← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62054: 1Tim

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܦܿܰܘܠܳܘܣ ܫܠܺܝܚܳܐ ܕܝܶܫܽܘܥ ܡܫܺܝܚܳܐ܂ ܒܦܽܘܩܕܳܢܳܐ ܕܰܐܠܳܗܳܐ ܡܰܚܝܳܢܰܢ܂ ܘܕܼܰܡܫܺܝܚܳܐ ܝܶܫܽܘܥ ܣܰܒܼܪܰܢ܃
01:02 [ai]ܠܛܺܝܡܳܬܼܶܐܳܘܣ ܒܪܳܐ ܫܰܪܺܝܪܳܐ ܒܗܰܝܡܳܢܽܘܬܼܳܐ܂ ܛܰܝܒܿܽܘܬܼܳܐ ܘܪ̈ܰܚܡܶܐ ܘܰܫܠܳܡܳܐ܂ ܡܶܢ ܐܰܠܳܗܳܐ ܐܰܒܼܽܘܢ܃ ܘܰܡܫܺܝܚܳܐ ܝܶܫܽܘܥ ܡܳܪܰܢ܀
01:03 [ai]ܒܥܺܝܬܼ ܗ̱ܘܺܝܬܼ ܡܶܢܳܟܼ܂ ܟܰܕܼ ܐܳܙܶܠ ܐ̱ܢܳܐ ܠܡܰܩܶܕܼܳܘܢܺܝܰܐ܃ ܕܰܬܼܩܰܘܶܐ ܒܶܐܦܼܶܣܳܘܣ܃ ܘܰܬܼܦܼܰܩܶܕܼ ܠܐ̱ܢܳܫ ܐ̱ܢܳܫ ܕܠܳܐ ܢܰܠܦܼܽܘܢ ܝܽܘܠܦܿܳܢܶܐ̈ ܡܫܰܚܠܦܼܶܐ̈܃
01:04 [ai]ܘܠܳܐ ܢܶܬܼܪܡܽܘܢ ܠܫܽܘܥܝܳܬܼܳܐ̈ ܘܰܠܬܼܰܫܥܝܳܬܼܳܐ̈ ܕܿܫܰܪ̈ܒܼܳܬܼܳܐ܂ ܕܣܳܟܼܳܐ ܠܰܝܬܿ ܠܗܽܘܢ܂ ܗܳܠܶܝܢ ܕܿܚܶܪ̈ܝܳܢܶܐ ܗ̱ܘ ܥܳܒܼܕܳܢ̈ ܝܰܬܿܺܝܪܳܐܺܝܬܼ܂ ܘܠܳܐ ܒܶܢܝܳܢܳܐ ܒܗܰܝܡܳܢܽܘܬܼܳܐ ܕܰܐܠܳܗܳܐ܂
01:05 [ai]ܣܳܟܼܶܗ ܕܶܝܢ ܕܦܽܘܩܕܳܢܳܐ ܐܺܝܬܼܰܘܗ̱ܝ ܚܽܘܒܿܳܐ܂ ܕܡܶܢ ܠܶܒܿܳܐ ܕܰܟܼܝܳܐ܂ ܘܡܶܢ ܬܿܺܐܪܬܳܐ ܛܳܒܼܬܼܳܐ܂ ܘܡܶܢ ܗܰܝܡܳܢܽܘܬܼܳܐ ܫܰܪܺܝܪܬܳܐ܂
01:06 [ai]ܘܡܶܢܗܶܝܢ ܡܶܢ ܗܳܠܶܝܢ ܛܥܰܘ ܐ̱ܢܳܫܳܐ ܘܰܣܛܰܘ ܠܡܶܠܶܐ̈ ܣܪ̈ܺܝܩܳܬܼܳܐ܃
01:07 [ai]ܒܕܰܒܼܥܰܘ ܠܡܶܗܘܳܐ ܡܰܠܦܼܳܢܶܐ̈ ܕܢܳܡܽܘܣܳܐ܃ ܟܰܕܼ ܠܳܐ ܡܶܣܬܿܰܟܠܺܝܢ ܡܶܕܶܡ ܕܰܡܡܰܠܠܺܝܢ܃ ܘܠܳܐ ܡܶܕܶܡ ܕܰܥܠܰܘܗ̱ܝ ܡܶܬܼܚܪܶܝܢ܀
01:08 [ai]ܝܳܕܼܥܺܝܢܰܢ ܕܶܝܢ܂ ܕܢܳܡܽܘܣܳܐ ܫܰܦܿܺܝܪ ܗ̱ܽܘ܃ ܐܶܢ ܐ̱ܢܳܫ ܐܰܟܼܘܳܬܼܶܗ ܕܢܳܡܽܘܣܳܐ ܢܶܬܿܕܿܰܒܰܪ ܒܶܗ܃
01:09 [ai]ܟܰܕܼ ܝܳܕܼܰܥ ܕܰܠܟܼܺܐܢܶܐ̈ ܢܳܡܽܘܣܳܐ ܠܳܐ ܣܺܝܡ܃ ܐܶܠܳܐ ܠܥܰܘܳܠܶܐ̈܂ ܘܰܠܡܳܪ̈ܽܘܕܼܶܐ܂ ܘܰܠܪ̈ܰܫܺܝܥܶܐ܂ ܘܰܠܚܰܛܳܝܶܐ̈܂ ܘܰܠܥܰܢܳܬܼܶܐ̈܂ ܘܠܰܐܝܠܶܝܢ ܕܠܳܐ ܕܟܶܝܢ܂ ܘܠܰܐܝܠܶܝܢ ܕܡܳܚܶܝܢ ܠܰܐܒܼܳܗܰܝܗܽܘܢ̈܂ ܘܠܰܐܝܠܶܝܢ ܕܡܳܚܶܝܢ ܠܶܐܡܗܳܬܼܗܽܘܢ̈܂ ܘܰܠܩܳܛܽܘܠܶܐ̈܂
01:10 [ai]ܘܰܠܙܰܢܳܝܶܐ̈܂ ܘܰܠܫܳܟܼܒܰܝ̈ ܥܰܡ ܕܿܶܟܼܪ̈ܶܐ܂ ܘܰܠܓܼܳܢܒܰܝ̈ ܒܢܰܝ ܚܺܐܪ̈ܶܐ܂ ܘܰܠܕܼܰܓܳܠܶܐ̈܂ ܘܰܠܥܳܒܼܪ̈ܰܝ ܥܰܠ ܡܰܘܡܳܬܼܳܐ̈܂ ܘܰܠܟܼܽܠܡܶܕܶܡ ܕܺܐܝܬܼܰܘܗ̱ܝ ܣܰܩܽܘܒܼܠܳܐ ܠܝܽܘܠܦܿܳܢܳܐ ܚܠܺܝܡܳܐ
01:11 [ai]ܕܶܐܘܰܢܓܿܶܠܺܝܳܘܢ ܕܬܶܫܒܿܽܘܚܬܿܶܗ ܕܰܐܠܳܗܳܐ ܡܒܼܰܪܟܼܳܐ܂ ܗܰܘ ܕܶܐܢܳܐ ܐܶܬܼܗܰܝܡܢܶܬܼ܂
01:12 [ai]ܘܡܰܘܕܿܶܐ ܐ̱ܢܳܐ ܠܶܗ ܕܚܰܝܠܰܢܝ܂ ܠܡܳܪܰܢ ܝܶܫܽܘܥ ܡܫܺܝܚܳܐ܃ ܕܚܰܫܒܰܢܝ ܡܗܰܝܡܢܳܐ ܘܣܳܡܰܢܝ ܠܬܼܶܫܡܶܫܬܿܶܗ܃
01:13 [ai]ܠܺܝ ܕܡܶܢ ܩܕܼܺܝܡ ܡܓܼܰܕܿܦܼܳܢ ܗ̱ܘܺܝܬܼ܂ ܘܪܳܕܼܽܘܦܼ ܘܰܡܨܰܥܪܳܢ܂ ܐܶܠܳܐ ܐܶܬܼܚܰܢܢܶܬܼ ܡܶܛܽܠ ܕܟܰܕܼ ܠܳܐ ܝܳܕܼܰܥ ܗ̱ܘܺܝܬܼ܃ ܥܶܒܼܕܿܶܬܼ ܕܠܳܐ ܗܰܝܡܳܢܽܘܬܼܳܐ܂
01:14 [ai]ܣܶܓܼܝܰܬܼ ܒܺܝ ܕܶܝܢ܃ ܛܰܝܒܿܽܘܬܼܶܗ ܕܡܳܪܰܢ ܘܗܰܝܡܳܢܽܘܬܼܳܐ ܘܚܽܘܒܿܳܐ܂ ܕܰܒܼܝܶܫܽܘܥ ܡܫܺܝܚܳܐ܀
01:15 [ai]ܡܗܰܝܡܢܳܐ ܗ̱ܝ ܡܶܠܬܼܳܐ ܘܫܳܘܝܳܐ ܗ̱ܝ ܠܰܡܩܰܒܿܳܠܽܘܬܼܳܗ܃ ܕܝܶܫܽܘܥ ܡܫܺܝܚܳܐ ܐܶܬܼܳܐ ܠܥܳܠܡܳܐ ܠܡܰܚܳܝܽܘ ܠܚܰܛܳܝܶܐ̈܃ ܕܩܰܕܼܡܳܝܗܽܘܢ ܐܶܢܳܐ ܐ̱ܢܳܐ܂
01:16 [ai]ܐܶܠܳܐ ܡܶܛܽܠ ܗܳܢܳܐ ܪܰܚܶܡ ܥܠܰܝ܃ ܕܒܺܝ ܩܰܕܼܡܳܐ ܢܚܰܘܶܐ ܝܶܫܽܘܥ ܡܫܺܝܚܳܐ ܟܽܠܳܗ ܡܰܓܿܪܰܬܼܪܽܘܚܶܗ܃ ܠܬܼܰܚܘܺܝܬܼܳܐ ܕܰܐܝܠܶܝܢ ܕܰܥܬܼܺܝܕܼܺܝܢ ܕܰܢܗܰܝܡܢܽܘܢ ܒܶܗ ܠܚܰܝ̈ܶܐ ܕܰܠܥܳܠܰܡ܂
01:17 [ai]ܠܡܰܠܟܿܳܐ ܕܶܝܢ ܕܥܳܠܡܶܐ̈܃ ܠܗܰܘ ܕܠܳܐ ܡܶܬܼܚܰܒܿܰܠ ܘܠܳܐ ܡܶܬܼܚܙܶܐ܃ ܕܗܽܘܝܽܘ ܚܰܕܼ ܐܰܠܳܗܳܐ܃ ܐܺܝܩܳܪܳܐ ܘܬܼܶܫܒܿܽܘܚܬܳܐ ܠܥܳܠܰܡ ܥܳܠܡܺܝܢ܂ ܐܰܡܺܝܢ܀
01:18 [ai]ܗܳܢܳܐ ܦܽܘܩܕܳܢܳܐ ܡܰܓܼܥܶܠ ܐ̱ܢܳܐ ܠܳܟܼ ܒܶܪܝ ܛܺܝܡܳܬܼܶܐܳܘܣ܃ ܐܰܝܟܼ ܢܒܼܺܝܰܘܳܬܼܳܐ̈ ܩܰܕܼܡܳܝܳܬܼܳܐ̈ ܕܰܗܘܰܝ̈ ܥܠܰܝܟܿ܃ ܕܬܶܦܼܠܽܘܚ ܒܗܶܝܢ ܦܳܠܚܽܘܬܼܳܐ ܗܳܕܼܶܐ ܫܰܦܿܺܝܪܬܳܐ܃
01:19 [ai]ܒܗܰܝܡܳܢܽܘܬܼܳܐ ܘܰܒܬܼܺܐܪܬܳܐ ܛܳܒܼܬܼܳܐ܂ ܐܰܝܠܶܝܢ ܓܶܝܪ ܕܰܠܗܳܕܼܶܐ ܕܚܰܩܘ ܡܶܢܗܽܘܢ܃ ܡܶܢ ܗܰܝܡܳܢܽܘܬܼܳܐ ܐܶܣܬܿܰܪܰܩܘ܃
01:20 [ai]ܐܰܝܟܼ ܗܽܘܡܶܢܶܐܳܘܣ ܘܰܐܠܶܟܿܣܰܢܕܿܪܳܘܣ܃ ܗܳܠܶܝܢ ܕܰܐܫܠܡܶܬܼ ܠܣܳܛܳܢܳܐ܂ ܕܢܶܬܼܪܕܼܽܘܢ ܕܠܳܐ ܢܶܗܘܽܘܢ ܡܓܼܰܕܿܦܼܺܝܢ܀

next chapter