The Comprehensive Aramaic Lexicon

03:01 [ai]	ܘܡܶܛܽܠ ܕܠܳܐ ܚܰܡܣܶܢܢ܃ ܨܒܼܰܝܢ ܠܰܡܦܼܳܫ ܒܰܐܬܼܺܢܶܘܣ ܒܰܠܚܽܘܕܼܰܝܢ܂
03:02 [ai]	ܘܰܢܫܰܕܿܰܪ ܠܘܳܬܼܟܼܽܘܢ ܠܛܺܝܡܳܬܼܶܐܳܘܣ ܐܰܚܽܘܢ ܘܰܡܫܰܡܫܳܢܳܐ ܕܰܐܠܳܗܳܐ܂ ܘܰܡܥܰܕܿܪܳܢܰܢ ܒܰܣܒܼܰܪܬܼܶܗ ܕܰܡܫܺܝܚܳܐ܃ ܕܰܢܫܰܪܰܪܟܼܽܘܢ ܘܢܶܒܼܥܶܐ ܡܶܢܟܼܽܘܢ ܥܰܠ ܗܰܝܡܳܢܽܘܬܼܟܼܽܘܢ܃
03:03 [ai]	ܕܠܳܐ ܐ̱ܢܳܫ ܡܶܢܟܼܽܘܢ ܬܶܬܼܩܰܛܰܥ ܠܶܗ ܒܽܐܘܠܨܳܢܶܐ̈ ܗܳܠܶܝܢ܂ ܐܰܢ̱ܬܿܽܘܢ ܓܶܝܪ ܝܳܕܼܥܺܝܢ ܐܢ̱ܬܿܽܘܢ܃ ܕܰܠܗܳܕܼܶܐ ܗ̱ܽܘ ܣܺܝܡܺܝܢܰܢ܂
03:04 [ai]	ܐܳܦܼ ܟܰܕܼ ܠܘܳܬܼܟܼܽܘܢ ܗܘܰܝܢ ܓܶܝܪ܃ ܩܰܕܶܡܢ ܐܶܡܰܪܢ ܠܟܼܽܘܢ܃ ܕܰܥܬܼܺܝܕܼܺܝܢܰܢ ܠܡܶܬܼܶܐܠܳܨܽܘ܂ ܐܰܝܟܿܰܢܳܐ ܕܝܳܕܼܥܺܝܢ ܐܢ̱ܬܿܽܘܢ ܕܰܗܘܳܐ܂
03:05 [ai]	ܡܶܛܽܠ ܗܳܢܳܐ ܐܳܦܼ ܐܶܢܳܐ ܠܳܐ ܚܰܡܣܢܶܬܼ܃ ܥܕܼܰܡܳܐ ܕܫܰܕܿܪܶܬܼ ܕܶܐܕܿܰܥ ܗܰܝܡܳܢܽܘܬܼܟܼܽܘܢ܃ ܕܕܼܰܠܡܳܐ ܢܢܰܣܶܝܟܼܽܘܢ ܡܢܰܣܝܳܢܳܐ܃ ܘܢܶܗܘܶܐ ܥܰܡܠܰܢ ܣܪܺܝܩܳܐ ܿ܀ܿ܀ܿ
03:06 [ai]	ܗܳܫܳܐ ܕܶܝܢ ܡܶܢ ܕܶܐܬܼܳܐ ܠܘܳܬܼܰܢ ܛܺܝܡܳܬܼܶܐܳܘܣ ܡܶܢ ܨܶܐܕܼܰܝܟܿܽܘܢ܃ ܘܣܰܒܼܪܰܢ ܥܰܠ ܗܰܝܡܳܢܽܘܬܼܟܼܽܘܢ܂ ܘܥܰܠ ܚܽܘܒܟܽܘܢ܂ ܘܕܼܺܐܝܬܼ ܠܘܳܬܼܟܼܽܘܢ ܥ̱ܽܘܗܕܳܢܰܢ ܛܳܒܼܳܐ ܒܟܽܠ ܥܶܕܳܢ܃ ܘܰܣܘܶܝܢ ܐܢ̱ܬܿܽܘܢ ܠܡܶܚܙܝܰܢ܂ ܐܰܝܟܿܰܢܳܐ ܕܳܐܦܼ ܚܢܰܢ ܠܟܼܽܘܢ܃
03:07 [ai]	ܡܶܛܽܠ ܗܳܢܳܐ܂ ܐܶܬܼܒܰܝܰܐܢ ܒܟܽܘܢ ܐܰܚܰܝܢ̈܃ ܥܰܠ ܟܽܠܗܶܝܢ ܥܳܩܳܬܼܰܢ̈ ܘܽܐܘܠܨܳܢܰܝܢ̈܂ ܡܶܛܽܠ ܗܰܝܡܳܢܽܘܬܼܟܼܽܘܢ܂
03:08 [ai]	ܘܗܳܫܳܐ ܗ̱ܽܘ ܚܰܝܺܝܢܰܢ܃ ܐܶܢ ܐܰܢ̱ܬܿܽܘܢ ܬܶܬܼܩܰܝܡܽܘܢ ܒܡܳܪܰܢ܂
03:09 [ai]	ܐܰܝܕܼܳܐ ܓܶܝܪ ܬܰܘܕܿܺܝܬܼܳܐ ܡܶܫܟܿܚܺܝܢܰܢ ܠܡܶܦܼܪܰܥ ܚܠܳܦܼܰܝܟܿܽܘܢ ܠܰܐܠܳܗܳܐ܃ ܥܰܠ ܟܽܠ ܚܰܕܼܽܘܬܼܳܐ ܕܚܳܕܼܶܝܢܰܢ ܡܶܛܽܠܳܬܼܟܼܽܘܢ܃
03:10 [ai]	ܐܶܠܳܐ ܕܰܩܕܼܳܡ ܐܰܠܳܗܳܐ ܝܰܬܿܺܝܪܳܐܺܝܬܼ ܢܶܬܼܟܿܰܫܰܦܼ ܒܠܺܠܝܳܐ ܘܒܼܺܐܝܡܳܡܳܐ܃ ܕܢܶܚܙܶܐ ܐܰܦܿܰܝܟܿܽܘܢ̈܃ ܘܢܶܓܼܡܽܘܪ ܡܳܐ ܕܚܰܣܺܝܪܳܐ ܗܰܝܡܳܢܽܘܬܼܟܼܽܘܢ܂
03:11 [ai]	ܗܽܘ ܕܶܝܢ ܐܰܠܳܗܳܐ ܐܰܒܼܽܘܢ ܘܡܳܪܰܢ ܝܶܫܽܘܥ ܡܫܺܝܚܳܐ܃ ܢܶܬܼܪܽܘܨ ܐܽܘܪܚܰܢ ܠܘܳܬܼܟܼܽܘܢ܂
03:12 [ai]	ܘܢܰܣܓܿܶܐ ܘܰܢܝܰܬܿܰܪ ܚܽܘܒܟܽܘܢ܂ ܕܚܰܕܼ ܠܘܳܬܼ ܚܰܕܼ ܘܕܼܰܠܘܳܬܼ ܟܽܠܢܳܫ܃ ܐܰܝܟܿܰܢܳܐ ܕܰܚܢܰܢ ܡܰܚܒܼܺܝܢܰܢ ܠܟܼܽܘܢ܂
03:13 [ai]	ܘܰܢܩܰܝܶܡ ܠܶܒܿܰܘܳܬܼܟܼܽܘܢ̈ ܕܠܳܐ ܪܶܫܝܳܢ ܒܩܰܕܿܺܝܫܽܘܬܼܳܐ ܩܕܼܳܡ ܐܰܠܳܗܳܐ ܐܰܒܼܽܘܢ܃ ܒܡܶܐܬܼܺܝܬܼܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܕܥܰܡ ܟܽܠܗܽܘܢ ܩܰܕܿܺܝܫܰܘܗ̱ܝ̈܀

next chapter