ ܗܳܢܳܐ ܠܳܐ ܬܶܗܘܽܘܢ ܚܰܣܺܝܪ̈ܰܝ ܪܶܥܝܳܢܳܐ܃ ܐܶܠܳܐ ܐܶܣܬܿܰܟܿܰܠܘ܂ ܡܳܢܰܘ ܨܶܒܼܝܳܢܶܗ ܕܰܐܠܳܗܳܐ܂
05:18 [ai]	ܘܠܳܐ ܗܘܰܝܬܿܽܘܢ ܪܳܘܶܝܢ ܒܚܰܡܪܳܐ܂ ܕܒܶܗ ܐܺܝܬܼ ܐܳܣܽܘܛܽܘܬܼܳܐ܃ ܐܶܠܳܐ ܐܶܬܼܡܠܰܘ ܒܪܽܘܚܳܐ܂
05:19 [ai]	ܘܡܰܠܶܠܘ ܥܰܡ ܢܰܦܼܫܟܼܽܘܢ ܒܡܰܙܡܽܘܪ̈ܶܐ܂ ܘܰܒܬܼܶܫܒܿܚܳܬܳܐ̈܃ ܘܒܼܰܙܡܺܝܪ̈ܳܬܼܳܐ ܕܪܽܘܚܳܐ ܗܘܰܝܬܿܽܘܢ ܙܳܡܪܺܝܢ ܒܠܶܒܿܰܘܳܬܼܟܼܽܘܢ̈ ܠܡܳܪܝܳܐ܂
05:20 [ai]	ܘܰܗܘܰܝܬܿܽܘܢ ܡܰܘܕܶܝܢ ܒܟܽܠܙܒܼܰܢ ܥܰܠ ܐܰܦܿܰܝ̈ ܟܽܠܢܳܫ܃ ܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂ ܠܰܐܠܳܗܳܐ ܐܰܒܼܳܐ܂
05:21 [ai]	ܘܰܗܘܰܝܬܿܽܘܢ ܡܶܫܬܿܰܥܒܿܕܼܺܝܢ ܚܰܕܼ ܠܚܰܕܼ ܒܿܚܽܘܒܶܗ ܕܰܡܫܺܝܚܳܐ܀
05:22 [ai]	ܢܶܫܶܐ̈܃ ܗܘܰܝܬܿܶܝܢ̈ ܡܶܫܬܿܰܥܒܿܕܼܳܢ̈ ܠܒܼܰܥܠܰܝܟܿܶܝܢ̈܃ ܐܰܝܟܼ ܕܰܠܡܳܪܰܢ܃
05:23 [ai]	ܡܶܛܽܠ ܕܓܰܒܼܪܳܐ ܪܺܫܳܗ ܗ̱ܽܘ ܕܰܐܢ̱ܬܿܬܼܳܐ܃ ܐܰܝܟܿܰܢܳܐ ܕܳܐܦܼ ܡܫܺܝܚܳܐ ܪܺܫܳܐ ܗܽܘ ܕܥܺܕ̱ܿܬܳܐ܃ ܘܗܽܘܝܽܘ ܡܰܚܝܳܢܳܐ ܕܦܰܓܼܪܳܐ܂
05:24 [ai]	ܐܶܠܳܐ ܐܰܝܟܿܰܢܳܐ ܕܥܺܕ̱ܿܬܳܐ ܡܶܫܬܿܰܥܒܿܕܼܳܐ ܠܰܡܫܺܝܚܳܐ܃ ܗܳܟܼܰܢܳܐ ܐܳܦܼ ܢܶܫܶܐ̈ ܠܒܼܰܥܠܰܝܗܶܝܢ̈ ܒܟܽܠܡܶܕܶܡ܀
05:25 [ai]	ܓܿܰܒܼܪ̈ܶܐ܃ ܐܰܚܶܒܼܘ ܢܶܫܰܝܟܿܽܘܢ̈܃ ܐܰܝܟܼ ܕܳܐܦܼ ܡܫܺܝܚܳܐ ܐܰܚܶܒܼ ܠܥܺܕ̱ܿܬܿܶܗ܂ ܘܢܰܦܼܫܶܗ ܐܰܫܠܶܡ ܥܰܠ ܐܰܦܿܶܝܗ̈܃
05:26 [ai]	ܕܰܢܩܰܕܿܫܺܝܗ ܘܰܢܕܼܰܟܿܶܝܗ܂ ܒܰܣܚܳܝܳܐ ܕܡܰܝܳܐ̈܂ ܘܰܒܡܶܠܬܼܳܐ܂
05:27 [ai]	ܘܰܢܩܺܝܡܺܝܗ ܥܺܕ̱ܿܬܳܐ ܠܢܰܦܼܫܶܗ܂ ܟܰܕܼ ܡܫܰܒܿܚܳܐ܂ ܘܠܰܝܬܿ ܒܿܳܗ ܛܽܘܠܫܳܐ܂ ܘܠܳܐ ܩܰܡܛܳܐ܂ ܘܠܳܐ ܡܶܕܶܡ܂ ܕܰܠܗܳܠܶܝܢ ܕܳܡܶܐ܂ ܐܶܠܳܐ ܬܶܗܘܶܐ ܩܰܕܿܺܝܫܳܐ܂ ܕܠܳܐ ܡܽܘܡ܂
05:28 [ai]	ܗܳܟܼܰܢܳܐ ܘܳܠܶܐ ܠܓܼܰܒܼܪ̈ܶܐ܃ ܕܢܰܚܒܼܽܘܢ ܢܶܫܰܝܗܽܘܢ̈܂ ܐܰܝܟܼ ܕܿܰܠܦܼܰܓܼܪ̈ܰܝܗܽܘܢ܂ ܡܰܢ ܕܠܰܐܢ̱ܬܿܬܼܶܗ ܓܶܝܪ ܡܰܚܶܒܼ܃ ܢܰܦܼܫܶܗ ܗ̱ܽܘ ܡܰܚܶܒܼ܂
05:29 [ai]	ܠܳܐ ܓܶܝܪ ܐ̱ܢܳܫ ܡܶܡܬܼܽܘܡ ܣܳܢܶܐ ܦܰܓܼܪܶܗ܃ ܐܶܠܳܐ ܡܬܼܰܪܣܶܐ ܠܶܗ܂ ܘܝܳܨܶܦܼ ܕܺܝܠܶܗ܃ ܐܰܝܟܿܰܢܳܐ ܕܳܐܦܼ ܡܫܺܝܚܳܐ ܕܥܺܕ̱ܿܬܿܶܗ܃
05:30 [ai]	ܡܶܛܽܠ ܕܿܗܰܕܳܡܶܐ̈ ܚܢܰܢ ܕܦܰܓܼܪܶܗ܃ ܘܡܶܢ ܒܶܣܪܶܗ ܚܢܰܢ܂ ܘܡܶܢ ܓܿܰܪ̈ܡܰܘܗ̱ܝ܂
05:31 [ai]	ܡܶܛܽܠ ܗܳܢܳܐ ܢܶܫܒܿܽܘܩ ܓܰܒܼܪܳܐ ܠܰܐܒܼܽܘܗ̱ܝ ܘܠܶܐܡܶܗ܃ ܘܢܶܩܰܦܼ ܠܰܐܢ̱ܬܿܬܼܶܗ܃ ܘܢܶܗܘܽܘܢ ܬܿܪ̈ܰܝܗܽܘܢ ܚܰܕܼ ܒܣܰܪ܂
05:32 [ai]	ܗܳܢܳܐ ܐ̱ܪܳܙܳܐ ܪܰܒܼ ܗ̱ܽܘ܃ ܐܶܢܳܐ ܕܶܝܢ ܐܳܡܰܪ ܐ̱ܢܳܐ ܥܰܠ ܡܫܺܝܚܳܐ ܘܥܰܠ ܥܺܕ̱ܿܬܿܶܗ܂
05:33 [ai]	ܒܪܰܡ ܐܳܦܼ ܐܰܢ̱ܬܿܽܘܢ ܟܽܠ ܚܰܕܼ ܚܰܕܼ ܡܶܢܟܼܽܘܢ܃ ܗܳܟܼܰܢܳܐ ܢܶܪܚܰܡ ܐܰܢ̱ܬܿܬܼܶܗ ܐܰܝܟܼ ܕܰܠܢܰܦܼܫܶܗ܃ ܐܰܢ̱ܬܿܬܼܳܐ ܕܶܝܢ܂ ܬܶܗܘܶܐ ܕܳܚܠܳܐ ܡܶܢ ܒܰܥܠܳܗ܀

next chapter