← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62053: 2Th

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


03:01 [ai]ܡܶܢ ܗܳܫܳܐ ܐܰܚܰܝܢ̈܂ ܨܰܠܰܘ ܥܠܰܝܢ܃ ܕܡܶܠܬܼܶܗ ܕܡܳܪܰܢ ܬܶܗܘܶܐ ܪܳܗܛܳܐ ܘܡܶܫܬܿܰܒܿܚܳܐ ܒܟܽܠ ܕܽܘܟܿܳܐ ܐܰܝܟܼ ܕܰܠܘܳܬܼܟܼܽܘܢ܃
03:02 [ai]ܘܰܕܼܢܶܬܼܦܿܰܨܶܐ ܡܶܢ ܒܢܰܝܢܳܫܳܐ ܒܺܝܫܶܐ̈ ܘܥܰܢܳܬܼܶܐ̈܂ ܠܰܘ ܓܶܝܪ ܕܟܽܠܢܳܫ ܗ̱ܺܝ ܗܰܝܡܳܢܽܘܬܼܳܐ܂
03:03 [ai]ܡܗܰܝܡܰܢ ܗ̱ܽܘ ܕܶܝܢ ܡܳܪܝܳܐ܃ ܕܗܽܘ ܢܢܰܛܰܪܟܼܽܘܢ܃ ܘܰܢܫܰܘܙܶܒܼܟܼܽܘܢ ܡܶܢ ܒܺܝܫܳܐ܂
03:04 [ai]ܬܟܼܺܝܠܺܝܢܰܢ ܕܶܝܢ ܥܠܰܝܟܿܽܘܢ ܒܡܳܪܰܢ܃ ܕܿܡܶܕܶܡ ܕܰܡܦܼܰܩܕܼܺܝܢܰܢ ܠܟܼܽܘܢ܃ ܥܒܼܰܕܿܬܿܽܘܢ ܐܳܦܼ ܥܳܒܼܕܿܺܝܬܿܽܘܢ܂
03:05 [ai]ܘܡܳܪܰܢ ܢܶܬܼܪܽܘܨ ܠܶܒܿܰܘܳܬܼܟܼܽܘܢ̈܃ ܠܚܽܘܒܶܗ ܕܰܐܠܳܗܳܐ ܘܠܰܡܣܰ‍<‍ܝ‍>‍ܒܿܪܳܢܽܘܬܼܶܗ ܕܰܡܫܺܝܚܳܐ
03:06 [ai]ܡܦܼܰܩܕܼܺܝܢܰܢ ܠܟܼܽܘܢ ܕܶܝܢ ܐܰܚܰܝ̈܃ ܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܃ ܕܰܗܘܰܝܬܿܽܘܢ ܦܰܪܺܝܩܺܝܢ ܡܶܢ ܟܽܠ ܐܰܚܳܐ܂ ܐܰܝܢܳܐ ܕܒܺܝܫ ܒܺܝܫ ܡܗܰܠܶܟܼ܃ ܘܠܳܐ ܐܰܝܟܼ ܦܽܘܩܕܳܢܶܐ̈ ܕܩܰܒܿܶܠܘ ܡܶܢܰܢ܂
03:07 [ai]ܐܰܢ̱ܬܿܽܘܢ ܓܶܝܪ ܝܳܕܼܥܺܝܢ ܐܢ̱ܬܿܽܘܢ܃ ܐܰܝܟܿܰܢܳܐ ܘܳܠܶܐ ܠܡܶܬܿܕܰܡܳܝܽܘ ܒܰܢ܃ ܕܠܳܐ ܗܰܠܶܟܼܢ ܒܺܝܫ ܒܺܝܫ ܒܰܝܢܳܬܼܟܼܽܘܢ܂
03:08 [ai]ܐܳܦܼܠܳܐ ܠܰܚܡܳܐ ܕܡܰܓܿܳܢ ܐܶܟܼܰܠܢ ܡܶܢ ܐ̱ܢܳܫ ܡܶܢܟܼܽܘܢ܂ ܐܶܠܳܐ ܒܥܰܡܠܳܐ ܘܰܒܠܶܐܘܽܬܼܳܐ ܒܠܺܠܝܳܐ ܘܒܼܺܐܝܡܳܡܳܐ ܦܳܠܚܺܝܢ ܗ̱ܘܰܝܢ܃ ܕܥܰܠ ܐ̱ܢܳܫ ܡܶܢܟܼܽܘܢ ܠܳܐ ܢܺܐܩܰܪ܂
03:09 [ai]ܠܳܐ ܗ̱ܘܳܐ ܡܶܛܽܠ ܕܠܳܐ ܫܰܠܺܝܛ ܠܰܢ܃ ܐܶܠܳܐ ܕܰܒܼܢܰܦܼܫܰܢ ܢܶܬܿܶܠ ܠܟܼܽܘܢ ܛܽܘܦܼܣܳܐ܂ ܕܒܰܢ ܬܿܶܬܿܕܰܡܽܘܢ܂
03:10 [ai]ܐܳܦܼ ܟܰܕܼ ܠܘܳܬܼܟܼܽܘܢ ܗ̱ܘܰܝܢ ܓܶܝܪ܃ ܗܳܕܼܶܐ ܡܦܼܰܩܕܼܺܝܢ ܗ̱ܘܰܝܢ ܠܟܼܽܘܢ܃ ܕܟܽܠ ܕܠܳܐ ܨܳܒܼܶܐ ܕܢܶܦܼܠܽܘܚ܃ ܐܳܦܼܠܳܐ ܢܶܠܥܰܣ܂
03:11 [ai]ܫܳܡܥܺܝܢܰܢ ܓܶܝܪ܃ ܕܺܐܝܬܼ ܒܟܽܘܢ ܐ̱ܢܳܫܳܐ ܕܒܺܝܫ ܒܺܝܫ ܡܗܰܠܟܼܺܝܢ܃ ܘܡܶܕܶܡ ܠܳܐ ܦܳܠܚܺܝܢ܂ ܐܶܠܳܐ ܐܶܢ ܣܪ̈ܺܝܩܳܬܼܳܐ܃
03:12 [ai]ܠܗܽܘܢ ܕܶܝܢ ܠܗܳܠܶܝܢ ܡܦܼܰܩܕܼܺܝܢܰܢ܃ ܘܒܼܳܥܶܝܢܰܢ ܡܶܢܗܽܘܢ ܒܡܳܪܰܢ ܝܶܫܽܘܥ ܡܫܺܝܚܳܐ܃ ܕܰܒܼܫܶܠܝܳܐ ܢܶܗܘܽܘܢ ܦܳܠܚܺܝܢ ܘܳܐܟܼܠܺܝܢ ܠܰܚܡܗܽܘܢ܂
03:13 [ai]ܐܢ̱ܬܿܽܘܢ ܕܶܝܢ ܐܰܚܰܝ̈܃ ܠܳܐ ܬܶܡܰܐܢ ܠܟܼܽܘܢ ܠܡܶܥܒܿܰܕܼ ܕܫܰܦܿܺܝܪ܂
03:14 [ai]ܘܶܐܢ ܐ̱ܢܳܫ ܠܳܐ ܡܶܫܬܿܡܰܥ ܠܡܶܠܰܝܢ̈ ܗܳܠܶܝܢ ܕܒܶܐܓܿܰܪܬܳܐ܃ ܢܶܬܼܦܿܪܶܫ ܠܟܼܽܘܢ ܗܳܢܳܐ܂ ܘܠܳܐ ܗܘܰܝܬܿܽܘܢ ܡܶܬܼܚܰܠܛܺܝܢ ܥܰܡܶܗ܂ ܕܢܶܒܼܗܰܬܼ܂
03:15 [ai]ܘܠܳܐ ܐܰܝܟܼ ܒܥܶܠܕܿܒܼܳܒܼܳܐ ܬܶܐܚܕܿܽܘܢܶܗ܃ ܐܶܠܳܐ ܗܘܰܝܬܿܽܘܢ ܡܰܪܬܿܶܝܢ ܠܶܗ ܐܰܝܟܼ ܕܠܰܐܚܳܐ܀
03:16 [ai]ܗܽܘ ܕܶܝܢ ܡܳܪܶܗ ܕܰܫܠܳܡܳܐ ܢܶܬܿܶܠ ܠܟܼܽܘܢ ܫܠܳܡܳܐ ܒܟܽܠܙܒܼܰܢ ܒܟܽܠܡܶܕܶܡ܂ ܡܳܪܰܢ ܥܰܡ ܟܽܠܟܼܽܘܢ܂
03:17 [ai]ܫܠܳܡܳܐ ܒܰܟܼܬܼܳܒܼܰܬܼ ܐܺܝܕܼܰܝ̈܃ ܐܶܢܳܐ ܦܿܰܘܠܳܘܣ ܟܶܬܼܒܿܶܬܼ܃ ܕܺܐܝܬܼܰܘܗ̱ܝ ܐܳܬܼܳܐ ܕܰܒܼܟܼܽܠܗܶܝܢ ܐܶܓܿܪ̈ܳܬܼܝ܂ ܗܳܟܼܰܢܳܐ ܟܳܬܼܶܒܼ ܐ̱ܢܳܐ܂
03:18 [ai]ܛܰܝܒܿܽܘܬܼܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܥܰܡ ܟܽܠܟܼܽܘܢ܂ ܐܰܡܺܝܢ ܿ܀ܿ܀ܿ