← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62050: Phil

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


03:01 [ai]ܡܶܟܿܺܝܠ ܐܰܚܰܝ̈ ܚܕܼܰܘ ܒܡܳܪܰܢ܂ ܗܶܢܶܝܢ ܟܰܕܼ ܗܶܢܶܝܢ ܕܶܐܟܼܬܽܘܒܼ ܠܟܼܽܘܢ܃ ܠܳܐ ܡܳܐܢܳܐ ܠܺܝ܃ ܡܶܛܽܠ ܕܰܠܟܼܽܘܢ ܡܙܰܗܪ̈ܳܢ܂
03:02 [ai]ܐܶܙܕܿܰܗ̱ܪܘ ܡܶܢ ܟܰܠܒܿܶܐ̈܂ ܐܶܙܕܿܰܗ̱ܪܘ ܡܶܢ ܦܳܥܠܶܐ̈ ܒܺܝܫܶܐ̈܂ ܐܶܙܕܿܰܗ̱ܪܘ ܡܶܢ ܦܣܳܩ ܒܶܣܪܳܐ܂
03:03 [ai]ܓܙܽܘܪܬܳܐ ܓܶܝܪ ܚܢܰܢ ܐܺܝܬܼܰܝܢ܃ ܐܰܝܠܶܝܢ ܕܦܳܠܚܺܝܢܰܢ ܠܰܐܠܳܗܳܐ ܒܪܽܘܚܳܐ܃ ܘܡܶܫܬܿܰܒܼܗܪܺܝܢܰܢ ܒܝܶܫܽܘܥ ܡܫܺܝܚܳܐ܃ ܘܠܳܐ ܬܟܼܺܝܠܺܝܢܰܢ ܥܰܠ ܒܶܣܪܳܐ܃
03:04 [ai]ܟܰܕܼ ܠܺܝ ܐܺܝܬܼ ܗ̱ܘܳܐ ܠܺܝ ܬܽܘܟܼܠܳܢܳܐ ܐܳܦܼ ܥܰܠ ܒܶܣܪܳܐ܂ ܐܶܢ ܓܶܝܪ ܐ̱ܢܳܫ ܣܳܒܼܰܪ ܕܬܽܘܟܼܠܳܢܶܗ ܒܒܼܶܣܪܳܐ ܗ̱ܘ܃ ܝܰܬܿܺܝܪ ܡܶܢܶܗ ܐܶܢܳܐ܂
03:05 [ai]ܓܙܺܝܪܳܐ ܒܰܪ ܬܡܳܢܝܳܐ ܝܰܘܡܺܝܢ̈܂ ܡܶܢ ܛܽܘܗܡܳܐ ܕܺܐܝܣܪܳܝܶܠ܂ ܡܶܢ ܫܰܒܼܛܳܐ ܕܒܼܶܢܝܳܡܺܝܢ܂ܥܶܒܼܪܳܝܳܐ ܒܰܪ ܥܶܒܼܪ̈ܳܝܶܐ܂ ܒܢܳܡܽܘܣܳܐ ܦܪܺܝܫܳܝܳܐ܂
03:06 [ai]ܒܰܛܢܳܢܳܐ ܪܳܕܼܽܘܦܼܳܐ ܕܥܺܕ̱ܿܬܳܐ܂ ܘܰܒܙܰܕܿܺܝܩܽܘܬܼܳܐ ܕܢܳܡܽܘܣܳܐ ܕܠܳܐ ܪܶܫܝܳܢ ܗ̱ܘܺܝܬܼ܂
03:07 [ai]ܐܶܠܳܐ ܗܳܠܶܝܢ ܕܝܽܘܬܼܪܳܢܳܐ ܗܘܰܝ̈ ܠܺܝ܃ ܚܽܘܣܪܳܢܳܐ ܚܶܫܒܿܶܬܼ ܐܶܢܶܝܢ̈ ܡܶܛܽܠ ܡܫܺܝܚܳܐ܂
03:08 [ai]ܐܳܦܼ ܚܳܫܶܒܼ ܐ̱ܢܳܐ ܠܗܶܝܢ ܟܽܠܗܶܝܢ ܚܽܘܣܪܳܢܳܐ܃ ܡܶܛܽܠ ܪܰܒܿܽܘܬܼܳܐ ܕܺܝܕܼܰܥܬܼܶܗ ܕܝܶܫܽܘܥ ܡܫܺܝܚܳܐ ܡܳܪܝ܃ ܗܰܘ ܕܡܶܛܽܠܳܬܼܶܗ ܟܽܠܡܶܕܶܡ ܚܶܣܪܶܬܼ܂ ܘܰܐܝܟܼ ܙܶܒܼܠܳܐ ܚܶܫܒܿܶܬܼ܃ ܕܠܰܡܫܺܝܚܳܐ ܐܺܬܼܰܪ܃
03:09 [ai]ܘܶܐܫܬܿܟܼܰܚ ܒܶܗ܃ ܟܰܕܼ ܠܰܝܬܿ ܠܺܝ ܙܰܕܿܺܝܩܽܘܬܼܳܐ ܕܢܰܦܼܫܝ ܗܳܝ ܕܡܶܢ ܢܳܡܽܘܣܳܐ܃ ܐܶܠܳܐ ܗܳܝ ܕܡܶܢ ܗܰܝܡܳܢܽܘܬܼܳܐ ܕܰܡܫܺܝܚܳܐ܃ ܕܺܐܝܬܼܶܝܗ ܙܰܕܿܺܝܩܽܘܬܼܳܐ ܕܡܶܢ ܐܰܠܳܗܳܐ܃
03:10 [ai]ܕܒܳܗ ܐܶܫܬܰܘܕܿܰܥ ܠܝܶܫܽܘܥ ܘܰܠܚܰܝܠܳܐ ܕܰܩܝܳܡܬܿܶܗ܃ ܘܶܐܫܬܰܘܬܿܰܦܼ ܒܚܰܫܰܘܗ̱ܝ̈܂ ܘܶܐܬܿܕܰܡܶܐ ܒܡܰܘܬܿܶܗ܃
03:11 [ai]ܕܰܠܡܳܐ ܐܶܫܟܿܰܚ ܐܶܡܰܛܶܐ ܠܰܩܝܳܡܬܳܐ ܕܡܶܢ ܒܶܝܬܼ ܡܺܝܬܼܶܐ̈܂
03:12 [ai]ܠܳܐ ܗ̱ܘܳܐ ܡܶܢ ܟܰܕܿܽܘ ܢܶܣܒܿܶܬܼ܂ ܐܰܘ ܡܶܢ ܟܰܕܿܽܘ ܐܶܬܼܓܿܰܡܪܶܬܼ܂ ܐܶܠܳܐ ܪܳܗܶܛ ܐ̱ܢܳܐ܃ ܕܰܠܡܳܐ ܐܰܕܼܪܶܟܼ ܠܡܶܕܶܡ ܕܡܶܛܽܠܳܬܼܶܗ ܐܰܕܼܪܟܼܰܢܝ ܝܶܫܽܘܥ ܡܫܺܝܚܳܐ ܿ܀ܿ܀ܿ
03:13 [ai]ܐܰܚܰܝ̈܃ ܐܶܢܳܐ ܥܰܠ ܢܰܦܼܫܝ ܠܳܐ ܪܳܢܶܐ ܐ̱ܢܳܐ ܕܰܐܕܼܪܟܼܶܬܼ܂ ܚܕܼܳܐ ܕܶܝܢ ܝܳܕܼܰܥ ܐ̱ܢܳܐ܃ ܕܰܕܼܒܼܶܣܬܿܰܪܝ ܛܳܥܶܐ ܐ̱ܢܳܐ܂ ܘܠܰܩܕܼܳܡܰܝ ܡܶܫܬܰܘܫܰܛ ܐ̱ܢܳܐ܂
03:14 [ai]ܘܪܳܗܶܛ ܐ̱ܢܳܐ ܠܽܘܩܒܼܰܠ ܢܺܝܫܳܐ܃ ܕܶܐܣܰܒܼ ܙܳܟܼܽܘܬܼܳܐ ܕܩܶܪܝܳܢܳܐ ܕܰܠܥܶܠ ܕܰܐܠܳܗܳܐ܂ ܒܝܶܫܽܘܥ ܡܫܺܝܚܳܐ܂
03:15 [ai]ܐܰܝܠܶܝܢ ܕܰܓܼܡܺܝܪܺܝܢ ܗܳܟܼܺܝܠ ܗܳܠܶܝܢ ܢܶܬܼܪܰܥܽܘܢ܂ ܘܶܐܢ ܡܶܕܶܡ ܐ̱ܚܪܳܢܝܳܐܺܝܬܼ ܡܶܬܼܪܰܥܶܝܢ ܐܢ̱ܬܿܽܘܢ܃ ܐܳܦܼ ܗܳܕܼܶܐ ܐܰܠܳܗܳܐ ܢܶܓܼܠܶܐ ܠܟܼܽܘܢ܂
03:16 [ai]ܒܪܰܡ ܠܗܳܕܼܶܐ ܕܡܰܛܺܝܢ܃ ܒܚܰܕܼ ܫܒܼܺܝܠܳܐ ܢܶܫܠܰܡ܂ ܘܒܼܰܚܕܼܳܐ ܐܰܘܝܽܘܬܼܳܐ܀
03:17 [ai]ܐܶܬܿܕܰܡܰܘ ܒܺܝ ܐܰܚܰܝ̈܃ ܘܰܗܘܰܝܬܿܽܘܢ ܡܶܬܼܒܿܰܩܶܝܢ ܒܰܐܝܠܶܝܢ܂ ܕܗܳܟܼܰܢܳܐ ܡܗܰܠܟܼܺܝܢ܃ ܐܰܝܟܼ ܕܡܽܘܬܼܳܐ ܕܒܰܢ ܚܳܙܶܝܬܿܽܘܢ܂
03:18 [ai]ܐܺܝܬܼ ܓܶܝܪ ܣܰܓܿܺܝܶܐܐ̈܃ ܕܰܐ̱ܚܪܳܢܝܳܐܺܝܬܼ ܡܗܰܠܟܼܺܝܢ܃ ܗܳܢܽܘܢ ܕܙܰܒܼܢܺܝܢ̈ ܣܰܓܿܺܝܳܐܢ̈ ܐܶܡܪܶܬܼ ܠܟܼܽܘܢ ܥܠܰܝܗܽܘܢ܃ ܗܳܫܳܐ ܕܶܝܢ ܟܰܕܼ ܒܳܟܼܶܐ ܐ̱ܢܳܐ ܐܳܡܰܪ ܐ̱ܢܳܐ܂ ܗܳܢܽܘܢ ܕܰܒܼܥܶܠܕܿܒܼܳܒܼܶܐ̈ ܕܰܙܩܺܝܦܼܶܗ ܕܰܡܫܺܝܚܳܐ܂
03:19 [ai]ܕܚܰܪܬܼܗܽܘܢ ܐܰܒܼܕܳܢܳܐ ܗ̱ܝ܂ ܗܳܢܽܘܢ ܕܰܐܠܳܗܗܽܘܢ ܟܰܪܣܗܽܘܢ ܘܬܼܶܫܒܿܽܘܚܬܿܗܽܘܢ ܒܶܗܬܿܰܬܼܗܽܘܢ܂ ܗܳܠܶܝܢ ܕܬܰܪܥܺܝܬܼܗܽܘܢ ܒܰܐܪܥܳܐ ܗ̱ܝ܂
03:20 [ai]ܕܺܝܠܰܢ ܕܶܝܢ ܦܽܘܠܚܳܢܰܢ ܒܰܫܡܰܝܳܐ ܗ̱ܘ܂ ܘܡܶܢ ܬܰܡܳܢ ܡܣܰܟܿܶܝܢܰܢ ܠܡܰܚܝܳܢܳܐ܂ ܠܡܳܪܰܢ ܝܶܫܽܘܥ ܡܫܺܝܚܳܐ܃
03:21 [ai]ܕܗܽܘ ܢܚܰܠܶܦܼ ܦܰܓܼܪܳܐ ܕܡܽܘܟܿܳܟܼܰܢ܃ ܕܢܶܗܘܶܐ ܒܰܕܼܡܽܘܬܼܳܐ ܕܦܰܓܼܪܳܐ ܕܫܽܘܒܼܚܶܗ܃ ܐܰܝܟܼ ܚܰܝܠܶܗ ܪܰܒܿܳܐ ܗܰܘ ܕܒܶܗ ܟܽܠ ܐܶܫܬܿܰܥܒܿܰܕܼ ܠܶܗ܀

next chapter