← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62050: Phil

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


04:01 [ai]ܡܶܟܿܺܝܠ ܐܰܚܰܝ̈܃ ܚܰܒܺܝܒܼܶܐ̈ ܘܰܪ̈ܚܺܝܡܶܐ܂ ܘܚܰܕܼܘܰܬܼܝ ܘܰܟܼܠܺܝܠܝ܃ ܗܳܟܼܰܢܳܐ ܩܽܘܡܘ ܒܡܳܪܰܢ ܚܰܒܺܝܒܼܰܝ̈܂
04:02 [ai]ܡܶܢ ܐܶܘܳܗܕܼܺܝܰܐ ܒܿܳܥܶܐ ܐ̱ܢܳܐ ܘܡܶܢ ܣܽܘܢܛܺܝܟܼܰܐ܃ ܕܚܰܕܼ ܪܶܥܝܳܢܳܐ ܢܶܗܘܶܐ ܠܗܶܝܢ ܒܡܳܪܰܢ܂
04:03 [ai]ܐܳܦܼ ܡܶܢܳܟܼ ܒܿܳܥܶܐ ܐ̱ܢܳܐ܂ ܒܰܪ ܙܰܘܓܿܝ ܫܰܪܺܝܪܳܐ܃ ܕܬܶܗܘܶܐ ܡܥܰܕܿܰܪ ܠܗܶܝܢ܃ ܕܗܶܢܶܝܢ ܠܐܺܝ̈ ܥܰܡܝ ܒܶܐܘܰܢܓܿܶܠܺܝܳܘܢ ܥܰܡ ܩܠܺܡܺܝܣ ܘܥܰܡ ܫܰܪܟܿܳܐ ܕܰܡܥܰܕܿܪ̈ܳܢܰܝ܃ ܗܳܢܽܘܢ ܕܰܫܡܳܗܰܝܗܽܘܢ̈ ܟܬܼܺܝܒܼܺܝܢ ܒܰܟܼܬܼܳܒܼܳܐ ܕܚܰܝ̈ܶܐ܀
04:04 [ai]ܚܕܼܰܘ ܒܡܳܪܰܢ ܒܟܽܠܙܒܼܰܢ܃ ܘܬܼܽܘܒܼ ܐܳܡܰܪ ܐ̱ܢܳܐ ܚܕܼܰܘ܂
04:05 [ai]ܘܡܰܟܿܺܝܟܼܽܘܬܼܟܼܽܘܢ ܬܶܬܼܺܝܕܼܰܥ ܠܘܳܬܼ ܟܽܠܢܳܫ܂ ܡܳܪܰܢ ܩܰܪܺܝܒܼ ܗ̱ܽܘ܂
04:06 [ai]ܕܿܡܶܕܶܡ ܠܳܐ ܬܺܐܨܦܿܽܘܢ܃ ܐܶܠܳܐ ܒܟܽܠܙܒܼܰܢ ܒܰܨܠܽܘܬܼܳܐ܂ ܘܰܒܒܼܳܥܽܘܬܼܳܐ܂ ܘܰܒܬܼܰܘܕܿܺܝܬܼܳܐ܂ ܫܶܐܠܳܬܼܟܼܽܘܢ̈ ܢܶܬܼܝܰܕܿܥܳܢ̈ ܩܕܼܳܡ ܐܰܠܳܗܳܐ܂
04:07 [ai]ܘܰܫܠܳܡܶܗ ܕܰܐܠܳܗܳܐ ܗܰܘ ܕܪܰܒܿ ܡܶܢ ܟܽܠ ܡܰܕܿܰܥ܃ ܢܢܰܛܰܪ ܠܶܒܿܰܘܳܬܼܟܼܽܘܢ̈ ܘܡܰܕܿܥܰܝܟܿܽܘܢ̈ ܒܝܶܫܽܘܥ ܡܫܺܝܚܳܐ܀
04:08 [ai]ܡܶܟܿܺܝܠ ܐܰܚܰܝ̈܃ ܐܰܝܠܶܝܢ ܕܫܰܪ̈ܺܝܪܳܢ܂ ܘܰܐܝܠܶܝܢ ܕܢܰܟܼܦܿܳܢ̈܂ ܘܰܐܝܠܶܝܢ ܕܟܺܐܢܳܢ̈ ܘܰܐܝܠܶܝܢ ܕܕܼܰܟܼܝܳܢ̈܂ ܘܰܐܝܠܶܝܢ ܕܿܰܪ̈ܚܺܝܡܳܢ ܘܰܐܝܠܶܝܢ ܕܰܫܒܼܺܝܚܳܢ̈܂ ܘܰܐܝܠܶܝܢ ܥܒܼܳܕܼܶܐ̈ ܕܫܽܘܒܼܚܳܐ ܘܰܕܼܩܽܘܠܳܣܳܐ܃ ܗܳܠܶܝܢ ܐܶܬܼܪܰܥܰܘ܂
04:09 [ai]ܗܳܠܶܝܢ ܕܺܝܠܶܦܼܬܿܽܘܢ܂ ܘܩܰܒܿܶܠܬܿܽܘܢ܂ ܘܰܫܡܰܥܬܿܽܘܢ܂ ܘܰܚܙܰܝܬܿܽܘܢ ܒܺܝ܃ ܗܳܠܶܝܢ ܣܥܽܘܪܘ܃ ܘܰܐܠܳܗܳܐ ܕܰܫܠܳܡܳܐ ܢܶܗܘܶܐ ܥܰܡܟܼܽܘܢ܀
04:10 [ai]ܪܰܘܪܒܼܳܐܺܝܬܼ ܕܶܝܢ ܚܕܼܺܝܬܼ ܒܡܳܪܰܢ܃ ܕܰܐܩܶܦܼܬܿܽܘܢ ܠܡܺܐܨܰܦܼ ܕܺܝܠܝ܃ ܐܰܝܟܿܰܢܳܐ ܕܳܐܦܼ ܝܳܨܦܿܺܝܢ ܗ̱ܘܰܝܬܿܽܘܢ܃ ܐܶܠܳܐ ܠܳܐ ܣܦܼܺܝܩܺܝܢ ܗ̱ܘܰܝܬܿܽܘܢ܂
04:11 [ai]ܠܳܐ ܗ̱ܘܳܐ ܕܶܝܢ ܡܶܛܽܠ ܕܰܚܣܰܪ ܠܺܝ܂ ܐܳܡܰܪ ܐ̱ܢܳܐ܂ ܐܶܢܳܐ ܓܶܝܪ ܝܶܠܦܿܶܬܼ܃ ܕܢܶܗܘܶܐ ܣܳܦܼܶܩ ܠܺܝ ܗܰܘ ܡܶܕܶܡ ܕܺܐܝܬܼ ܠܺܝ܂
04:12 [ai]ܝܳܕܼܰܥ ܐ̱ܢܳܐ ܕܶܐܬܼܡܰܟܿܰܟܼ܂ ܝܳܕܼܰܥ ܐ̱ܢܳܐ ܗ̱ܽܘ ܐܳܦܼ ܕܶܐܬܼܝܰܬܿܰܪ ܒܟܽܠ܂ ܘܰܒܟܼܽܠ ܡܶܕܶܡ ܡܕܼܰܪܰܫ ܐ̱ܢܳܐ܃ ܐܳܦܼ ܒܣܰܒܼܥܳܐ ܐܳܦܼ ܒܟܰܦܼܢܳܐ܂ ܒܰܡܫܰܪܬܿܚܽܘܬܼܳܐ ܘܰܒܚܰܣܺܝܪܽܘܬܼܳܐ܃
04:13 [ai]ܕܟܽܠ ܡܶܕܶܡ ܡܨܶܐ ܐ̱ܢܳܐ ܚܰܝܠܳܐ ܒܰܡܫܺܝܚܳܐ܂ ܕܰܡܚܰܝܶܠ ܠܺܝ܂
04:14 [ai]ܒܪܰܡ ܫܰܦܿܺܝܪ ܥܒܼܰܕܿܬܿܽܘܢ܃ ܕܶܐܫܬܰܘܬܿܰܦܼܬܿܽܘܢ ܠܽܐܘܠܨܳܢܰܝ̈܀
04:15 [ai]ܝܳܕܼܥܺܝܢ ܐܢ̱ܬܿܽܘܢ ܕܶܝܢ ܐܳܦܼ ܐܰܢ̱ܬܿܽܘܢ ܦܼܺܝܠܺܝܦܿܺܣܳܝܶܐ̈܃ ܕܰܒܼܫܽܘܪܳܝܳܐ ܕܰܣܒܼܰܪܬܼܳܐ܂ ܟܰܕܼ ܢܶܦܼܩܶܬܼ ܡܶܢ ܡܰܩܶܕܼܳܘܢܺܝܰܐ܃ ܐܳܦܼܠܳܐ ܚܕܼܳܐ ܡܶܢ ܥܺܕܼܳܬܼܳܐ̈ ܐܶܫܬܰܘܬܿܰܦܼ ܠܺܝ ܒܚܽܘܫܒܿܳܢ ܡܰܣܒܼܳܐ ܘܡܰܬܿܠܳܐ܂ ܐܶܠܳܐ ܐܰܢ̱ܬܿܽܘܢ ܒܰܠܚܽܘܕܼ܃
04:16 [ai]ܕܳܐܦܼ ܠܬܼܶܣܰܠܳܘܢܺܝܩܺܐ ܚܕܼܳܐ ܙܒܼܰܢ ܘܬܼܰܪ̈ܬܿܶܝܢ܃ ܚܫܰܚܬܼܝ ܫܰܕܿܰܪܬܿܽܘܢ ܠܺܝ܂
04:17 [ai]ܠܰܘ ܕܡܰܘܗܰܒܼܬܼܳܐ ܒܿܳܥܶܐ ܐ̱ܢܳܐ܃ ܐܶܠܳܐ ܒܿܳܥܶܐ ܐ̱ܢܳܐ܃ ܕܿܦܼܺܐܪ̈ܶܐ ܢܶܣܓܿܽܘܢ ܠܟܼܽܘܢ܂
04:18 [ai]ܟܽܠܡܶܕܶܡ ܩܰܒܿܠܶܬܼ܂ ܘܝܰܬܿܺܝܪ ܠܺܝ ܘܰܡܠܶܐ ܐ̱ܢܳܐ܃ ܘܢܶܣܒܿܶܬܼ ܟܽܠ܂ ܕܫܰܕܿܰܪܬܿܽܘܢ ܠܺܝ ܒܝܰܕܼ ܐܶܦܿܰܦܼܪܳܘܕܼܺܝܛܳܣ܃ ܪܺܝܚܳܐ ܒܰܣܺܝܡܳܐ܂ ܘܕܼܶܒܼܚܳܐ ܡܩܰܒܠܳܐ܂ ܕܫܳܦܼܰܪ ܠܰܐܠܳܗܳܐ܂
04:19 [ai]ܘܰܐܠܳܗܝ ܢܡܰܠܶܐ ܟܽܠܳܗ ܣܢܺܝܩܽܘܬܼܟܼܽܘܢ܃ ܐܰܝܟܼ ܥܽܘܬܼܪܶܗ܂ ܒܫܽܘܒܼܚܳܐ ܕܝܶܫܽܘܥ ܡܫܺܝܚܳܐ܂
04:20 [ai]ܠܰܐܠܳܗܳܐ ܕܶܝܢ ܐܰܒܼܽܘܢ܃ ܫܽܘܒܼܚܳܐ ܘܺܐܝܩܳܪܳܐ ܠܥܳܠܰܡ ܥܳܠܡܺܝܢ܂ ܐܰܡܺܝܢ܀
04:21 [ai]ܫܰܐܠܘ ܒܰܫܠܳܡܳܐ ܕܟܽܠܗܽܘܢ ܩܰܕܿܺܝܫܶܐ̈ ܕܰܒܼܝܶܫܽܘܥ ܡܫܺܝܚܳܐ܂ ܫܳܐܠܺܝܢ ܒܰܫܠܳܡܟܼܽܘܢ ܐܰܚܶܐ̈ ܕܥܰܡܝ܂
04:22 [ai]ܫܳܐܠܺܝܢ ܒܰܫܠܳܡܟܼܽܘܢ ܟܽܠܗܽܘܢ ܩܰܕܿܺܝܫܶܐ̈܃ ܝܰܬܿܺܝܪܳܐܺܝܬܼ ܗܳܠܶܝܢ ܕܡܶܢ ܒܰܝܬܿܶܗ ܕܩܶܣܰܪ܂
04:23 [ai]ܛܰܝܒܿܽܘܬܼܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܥܰܡ ܟܽܠܟܼܽܘܢ܂ ܐܰܡܺܝܢ܀