← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62050: Phil

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܦܿܰܘܠܳܘܣ ܘܛܺܝܡܳܬܼܶܐܳܘܣ܂ ܥܰܒܼܕܿܶܐ̈ ܕܝܶܫܽܘܥ ܡܫܺܝܚܳܐ܃ ܠܟܼܽܠܗܽܘܢ ܩܰܕܿܺܝܫܶܐ̈ ܕܰܒܼܝܶܫܽܘܥ ܡܫܺܝܚܳܐ ܕܺܐܝܬܼ ܒܦܼܺܝܠܺܝܦܿܳܘܣ܃ ܥܰܡ ܩܰܫܺܝܫܶܐ̈ ܘܰܡܫܰܡܫܳܢܶܐ̈܂
01:02 [ai]ܛܰܝܒܿܽܘܬܼܳܐ ܥܰܡܟܼܽܘܢ ܘܰܫܠܳܡܳܐ܂ ܡܶܢ ܐܰܠܳܗܳܐ ܐܰܒܼܽܘܢ܃ ܘܡܶܢ ܡܳܪܰܢ ܝܶܫܽܘܥ ܡܫܺܝܚܳܐ܀
01:03 [ai]ܡܰܘܕܿܶܐ ܐ̱ܢܳܐ ܠܰܐܠܳܗܝ ܥܰܠ ܥ̱ܽܘܗܕܳܢܟܼܽܘܢ ܐܰܡܺܝܢܳܐ܃
01:04 [ai]ܕܰܒܼܟܼܽܠ ܒܳܥܘܳܬܼܝ̈ ܕܥܰܠ ܐܰܦܿܰܝܟܿܽܘܢ̈܂ ܘܟܼܰܕܼ ܚܳܕܼܶܐ ܐ̱ܢܳܐ ܡܶܬܼܟܿܰܫܰܦܼ ܐ̱ܢܳܐ܃
01:05 [ai]ܥܰܠ ܫܰܘܬܿܳܦܼܽܘܬܼܟܼܽܘܢ ܕܒܶܐܘܰܢܓܿܶܠܺܝܳܘܢ܂ ܡܶܢ ܝܰܘܡܳܐ ܩܰܕܼܡܳܝܳܐ ܘܰܥܕܼܰܡܳܐ ܠܗܳܫܳܐ܂
01:06 [ai]ܡܶܛܽܠ ܕܰܬܼܟܼܺܝܠ ܐ̱ܢܳܐ ܥܰܠ ܗܳܕܼܶܐ܃ ܕܗܰܘ ܡܰܢ ܕܫܰܪܺܝ ܒܟܽܘܢ ܥܒܼܳܕܼܶܐ̈ ܛܳܒܼܶܐ̈܃ ܗܽܘ ܢܫܰܠܶܡ ܥܕܼܰܡܳܐ ܠܝܰܘܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂
01:07 [ai]ܗܳܟܼܰܢܳܐ ܓܶܝܪ ܙܳܕܼܶܩ ܠܺܝ ܠܡܶܬܼܪܰܥܳܝܽܘ ܥܰܠ ܟܽܠܟܼܽܘܢ܃ ܡܶܛܽܠ ܕܰܒܼܠܶܒܿܝ ܣܺܝܡܺܝܢ ܐܢ̱ܬܿܽܘܢ܂ ܘܒܼܰܐܣܽܘܪ̈ܰܝ܂ ܘܰܒܡܰܦܿܰܩ ܒܪܽܘܚܝ܂ ܕܥܰܠ ܫܪܳܪܶܗ ܕܶܐܘܰܢܓܿܶܠܺܝܳܘܢ܃ ܕܫܰܘܬܿܳܦܼܰܝ̈ ܐܰܢ̱ܬܿܽܘܢ ܒܛܰܝܒܿܽܘܬܼܳܐ܂
01:08 [ai]ܣܳܗܶܕܼ ܗ̱ܽܘ ܠܺܝ ܓܶܝܪ ܐܰܠܳܗܳܐ܃ ܕܰܐܝܟܿܰܢܳܐ ܡܰܚܶܒܼ ܐ̱ܢܳܐ ܠܟܼܽܘܢ܂ ܒܪ̈ܰܚܡܰܘܗ̱ܝ ܕܝܶܫܽܘܥ ܡܫܺܝܚܳܐ܂
01:09 [ai]ܘܗܳܕܼܶܐ ܡܨܰܠܶܐ ܐ̱ܢܳܐ܃ ܕܬܽܘܒܼ ܢܶܣܓܿܶܐ ܘܢܶܬܼܝܰܬܿܰܪ ܚܽܘܒܟܽܘܢ܂ ܒܺܝܕܼܰܥܬܼܳܐ܂ ܘܰܒܟܼܽܠ ܣܽܘܟܿܳܠ ܕܪܽܘܚ܃
01:10 [ai]ܕܬܶܗܘܽܘܢ ܦܳܪܫܺܝܢ ܐܰܝܠܶܝܢ ܕܳܥ̱ܗܢܳܢ̈܃ ܘܬܼܶܗܘܽܘܢ ܕܟܶܝܢ ܕܠܳܐ ܬܽܘܩܠܳܐ ܒܝܰܘܡܶܗ ܕܰܡܫܺܝܚܳܐ܃
01:11 [ai]ܘܰܡܠܶܝܢ ܦܿܺܐܪ̈ܶܐ ܕܙܰܕܿܺܝܩܽܘܬܼܳܐ ܕܰܒܼܝܶܫܽܘܥ ܡܫܺܝܚܳܐ܂ ܠܫܽܘܒܼܚܳܐ ܘܠܺܐܝܩܳܪܳܐ ܕܰܐܠܳܗܳܐ܀
01:12 [ai]ܨܳܒܼܶܐ ܐ̱ܢܳܐ ܕܶܝܢ ܕܬܶܕܿܥܽܘܢ ܐܰܚܰܝ̈܃ ܕܣܽܘܥܪܳܢܝ ܕܺܝܠܝ ܝܰܬܿܺܝܪܳܐܺܝܬܼ ܐܳܬܼܶܐ ܠܰܩܕܼܳܡܰܘܗ̱ܝ ܒܶܐܘܰܢܓܿܶܠܺܝܳܘܢ܃
01:13 [ai]ܗܳܟܼܰܢܳܐ ܕܳܐܦܼ ܐܰܣܽܘܪ̈ܰܝ ܐܶܬܼܓܿܠܺܝܘ ܒܰܡܫܺܝܚܳܐ ܒܰܦܪܶܛܳܘܪܺܝܳܢ ܟܽܠܳܗ܂ ܘܰܠܫܰܪܟܿܳܐ ܕܟܽܠܢܳܫ܃
01:14 [ai]ܘܣܽܘܓܼܳܐܐ ܕܰܐܚܶܐ̈ ܕܰܒܼܡܳܪܰܢ܂ ܐܶܬܿܬܿܟܼܶܠܘ ܥܰܠ ܐܰܣܽܘܪ̈ܰܝ܃ ܘܰܐܫܺܝܚܘ ܝܰܬܿܺܝܪܳܐܺܝܬܼ܂ ܕܠܳܐ ܕܶܚܠܳܐ ܠܰܡܡܰܠܳܠܽܘ ܡܶܠܬܼܳܐ ܕܰܐܠܳܗܳܐ܂
01:15 [ai]ܘܐ̱ܢܳܫ ܐ̱ܢܳܫ ܡܶܢ ܚܣܳܡܳܐ ܘܚܶܪܝܳܢܳܐ܂ ܐ̱ܢܳܫ ܐ̱ܢܳܫ ܕܶܝܢ ܒܨܶܒܼܝܳܢܳܐ ܛܳܒܼܳܐ ܘܰܒܚܽܘܒܿܳܐ܃ ܠܰܡܫܺܝܚܳܐ ܡܰܟܼܪܙܺܝܢ܃
01:16 [ai]ܡܶܛܽܠ ܕܝܳܕܼܥܺܝܢ ܕܰܠܡܰܦܿܰܩ ܒܪܽܘܚܳܐ ܕܶܐܘܰܢܓܿܶܠܺܝܳܘܢ܂ ܣܺܝܡ ܐ̱ܢܳܐ܂
01:17 [ai]ܗܳܢܽܘܢ ܕܶܝܢ ܕܰܒܼܚܶܪܝܳܢܳܐ ܠܰܡܫܺܝܚܳܐ ܡܰܟܼܪܙܺܝܢ܃ ܠܳܐ ܗ̱ܘܳܐ ܕܰܟܼܝܳܐܺܝܬܼ܃ ܐܶܠܳܐ ܕܣܳܒܼܪܺܝܢ ܕܡܰܘܣܦܼܺܝܢ ܐܽܘܠܨܳܢܳܐ ܠܰܐܣܽܘܪ̈ܰܝ܂
01:18 [ai]ܘܰܒܗܳܕܶܐ ܚܕܼܺܝܬܼ ܘܚܳܕܼܶܐ ܐ̱ܢܳܐ܃ ܕܰܒܼܟܼܽܠ ܦܪܽܘܣ܃ ܐܶܢ ܒܥܶܠܬܼܳܐ܂ ܘܶܐܢ ܒܩܽܘܫܬܳܐ܂ ܡܫܺܝܚܳܐ ܢܶܬܼܟܿܪܶܙ܂
01:19 [ai]ܝܳܕܼܰܥ ܐ̱ܢܳܐ ܓܶܝܪ ܕܗܳܠܶܝܢ ܠܚܰܝ̈ܶܐ ܡܶܫܬܿܰܟܼܚܳܢ̈ ܠܺܝ ܒܒܼܳܥܽܘܬܼܟܼܽܘܢ܂ ܘܰܒܡܰܘܗܰܒܼܬܼܳܐ ܕܪܽܘܚܳܐ ܕܝܶܫܽܘܥ ܡܫܺܝܚܳܐ܃
01:20 [ai]ܐܰܝܟܿܰܢܳܐ ܕܰܡܣܰܒܰܪ ܐ̱ܢܳܐ ܘܰܡܣܰܟܿܶܐ ܐ̱ܢܳܐ܃ ܕܰܒܼܡܶܕܶܡ ܠܳܐ ܐܶܒܼܗܰܬܼ܃ ܐܶܠܳܐ ܒܓܰܠܝܽܘܬܼ ܐܰܦܿܶܐ̈ ܐܰܝܟܼ ܕܰܒܼܟܼܽܠܙܒܼܰܢ ܐܳܦܼ ܗܳܫܳܐ܂ ܢܶܬܼܪܰܘܪܰܒܼ ܡܫܺܝܚܳܐ ܒܦܰܓܼܪܝ܂ ܐܶܢ ܒܚܰܝ̈ܶܐ܂ ܘܶܐܢ ܒܡܰܘܬܳܐ܂
01:21 [ai]ܚܰܝܰܝ̈ ܓܶܝܪ ܕܺܝܠܝ ܡܫܺܝܚܳܐ ܗ̱ܘ܂ ܘܶܐܢ ܐܶܡܽܘܬܼ܃ ܝܽܘܬܼܪܳܢܳܐ ܗ̱ܘ ܠܺܝ܂
01:22 [ai]ܐܶܢ ܕܶܝܢ ܐܳܦܼ ܒܗܳܠܶܝܢ ܚܰܝ̈ܶܐ ܕܒܶܣܪܳܐ܃ ܦܿܺܐܪ̈ܶܐ ܐܺܝܬܼ ܠܺܝ ܒܰܥܒܼܳܕܼܰܝ̈܂ ܠܳܐ ܝܳܕܼܰܥ ܐ̱ܢܳܐ ܡܳܢܳܐ ܐܶܓܼܒܿܶܐ ܠܺܝ܂
01:23 [ai]ܐܳܠܨܳܢ̈ ܠܺܝ ܓܶܝܪ ܬܿܰܪ̈ܬܿܰܝܗܶܝܢ܂ ܠܡܶܦܼܛܰܪ ܪܓܼܺܝܓܼ ܐ̱ܢܳܐ܃ ܕܥܰܡ ܡܫܺܝܚܳܐ ܐܶܗܘܶܐ܂ ܘܗܳܕܼܶܐ ܛܳܒܼ ܦܳܩܚܳܐ ܗ̱ܘܳܬܼ ܠܺܝ܂
01:24 [ai]ܐܶܠܳܐ ܐܳܦܼ ܕܶܐܩܰܘܶܐ ܒܦܰܓܼܪܝ܃ ܐܳܠܨܳܐ ܠܺܝ ܨܒܼܽܘܬܼܳܐ ܡܶܛܽܠܳܬܼܟܼܽܘܢ܂
01:25 [ai]ܘܗܳܕܼܶܐ ܬܟܼܺܝܠܳܐܺܝܬܼ ܝܳܕܼܰܥ ܐ̱ܢܳܐ܃ ܕܦܳܐܶܫ ܐ̱ܢܳܐ ܘܰܡܩܰܘܶܐ ܐ̱ܢܳܐ܃ ܠܚܰܕܼܽܘܬܼܳܐ ܕܺܝܠܟܼܽܘܢ ܘܰܠܬܼܰܪܒܺܝܬܼܳܐ ܕܗܰܝܡܳܢܽܘܬܼܟܼܽܘܢ܃
01:26 [ai]ܕܟܰܕܼ ܐܺܬܼܶܐ ܬܽܘܒܼ ܠܘܳܬܼܟܼܽܘܢ܃ ܢܶܬܼܝܰܬܿܰܪ ܒܺܝ ܫܽܘܒܼܗܳܪܟܼܽܘܢ ܕܰܒܼܝܶܫܽܘܥ ܡܫܺܝܚܳܐ ܒܰܠܚܽܘܕܼ܂
01:27 [ai]ܐܰܝܟܿܰܢܳܐ ܕܝܳܐܶܐ ܠܰܣܒܼܰܪܬܼܶܗ ܕܰܡܫܺܝܚܳܐ܃ ܗܘܰܝܬܿܽܘܢ ܡܶܬܿܕܿܰܒܿܪܺܝܢ܃ ܕܶܐܢ ܐܺܬܼܶܐ܂ ܐܶܚܙܶܝܟܼܽܘܢ܃ ܘܶܐܢ ܦܰܪܺܝܩ ܐ̱ܢܳܐ܂ ܐܶܫܡܰܥ ܥܠܰܝܟܿܽܘܢ܃ ܕܩܳܝܡܺܝܢ ܐܢ̱ܬܿܽܘܢ ܒܰܚܕܼܳܐ ܪܽܘܚ܂ ܘܒܼܰܚܕܼܳܐ ܢܦܼܶܫ܂ ܘܡܶܬܼܢܰܨܚܺܝܬܿܽܘܢ ܐܰܟܼܚܰܕܼ܂ ܒܗܰܝܡܳܢܽܘܬܼܳܐ ܕܶܐܘܰܢܓܿܶܠܺܝܳܘܢ܂
01:28 [ai]ܘܰܒܡܶܕܶܡ ܠܳܐ ܡܶܬܿܬܿܙܺܝܥܺܝܢ ܐܢ̱ܬܿܽܘܢ ܡܶܢ ܗܳܢܽܘܢ ܕܩܳܝܡܺܝܢ ܠܩܽܘܒܼܠܰܢ܃ ܠܬܼܰܚܘܺܝܬܼܳܐ ܕܿܰܐܒܼܕܳܢܗܽܘܢ܂ ܘܰܠܚܰܝ̈ܶܐ ܕܺܝܠܟܼܽܘܢ܂
01:29 [ai]ܘܗܳܕܼܶܐ ܡܶܢ ܐܰܠܳܗܳܐ ܗ̱ܘ ܐܶܬܼܝܰܗܒܿܰܬܼ ܠܟܼܽܘܢ܃ ܕܠܳܐ ܒܰܠܚܽܘܕܼ ܡܗܰܝܡܳܢܽܘ ܬܗܰܝܡܢܽܘܢ ܒܶܗ ܒܰܡܫܺܝܚܳܐ܃ ܐܶܠܳܐ ܐܳܦܼ ܕܥܰܠ ܐܰܦܿܰܘܗ̱ܝ̈ ܬܶܚܫܽܘܢ܃
01:30 [ai]ܘܰܬܼܣܰܝܒܿܪܽܘܢ ܐܰܓܼܽܘܢܳܐ܃ ܐܰܝܟܼ ܗܰܘ ܕܰܚܙܰܝܬܿܽܘܢ ܒܺܝ܂ ܘܗܳܫܳܐ ܫܳܡܥܺܝܬܿܽܘܢ ܥܠܰܝ ܿ܀ܿ܀ܿ

next chapter