← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62051: Col

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


02:01 [ai]ܨܳܒܼܶܐ ܐ̱ܢܳܐ ܕܶܝܢ ܕܬܶܕܿܥܽܘܢ܃ ܐܰܝܢܳܐ ܐܰܓܼܽܘܢܳܐ ܐܺܝܬܼ ܠܺܝ ܚܠܳܦܼܰܝܟܿܽܘܢ܂ ܘܰܚܠܳܦܼ ܗܳܢܽܘܢ ܕܰܒܼܠܰܕܼܺܝܩܺܝܰܐ܂ ܘܰܚܠܳܦܼ ܫܰܪܟܿܳܐ ܐܰܝܠܶܝܢ ܕܦܰܪܨܽܘܦܿܝ ܠܳܐ ܚܙܰܘ ܒܰܒܼܣܰܪ܃
02:02 [ai]ܕܿܢܶܬܼܒܰܝܽܐܘܢ ܠܶܒܿܰܘܳܬܼܗܽܘܢ̈ ܘܢܶܬܼܩܰܪܒܼܽܘܢ ܒܚܽܘܒܿܳܐ ܠܟܼܽܠܶܗ ܥܽܘܬܼܪܳܐ ܕܰܦܝܳܣܳܐ܂ ܘܰܠܣܽܘܟܿܳܠܳܐ ܕܺܝܕܼܰܥܬܼܶܗ ܕܐ̱ܪܳܙܳܐ ܕܰܐܠܳܗܳܐ ܐܰܒܼܳܐ܂ ܘܕܼܰܡܫܺܝܚܳܐ܂
02:03 [ai]ܗܰܘ ܕܒܶܗ ܟܰܣܝܳܢ̈ ܟܽܠܗܶܝܢ ܣܺܝܡܳܬܼܳܐ̈ ܕܚܶܟܼܡܬܼܳܐ ܘܕܼܺܝܕܼܰܥܬܼܳܐ܀
02:04 [ai]ܗܳܕܼܶܐ ܕܶܝܢ ܐܳܡܰܪ ܐ̱ܢܳܐ܃ ܕܠܳܐ ܐ̱ܢܳܫ ܢܶܗܘܶܐ ܡܰܛܥܶܐ ܠܟܼܽܘܢ ܒܰܦܼܝܳܣܳܐ ܕܡܶܠܶܐ̈܂
02:05 [ai]ܐܳܦܼܶܢ ܒܰܒܼܣܰܪ ܓܶܝܪ ܦܰܪܺܝܩ ܐ̱ܢܳܐ ܡܶܢܟܼܽܘܢ܃ ܐܶܠܳܐ ܒܪܽܘܚ ܥܰܡܟܼܽܘܢ ܐ̱ܢܳܐ܃ ܘܚܳܕܼܶܐ ܐ̱ܢܳܐ ܕܚܳܙܶܐ ܐ̱ܢܳܐ ܡܛܰܟܿܣܽܘܬܼܟܼܽܘܢ ܘܫܰܪܺܝܪܽܘܬܼܳܐ ܕܗܰܝܡܳܢܽܘܬܼܟܼܽܘܢ ܕܒܰܡܫܺܝܚܳܐ܀
02:06 [ai]ܐܰܝܟܿܰܢܳܐ ܗܳܟܼܺܝܠ ܕܩܰܒܿܶܠܬܿܽܘܢ ܠܝܶܫܽܘܥ ܡܫܺܝܚܳܐ ܡܳܪܰܢ܃ ܒܶܗ ܗܰܠܶܟܼܘ܃
02:07 [ai]ܟܰܕܼ ܡܫܰܪܪܺܝܢ ܥܶܩܳܪ̈ܰܝܟܿܽܘܢ܂ ܘܡܶܬܼܒܿܢܶܝܢ ܐܢ̱ܬܿܽܘܢ ܒܶܗ܂ ܘܡܶܬܼܩܰܝܡܺܝܢ ܐܢ̱ܬܿܽܘܢ ܒܗܰܝܡܳܢܽܘܬܼܳܐ ܗܳܝ ܕܺܝܠܶܦܼܬܿܽܘܢ܃ ܕܒܳܗ ܬܶܬܼܝܰܬܿܪܽܘܢ ܒܬܰܘܕܿܺܝܬܼܳܐ܀
02:08 [ai]ܐܶܙܕܿܰܗ̱ܪܘ ܕܰܠܡܳܐ ܐ̱ܢܳܫ ܢܚܰܠܶܨܟܼܽܘܢ ܒܦܺܝܠܳܣܳܦܼܽܘܬܼܳܐ ܘܰܒܛܳܥܝܽܘܬܼܳܐ ܣܪܺܝܩܬܳܐ܃ ܐܰܝܟܼ ܝܽܘܠܦܿܳܢܶܐ̈ ܕܿܰܒܼܢܰܝܢܳܫܳܐ܂ ܘܰܐܝܟܼ ܐܶܣܛܽܘܟܿܣܰܘܗ̱ܝ̈ ܕܥܳܠܡܳܐ܂ ܘܠܳܐ ܐܰܝܟܼ ܡܫܺܝܚܳܐ܃
02:09 [ai]ܕܒܶܗ ܥܳܡܰܪ ܟܽܠܶܗ ܡܽܘܠܳܝܳܐ ܕܰܐܠܳܗܽܘܬܼܳܐ ܓܽܘܫܡܳܢܳܐܺܝܬܼ܂
02:10 [ai]ܘܒܼܶܗ ܐܳܦܼ ܐܰܢ̱ܬܿܽܘܢ ܡܶܫܬܿܰܡܠܶܝܬܿܽܘܢ܂ ܕܗܽܘ ܐܺܝܬܼܰܘܗ̱ܝ ܪܺܫܳܐ ܕܟܽܠܗܶܝܢ ܐܰܪ̈ܟܼܰܘܣ ܘܫܽܘܠܛܳܢܶܐ̈܂
02:11 [ai]ܘܒܼܶܗ ܐܶܬܼܓܿܙܰܪܬܿܽܘܢ ܓܙܽܘܪܬܳܐ ܕܠܳܐ ܒܺܐܝܕܼܺܝܢ̈܂ ܒܰܫܠܳܚ ܒܶܣܪܳܐ ܕܰܚܛܳܗܶܐ̈܂ ܒܰܓܼܙܽܘܪܬܿܶܗ ܕܰܡܫܺܝܚܳܐ܂
02:12 [ai]ܘܶܐܬܼܩܒܼܰܪܬܿܽܘܢ ܥܰܡܶܗ ܒܡܰܥܡܽܘܕܼܺܝܬܼܳܐ܂ ܘܒܼܶܗ ܩܳܡܬܿܽܘܢ ܥܰܡܶܗ܂ ܕܗܰܝܡܶܢܬܿܽܘܢ ܒܚܰܝܠܳܐ ܕܰܐܠܳܗܳܐ ܕܰܐܩܺܝܡܶܗ ܡܶܢ ܒܶܝܬܼ ܡܺܝܬܼܶܐ̈܂
02:13 [ai]ܘܰܠܟܼܽܘܢ ܕܡܺܝܬܼܺܝܢ ܗ̱ܘܰܝܬܿܽܘܢ ܒܰܚܛܳܗܰܝܟܿܽܘܢ̈܂ ܘܰܒܥܽܘܪܠܽܘܬܼ ܒܶܣܪܟܼܽܘܢ܃ ܐܰܚܺܝܟܼܽܘܢ ܥܰܡܶܗ܂ ܘܰܫܒܼܰܩ ܠܰܢ ܟܽܠܗܽܘܢ ܚܛܳܗܰܝܢ̈܂
02:14 [ai]ܘܰܥܛܳܐ ܒܦܽܘܩܕܳܢܰܘܗ̱ܝ̈ ܫܛܳܪ ܚܰܘܒܰܝܢ̈܃ ܗܰܘ ܕܺܐܝܬܼܰܘܗ̱ܝ ܗ̱ܘܳܐ ܣܰܩܽܘܒܼܠܰܢ܂ ܘܫܰܩܠܶܗ ܡܶܢ ܡܨܰܥܬܼܳܐ ܘܩܰܒܼܥܶܗ ܒܰܙܩܺܝܦܼܶܗ܂
02:15 [ai]ܘܒܼܰܫܠܳܚ ܦܰܓܼܪܶܗ ܦܰܪܣܺܝ ܠܰܐܪ̈ܟܼܰܘܣ ܘܰܠܫܰܠܺܝܛܳܢܶܐ̈܂ ܘܰܐܒܼܗܶܬܼ ܐܶܢܽܘܢ ܓܰܠܝܳܐܺܝܬܼ ܒܰܩܢܽܘܡܶܗ܀
02:16 [ai]ܠܳܐ ܗܳܟܼܺܝܠ ܐ̱ܢܳܫ ܢܕܼܰܘܶܕܼܟܼܽܘܢ܃ ܒܡܶܐܟܼܠܳܐ ܘܰܒܡܰܫܬܿܝܳܐ܂ ܐܰܘ ܒܦܽܘܠܳܓܼܶܐ̈ ܕܥܺܐܕܼܶܐ̈ ܘܰܕܼܪܺܝܫ ܝܰܪ̈ܚܶܐ ܘܰܕܼܫܰܒܿܶܐ̈܃
02:17 [ai]ܗܳܠܶܝܢ ܕܺܐܝܬܼܰܝܗܶܝܢ ܛܶܠܳܢܝܳܬܼܳܐ̈ ܕܰܐܝܠܶܝܢ ܕܰܥܬܼܺܝܕܼܳܢ̈܃ ܦܰܓܼܪܳܐ ܕܶܝܢ ܡܫܺܝܚܳܐ ܗ̱ܘ܂
02:18 [ai]ܘܰܠܡܳܐ ܐ̱ܢܳܫ ܢܶܨܒܿܶܐ ܒܡܰܟܿܺܝܟܼܽܘܬܼ ܪܶܥܝܳܢܳܐ ܠܰܡܚܰܝܳܒܼܽܘܬܼܟܼܽܘܢ܃ ܕܬܶܫܬܿܰܥܒܿܕܼܽܘܢ ܠܦܼܽܘܠܚܳܢܳܐ ܕܡܰܠܰܐܟܼܶܐ̈܃ ܒܰܕܼܣܳܥܶܐ ܥܰܠ ܡܶܕܶܡ ܕܠܳܐ ܚܙܳܐ܂ ܘܰܣܪܺܝܩܳܐܺܝܬܼ ܡܶܬܼܚܬܼܰܪ ܒܪܶܥܝܳܢܳܐ ܕܒܶܣܪܶܗ܂
02:19 [ai]ܘܠܳܐ ܐܳܚܶܕܼ ܪܺܫܳܐ܃ ܕܡܶܢܶܗ ܟܽܠܶܗ ܦܰܓܼܪܳܐ ܡܶܬܼܪܰܟܿܰܒܼ܂ ܘܡܶܬܼܩܰܝܰܡ ܒܫܶܪ̈ܝܳܢܶܐ ܘܰܒܗܰܕܳܡܶܐ̈܂ ܘܪܳܒܼܶܐ ܬܿܰܪܒܺܝܬܼܳܐ ܕܰܐܠܳܗܳܐ܀
02:20 [ai]ܐܶܢ ܓܶܝܪ ܡܺܝܬܿܬܿܽܘܢ ܥܰܡ ܡܫܺܝܚܳܐ ܡܶܢ ܐܶܣܛܽܘܟܿܣܰܘܗ̱ܝ̈ ܕܥܳܠܡܳܐ܃ ܠܡܳܢܳܐ ܐܰܝܟܼ ܗܰܘ ܕܚܰܝܺܝܢ ܐܢ̱ܬܿܽܘܢ ܒܥܳܠܡܳܐ ܡܶܬܿܕܼܺܝܢܺܝܢ ܐܢ̱ܬܿܽܘܢ܂
02:21 [ai]ܠܳܐ ܠܰܡ ܬܶܩܪܽܘܒܼ ܘܠܳܐ ܬܶܛܥܰܡ ܘܠܳܐ ܬܶܩܰܦܼ܃
02:22 [ai]ܕܺܐܝܬܼܰܝܗܶܝܢ ܗܳܠܶܝܢ ܚܫܰܚܬܼܳܐ ܕܿܡܶܬܼܚܰܒܠܳܐ܂ ܘܦܼܽܘܩܳܕܼܶܐ̈ ܐܶܢܶܝܢ̈ ܘܝܽܘܠܦܿܳܢܶܐ̈ ܕܿܰܒܼܢܰܝܢܳܫܳܐ܂
02:23 [ai]ܘܡܶܬܼܚܰܙܝܳܢ̈ ܕܺܐܝܬܼ ܒܗܶܝܢ ܡܶܠܬܼܳܐ ܕܚܶܟܼܡܬܼܳܐ܂ ܒܦܿܰܪܨܽܘܦܿ ܡܰܟܿܺܝܟܼܽܘܬܼܳܐ ܘܕܼܶܚܠܰܬܼ ܐܰܠܳܗܳܐ܃ ܘܰܕܼܠܳܐ ܚܳܝܣܺܝܢ ܥܰܠ ܦܰܓܼܪܳܐ܂ ܠܰܘ ܒܡܶܕܶܡ ܕܰܡܝܰܩܰܪ܃ ܐܶܠܳܐ ܒܰܐܝܠܶܝܢ ܕܰܚܫܰܚܬܼܳܐ ܐܶܢܶܝܢ̈ ܕܒܶܣܪܳܐ ܿ܀ܿ܀ܿ

next chapter