The Comprehensive Aramaic Lexicon

06:01 [ai]	ܐܰܝܠܶܝܢ ܕܺܐܝܬܼܰܝܗܽܘܢ ܬܚܶܝܬܼ ܢܺܝܪܳܐ ܕܥܰܒܼܕܿܽܘܬܼܳܐ܃ ܠܡܳܪ̈ܰܝܗܽܘܢ ܒܟܽܠ ܐܺܝܩܳܪ ܢܶܐܚܕܼܽܘܢ܃ ܕܠܳܐ ܢܶܗܘܶܐ ܫܡܶܗ ܕܰܐܠܳܗܳܐ ܘܝܽܘܠܦܿܳܢܶܗ ܡܶܬܼܓܿܰܕܿܰܦܼ܂
06:02 [ai]	ܐܰܝܠܶܝܢ ܕܶܝܢ ܕܺܐܝܬܼ ܠܗܽܘܢ ܡܳܪ̈ܰܝܳܐ ܡܗܰܝܡܢܶܐ̈܃ ܠܳܐ ܢܶܒܼܣܽܘܢ ܒܗܽܘܢ܂ ܥܰܠ ܕܰܐܚܰܝܗܽܘܢ̈ ܐܶܢܽܘܢ܃ ܐܶܠܳܐ ܝܰܬܿܺܝܪܳܐܺܝܬܼ ܢܫܰܡܫܽܘܢ ܐܶܢܽܘܢ܂ ܥܰܠ ܕܰܡܗܰܝܡܢܶܐ̈ ܐܶܢܽܘܢ ܘܚܰܒܺܝܒܼܶܐ̈܂ ܗܳܠܶܝܢ ܕܡܶܬܿܬܿܢܺܝܚܺܝܢ ܒܬܶܫܡܶܫܬܿܗܽܘܢ܂ ܗܳܠܶܝܢ ܐܰܠܶܦܼ ܘܰܒܥܺܝ ܡܶܢܗܽܘܢ܂
06:03 [ai]	ܐܶܢ ܕܶܝܢ ܐܺܝܬܼ ܐ̱ܢܳܫ ܕܡܰܠܶܦܼ ܝܽܘܠܦܿܳܢܳܐ ܐ̱ܚܪܺܢܳܐ܃ ܘܠܳܐ ܡܶܬܼܩܰܪܰܒܼ ܠܡܶܠܶܐ̈ ܚܠܺܝܡܳܬܼܳܐ̈ ܕܡܳܪܰܢ ܝܶܫܽܘܥ ܡܫܺܝܚܳܐ܂ ܘܰܠܝܽܘܠܦܿܳܢܳܐ ܕܕܼܶܚܠܰܬܼ ܐܰܠܳܗܳܐ܃
06:04 [ai]	ܗܳܢܳܐ ܡܶܬܿܪܺܝܡ ܟܰܕܼ ܡܶܕܶܡ ܠܳܐ ܝܳܕܼܰܥ܃ ܐܶܠܳܐ ܟܪܺܝܗ ܒܰܕܼܪܳܫܳܐ ܘܒܼܰܒܼܥܳܬܼܳܐ ܕܡܶܠܶܐ̈܃ ܕܡܶܢܗܶܝܢ ܗܳܘܶܐ ܚܣܳܡܳܐ܂ ܘܚܶܪܝܳܢܳܐ܂ ܘܓܼܽܘܕܿܳܦܼܳܐ܂ ܘܰܡܣܳܡ ܒܪܶܥܝܳܢܳܐ ܒܺܝܫܳܐ܂
06:05 [ai]	ܘܰܫܚܳܩܳܐ ܕܿܰܒܼܢܰܝܢܳܫܳܐ܃ ܐܰܝܠܶܝܢ ܕܰܡܚܰܒܿܰܠ ܪܶܥܝܳܢܗܽܘܢ܂ ܘܰܓܼܠܺܝܙܺܝܢ ܡܶܢ ܩܽܘܫܬܳܐ܂ ܘܣܳܒܼܪܺܝܢ ܕܬܶܓܼܽܘܪܬܳܐ ܗ̱ܝ ܕܶܚܠܰܬܼ ܐܰܠܳܗܳܐ܂ ܐܰܢ̱ܬܿ ܕܶܝܢ ܐܶܬܼܪܰܚ̱ܩ ܡܶܢ ܗܳܠܶܝܢ܂
06:06 [ai]	ܬܶܐܓܼܽܘܪܬܿܰܢ ܓܶܝܪ ܕܺܝܠܰܢ ܪܰܒܿܳܐ ܗ̱ܝ܃ ܕܺܐܝܬܼܶܝܗ ܕܶܚܠܰܬܼ ܐܰܠܳܗܳܐ ܒܰܚܫܰܚܬܼܳܐ ܕܡܶܣܬܼܰܢ܂
06:07 [ai]	ܡܶܕܶܡ ܓܶܝܪ ܠܳܐ ܐܰܥܶܠܢ ܠܥܳܠܡܳܐ܃ ܘܺܝܕܼܺܝܥܳܐ ܕܳܐܦܼܠܳܐ ܕܢܰܦܿܶܩ ܡܶܢܶܗ ܡܶܫܟܿܚܺܝܢܰܢ܂
06:08 [ai]	ܡܶܛܽܠ ܗܳܢܳܐ ܣܳܦܼܩܳܐ ܠܰܢ ܡܶܐܟܼܽܘܠܬܳܐ ܘܬܼܰܟܼܣܺܝܬܼܳܐ܂
06:09 [ai]	ܐܰܝܠܶܝܢ ܕܶܝܢ ܕܨܳܒܼܶܝܢ ܠܡܶܥܬܿܰܪ܃ ܢܳܦܼܠܺܝܢ ܒܢܶܣܝܽܘܢܶܐ̈܂ ܘܰܒܦܼܰܚܶܐ̈܂ ܘܒܼܰܪ̈ܓܼܺܝܓܼܳܬܼܳܐ ܣܰܓܿܺܝܳܐܬܼܳܐ̈܃ ܕܣܰܟܼܠܳܢ̈ ܘܰܡܣܰܓܿܦܼܳܢ̈ ܘܰܡܛܰܒܿܥܳܢ̈
06:10 [ai]	ܥܶܩܳܪܳܐ ܕܶܝܢ ܕܟܽܘܠܗܶܝܢ ܒܺܝܫܳܬܼܳܐ̈ ܐܺܝܬܼܶܝܗ ܪܶܚܡܰܬܼ ܟܶܣܦܿܳܐ܂ ܘܺܐܝܬܼ ܐ̱ܢܳܫܳܐ ܕܶܐܬܼܪܰܓܼܪܰܓܼܘ ܠܶܗ܃ ܘܡܶܢ ܗܰܝܡܳܢܽܘܬܼܳܐ ܛܥܰܘ܃ ܘܢܰܦܼܫܗܽܘܢ ܐܰܥܶܠܘ ܠܕܼܰܐܘܳܢܶܐ̈ ܣܰܓܿܺܝܶܐܐ̈܀
06:11 [ai]	ܐܰܢ̱ܬܿ ܕܶܝܢ ܐܳܘ ܒܰܪܢܳܫܳܐ ܕܰܐܠܳܗܳܐ܃ ܡܶܢ ܗܳܠܶܝܢ ܥܪܽܘܩ܃ ܘܗܰܪ̱ܛ ܒܳܬܼܰܪ ܙܰܕܿܺܝܩܽܘܬܼܳܐ܂ ܘܒܼܳܬܼܰܪ ܟܺܐܢܽܘܬܼܳܐ܂ ܘܒܼܳܬܼܰܪ ܗܰܝܡܳܢܽܘܬܼܳܐ܂ ܘܒܼܳܬܼܰܪ ܚܽܘܒܿܳܐ܂ ܘܒܼܳܬܼܰܪ ܡܣܰܝܒܿܪܳܢܽܘܬܼܳܐ܂ ܘܒܼܳܬܼܰܪ ܡܰܟܿܺܝܟܼܽܘܬܼܳܐ܂
06:12 [ai]	ܘܶܐܬܼܟܿܰܬܿܰܫ ܒܰܐܓܼܽܘܢܳܐ ܛܳܒܼܳܐ ܕܗܰܝܡܳܢܽܘܬܼܳܐ܃ ܘܰܐܕܼܪܶܟܼ ܚܰܝ̈ܶܐ ܕܰܠܥܳܠܰܡ ܕܰܠܗܽܘܢ ܐܶܬܼܩܪܺܝܬܿ܃ ܘܰܐܘܕܿܺܝܬܼ ܬܰܘܕܿܺܝܬܼܳܐ ܛܳܒܼܬܼܳܐ ܩܕܼܳܡ ܣܳܗܕܿܶܐ̈ ܣܰܓܿܺܝܶܐܐ̈܀
06:13 [ai]	ܡܣܰܗܶܕܼ ܐ̱ܢܳܐ ܠܳܟܼ ܩܕܼܳܡ ܐܰܠܳܗܳܐ܂ ܗܰܘ ܕܡܰܚܶܐ ܟܽܠ܃ ܘܝܶܫܽܘܥ ܡܫܺܝܚܳܐ܂ ܗܰܘ ܕܰܐܣܗܶܕܼ ܩܕܼܳܡ ܦܿܳܢܛܺܝܳܘܣ ܦܿܺܝܠܰܛܳܘܣ ܣܳܗܕܿܽܘܬܼܳܐ ܫܰܦܿܺܝܪܬܳܐ܃
06:14 [ai]	ܕܬܶܛܪܺܝܘܗ̱ܝ܃ ܦܽܘܩܕܳܢܳܐ ܕܠܳܐ ܛܽܘܠܫܳܐ ܘܰܕܼܠܳܐ ܡܽܘܡܳܐ܃ ܥܕܼܰܡܳܐ ܠܓܼܶܠܝܳܢܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂
06:15 [ai]	ܗܰܘ ܕܰܥܬܼܺܝܕܼ ܒܙܰܒܼܢܶܗ ܢܚܰܘܶܝܘܗ̱ܝ ܐܰܠܳܗܳܐ ܡܒܼܰܪܟܼܳܐ ܘܚܰܝܠܬܼܳܢܳܐ ܒܰܠܚܽܘܕܼܰܘܗ̱ܝ܃ ܡܰܠܟܿܳܐ ܕܡܰܠܟܿܶܐ̈ ܘܡܳܪܳܐ ܕܿܡܳܪ̈ܰܘܳܬܼܳܐ܂
06:16 [ai]	ܗܰܘ ܕܗܽܘ ܒܰܠܚܽܘܕܼܰܘܗ̱ܝ ܠܳܐ ܡܶܬܼܚܰܒܿܰܠ܂ ܘܥܳܡܰܪ ܒܢܽܘܗܪܳܐ܃ ܕܐ̱ܢܳܫ ܠܳܐܡܶܫܟܿܰܚ ܕܢܶܬܼܩܰܪܰܒܼ ܠܶܗ܂ ܘܐ̱ܢܳܫ ܡܶܢ ܒܢܰܝܢܳܫܳܐ ܠܳܐ ܚܙܳܝܗ̱ܝ܃ ܘܳܐܦܼܠܳܐ ܡܨܶܐ ܠܡܶܚܙܝܶܗ܂ ܗܰܘ ܕܠܶܗ ܐܺܝܩܳܪܳܐ ܘܫܽܘܠܛܳܢܳܐ ܠܥܳܠܰܡ ܥܳܠܡܺܝܢ܂ ܐܰܡܺܝܢ܀
06:17 [ai]	ܠܥܰܬܿܺܝܪ̈ܶܐ ܕܥܳܠܡܳܐ ܗܳܢܳܐ ܦܰܩܶܕܼ܃ ܕܠܳܐ ܢܶܬܿܪܺܝܡܽܘܢ ܒܪ̈ܶܥܝܳܢܰܝܗܽܘܢ܃ ܘܠܳܐ ܢܶܬܿܬܿܰܟܼܠܽܘܢ ܥܰܠ ܥܽܘܬܼܪܳܐ ܕܠܰܝܬܿ ܥܠܰܘܗ̱ܝ ܬܽܘܟܼܠܳܢܳܐ܃ ܐܶܠܳܐ ܥܰܠ ܐܰܠܳܗܳܐ ܚܰܝܳܐ܂ ܗܰܘ ܕܝܰܗ̱ܒܼ ܠܰܢ ܟܽܠ ܥܰܬܿܺܝܪܳܐܺܝܬܼ ܠܰܢܝܳܚܰܢ܃
06:18 [ai]	ܘܢܶܥܒܿܕܼܽܘܢ ܥܒܼܳܕܼܶܐ̈ ܛܳܒܼܶܐ̈܂ ܘܢܶܥܬܿܪܽܘܢ ܒܣܽܘܥܪ̈ܳܢܶܐ ܫܰܦܿܺܝܪ̈ܶܐ܂ ܘܢܶܗܘܽܘܢ ܕܠܺܝܠܺܝܢ ܠܡܶܬܿܰܠ ܘܰܠܡܶܫܬܰܘܬܿܳܦܼܽܘ܂
06:19 [ai]	ܘܰܢܣܺܝܡܽܘܢ ܠܢܰܦܼܫܗܽܘܢ ܫܶܬܼܶܐܣܬܳܐ ܛܳܒܼܬܼܳܐ ܠܡܶܕܶܡ ܕܰܥܬܼܺܝܕܼ܃ ܕܢܰܕܼܪܟܼܽܘܢ ܚܰܝ̈ܶܐ ܫܰܪܺܝܪܳܐ܀
06:20 [ai]	ܐܳܘ ܛܺܝܡܳܬܼܶܐܐ܃ ܐܶܙܕܿܰܗ̱ܪ ܒܡܶܕܶܡ ܕܶܐܬܼܓܿܥܶܠ ܠܳܟܼ܃ ܘܰܥܪܽܘܩ ܡܶܢ ܒܢܳܬܼ ܩܳܠܶܐ̈ ܣܪ̈ܺܝܩܳܬܼܳܐ܃ ܘܡܶܢ ܗܦܼܳܟܼܳܬܼܳܐ̈ ܕܺܝܕܼܰܥܬܼܳܐ ܕܰܓܿܳܠܬܼܳܐ܂
06:21 [ai]	ܐܰܝܠܶܝܢ ܓܶܝܪ ܕܿܡܶܫܬܰܘܕܶܝܢ ܠܳܗ܂ ܛܥܰܘ ܠܗܽܘܢ ܡܶܢ ܗܰܝܡܳܢܽܘܬܼܳܐ܂ ܛܰܝܒܿܽܘܬܼܳܐ ܥܰܡܳܟܼ܂ ܐܰܡܺܝܢ܀