← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62050: Phil

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


02:01 [ai]ܐܶܢ ܐܺܝܬܼ ܠܟܼܽܘܢ ܗܳܟܼܺܝܠ܂ ܒܽܘܝܳܐܳܐ ܒܰܡܫܺܝܚܳܐ܂ ܘܶܐܢ ܡܰܡܠܶܐ ܒܠܶܒܿܳܐ ܒܚܽܘܒܿܳܐ܂ ܘܶܐܢ ܫܰܘܬܿܳܦܼܽܘܬܼܳܐ ܕܪܽܘܚܳܐ܂ ܘܶܐܢ ܪܽܘܚܳܦܼܳܐ ܘܪ̈ܰܚܡܶܐ܃
02:02 [ai]ܫܰܠܶܡܘ ܚܰܕܼܘܰܬܼܝ܃ ܕܚܰܕܼ ܪܶܥܝܳܢܳܐ ܢܶܗܘܶܐ ܠܟܼܽܘܢ܂ ܘܚܰܕܼ ܚܽܘܒܿܳܐ܂ ܘܰܚܕܼܳܐ ܢܦܼܶܫ܂ ܘܰܚܕܼܳܐ ܬܰܪܥܺܝܬܼܳܐ܂
02:03 [ai]ܘܡܶܕܶܡ ܒܚܶܪܝܳܢܳܐ ܐܰܘ ܒܬܶܫܒܿܽܘܚܬܳܐ ܣܪܺܝܩܬܳܐ܂ ܠܳܐ ܬܶܥܒܿܕܼܽܘܢ܃ ܐܶܠܳܐ ܒܡܰܟܿܺܝܟܼܽܘܬܼ ܪܶܥܝܳܢܳܐ܃ ܟܽܠܢܳܫ ܠܚܰܒܼܪܶܗ ܐܰܝܟܼ ܕܰܡܝܰܬܿܰܪ ܡܶܢܶܗ܂
02:04 [ai]ܘܠܳܐ ܐ̱ܢܳܫ ܕܢܰܦܼܫܶܗ ܢܺܐܨܰܦܼ܃ ܐܶܠܳܐ ܟܽܠܢܳܫ ܐܳܦܼ ܕܚܰܒܼܪܶܗ܂
02:05 [ai]ܘܗܳܕܼܶܐ ܐܶܬܼܪܰܥܰܘ ܒܢܰܦܼܫܟܼܽܘܢ܃ ܗܳܝ ܕܳܐܦܼ ܝܶܫܽܘܥ ܡܫܺܝܚܳܐ܂
02:06 [ai]ܗܰܘ ܕܟܰܕܼ ܐܺܝܬܼܰܘܗ̱ܝ ܒܰܕܼܡܽܘܬܼܳܐ ܕܰܐܠܳܗܳܐ܃ ܠܳܐ ܗ̱ܘܳܐ ܚܛܽܘܦܼܝܳܐ ܚܰܫܒܿܳܗ ܗܳܕܼܶܐ܂ ܕܺܐܝܬܼܰܘܗ̱ܝ ܦܶܚܡܳܐ ܕܰܐܠܳܗܳܐ܂
02:07 [ai]ܐܶܠܳܐ ܢܰܦܼܫܶܗ ܣܰܪܶܩ܂ ܘܰܕܼܡܽܘܬܼܳܐ ܕܥܰܒܼܕܿܳܐ ܢܣܰܒܼ܂ ܘܰܗܘܳܐ ܒܰܕܼܡܽܘܬܼܳܐ ܕܿܰܒܼܢܰܝܢܳܫܳܐ܂ ܘܒܼܶܐܣܟܿܺܡܳܐ ܐܶܫܬܿܟܼܰܚ ܐܰܝܟܼ ܒܰܪܢܳܫܳܐ܂
02:08 [ai]ܘܡܰܟܿܶܟܼ ܢܰܦܼܫܶܗ܂ ܘܶܐܫܬܿܡܰܥ ܥܕܼܰܡܳܐ ܠܡܰܘܬܳܐ܂ ܡܰܘܬܳܐ ܕܶܝܢ܂ ܕܰܙܩܺܝܦܼܳܐ܂
02:09 [ai]ܡܶܛܽܠ ܗܳܢܳܐ ܐܳܦܼ ܐܰܠܳܗܳܐ ܐܰܣܓܿܺܝ ܪܰܡܪܡܶܗ܂ ܘܝܰܗ̱ܒܼ ܠܶܗ ܫܡܳܐ ܕܰܡܝܰܬܿܰܪ ܡܶܢ ܟܽܠ ܫܡܳܗܺܝܢ̈܃
02:10 [ai]ܕܒܰܫܡܶܗ ܕܝܶܫܽܘܥ ܟܽܠ ܒܪܽܘܟܼ ܬܶܟܿܽܘܦܼ܂ ܕܒܰܫܡܰܝܳܐ܂ ܘܒܼܰܐܪܥܳܐ܂ ܘܕܼܰܠܬܼܰܚܬܿ ܡܶܢ ܐܰܪܥܳܐ܃
02:11 [ai]ܘܟܼܽܠ ܠܶܫܳܢ ܢܰܘܕܿܶܐ ܕܡܳܪܝܳܐ ܗ̱ܘ ܝܶܫܽܘܥ ܡܫܺܝܚܳܐ ܠܫܽܘܒܼܚܳܐ ܕܰܐܠܳܗܳܐ ܐܰܒܼܽܘܗ̱ܝ܀
02:12 [ai]ܡܶܟܿܺܝܠ ܚܰܒܺܝܒܼܰܝ̈܃ ܐܰܝܟܿܰܢܳܐ ܕܰܒܼܟܼܽܠܙܒܼܰܢ ܐܶܫܬܿܡܰܥܬܿܽܘܢ܃ ܠܳܐ ܟܰܕܼ ܩܰܪܺܝܒܼ ܐ̱ܢܳܐ ܠܟܼܽܘܢ ܒܰܠܚܽܘܕܼ܂ ܐܶܠܳܐ ܗܳܫܳܐ ܕܪܰܚܺܝܩ ܐ̱ܢܳܐ ܡܶܢܟܼܽܘܢ܃ ܝܰܬܿܺܝܪܳܐܺܝܬܼ ܒܕܶܚܠܬܼܳܐ ܘܒܼܰܪܬܼܺܝܬܼܳܐ܃ ܦܠܽܘܚܘ ܦܽܘܠܚܳܢܳܐ ܕܚܰܝܰܝܟܿܽܘܢ̈܂
02:13 [ai]ܐܰܠܳܗܳܐ ܗ̱ܘ ܓܶܝܪ ܡܚܰܦܿܶܛ ܒܟܽܘܢ܃ ܐܳܦܼ ܠܡܶܨܒܿܳܐ܂ ܐܳܦܼ ܠܡܶܣܥܰܪ܃ ܗܰܘ ܕܨܳܒܼܶܝܢ ܐܢ̱ܬܿܽܘܢ܂
02:14 [ai]ܟܽܠܡܶܕܶܡ ܗܘܰܝܬܿܽܘܢ ܥܳܒܼܕܺܝܢ܃ ܕܠܳܐ ܪܶܛܢܳܐ ܘܰܕܼܠܳܐ ܦܽܘܠܳܓܼ܃
02:15 [ai]ܕܬܶܗܘܽܘܢ ܬܰܡܺܝܡܶܐ̈ ܘܰܕܼܠܳܐ ܡܽܘܡ܂ ܐܰܝܟܼ ܒܢܰܝܳܐ ܕܟܰܝܳܐ̈ ܕܰܐܠܳܗܳܐ܃ ܕܥܳܡܪܺܝܢ ܒܕܳܪܳܐ ܥܰܣܩܳܐ ܘܰܡܥܰܩܡܳܐ܂ ܘܶܐܬܼܚܙܰܘ ܒܰܝܢܳܬܼܗܽܘܢ ܐܰܝܟܼ ܢܰܗܺܝܪ̈ܶܐ ܒܥܳܠܡܳܐ܃
02:16 [ai]ܕܺܐܝܬܼܰܝܟܿܽܘܢ ܠܗܽܘܢ ܒܕܽܘܟܿܰܬܼ ܚܰܝ̈ܶܐ ܠܫܽܘܒܼܗܳܪܝ ܕܺܝܠܝ ܒܝܰܘܡܶܗ ܕܰܡܫܺܝܚܳܐ܃ ܕܠܳܐ ܗ̱ܘܳܐ ܐܺܝܩܺܐ ܪܶܗܛܶܬܼ ܘܠܳܐ ܣܪܺܝܩܳܐܺܝܬܼ ܥܶܡܠܶܬܼ܂
02:17 [ai]ܐܶܠܳܐ ܐܳܦܼܶܢ ܡܶܬܼܢܰܩܶܐ ܐ̱ܢܳܐ ܥܰܠ ܕܶܒܼܚܬܼܳܐ ܘܬܼܶܫܡܶܫܬܳܐ ܕܗܰܝܡܳܢܽܘܬܼܟܼܽܘܢ܃ ܚܳܕܼܶܐ ܐ̱ܢܳܐ ܘܪܳܘܶܙ ܐ̱ܢܳܐ ܥܰܡ ܟܽܠܟܼܽܘܢ܂
02:18 [ai]ܗܳܟܼܰܢܳܐ ܐܳܦܼ ܐܰܢ̱ܬܿܽܘܢ ܚܕܼܰܘ ܘܰܪܘܰܙܘ ܥܰܡܝ܂
02:19 [ai]ܡܣܰܒܰܪ ܐ̱ܢܳܐ ܕܶܝܢ ܒܡܳܪܰܢ ܝܶܫܽܘܥ܃ ܕܶܐܫܰܕܿܰܪ ܠܘܳܬܼܟܼܽܘܢ ܠܛܺܝܡܳܬܼܶܐܳܘܣ ܒܰܥܓܼܰܠ܃ ܕܳܐܦܼ ܠܺܝ ܢܶܗܘܶܐ ܠܺܝ ܢܝܳܚܳܐ܃ ܟܰܕܼ ܐܺܠܰܦܼ ܡܶܛܽܠܳܬܼܟܼܽܘܢ܂
02:20 [ai]ܠܰܝܬܿ ܠܺܝ ܓܶܝܪ ܐ̱ܚܪܺܝܢ ܗܳܪܟܿܳܐ ܕܰܐܝܟܼ ܢܰܦܼܫܝ ܗ̱ܽܘ܃ ܕܰܐܟܼܺܝܦܼܳܐܺܝܬܼ ܝܳܨܶܦܼ ܕܺܝܠܟܼܽܘܢ܂
02:21 [ai]ܟܽܠܗܽܘܢ ܓܶܝܪ ܕܢܰܦܼܫܗܽܘܢ ܗ̱ܽܘ ܒܿܳܥܶܝܢ܃ ܘܠܳܐ ܕܝܶܫܽܘܥ ܡܫܺܝܚܳܐ܂
02:22 [ai]ܒܽܘܩܝܶܗ ܕܶܝܢ ܕܗܳܢܳܐ ܝܳܕܼܥܺܝܬܿܽܘܢ܃ ܕܰܐܝܟܼ ܒܪܳܐ ܥܰܡ ܐܰܒܼܽܘܗ̱ܝ܃ ܗܳܟܼܰܢܳܐ ܦܳܠܰܚ ܥܰܡܝ ܒܰܣܒܼܰܪܬܼܳܐ܂
02:23 [ai]ܠܗܳܢܳܐ ܡܣܰܒܰܪ ܐ̱ܢܳܐ܃ ܕܶܐܫܰܕܿܰܪ ܠܘܳܬܼܟܼܽܘܢ ܒܰܥܓܼܰܠ ܡܳܐ ܕܰܚܙܺܝܬܼ ܡܳܐ ܕܰܠܘܳܬܼܝ܂
02:24 [ai]ܘܰܬܼܟܼܺܝܠ ܐ̱ܢܳܐ ܥܰܠ ܡܳܪܝ܃ ܕܳܐܦܼ ܐܶܢܳܐ ܒܰܥܓܼܰܠ ܐܳܬܼܶܐ ܐ̱ܢܳܐ ܠܘܳܬܼܟܼܽܘܢ܂
02:25 [ai]ܗܳܫܳܐ ܕܶܝܢ ܐܶܠܰܨܬܼܰܢܝ ܨܒܼܽܘܬܼܳܐ܃ ܕܶܐܫܰܕܿܰܪ ܠܘܳܬܼܟܼܽܘܢ ܠܶܐܦܿܰܦܼܪܳܘܕܼܺܝܛܳܣ ܐܰܚܳܐ܃ ܕܺܐܝܬܼܰܘܗ̱ܝ ܡܥܰܕܿܪܳܢܳܐ܂ ܘܦܼܳܠܚܳܐ ܕܥܰܡܝ܃ ܕܺܝܠܟܼܽܘܢ ܕܶܝܢ ܫܠܺܝܚܳܐ܂ ܘܰܡܫܰܡܫܳܢܳܐ ܕܰܚܫܰܚܬܼܝ܃
02:26 [ai]ܡܶܛܽܠ ܕܰܣܘܶܐ ܗ̱ܘܳܐ ܠܡܶܚܙܳܐ ܠܟܼܽܠܟܼܽܘܢ܃ ܘܰܡܥܳܩ ܗ̱ܘܳܐ ܕܺܝܕܼܰܥ ܕܰܫܡܰܥܬܿܽܘܢ ܕܶܐܬܼܟܿܪܰܗ܂
02:27 [ai]ܐܳܦܼ ܐܶܬܼܟܿܪܰܗ ܓܶܝܪ ܥܕܼܰܡܳܐ ܠܡܰܘܬܳܐ܃ ܐܶܠܳܐ ܐܰܠܳܗܳܐ ܪܰܚܶܡ ܥܠܰܘܗ̱ܝ܃ ܠܳܐ ܗ̱ܘܳܐ ܕܶܝܢ ܥܠܰܘܗ̱ܝ ܒܰܠܚܽܘܕܼ܃ ܐܶܠܳܐ ܐܳܦܼ ܥܠܰܝ܃ ܕܠܳܐ ܬܶܗܘܶܐ ܠܺܝ ܥܳܩܳܐ ܥܰܠ ܥܳܩܳܐ܂
02:28 [ai]ܚܦܼܺܝܛܳܐܺܝܬܼ ܗܳܟܼܺܝܠ ܫܰܕܿܰܪܬܿܶܗ ܠܘܳܬܼܟܼܽܘܢ܃ ܕܟܰܕܼ ܬܶܚܙܽܘܢܳܝܗ̱ܝ܂ ܬܽܘܒܼ ܬܶܚܕܿܽܘܢ܃ ܘܠܺܝ ܩܰܠܺܝܠ ܢܶܗܘܶܐ ܢܦܼܺܐܫܳܐ܂
02:29 [ai]ܩܰܒܿܠܽܘܗ̱ܝ ܗܳܟܼܺܝܠ ܒܡܳܪܝܳܐ ܒܟܽܠ ܚܰܕܼܘܳܐ܂ ܘܠܰܐܝܠܶܝܢ ܕܗܳܟܼܰܢܳܐ ܐܶܢܽܘܢ܃ ܒܺܐܝܩܳܪܳܐ ܐܰܚܽܘܕܼܘ ܐܶܢܽܘܢ܂
02:30 [ai]ܡܶܛܽܠ ܥܒܼܳܕܼܳܐ ܓܶܝܪ ܕܰܡܫܺܝܚܳܐ ܥܕܼܰܡܳܐ ܠܡܰܘܬܳܐ ܡܰܛܺܝ܂ ܘܒܼܰܣܰܪ ܥܰܠ ܢܰܦܼܫܶܗ܃ ܕܰܢܡܰܠܶܐ ܡܶܕܶܡ ܕܒܰܨܰܪܬܿܽܘܢ ܗ̱ܘܰܝܬܿܽܘܢ ܒܬܶܫܡܶܫܬܳܐ ܕܰܠܘܳܬܼܝ܀

next chapter