← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62052: 1Th

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


02:01 [ai]ܘܰܐܢ̱ܬܿܽܘܢ ܝܳܕܼܥܺܝܢ ܐܢ̱ܬܿܽܘܢ ܐܰܚܰܝ̈܃ ܕܡܰܥܠܳܢܰܢ ܕܰܠܘܳܬܼܟܼܽܘܢ ܠܳܐ ܗ̱ܘܳܐ ܣܪܺܝܩܳܐܺܝܬܼ ܗܘܳܐ܃
02:02 [ai]ܐܶܠܳܐ ܠܽܘܩܕܼܰܡ ܚܰܫܢܰܢ ܘܶܐܨܛܰܥܰܪܢܰܢ܃ ܐܰܝܟܼ ܕܝܳܕܼܥܺܝܬܿܽܘܢ ܒܦܼܺܝܠܺܝܦܿܳܘܣ܂ ܘܗܳܝܕܶܝܢ ܒܰܐܓܼܽܘܢܳܐ ܪܰܒܿܳܐ܃ ܡܰܠܶܠܢ ܥܰܡܟܼܽܘܢ ܒܦܰܪܶܗ̱ܣܺܝܰܐ ܕܰܐܠܳܗܰܢ܂ ܣܒܼܰܪܬܼܶܗ ܕܰܡܫܺܝܚܳܐ܂
02:03 [ai]ܒܽܘܝܳܐܰܢ ܓܶܝܪ ܠܳܐ ܗ̱ܘܳܐ ܡܶܢ ܛܳܥܝܽܘܬܼܳܐ܂ ܐܳܦܼܠܳܐ ܡܶܢ ܛܰܢܦܼܽܘܬܼܳܐ܂ ܐܳܦܼܠܳܐ ܒܢܶܟܼܠܳܐ܃
02:04 [ai]ܐܶܠܳܐ ܐܰܝܟܼ ܡܳܐ ܕܰܒܼܩܶܝܢܰܢ ܠܰܐܠܳܗܳܐ ܕܬܶܬܼܗܰܝܡܰܢ ܣܒܼܰܪܬܼܶܗ܃ ܗܳܟܼܰܢܳܐ ܡܡܰܠܠܺܝܢܰܢ܂ ܠܳܐ ܐܰܝܟܼ ܕܿܠܰܒܼܢܰܝ ܐ̱ܢܳܫܳܐ ܢܶܫܦܿܰܪ܃ ܐܶܠܳܐ ܠܰܐܠܳܗܳܐ܂ ܗܰܘ ܕܒܳܩܶܐ ܠܶܒܿܰܘܳܬܼܰܢ̈܂
02:05 [ai]ܐܳܦܼܠܳܐ ܓܶܝܪ ܡܶܡܬܼܽܘܡ ܐܶܬܼܚܰܫܰܚܢ ܒܡܰܡܠ̱ܠܳܐ ܫܰܕܿܳܠܳܐ ܐܰܝܟܼ ܕܝܳܕܼܥܺܝܢ ܐܢ̱ܬܿܽܘܢ܂ ܘܠܳܐ ܒܥܶܠܬܼܳܐ ܕܝܰܥܢܽܘܬܼܳܐ܂ ܐܰܠܳܗܳܐ ܣܳܗܶܕܼ܂
02:06 [ai]ܘܠܳܐ ܒܥܰܝܢ ܫܽܘܒܼܚܳܐ ܡܶܢ ܒܢܰܝܢܳܫܳܐ܂ ܠܳܐ ܡܶܢܟܼܽܘܢ ܘܠܳܐ ܡܶܢ ܐ̱ܚܪ̈ܳܢܶܐ܃ ܟܰܕܼ ܡܶܫܟܿܚܺܝܢ ܗ̱ܘܰܝܢ ܝܰܩܺܝܪ̈ܶܐ ܠܡܶܗܘܳܐ ܐܰܝܟܼ ܫܠܺܝܚܶܐ̈ ܕܰܡܫܺܝܚܳܐ܂
02:07 [ai]ܐܶܠܳܐ ܗܘܰܝܢ ܒܰܝܢܳܬܼܟܼܽܘܢ ܡܰܟܿܺܝܟܼܶܐ̈܂ ܘܰܐܝܟܼ ܡܪܰܒܿܝܳܢܺܝܬܼܳܐ ܕܰܡܚܰܒܿܒܼܳܐ ܒܢܶܝܗ܃
02:08 [ai]ܗܳܟܼܰܢܳܐ ܐܳܦܼ ܚܢܰܢ ܡܚܰܒܿܒܼܺܝܢܰܢ ܘܰܡܣܰܘܚܺܝܢܰܢ ܠܡܶܬܿܰܠ ܠܟܼܽܘܢ܃ ܠܳܐ ܒܰܠܚܽܘܕܼ ܣܒܼܰܪܬܼܶܗ ܕܰܐܠܳܗܳܐ܃ ܐܶܠܳܐ ܐܳܦܼ ܢܰܦܼܫܰܢ܃ ܡܶܛܽܠ ܕܿܚܰܒܺܝܒܼܰܝܢ ܐܢ̱ܬܿܽܘܢ܀
02:09 [ai]ܥܳܗܕܺܝܢ ܐܢ̱ܬܿܽܘܢ ܓܶܝܪ ܐܰܚܰܝܢ̈܃ ܕܠܳܐܶܝܢ ܗ̱ܘܰܝܢ ܘܥܳܡܠܺܝܢ ܒܰܥܒܼܳܕܼ ܐܺܝܕܼܰܝܢ̈ ܒܠܺܠܝܳܐ ܘܒܼܺܐܝܡܳܡܳܐ܃ ܕܥܰܠ ܚܰܕܼ ܡܶܢܟܼܽܘܢ ܠܳܐ ܢܺܐܩܰܪ܂
02:10 [ai]ܐܰܢ̱ܬܿܽܘܢ ܣܳܗܕܺܝܢ ܘܰܐܠܳܗܳܐ܃ ܐܰܝܟܿܰܢܳܐ ܐܰܟܼܪܶܙܢ ܠܟܼܽܘܢ ܣܒܼܰܪܬܼܶܗ ܕܰܐܠܳܗܳܐ܂ ܕܰܟܼܝܳܐܺܝܬܼ ܘܟܼܺܐܢܳܐܺܝܬܼ܂ ܘܰܕܼܠܳܐ ܪܶܫܝܳܢ ܗܘܰܝܢ ܠܘܳܬܼ ܟܽܠܗܽܘܢ ܡܗܰܝܡܢܶܐ̈܃
02:11 [ai]ܐܰܝܟܿܰܢܳܐ ܕܝܳܕܼܥܺܝܢ ܐܢ̱ܬܿܽܘܢ ܕܡܶܢ ܚܰܕܼ ܚܰܕܼ ܡܶܢܟܼܽܘܢ ܐܰܝܟܼ ܐܰܒܼܳܐ ܡܶܢ ܒܢܰܘܗ̱ܝ܃ ܒܿܳܥܶܝܢ ܗ̱ܘܰܝܢ܂ ܘܡܳܠܶܝܢ ܗ̱ܘܰܝܢ ܒܿܠܶܒܟܽܘܢ܂ ܘܰܡܣܰܗܕܼܺܝܢܰܢ ܠܟܼܽܘܢ܃
02:12 [ai]ܕܰܬܼܗܰܠܟܼܽܘܢ ܐܰܝܟܼ ܕܝܳܐܶܐ ܠܰܐܠܳܗܳܐ܃ ܗܰܘ ܕܰܩܪܳܟܼܽܘܢ ܠܡܰܠܟܿܽܘܬܼܶܗ ܘܰܠܫܽܘܒܼܚܶܗ܂
02:13 [ai]ܡܶܛܽܠ ܗܳܢܳܐ ܐܳܦܼ ܚܢܰܢ ܡܰܘܕܶܝܢܰܢ ܐܰܡܺܝܢܳܐܺܝܬܼ ܠܰܐܠܳܗܳܐ܃ ܕܡܶܠܬܼܳܐ ܕܰܐܠܳܗܳܐ܂ ܕܩܰܒܿܶܠܬܿܽܘܢ ܡܶܢܰܢ܂ ܠܳܐ ܗ̱ܘܳܐ ܐܰܝܟܼ ܡܶܠܬܼܳܐ ܕܿܰܒܼܢܰܝܢܳܫܳܐ ܩܰܒܿܶܠܬܿܽܘܢܳܗ܃ ܐܶܠܳܐ ܐܰܝܟܿܰܢܳܐ ܕܺܐܝܬܼܶܝܗ ܫܰܪܺܝܪܳܐܺܝܬܼ ܡܶܠܬܼܳܐ ܕܰܐܠܳܗܳܐ܃ ܘܗܺܝ ܒܰܥܒܼܳܕܼܳܐ ܡܶܣܬܿܰܥܪܳܐ ܒܟܽܘܢ ܒܰܐܝܠܶܝܢ ܕܰܡܗܰܝܡܢܺܝܢ܀
02:14 [ai]ܐܰܢ̱ܬܿܽܘܢ ܕܶܝܢ ܐܰܚܰܝ̈܃ ܐܶܬܿܕܰܡܺܝܬܿܽܘܢ ܠܥܺܕܼܳܬܼܳܐ̈ ܕܰܐܠܳܗܳܐ ܕܒܺܝܗܽܘܕܼ܂ ܗܳܠܶܝܢ ܕܰܒܼܝܶܫܽܘܥ ܡܫܺܝܚܳܐ܃ ܕܗܳܟܼܰܢ ܣܰܝܒܰܪܬܿܽܘܢ ܐܳܦܼ ܐܰܢ̱ܬܿܽܘܢ ܡܶܢ ܒܢܰܝ ܫܰܪܒܿܰܬܼܟܼܽܘܢ܃ ܐܰܝܟܿܰܢܳܐ ܕܳܐܦܼ ܗܶܢܽܘܢ ܡܶܢ ܺܝܗܽܘܕܼܳܝܶܐ̈܃
02:15 [ai]ܗܳܢܽܘܢ ܕܰܠܡܳܪܰܢ ܝܶܫܽܘܥ ܡܫܺܝܚܳܐ ܩܛܰܠܘ܂ ܘܠܰܢܒܼܺܝܶܐ̈ ܕܡܶܢܗܽܘܢ ܘܠܰܢ ܪܕܼܰܦܼܘ܂ ܘܠܰܐܠܳܗܳܐ ܠܳܐ ܫܳܦܼܪܺܝܢ܂ ܘܰܥܒܼܺܝܕܼܺܝܢ ܣܰܩܽܘܒܼܠܳܐ ܠܟܼܽܠܗܽܘܢ ܒܢܰܝ ܐ̱ܢܳܫܳܐ܃
02:16 [ai]ܕܟܳܠܶܝܢ ܠܰܢ ܕܰܢܡܰܠܶܠ ܥܰܡ ܥܰܡ̱ܡܶܐ̈ ܕܢܺܚܽܘܢ܃ ܠܰܡܫܰܠܳܡܽܘ ܚܛܳܗܰܝܗܽܘܢ̈ ܒܟܽܠܙܒܼܰܢ܂ ܡܰܛܺܝ ܕܶܝܢ ܥܠܰܝܗܽܘܢ ܪܽܘܓܼܙܳܐ ܥܕܼܰܡܳܐ ܠܚܰܪܬܼܳܐ܀
02:17 [ai]ܚܢܰܢ ܕܶܝܢ ܐܰܚܰܝܢ̈܃ ܗܘܰܝܢ ܝܰܬܼܡܶܐ̈ ܡܶܢܟܼܽܘܢ ܙܰܒܼܢܳܐ ܕܫܳܥܬܼܳܐ܂ ܒܰܐܦܿܰܝܢ̈ ܘܠܳܐ ܒܿܠܶܒܰܢ܃ ܘܝܰܬܿܺܝܪܳܐܺܝܬܼ ܐܶܬܼܚܰܦܿܰܛܢ ܠܡܶܚܙܳܐ ܐܰܦܿܰܝܟܿܽܘܢ̈ ܒܚܽܘܒܿܳܐ ܣܰܓܿܺܝܳܐܐ܂
02:18 [ai]ܘܰܨܒܼܰܝܢ ܕܢܺܐܬܼܶܐ ܠܘܳܬܼܟܼܽܘܢ܂ ܐܶܢܳܐ ܦܿܰܘܠܳܘܣ ܚܕܼܳܐ ܙܒܼܰܢ ܘܬܼܰܪ̈ܬܿܶܝܢ܃ ܘܥܰܘܟܼܰܢܝ ܣܳܛܳܢܳܐ܂
02:19 [ai]ܐܰܝܢܰܘ ܓܶܝܪ ܣܰܒܼܪܰܢ ܘܚܰܕܼܽܘܬܼܰܢ ܘܰܟܼܠܺܝܠܳܐ ܕܫܽܘܒܼܗܳܪܰܢ܃ ܐܶܠܳܐ ܐܶܢ ܐܰܢ̱ܬܿܽܘܢ ܩܕܼܳܡ ܡܳܪܰܢ ܝܶܫܽܘܥ ܒܡܶܐܬܼܺܝܬܼܶܗ܂
02:20 [ai]ܐܰܢ̱ܬܿܽܘܢ ܐܶܢܽܘܢ ܓܶܝܪ ܬܶܫܒܿܽܘܚܬܿܰܢ ܘܚܰܕܼܽܘܬܼܰܢ܂

next chapter