← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62052: 1Th

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


05:01 [ai]ܥܰܠ ܙܰܒܼܢܶܐ̈ ܕܶܝܢ ܘܥܶܕܳܢܶܐ̈܂ ܐܰܚܰܝ̈܃ ܠܳܐ ܣܢܺܝܩܺܝܬܿܽܘܢ ܠܡܶܟܼܬܿܰܒܼ ܠܟܼܽܘܢ܂
05:02 [ai]ܐܰܢ̱ܬܿܽܘܢ ܓܶܝܪ ܫܰܪܺܝܪܳܐܺܝܬܼ ܝܳܕܼܥܺܝܢ ܐܢ̱ܬܿܽܘܢ܃ ܕܝܰܘܡܶܗ ܕܡܳܪܰܢ܂ ܐܰܝܟܼ ܓܰܢܳܒܼܳܐ ܒܠܺܠܝܳܐ܂ ܗܳܟܼܰܢܳܐ ܐܳܬܼܶܐ܂
05:03 [ai]ܟܰܕܼ ܢܺܐܡܪܽܘܢ ܕܰܫܠܳܡܳܐ ܗ̱ܘ ܘܫܰܝܢܳܐ܃ ܘܗܳܝܕܶܝܢ ܡܶܢ ܫܶܠܝܳܐ ܢܩܽܘܡ ܥܠܰܝܗܽܘܢ ܐܰܒܼܕܳܢܳܐ܃ ܐܰܝܟܼ ܚܶܒܼܠܶܐ̈ ܥܰܠ ܒܰܛܢܬܼܳܐ܂ ܘܠܳܐ ܢܰܡܕܼܽܘܢ܂
05:04 [ai]ܐܰܢ̱ܬܿܽܘܢ ܕܶܝܢ ܐܰܚܰܝ̈܃ ܠܳܐ ܗܘܰܝܬܿܽܘܢ ܒܚܶܫܽܘܟܼܳܐ܃ ܕܗܰܘ ܝܰܘܡܳܐ ܐܰܝܟܼ ܓܰܢܳܒܼܳܐ ܢܰܕܼܪܶܟܼܟܼܽܘܢ܂
05:05 [ai]ܟܽܠܟܼܽܘܢ ܓܶܝܪ ܒܢܰܝ ܢܽܘܗܪܳܐ ܐܰܢ̱ܬܿܽܘܢ܂ ܘܰܒܢܰܝ ܐܺܝܡܳܡܳܐ܂ ܘܠܳܐ ܗܘܰܝܬܿܽܘܢ ܒܢܰܝ ܠܺܠܝܳܐ܂ ܘܠܳܐ ܒܢܰܝ ܚܶܫܽܘܟܼܳܐ܂
05:06 [ai]ܠܳܐ ܢܶܕܼܡܰܟܼ ܗܳܟܼܺܝܠ ܐܰܝܟܼ ܫܰܪܟܿܳܐ܃ ܐܶܠܳܐ ܗܘܰܝܢ ܥܺܝܪܺܝܢ ܘܰܡܗܰܘܢܺܝܢ܂
05:07 [ai]ܐܰܝܠܶܝܢ ܓܶܝܪ ܕܕܼܳܡܟܿܺܝܢ܃ ܒܠܺܠܝܳܐ ܗ̱ܘ ܕܳܡܟܿܺܝܢ܂ ܘܰܐܝܠܶܝܢ ܕܪܳܘܶܝܢ܃ ܒܠܺܠܝܳܐ ܗ̱ܘ ܪܳܘܶܝܢ܂
05:08 [ai]ܚܢܰܢ ܕܶܝܢ ܕܿܰܒܼܢܰܝ ܐܺܝܡܳܡܳܐ ܚܢܰܢ܃ ܗܘܰܝܢ ܥܺܝܪܺܝܢ ܒܪܶܥܝܳܢܰܢ܂ ܘܰܠܒܼܺܝܫܺܝܢ ܫܶܪܝܳܢܳܐ ܕܗܰܝܡܳܢܽܘܬܼܳܐ ܘܰܕܼܚܽܘܒܿܳܐ܂ ܘܰܢܣܺܝܡ ܣܰܢܘܰܪܬܳܐ ܕܣܰܒܼܪܳܐ ܕܚܰܝ̈ܶܐ܂
05:09 [ai]ܡܶܛܽܠ ܕܠܳܐ ܣܳܡܰܢ ܐܰܠܳܗܳܐ ܠܪܽܘܓܼܙܳܐ܃ ܐܶܠܳܐ ܠܩܶܢܝܳܢܳܐ ܕܚܰܝ̈ܶܐ ܒܡܳܪܰܢ ܝܶܫܽܘܥ ܡܫܺܝܚܳܐ܂
05:10 [ai]ܗܰܘ ܕܡܺܝܬܼ ܥܰܠ ܐܰܦܿܰܝܢ̈܃ ܕܶܐܢ ܥܺܝܪܺܝܢܰܢ܂ ܘܶܐܢ ܕܰܡܟܿܺܝܢܰܢ܃ ܐܰܟܼܚܕܼܳܐ ܥܰܡܶܗ ܢܺܚܶܐ܂
05:11 [ai]ܡܶܛܽܠ ܗܳܢܳܐ ܒܰܝܰܐܘ ܚܰܕܼ ܠܚܰܕܼ܃ ܘܒܼܰܢܰܘ ܚܰܕܼ ܠܚܰܕܼ܃ ܐܰܝܟܿܰܢܳܐ ܕܳܐܦܼ ܥܳܒܼܕܿܺܝܬܿܽܘܢ܀
05:12 [ai]ܒܿܳܥܶܝܢܰܢ ܕܶܝܢ ܡܶܢܟܼܽܘܢ ܐܰܚܰܝ̈܃ ܕܰܗܘܰܝܬܿܽܘܢ ܝܳܕܼܥܺܝܢ ܠܰܐܝܠܶܝܢ ܕܠܳܐܶܝܢ ܒܟܽܘܢ܃ ܘܩܳܝܡܺܝܢ ܒܰܐܦܿܰܝܟܿܽܘܢ̈ ܒܡܳܪܰܢ܃ ܘܡܰܠܦܼܺܝܢ ܠܟܼܽܘܢ܃
05:13 [ai]ܕܰܗܘܰܘ ܚܫܺܝܒܼܺܝܢ ܠܟܼܽܘܢ ܒܚܽܘܒܿܳܐ ܝܰܬܿܺܝܪܳܐ܂ ܘܡܶܛܽܠ ܥܒܼܳܕܼܗܽܘܢ ܐܶܫܬܿܰܝ̱ܢܘ ܥܰܡܗܽܘܢ܀
05:14 [ai]ܒܿܳܥܶܝܢܰܢ ܕܶܝܢ ܡܶܢܟܼܽܘܢ ܐܰܚܰܝ̈܃ ܪܕܼܰܘ ܠܡܰܣܟܠܳܢܶܐ̈܂ ܘܠܰܒܿܶܒܼܘ ܠܰܙܥܽܘܪ̈ܰܝ ܢܰܦܼܫܳܐ܂ ܘܣܰܒܼܘ ܛܰܥܢܳܐ ܕܰܡܚܺܝܠܶܐ̈܂ ܘܰܐܓܿܰܪܘ ܪܽܘܚܟܼܽܘܢ ܠܘܳܬܼ ܟܽܠܢܳܫ܂
05:15 [ai]ܘܶܐܙܕܿܰܗ̱ܪܘ ܕܰܠܡܳܐ ܐ̱ܢܳܫ ܡܶܢܟܼܽܘܢ ܒܺܝܫܬܳܐ ܚܠܳܦܼ ܒܺܝܫܬܳܐ ܢܶܦܼܪܽܘܥ܃ ܐܶܠܳܐ ܒܟܽܠܙܒܼܰܢ ܗܰܪ̱ܛܘ ܒܳܬܼܰܪ ܛܳܒܼܳܬܼܳܐ̈܂ ܠܘܳܬܼ ܚܕܼܳܕܼܶܐ̈܂ ܘܰܠܘܳܬܼ ܟܽܠܢܳܫ܂
05:16 [ai]ܗܘܰܘ ܚܳܕܼܶܝܢ ܒܟܽܠܙܒܼܰܢ܂
05:17 [ai]ܘܰܡܨܰܠܶܝܢ ܕܠܳܐ ܫܰܠܘܳܐ܂
05:18 [ai]ܘܰܒܟܼܽܠ ܡܶܕܶܡ ܗܘܰܘ ܡܰܘܕܶܝܢ܂ ܗܳܢܰܘ ܓܶܝܪ ܨܶܒܼܝܳܢܶܗ ܕܰܐܠܳܗܳܐ ܒܝܶܫܽܘܥ ܡܫܺܝܚܳܐ܂ ܒܟܽܘܢ܂
05:19 [ai]ܪܽܘܚܳܐ ܠܳܐ ܬܕܼܰܥܟܼܽܘܢ܂
05:20 [ai]ܢܒܼܺܝܰܘܳܬܼܳܐ̈ ܠܳܐ ܬܰܣܠܽܘܢ܂
05:21 [ai]ܟܽܠܡܶܕܶܡ ܒܩܰܘ܃ ܘܰܕܼܫܰܦܿܺܝܪ ܐܰܚܽܘܕܼܘ܂
05:22 [ai]ܘܡܶܢ ܟܽܠ ܨܒܼܽܘ ܒܺܝܫܳܐ ܥܪܽܘܩܘ܂
05:23 [ai]ܗܽܘ ܕܶܝܢ ܐܰܠܳܗܳܐ ܕܰܫܠܳܡܳܐ܃ ܢܩܰܕܿܶܫܟܼܽܘܢ ܓܡܺܝܪܳܐܺܝܬܼ ܠܟܼܽܠܟܼܽܘܢ܂ ܘܟܼܽܠܳܗ ܪܽܘܚܟܼܽܘܢ ܘܢܰܦܼܫܟܼܽܘܢ ܘܦܼܰܓܼܪܟܼܽܘܢ܃ ܢܢܰܛܰܪ ܕܠܳܐ ܪܶܫܝܳܢ܂ ܠܡܶܐܬܼܺܝܬܼܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂
05:24 [ai]ܡܗܰܝܡܰܢ ܗ̱ܽܘ ܡܰܢ ܕܰܩܪܳܟܼܽܘܢ܃ ܕܗܽܘ ܢܶܥܒܿܶܕܼ܀
05:25 [ai]ܐܰܚܰܝ̈ ܨܰܠܰܘ ܥܠܰܝܢ܂
05:26 [ai]ܫܰܐܠܘ ܒܰܫܠܳܡܳܐ ܕܰܐܚܰܝܢ̈ ܟܽܠܗܽܘܢ ܒܢܽܘܫܰܩܬܳܐ ܩܰܕܿܺܝܫܬܳܐ܂
05:27 [ai]ܡܰܘܡܶܐ ܐ̱ܢܳܐ ܠܟܼܽܘܢ ܒܡܳܪܰܢ܃ ܕܬܶܬܼܩܪܶܐ ܐܶܓܿܰܪܬܳܐ ܗܳܕܼܶܐ ܠܟܼܽܠܗܽܘܢ ܐܰܚܶܐ̈ ܩܰܕܿܺܝܫܶܐ̈܂
05:28 [ai]ܛܰܝܒܿܽܘܬܼܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܥܰܡܟܼܽܘܢ܂ ܐܰܡܺܝܢ܀