The Comprehensive Aramaic Lexicon

04:01 [ai]	ܪܽܘܚܳܐ ܕܶܝܢ ܦܫܺܝܩܳܐܺܝܬܼ ܐܳܡܪܳܐ܃ ܕܰܒܼܙܰܒܼܢܶܐ̈ ܐ̱ܚܪ̈ܳܝܶܐ ܢܶܦܼܪܩܽܘܢ ܐ̱ܢܳܫ ܐ̱ܢܳܫ ܡܶܢ ܗܰܝܡܳܢܽܘܬܼܳܐ܃ ܘܢܺܐܙܽܠ̱ܘܢ ܒܳܬܼܰܪ ܪ̈ܽܘܚܶܐ ܛܳܥܝܳܬܼܳܐ̈ ܘܒܼܳܬܼܰܪ ܝܽܘܠܦܿܳܢܶܐ̈ ܕܫܺܐܕܼܶܐ̈܃
04:02 [ai]	ܗܳܠܶܝܢ ܕܒܶܐܣܟܿܺܡܳܐ ܕܰܓܿܳܠܳܐ ܡܰܛܥܶܝܢ ܘܰܡܡܰܠܠܺܝܢ ܟܰܕܿܳܒܼܽܘܬܼܳܐ܂ ܘܰܟܼܘܶܝܢ ܒܬܺܐܪܬܿܗܽܘܢ܂
04:03 [ai]	ܘܟܼܳܠܶܝܢ ܠܡܶܙܕܿܰܘܳܓܼܽܘ܂ ܘܡܰܦܼܪܩܺܝܢ ܡܶܢ ܡܶܐܟܼܠܳܬܼܳܐ̈܃ ܐܰܝܠܶܝܢ ܕܰܐܠܳܗܳܐ ܒܪܳܐ ܐܶܢܶܝܢ̈ ܠܚܽܘܫܳܚܳܐ ܘܰܠܬܼܰܘܕܿܺܝܬܼܳܐ܂ ܠܰܐܝܠܶܝܢ ܕܰܡܗܰܝܡܢܺܝܢ ܘܝܳܕܼܥܺܝܢ ܫܪܳܪܳܐ܂
04:04 [ai]	ܡܶܛܽܠ ܕܟܽܠ ܕܰܒܼܪܶܐ ܠܰܐܠܳܗܳܐ܃ ܫܰܦܿܺܝܪ ܗ̱ܽܘ܂ ܘܠܰܝܬܿ ܡܶܕܶܡ ܕܡܰܣܠܰܝ܃ ܐܶܢ ܒܬܰܘܕܿܺܝܬܼܳܐ ܢܶܬܼܢܣܶܒܼ܂
04:05 [ai]	ܡܶܬܼܩܰܕܿܰܫ ܓܶܝܪ ܒܡܶܠܬܼܳܐ ܕܰܐܠܳܗܳܐ ܘܒܼܰܨܠܽܘܬܼܳܐ܂
04:06 [ai]	ܗܳܠܶܝܢ ܐܶܢ ܬܶܗܘܶܐ ܡܰܠܶܦܼ ܠܰܐܚܰܝܟܿ̈܃ ܡܫܰܡܫܳܢܳܐ ܛܳܒܼܳܐ ܬܶܗܘܶܐ ܕܝܶܫܽܘܥ ܡܫܺܝܚܳܐ܃ ܟܰܕܼ ܡܶܬܼܪܰܒܿܶܐ ܐܰܢ̱ܬܿ ܒܡܶܠܶܐ̈ ܕܗܰܝܡܳܢܽܘܬܼܳܐ ܘܰܒܝܽܘܠܦܿܳܢܳܐ ܛܳܒܼܳܐ ܕܝܰܠܺܝܦܼ ܐܰܢ̱ܬܿ܀
04:07 [ai]	ܡܶܢ ܫܽܘܥܝܳܬܼܳܐ̈ ܕܶܝܢ ܦܰܟܿܺܝܗܳܬܼܳܐ̈ ܕܣܳܒܼܳܬܼܳܐ̈ ܐܶܫܬܿܰܐ̱ܠ܃ ܘܕܼܰܪܶܫ ܢܰܦܼܫܳܟܼ ܒܟܺܐܢܽܘܬܼܳܐ܂
04:08 [ai]	ܕܽܘܪܳܫܳܐ ܓܶܝܪ ܕܦܰܓܼܪܳܐ ܙܰܒܼܢܳܐ ܗ̱ܘ ܙܥܽܘܪܳܐ ܡܰܘܬܿܰܪ܃ ܟܺܐܢܽܘܬܼܳܐ ܕܶܝܢ ܒܟܽܠܡܶܕܶܡ ܡܰܘܬܿܪܳܐ܂ ܘܺܐܝܬܼ ܠܳܗ ܫܽܘܘ̱ܕܿܳܝܳܐ ܕܚܰܝ̈ܶܐ܂ ܕܙܰܒܼܢܳܐ ܗܳܢܳܐ ܘܕܼܰܥܬܼܺܝܕܼ܀
04:09 [ai]	ܡܗܰܝܡܢܳܐ ܗ̱ܝ ܡܶܠܬܼܳܐ ܘܫܳܘܝܳܐ ܗ̱ܝ ܠܰܡܩܰܒܿܳܠܽܘܬܼܳܗ܂
04:10 [ai]	ܡܶܛܽܠ ܗܳܕܼܶܐ ܗ̱ܘ ܓܶܝܪ ܠܳܐܶܝܢܰܢ ܘܡܶܬܼܚܰܣܕܼܺܝܢܰܢ܃ ܕܰܡܣܰܒܿܪܺܝܢܰܢ ܒܰܐܠܳܗܳܐ ܚܰܝܳܐ܃ ܕܺܐܝܬܼܰܘܗ̱ܝ ܡܰܚܝܳܢܳܐ ܕܿܰܒܼܢܰܝܢܳܫܳܐ ܟܽܠܗܽܘܢ܃ ܝܰܬܿܺܝܪܳܐܺܝܬܼ ܕܰܡܗܰܝܡܢܶܐ̈܂
04:11 [ai]	ܗܳܠܶܝܢ ܐܰܠܶܦܼ ܘܦܼܰܩܶܕܼ܂
04:12 [ai]	ܘܠܳܐ ܐ̱ܢܳܫ ܢܰܒܼܣܶܐ ܥܰܠ ܛܰܠܝܽܘܬܼܳܟܼ܃ ܐܶܠܳܐ ܗܘܺܝ ܕܡܽܘܬܼܳܐ ܠܰܡܗܰܝܡܢܶܐ̈܂ ܒܡܶܠܬܼܳܐ܂ ܘܰܒܗܽܘܦܿܳܟܼܳܐ܂ ܘܰܒܚܽܘܒܿܳܐ܂ ܘܰܒܗܰܝܡܳܢܽܘܬܼܳܐ܂ ܘܰܒܕܼܰܟܼܝܽܘܬܼܳܐ܂
04:13 [ai]	ܥܰܕܼ ܐܳܬܼܶܐ ܐ̱ܢܳܐ܃ ܐܶܬܼܚܰܦܿܰܛ ܒܩܶܪܝܳܢܳܐ܂ ܘܰܒܒܼܳܥܽܘܬܼܳܐ܂ ܘܰܒܝܽܘܠܦܿܳܢܳܐ܂
04:14 [ai]	ܘܠܳܐ ܬܶܒܼܣܶܐ ܒܡܰܘܗܰܒܼܬܼܳܐ ܕܺܐܝܬܼ ܒܳܟܼ܃ ܗܳܝ ܕܶܐܬܼܝܰܗܒܿܰܬܼ ܠܳܟܼ ܒܰܢܒܼܺܝܽܘܬܼܳܐ ܘܒܼܰܣܝܳܡ ܐܺܝܕܼܳܐ ܕܩܰܫܺܝܫܽܘܬܼܳܐ܂
04:15 [ai]	ܒܗܳܠܶܝܢ ܐܶܬܼܗܰܓܿܳܐ ܘܰܒܗܶܝܢ ܗܘܺܝ܃ ܕܬܶܬܼܺܝܕܼܰܥ ܠܟܼܽܠܢܳܫ ܕܠܰܩܕܼܳܡܰܝܟܿ ܐܳܬܼܶܐ ܐܰܢ̱ܬܿ܂
04:16 [ai]	ܘܶܐܙܕܿܰܗ̱ܪ ܒܢܰܦܼܫܳܟܼ ܘܰܒܝܽܘܠܦܿܳܢܳܟܼ܃ ܘܚܰܡܣܶܢ ܒܗܽܘܢ܂ ܟܰܕܼ ܗܳܠܶܝܢ ܓܶܝܪ ܬܶܥܒܿܶܕܼ܃ ܢܰܦܼܫܳܟܼ ܬܰܚܶܐ ܘܠܰܐܝܠܶܝܢ ܕܫܳܡܥܺܝܢ ܠܳܟܼ܃

next chapter