← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62049: Eph

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


06:01 [ai]ܒܢܰܝܳܐ܃ ܐܶܫܬܿܰܡ̱ܥܘ ܠܰܐܒܼܳܗܰܝܟܿܽܘܢ̈ ܒܡܳܪܰܢ܃ ܗܳܕܼܶܐ ܓܶܝܪ ܟܺܐܢܳܐ܂
06:02 [ai]ܘܗܳܢܰܘ ܦܽܘܩܕܳܢܳܐ ܩܰܕܼܡܳܝܳܐ ܕܰܡܠܺܝܟܼ܂ ܝܰܩܰܪ ܠܰܐܒܼܽܘܟܼ ܘܠܶܐܡܳܟܼ܃
06:03 [ai]ܕܢܶܗܘܶܐ ܠܳܟܼ ܕܫܰܦܿܺܝܪ܃ ܘܢܺܐܪܟܿܽܘܢ ܚܰܝܰܝܟܿ̈ ܥܰܠ ܐܰܪܥܳܐ܂
06:04 [ai]ܐܰܒܼܳܗܶܐ̈܃ ܠܳܐ ܬܰܪܓܿܙܽܘܢ ܒܢܰܝܟܿܽܘܢ܃ ܐܶܠܳܐ ܪܰܒܿܰܘ ܐܶܢܽܘܢ ܒܡܰܪܕܿܽܘܬܼܳܐ ܘܰܒܝܽܘܠܦܿܳܢܳܐ ܕܡܳܪܰܢ܀
06:05 [ai]ܥܰܒܼܕܿܶܐ̈܃ ܐܶܫܬܿܰܡ̱ܥܘ ܠܡܳܪ̈ܰܝܟܿܽܘܢ ܕܒܰܒܼܣܰܪ܃ ܒܕܶܚܠܬܼܳܐ܂ ܘܒܼܰܪܬܼܺܝܬܼܳܐ܂ ܘܒܼܰܦܼܫܺܝܛܽܘܬܼ ܠܶܒܿܳܐ܂ ܐܰܝܟܼ ܕܠܰܡܫܺܝܚܳܐ܃
06:06 [ai]ܠܳܐ ܒܡܰܚܙܶܐ ܥܰܝܢܳܐ܂ ܐܰܝܟܼ ܗܰܘ ܕܿܠܰܒܼܢܰܝܢܳܫܳܐ ܫܳܦܼܪܺܝܢ ܐܢ̱ܬܿܽܘܢ܃ ܐܶܠܳܐ ܐܰܝܟܼ ܥܰܒܼܕܿܶܐ̈ ܕܰܡܫܺܝܚܳܐ܂ ܕܥܳܒܼܕܺܝܢ ܨܶܒܼܝܳܢܳܐ ܕܰܐܠܳܗܳܐ܂
06:07 [ai]ܘܫܰܡܶܫܘ ܐܶܢܽܘܢ ܡܶܢ ܟܽܠܳܗ ܢܰܦܼܫܟܼܽܘܢ ܒܚܽܘܒܿܳܐ܃ ܐܰܝܟܼ ܕܰܠܡܳܪܰܢ܂ ܘܠܳܐ ܐܰܝܟܼ ܕܿܠܰܒܼܢܰܝܢܳܫܳܐ܃
06:08 [ai]ܟܰܕܼ ܝܳܕܼܥܺܝܬܿܽܘܢ ܕܗܰܘ ܡܶܕܶܡ ܕܥܳܒܼܶܕܼ ܐ̱ܢܳܫ ܕܫܰܦܿܺܝܪ܃ ܗܽܘ ܡܶܬܼܦܪܰܥ ܡܶܢ ܡܳܪܰܢ܃ ܐܶܢ ܥܰܒܼܕܿܳܐ ܗ̱ܽܘ܂ ܘܶܐܢ ܒܰܪ ܚܺܐܪ̈ܶܐ܀
06:09 [ai]ܐܳܦܼ ܐܰܢ̱ܬܿܽܘܢ ܡܳܪ̈ܰܝܳܐ܃ ܗܳܟܼܰܢܳܐ ܗܘܰܝܬܿܽܘܢ ܥܳܒܼܕܺܝܢ ܠܥܰܒܼܕܿܰܝܟܿܽܘܢ̈܂ ܗܘܰܝܬܿܽܘܢ ܫܳܒܼܩܺܝܢ ܠܗܽܘܢ ܣܰܟܼܠܽܘܬܼܳܐ܃ ܡܶܛܽܠ ܕܝܳܕܼܥܺܝܢ ܐܢ̱ܬܿܽܘܢ ܕܳܐܦܼ ܡܳܪܟܼܽܘܢ ܕܺܝܠܟܼܽܘܢ ܐܺܝܬܼܰܘܗ̱ܝ ܒܰܫܡܰܝܳܐ܃ ܘܡܰܣܰܒܼ ܒܰܐܦܿܶܐ̈ ܠܰܝܬܿ ܠܘܳܬܼܶܗ ܿ܀ܿ܀ܿ
06:10 [ai]ܡܶܟܿܺܝܠ ܐܰܚܰܝ̈ ܐܶܬܼܚܰܝܰܠܘ ܒܡܳܪܰܢ ܘܰܒܬܼܽܘܩܦܼܳܐ ܕܚܰܝܠܶܗ܂
06:11 [ai]ܘܰܠܒܼܰܫܘ ܟܽܠܶܗ ܙܰܝܢܳܐ ܕܰܐܠܳܗܳܐ܃ ܐܰܝܟܿܰܢܳܐ ܕܬܶܫܟܿܚܽܘܢ ܠܰܡܩܳܡ ܠܽܘܩܒܼܰܠ ܨܶܢܥܳܬܼܶܗ̈ ܕܳܐܟܼܶܠܩܰܪܨܳܐ܃
06:12 [ai]ܡܶܛܽܠ ܕܬܰܟܼܬܿܽܘܫܟܼܽܘܢ܂ ܠܳܐ ܗ̱ܘܳܐ ܥܰܡ ܒܶܣܪܳܐ ܘܰܕܼܡܳܐ܃ ܐܶܠܳܐ ܥܰܡ ܐܰܪ̈ܟܼܰܘܣ ܘܥܰܡ ܫܰܠܺܝܛܳܢܶܐ̈܂ ܘܥܰܡ ܐܰܚܺܝܕܼܰܝ̈ ܥܳܠܡܳܐ ܕܗܳܢܳܐ ܚܶܫܽܘܟܼܳܐ܂ ܘܥܰܡ ܪ̈ܽܘܚܶܐ ܒܺܝܫܳܬܼܳܐ̈܂ ܕܰܬܼܚܶܝܬܼ ܫܡܰܝܳܐ܂
06:13 [ai]ܡܶܛܽܠ ܗܳܢܳܐ ܠܒܼܰܫܘ ܟܽܠܶܗ ܙܰܝܢܳܐ ܕܰܐܠܳܗܳܐ܃ ܕܬܶܫܟܿܚܽܘܢ ܬܶܐܪܥܽܘܢ ܒܺܝܫܳܐ܃ ܘܟܼܰܕܼ ܡܥܰܬܿܕܼܺܝܢ ܐܢ̱ܬܿܽܘܢ ܒܟܽܠܡܶܕܶܡ܂ ܬܩܽܘܡܽܘܢ܀
06:14 [ai]ܩܽܘܡܘ ܗܳܟܼܺܝܠ ܘܰܚܙܽܘܩܘ ܚܰܨܰܝܟܿܽܘܢ̈ ܒܩܽܘܫܬܳܐ܂ ܘܰܠܒܼܰܫܘ ܫܶܪܝܳܢܳܐ ܕܙܰܕܿܺܝܩܽܘܬܼܳܐ܂
06:15 [ai]ܘܣܰܐܢܘ ܒܪ̈ܶܓܼܠܰܝܟܿܽܘܢ ܛܽܘܝܳܒܼܶܗ ܕܶܐܘܰܢܓܿܶܠܺܝܳܘܢ ܕܰܫܠܳܡܳܐ܂
06:16 [ai]ܘܥܰܡ ܗܳܠܶܝܢ܂ ܣܰܒܼܘ ܠܟܼܽܘܢ ܣܰܟܿܪܳܐ ܕܗܰܝܡܳܢܽܘܬܼܳܐ܃ ܕܒܳܗ ܬܶܬܼܡܨܽܘܢ ܚܰܝܠܳܐ ܠܡܰܕܼܥܳܟܼܽܘ ܟܽܠܗܽܘܢ ܓܿܶܐܪ̈ܰܘܗ̱ܝ ܝܳܩܕܿܶܐ̈ ܕܒܺܝܫܳܐ܂
06:17 [ai]ܘܣܺܝܡܘ ܣܰܢܘܰܪܬܳܐ ܕܦܽܘܪܩܳܢܳܐ܂ ܘܰܐܚܽܘܕܼܘ ܣܰܝܦܼܳܐ ܕܪܽܘܚܳܐ܃ ܕܺܐܝܬܼܰܘܗ̱ܝ ܡܶܠܬܼܳܐ ܕܰܐܠܳܗܳܐ܂
06:18 [ai]ܘܰܒܟܼܽܠ ܨܠܰܘܳܢ̈ ܘܰܒܟܼܽܠ ܒܳܥܘܳܢ̈ ܨܰܠܰܘ ܒܟܽܠܙܒܼܰܢ ܒܪܽܘܚ܂ ܘܒܼܳܗ ܒܰܨܠܽܘܬܼܳܐ ܗܘܰܝܬܿܽܘܢ ܫܳܗܪܺܝܢ ܒܟܽܠ ܥܶܕܳܢ܃ ܟܰܕܼ ܡܨܰܠܶܝܬܿܽܘܢ ܐܰܡܺܝܢܳܐܺܝܬܼ ܘܡܶܬܼܟܿܰܫܦܼܺܝܢ ܥܰܠ ܐܰܦܿܰܝ̈ ܟܽܠܗܽܘܢ ܩܰܕܿܺܝܫܶܐ̈܂
06:19 [ai]ܐܳܦܼ ܥܠܰܝ܃ ܕܬܶܬܼܺܝܗܶܒܼ ܠܺܝ ܡܶܠܬܼܳܐ ܒܡܰܦܼܬܿܰܚ ܦܽܘܡܝ܃ ܕܥܺܝܢ ܒܰܓܼܠܶܐ ܐܰܟܼܪܶܙ ܐ̱ܪܳܙܳܐ ܕܰܣܒܼܰܪܬܼܳܐ܂
06:20 [ai]ܗܰܘ ܕܶܐܢܳܐ ܐܺܝܙܓܿܰܕܿܶܗ ܒܫܺܫܠܳܬܼܳܐ̈܃ ܕܰܒܼܦܰܪܶܗ̱ܣܺܝܰܐ ܐܶܡܰܠܠܺܝܘܗ̱ܝ܂ ܐܰܝܟܼ ܕܘܳܠܶܐ ܠܺܝ ܠܰܡܡܰܠܳܠܽܘܬܼܶܗ܀
06:21 [ai]ܕܬܶܕܿܥܽܘܢ ܕܶܝܢ ܐܳܦܼ ܐܰܢ̱ܬܿܽܘܢ ܡܶܕܶܡ ܕܰܠܘܳܬܼܝ܂ ܘܡܶܕܶܡ ܕܣܳܥܰܪ ܐ̱ܢܳܐ܃ ܗܳܐ ܡܰܘܕܿܰܥ ܠܟܼܽܘܢ ܛܽܘܟܼܺܝܩܳܘܣ ܐܰܚܳܐ ܚܰܒܺܝܒܼܳܐ ܘܰܡܫܰܡܫܳܢܳܐ ܡܗܰܝܡܢܳܐ ܒܡܳܪܰܢ܃
06:22 [ai]ܕܠܶܗ ܫܰܕܿܪܶܬܼ ܠܘܳܬܼܟܼܽܘܢ ܥܠܶܝܗ ܥܰܠ ܗܳܕܼܶܐ܃ ܕܬܶܕܿܥܽܘܢ ܡܳܐ ܕܰܠܘܳܬܼܝ܂ ܘܰܢܒܼܰܝܰܐ ܠܶܒܿܰܘܳܬܼܟܼܽܘܢ̈܂
06:23 [ai]ܫܠܳܡܳܐ ܥܰܡ ܐܰܚܰܝܢ̈ ܘܚܽܘܒܿܳܐ ܥܰܡ ܗܰܝܡܳܢܽܘܬܼܳܐ܃ ܡܶܢ ܐܰܠܳܗܳܐ ܐܰܒܼܳܐ܂ ܘܡܶܢ ܡܳܪܰܢ ܝܶܫܽܘܥ ܡܫܺܝܚܳܐ܂
06:24 [ai]ܛܰܝܒܿܽܘܬܼܳܐ ܥܰܡ ܟܽܠܗܽܘܢ ܐܰܝܠܶܝܢ ܕܡܰܚܒܼܺܝܢ ܠܡܳܪܰܢ ܝܶܫܽܘܥ ܡܫܺܝܚܳܐ܂ ܕܠܳܐ ܚܒܼܳܠ܂ ܐܰܡܺܝܢ܀