The Comprehensive Aramaic Lexicon

03:01 [ai]	ܡܗܰܝܡܢܳܐ ܗ̱ܝ ܡܶܠܬܼܳܐ܃ ܕܶܐܢ ܐ̱ܢܳܫ ܪܳܐܶܓܼ ܩܰܫܺܝܫܽܘܬܼܳܐ܃ ܥܒܼܳܕܼܶܐ̈ ܛܳܒܼܶܐ̈ ܪܳܐܶܓܼ܂
03:02 [ai]	ܘܳܠܶܐ ܕܶܝܢ܂ ܕܢܶܗܘܶܐ ܩܰܫܺܝܫܳܐ܃ ܐܰܝܢܳܐ ܕܡܽܘܡܳܐ ܠܳܐ ܡܶܫܬܿܟܼܰܚ ܒܶܗ܃ ܘܰܗܘܳܐ ܒܰܥܠܳܐ ܕܰܚܕܼܳܐ ܐܰܢ̱ܬܿܬܼܳܐ܃ ܐܰܝܢܳܐ ܕܥܺܝܪ ܪܶܥܝܳܢܶܗ܂ ܘܰܢܟܼܶܦܼ ܘܰܡܛܰܟܿܰܣ܂ ܘܪܳܚܶܡ ܐܰܟܼܣܢܳܝܶܐ̈ ܘܡܰܠܦܼܳܢ܂
03:03 [ai]	ܘܠܳܐ ܥܳܒܼܰܪ ܥܰܠ ܚܰܡܪܳܐ܂ ܘܠܳܐ ܪܳܗܛܳܐ ܐܺܝܕܼܶܗ ܠܡܶܡܚܳܐ܃ ܐܶܠܳܐ ܢܶܗܘܶܐ ܡܰܟܿܺܝܟܼ܂ ܘܠܳܐ ܢܰܨܳܝ܂ ܘܠܳܐ ܪܳܚܶܡ ܟܶܣܦܿܳܐ܂
03:04 [ai]	ܘܰܡܕܼܰܒܰܪ ܒܰܝܬܿܶܗ ܫܰܦܿܺܝܪ܂ ܘܰܐܚܺܝܕܼ ܒܢܰܘܗ̱ܝ ܒܫܽܘܥܒܿܳܕܼܳܐ ܒܟܽܠܳܗ ܕܰܟܼܝܽܘܬܼܳܐ܂
03:05 [ai]	ܐܶܢ ܓܶܝܪ ܒܰܝܬܳܐ ܕܢܰܦܼܫܶܗ ܠܳܐ ܝܳܕܼܰܥ ܕܿܰܢܕܼܰܒܰܪ ܫܰܦܿܺܝܪ܃ ܐܰܝܟܿܰܢܳܐ ܡܶܫܟܿܰܚ ܥܺܕ̱ܿܬܿܶܗ ܕܰܐܠܳܗܳܐ ܕܿܰܢܕܼܰܒܰܪ܂
03:06 [ai]	ܘܠܳܐ ܢܶܗܘܶܐ ܛܠܶܐ ܬܽܘܠܡܳܕܼܶܗ܃ ܕܠܳܐ ܢܶܬܿܪܺܝܡ ܘܢܶܦܿܶܠ ܒܕܺܝܢܶܗ ܕܣܳܛܳܢܳܐ܂
03:07 [ai]	ܘܳܠܶܐ ܕܶܝܢ܂ ܕܳܐܦܼ ܣܳܗܕܿܽܘܬܼܳܐ ܫܰܦܿܺܝܪܬܳܐ ܐܺܝܬܼ ܠܶܗ ܡܶܢ ܒܰܪ̈ܳܝܶܐ܃ ܕܠܳܐ ܢܶܦܿܶܠ ܒܚܶܣܕܿܳܐ ܘܰܒܦܼܰܚܶܐ̈ ܕܣܳܛܳܢܳܐ܂
03:08 [ai]	ܘܳܐܦܼ ܡܫܰܡܫܳܢܶܐ̈ ܗܳܟܼܰܢܳܐ ܢܶܗܘܽܘܢ ܕܟܶܝܢ܂ ܘܠܳܐ ܢܡܰܠܠܽܘܢ ܬܰܪܬܿܶܝܢ܂ ܘܠܳܐ ܢܶܗܘܽܘܢ ܨܠܶܝܢ ܠܚܰܡܪܳܐ ܣܰܓܿܺܝܳܐܐ܂ ܘܠܳܐ ܢܶܪܚܡܽܘܢ ܝܽܘܬܼܪ̈ܳܢܶܐ ܛܰܢܦܿܶܐ̈܃
03:09 [ai]	ܐܶܠܳܐ ܢܶܐܚܕܼܽܘܢ ܐ̱ܪܳܙܳܐ ܕܗܰܝܡܳܢܽܘܬܼܳܐ ܒܬܺܐܪܬܳܐ ܕܟܺܝܬܼܳܐ܂
03:10 [ai]	ܘܗܶܢܽܘܢ ܗܳܠܶܝܢ ܢܶܬܼܒܿܩܽܘܢ ܠܽܘܩܕܼܰܡ܂ ܘܗܳܝܕܶܝܢ ܢܫܰܡܫܽܘܢ܃ ܟܰܕܼ ܐܺܝܬܼܰܝܗܽܘܢ ܕܠܳܐ ܪܶܫܝܳܢ ܿ܀ܿ܀ܿ
03:11 [ai]	ܗܳܟܼܰܢܳܐ ܐܳܦܼ ܢܶܫܶܐ̈ ܢܶܗܘܝܳܢ̈ ܢܰܟܼܦܿܳܢ̈܂ ܘܢܶܗܘܶܐ ܥܺܝܪ ܪܶܥܝܳܢܗܶܝܢ܂ ܘܢܶܗܘܝܳܢ̈ ܡܗܰܝܡܢܳܢ̈ ܒܟܽܠ ܡܶܕܶܡ܂ ܘܠܳܐ ܢܶܗܘܝܳܢ̈ ܐܳܟܼܠܳܢ̈ ܩܰܪ̈ܨܶܐ܀
03:12 [ai]	ܡܫܰܡܫܳܢܶܐ̈ ܢܶܗܘܽܘܢ܃ ܐܰܝܢܳܐ ܕܰܚܕܼܳܐ ܐܰܢ̱ܬܿܬܼܳܐ ܗܘܳܬܼ ܠܶܗ܂ ܘܕܼܰܒܰܪ ܒܢܰܘܗ̱ܝ ܘܒܼܰܝܬܿܶܗ ܫܰܦܿܺܝܪ܂
03:13 [ai]	ܐܰܝܠܶܝܢ ܓܶܝܪ ܕܫܰܡܶܫܘ ܫܰܦܿܺܝܪ܃ ܕܰܪܓܼܳܐ ܛܳܒܼܳܐ ܩܳܢܶܝܢ ܠܢܰܦܼܫܗܽܘܢ܂ ܘܡܰܓܼܠܶܐ ܐܰܦܿܶܐ̈ ܣܰܓܿܺܝܳܐܐ ܒܗܰܝܡܳܢܽܘܬܼܳܐ ܕܝܶܫܽܘܥ ܡܫܺܝܚܳܐ܀
03:14 [ai]	ܗܳܠܶܝܢ ܟܳܬܼܶܒܼ ܐ̱ܢܳܐ ܠܳܟܼ܃ ܟܰܕܼ ܡܣܰܒܰܪ ܐ̱ܢܳܐ ܕܒܰܥܓܼܰܠ ܐܳܬܼܶܐ ܐ̱ܢܳܐ ܠܘܳܬܼܳܟܼ܂
03:15 [ai]	ܘܶܐܢ ܗܽܘ ܕܶܝܢ ܕܡܰܘܚܰܪ ܐ̱ܢܳܐ܃ ܕܬܶܕܿܰܥ ܐܰܝܟܿܰܢܳܐ ܘܳܠܶܐ ܠܡܶܬܼܗܰܦܿܳܟܼܽܘ ܒܒܼܰܝܬܿܶܗ ܕܰܐܠܳܗܳܐ܃ ܕܺܐܝܬܼܶܝܗ ܥܺܕ̱ܿܬܳܐ ܕܰܐܠܳܗܳܐ ܚܰܝܳܐ܃ ܥܰܡܽܘܕܼܳܐ ܘܫܶܬܼܶܐܣܬܼܳܐ ܕܰܫܪܳܪܳܐ܂
03:16 [ai]	ܘܫܰܪܺܝܪܳܐܺܝܬܼ ܪܰܒܼ ܗܽܘ ܐ̱ܪܳܙܳܐ ܗܳܢܳܐ ܕܟܺܐܢܽܘܬܼܳܐ܃ ܕܶܐܬܼܓܿܠܺܝ ܒܰܒܼܣܰܪ܂ ܘܶܐܙܕܿܰܕܿܰܩ ܒܪܽܘܚ܂ ܘܶܐܬܼܚܙܺܝ ܠܡܰܠܰܐܟܼܶܐ̈܂ ܘܶܐܬܼܟܿܪܶܙ ܒܶܝܬܼ ܥܰܡ̱ܡܶܐ̈܂ ܘܶܐܬܼܗܰܝܡܰܢ ܒܥܳܠܡܳܐ܂ ܘܶܐܣܬܿܰܠܰܩ ܒܫܽܘܒܼܚܳܐ܀

next chapter