← Back
The Comprehensive Aramaic Lexicon
← Return to the Text Browser
click on the file description for more information
62054: 1Tim

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


05:01 [ai]ܒܩܰܫܺܝܫܳܐ ܠܳܐ ܬܶܓܼܥܽܘܪ܃ ܐܶܠܳܐ ܐܰܦܿܺܝܣܳܝܗ̱ܝ ܐܰܝܟܼ ܕܠܰܐܒܼܳܐ܂ ܘܠܰܐܝܠܶܝܢ ܕܰܛܠܶܝܢ ܐܰܝܟܼ ܕܠܰܐܚܰܝܟܿ̈܂
05:02 [ai]ܘܰܠܩܰܫܺܝܫܳܬܼܳܐ̈ ܐܰܝܟܼ ܐܶܡܗܳܬܼܳܐ̈܂ ܘܠܰܐܝܠܶܝܢ ܕܛܰܠܝܳܢ̈ ܐܰܝܟܼ ܕܠܰܐܚܘܳܬܼܳܟܼ̈ ܒܟܽܠܳܗ ܕܰܟܼܝܽܘܬܼܳܐ܀
05:03 [ai]ܠܰܐܪ̈ܡܠܳܬܼܳܐ ܝܰܩܰܪ܃ ܠܰܐܝܠܶܝܢ ܕܿܰܐܪ̈ܡܠܳܬܼܳܐ ܐܶܢܶܝܢ̈ ܒܰܫܪܳܪܳܐ܂
05:04 [ai]ܘܶܐܢ ܐܺܝܬܼ ܐܰܪܡܰܠܬܳܐ ܕܺܐܝܬܼ ܠܳܗ ܒܢܰܝܳܐ ܐܰܘ ܒܢܰܝ ܒܢܰܝܳܐ܃ ܢܺܐܠܦܿܽܘܢ ܠܽܘܩܕܼܰܡ ܕܿܒܼܰܒܼܢܰܝ̈ ܒܰܝܬܿܗܽܘܢ ܢܶܙܕܿܰܕܿܩܽܘܢ܃ ܘܢܶܦܼܪܥܽܘܢ ܚܽܘܒܼܠܶܐ̈ ܠܰܐܒܼܳܗܰܝܗܽܘܢ̈܂ ܗܳܕܼܶܐ ܓܶܝܪ ܡܩܰܒܠܳܐ ܩܕܼܳܡ ܐܰܠܳܗܳܐ܂
05:05 [ai]ܐܰܝܕܼܳܐ ܕܶܝܢ ܕܫܰܪܺܝܪܳܐܺܝܬܼ ܐܰܪܡܰܠܬܳܐ ܗ̱ܝ ܘܰܡܫܰܘܚܰܕܿܬܳܐ܃ ܗܳܕܼܶܐ ܣܰܒܼܪܳܗ ܥܰܠ ܐܰܠܳܗܳܐ ܗ̱ܘ܃ ܘܰܐܡܺܝܢܳܐ ܒܰܨܠܰܘܳܬܼܳܐ̈ ܘܰܒܒܼܳܥܘܳܬܼܳܐ̈ ܒܠܺܠܝܳܐ ܘܒܼܺܐܝܡܳܡܳܐ܂
05:06 [ai]ܐܰܝܕܼܳܐ ܕܶܝܢ ܕܦܳܠܚܳܐ ܐܶܣܛܪܰܢܺܝܰܐ܃ ܡܺܝܬܼܳܐ ܗ̱ܝ ܟܰܕܼ ܚܰܝܳܐ܂
05:07 [ai]ܗܳܠܶܝܢ ܗܘܰܝܬܿ ܡܦܼܰܩܶܕܼ ܠܗܶܝܢ܃ ܕܰܕܼܠܳܐ ܪܶܫܝܳܢ ܢܶܗܘܝܳܢ̈܂
05:08 [ai]ܐܶܢ ܐ̱ܢܳܫ ܓܶܝܪ ܕܰܐܝܠܶܝܢ ܕܕܼܺܝܠܶܗ ܐܶܢܽܘܢ܃ ܘܝܰܬܿܺܝܪܳܐܺܝܬܼ ܕܰܐܝܠܶܝܢ ܕܺܐܝܬܼܰܝܗܽܘܢ ܒܢܰܝ ܒܰܝܬܳܐ ܕܗܰܝܡܳܢܽܘܬܼܳܐ ܠܳܐ ܝܳܨܶܦܼ܃ ܗܳܢܳܐ ܟܦܼܰܪ ܠܶܗ ܒܗܰܝܡܳܢܽܘܬܼܳܐ܃ ܘܒܼܺܝܫ ܗ̱ܽܘ ܡܶܢ ܐܰܝܠܶܝܢ ܕܠܳܐ ܡܗܰܝܡܢܺܝܢ܂
05:09 [ai]ܗܘܰܝܬܿ ܗܳܟܼܺܝܠ ܓܳܒܼܶܐ ܐܰܪܡܰܠܬܳܐ܃ ܐܰܝܕܼܳܐ ܕܠܳܐ ܒܨܺܝܪܳܐ ܡܶܢ ܫܬܿܺܝܢ ܫܢܺܝܢ̈܂ ܐܰܝܕܼܳܐ ܕܰܠܚܰܕܼ ܗ̱ܽܘ ܓܰܒܼܪܳܐ ܗܘܳܬܼ܂
05:10 [ai]ܘܺܐܝܬܼ ܠܳܗ ܣܳܗܕܿܽܘܬܼܳܐ ܕܰܥܒܼܳܕܼܶܐ̈ ܫܰܦܿܺܝܪ̈ܶܐ܃ ܐܶܢ ܪܰܒܿܝܰܬܼ ܒܢܰܝܳܐ܂ ܐܶܢ ܩܰܒܿܠܰܬܼ ܐܰܟܼܣܢܳܝܶܐ̈܂ ܐܶܢ ܐܰܫܺܝܓܼܰܬܼ ܪ̈ܶܓܼܠܰܝܗܽܘܢ ܕܩܰܕܿܺܝܫܶܐ̈܂ ܐܶܢ ܐܰܪܘܚܰܬܼ ܠܰܐܠܺܝܨܶܐ̈܂ ܐܶܢ ܗܰܠܟܼܰܬܼ ܒܟܽܠ ܥܒܼܳܕܼ ܛܳܒܼ܂
05:11 [ai]ܡܶܢ ܐܰܪ̈ܡܠܳܬܼܳܐ ܕܶܝܢ ܐܰܝܠܶܝܢ ܕܛܰܠܝܳܢ̈܂ ܐܶܫܬܿܰܐ̱ܠ܂ ܡܶܨܛܰܪ̈ܝܳܢ ܠܗܶܝܢ ܓܶܝܪ ܥܰܠ ܡܫܺܝܚܳܐ܃ ܘܒܼܳܥܝܳܢ̈ ܠܡܶܗܘܳܐ ܠܓܼܰܒܼܪ̈ܶܐ܃
05:12 [ai]ܘܕܼܺܝܢܗܶܝܢ ܩܰܝܳܡ ܗ̱ܽܘ܃ ܕܰܛܠܰܡ ܗܰܝܡܳܢܽܘܬܼܗܶܝܢ ܩܰܕܼܡܳܝܬܳܐ܂
05:13 [ai]ܝܳܠܦܿܳܢ̈ ܕܶܝܢ ܐܳܦܼ ܚܒܼܰܢܳܢܽܘܬܼܳܐ܂ ܟܰܕܼ ܡܶܬܼܟܰܪ̈ܟܿܳܢ ܒܶܝܬܼ ܒܳܬܿܶܐ̈܃ ܘܠܳܐ ܒܰܠܚܽܘܕܼ ܚܒܼܰܢܳܢܽܘܬܼܳܐ܃ ܐܶܠܳܐ ܐܳܦܼ ܕܢܰܣܓܿܝܳܢ̈ ܡܰܡܠ̱ܠܳܐ܂ ܘܰܢܦܼܰܪ̈ܩܳܢ ܣܪ̈ܺܝܩܳܬܼܳܐ܂ ܘܰܢܡܰܠܠܳܢ̈ ܡܶܕܶܡ ܕܠܳܐ ܘܳܠܶܐ܂
05:14 [ai]ܨܳܒܼܶܐ ܐ̱ܢܳܐ ܗܳܟܼܺܝܠ܃ ܕܰܐܝܠܶܝܢ ܕܛܰܠܝܳܢ̈܃ ܢܶܙܕܿܰܘܓܼܳܢ̈܂ ܘܢܺܐܠܕܳܢ̈ ܒܢܰܝܳܐ܂ ܘܰܢܕܼܰܒܿܪܳܢ ܒܳܬܿܰܝܗܶܝܢ̈܃ ܘܠܳܐ ܢܶܬܿܠܳܢ̈ ܠܰܒܼܥܶܠܕܿܒܼܳܒܼܳܐ ܐܳܦܼܠܳܐ ܚܕܼܳܐ ܥܶܠܬܼܳܐ ܕܨܽܘܚܺܝܬܼܳܐ܂
05:15 [ai]ܥܰܠ ܕܗܳܫܳܐ ܓܶܝܪ ܫܰܪܺܝܘ ܐ̱ܢܳܫ ܐ̱ܢܳܫ ܡܶܣܛܳܐ ܒܳܬܼܰܪ ܣܳܛܳܢܳܐ܂
05:16 [ai]ܐܶܢ ܐ̱ܢܳܫ ܡܗܰܝܡܢܳܐ ܐܰܘ ܡܗܰܝܡܰܢܬܳܐ ܐܺܝܬܼ ܠܗܽܘܢ ܐܰܪ̈ܡܠܳܬܼܳܐ܃ ܢܬܼܰܪܣܽܘܢ ܐܶܢܶܝܢ̈ ܘܠܳܐ ܢܺܐܩܪܳܢ ܥܰܠ ܥܺܕ̱ܿܬܳܐ܃ ܕܠܰܐܝܠܶܝܢ ܕܿܰܐܪ̈ܡܠܳܬܼܳܐ ܐܶܢܶܝܢ̈ ܕܰܫܪܳܪܳܐ ܬܶܣܦܿܰܩ܀
05:17 [ai]ܩܰܫܺܝܫܶܐ̈ ܐܰܝܠܶܝܢ ܕܫܰܦܿܺܝܪ ܡܶܬܿܕܿܰܒܿܪܺܝܢ܃ ܠܺܐܝܩܳܪܳܐ ܥܦܼܺܝܦܼܳܐ ܢܶܫܘܽܘܢ܃ ܝܰܬܿܺܝܪܳܐܺܝܬܼ ܐܰܝܠܶܝܢ ܕܠܳܐܶܝܢ ܒܡܶܠܬܼܳܐ ܘܰܒܝܽܘܠܦܿܳܢܳܐ܂
05:18 [ai]ܐܶܡܰܪ ܓܶܝܪ ܟܬܼܳܒܼܳܐ܃ ܕܠܳܐ ܬܶܒܼܠܽܘܡ ܬܰܘܪܳܐ ܒܰܕܼܪܳܟܼܬܳܐ܂ ܘܫܳܘܶܐ ܗ̱ܽܘ ܦܳܥܠܳܐ ܐܰܓܼܪܶܗ܂
05:19 [ai]ܥܰܠ ܩܰܫܺܝܫܳܐ ܩܛܺܓܼܪܳܢܽܘܬܼܳܐ ܠܳܐ ܬܩܰܒܿܶܠ܃ ܐܶܠܳܐ ܥܰܠ ܦܽܘܡ ܬܿܪ̈ܶܝܢ ܘܰܬܼܠܳܬܼܳܐ ܣܳܗܕܺܝܢ܂
05:20 [ai]ܠܰܐܝܠܶܝܢ ܕܚܳܛܶܝܢ܂ ܩܕܼܳܡ ܟܽܠܢܳܫ ܟܰܘܶܢ܃ ܕܳܐܦܼ ܫܰܪܟܿܳܐ ܕܐ̱ܢܳܫܳܐ ܢܶܕܼܚܠܽܘܢ܂
05:21 [ai]ܡܣܰܗܶܕܼ ܐ̱ܢܳܐ ܠܳܟܼ ܩܕܼܳܡ ܐܰܠܳܗܳܐ܂ ܘܡܳܪܰܢ ܝܶܫܽܘܥ ܡܫܺܝܚܳܐ܂ ܘܡܰܠܰܐܟܼܰܘܗ̱ܝ̈ ܓܒܼܰܝܳܐ̈܃ ܕܗܳܠܶܝܢ ܬܶܛܰܪ܂ ܘܠܳܐ ܢܶܬܼܩܰܕܰܡ ܪܶܥܝܳܢܳܟܼ ܠܡܶܕܶܡ܂ ܘܠܳܐ ܬܶܣܥܽܘܪ ܡܶܕܶܡ ܒܡܰܣܰܒܼ ܒܰܐܦܿܶܐ̈ ܿ܀ܿ܀ܿ
05:22 [ai]ܐܺܝܕܼܳܐ ܒܰܥܓܼܰܠ ܥܰܠ ܐ̱ܢܳܫ ܠܳܐ ܬܣܺܝܡ܃ ܘܠܳܐ ܬܿܶܫܬܰܘܬܿܰܦܼ ܒܰܚܛܳܗܶܐ̈ ܢܽܘܟܼܪ̈ܳܝܶܐ܂ ܢܰܦܼܫܳܟܼ ܛܰܪ ܒܕܰܟܼܝܽܘܬܼܳܐ܂
05:23 [ai]ܘܡܶܟܿܺܝܠ ܡܰܝܳܐ̈ ܠܳܐ ܬܶܫܬܿܶܐ܃ ܐܶܠܳܐ ܚܰܡܪܳܐ ܩܰܠܺܝܠ ܗ̱ܘܰܝܬܿ ܫܳܬܼܶܐ ܡܶܛܽܠ ܐܶܣܛܽܘܡܟܼܳܟܼ܃ ܘܡܶܛܽܠ ܟܿܽܘܪ̈ܗܳܢܰܝܟܿ ܐܰܡܺܝܢܶܐ̈܀
05:24 [ai]ܐܺܝܬܼ ܒܢܰܝܢܳܫܳܐ ܕܰܚܛܳܗܰܝܗܽܘܢ̈ ܺܝܕܼܺܝܥܺܝܢ ܐܶܢܽܘܢ܂ ܘܰܡܩܰܕܿܡܺܝܢ ܠܗܽܘܢ ܠܒܼܶܝܬܼ ܕܺܝܢܳܐ܃ ܘܺܐܝܬܼ ܕܒܳܬܼܰܪܗܽܘܢ ܐܳܙܺܠ̱ܝܢ܃
05:25 [ai]ܗܳܟܼܰܢܳܐ ܐܳܦܼ ܥܒܼܳܕܼܶܐ̈ ܛܳܒܼܶܐ̈ ܺܝܕܼܺܝܥܺܝܢ ܐܶܢܽܘܢ܃ ܘܰܐܝܠܶܝܢ ܕܰܐ̱ܚܪܳܢܝܳܐܺܝܬܼ ܐܶܢܽܘܢ܂ ܠܡܶܛܫܳܐ ܠܳܐ ܡܶܫܟܿܚܺܝܢ܀

next chapter