← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62055: 2Tim

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


02:01 [ai]ܐܰܢ̱ܬܿ ܗܳܟܼܺܝܠ ܒܶܪܝ܃ ܐܶܬܼܚܰܝܰܠ ܒܛܰܝܒܿܽܘܬܼܳܐ ܕܰܒܼܝܶܫܽܘܥ ܡܫܺܝܚܳܐ܂
02:02 [ai]ܘܰܐܝܠܶܝܢ ܕܰܫܡܰܥܬܿ ܡܶܢܝ ܒܝܰܕܼ ܣܳܗܕܿܶܐ̈ ܣܰܓܿܺܝܶܐܐ̈܃ ܗܳܢܶܝܢ ܐܰܓܼܥܶܠ ܠܐ̱ܢܳܫܳܐ ܡܗܰܝܡܢܶܐ̈܃ ܐܰܝܠܶܝܢ ܕܡܳܛܝܳܐ ܒܺܐܝܕܼܰܝܗܽܘܢ̈ ܐܳܦܼ ܠܰܐ̱ܚܪ̈ܳܢܶܐ ܠܡܰܠܳܦܼܽܘ܂
02:03 [ai]ܘܣܰܝܒܰܪ ܒܺܝܫܳܬܼܳܐ̈܃ ܐܰܝܟܼ ܦܳܠܚܳܐ ܛܳܒܼܳܐ ܕܝܶܫܽܘܥ ܡܫܺܝܚܳܐ܂
02:04 [ai]ܠܳܐ ܐ̱ܢܳܫ ܦܳܠܰܚ ܘܡܶܬܼܦܿܰܟܰܪ ܒܨܶܒܼܘܳܬܼܳܐ̈ ܕܥܳܠܡܳܐ܃ ܕܢܶܫܦܿܰܪ ܠܗܰܘ ܡܰܢ ܕܰܓܼܒܼܳܝܗ̱ܝ܂
02:05 [ai]ܘܶܐܢ ܡܶܬܼܟܿܰܬܿܰܫ ܐ̱ܢܳܫ܃ ܠܳܐ ܡܶܬܼܟܿܰܠܰܠ܃ ܐܶܢ ܒܢܳܡܽܘܣܶܗ ܠܳܐ ܡܶܬܼܟܿܰܬܿܰܫ܂
02:06 [ai]ܠܰܐܟܿܳܪܳܐ ܕܠܳܐܶܐ ܘܳܠܶܐ ܠܶܗ܃ ܕܩܰܕܼܡܳܐ ܡܶܢ ܦܿܺܐܪ̈ܰܘܗ̱ܝ ܢܶܣܬܿܰܝܒܰܪ܂
02:07 [ai]ܐܶܣܬܿܰܟܿܰܠ ܡܶܕܶܡ ܕܳܐܡܰܪ ܐ̱ܢܳܐ܂ ܢܶܬܿܶܠ ܠܳܟܼ ܡܳܪܰܢ ܚܶܟܼܡܬܼܳܐ ܒܟܽܠ ܡܶܕܶܡ܀
02:08 [ai]ܐܶܬܿܕܿܰܟܼ̱ܪ ܠܝܶܫܽܘܥ ܡܫܺܝܚܳܐ܃ ܕܩܳܡ ܡܶܢ ܒܶܝܬܼ ܡܺܝܬܼܶܐ̈܃ ܗܰܘ ܕܺܐܝܬܼܰܘܗ̱ܝ ܡܶܢ ܙܰܪܥܳܐ ܕܕܼܰܘܺܝܕܼ܂ ܐܰܝܟܼ ܐܶܘܰܢܓܿܶܠܺܝܳܘܢ ܕܺܝܠܝ܃
02:09 [ai]ܕܒܶܗ ܣܳܒܼܶܠ ܐ̱ܢܳܐ ܒܺܝܫܳܬܼܳܐ̈ ܥܕܼܰܡܳܐ ܠܰܐܣܽܘܪ̈ܶܐ ܐܰܝܟܼ ܥܳܒܼܶܕܼ ܒܺܝܫܳܬܼܳܐ̈܂ ܐܶܠܳܐ ܡܶܠܬܼܶܗ ܕܰܐܠܳܗܳܐ ܠܳܐ ܐܰܣܺܝܪܳܐ܂
02:10 [ai]ܡܶܛܽܠ ܗܳܢܳܐ ܟܽܠܡܶܕܶܡ ܡܣܰܝܒܰܪ ܐ̱ܢܳܐ ܡܶܛܽܠ ܓܒܼܰܝܳܐ̈܃ ܕܳܐܦܼ ܗܶܢܽܘܢ ܢܶܫܟܿܚܽܘܢ ܚܰܝ̈ܶܐ ܕܰܒܼܝܶܫܽܘܥ ܕܰܒܼܝܶܫܽܘܥ ܡܫܺܝܚܳܐ ܥܰܡ ܫܽܘܒܼܚܳܐ ܕܰܠܥܳܠܰܡ܀
02:11 [ai]ܡܗܰܝܡܢܳܐ ܗ̱ܝ ܡܶܠܬܼܳܐ܂ ܐܶܢ ܓܶܝܪ ܡܺܝܬܼܢ ܥܰܡܶܗ܃ ܐܳܦܼ ܥܰܡܶܗ ܢܺܚܶܐ܂
02:12 [ai]ܘܶܐܢ ܢܣܰܝܒܰܪ܃ ܐܳܦܼ ܢܰܡܠܶܟܼ ܥܰܡܶܗ܂ ܐܶܢ ܕܶܝܢ ܢܶܟܼܦܿܽܘܪ ܒܶܗ܃ ܐܳܦܼ ܗܽܘ ܢܶܟܼܦܿܽܘܪ ܒܰܢ܂
02:13 [ai]ܘܶܐܢ ܠܳܐ ܢܗܰܝܡܶܢ ܒܶܗ܃ ܗܽܘ ܒܗܰܝܡܳܢܽܘܬܼܶܗ ܡܩܰܘܶܐ܂ ܕܢܶܟܼܦܿܽܘܪ ܓܶܝܪ ܒܢܰܦܼܫܶܗ܂ ܠܳܐ ܡܶܫܟܿܰܚ܂
02:14 [ai]ܗܳܠܶܝܢ ܗܘܰܝܬܿ ܡܰܥ̱ܗܶܕܼ ܠܗܽܘܢ ܘܰܡܣܰܗܶܕܼ ܩܕܼܳܡ ܡܳܪܰܢ܃ ܕܠܳܐ ܢܶܗܘܽܘܢ ܡܶܬܼܚܪܶܝܢ ܒܡܶܠܶܐ̈ ܕܠܳܐ ܝܽܘܬܼܪܳܢ܃ ܠܣܽܘܚܳܦܼܳܐ ܕܰܐܝܠܶܝܢ ܕܫܳܡܥܺܝܢ ܠܗܶܝܢ܂
02:15 [ai]ܘܢܶܬܼܒܿܛܶܠ ܠܳܟܼ܃ ܕܰܬܼܩܺܝܡ ܢܰܦܼܫܳܟܼ ܓܡܺܝܪܳܐܺܝܬܼ ܩܕܼܳܡ ܐܰܠܳܗܳܐ܃ ܦܳܠܚܳܐ ܕܠܳܐ ܒܶܗܬܿܬܼܳܐ܂ ܕܡܰܟܼܪܶܙ ܬܪܺܝܨܳܐܺܝܬܼ ܡܶܠܬܼܳܐ ܕܰܫܪܳܪܳܐ܂
02:16 [ai]ܘܡܶܢ ܡܶܠܶܐ̈ ܣܪ̈ܺܝܩܳܬܼܳܐ ܕܠܰܝܬܿ ܒܗܶܝܢ ܚܰܫܚܽܘ܃ ܐܶܫܬܿܰܐ̱ܠ܂ ܝܰܬܿܺܝܪܳܐܺܝܬܼ ܓܶܝܪ ܢܰܘܣܦܼܽܘܢ ܥܰܠ ܪܽܘܫܥܗܽܘܢ܂ ܗܳܢܽܘܢ ܕܰܥܢܶܝܢ ܒܗܶܝܢ܂
02:17 [ai]ܘܡܶܠܰܬܼܗܽܘܢ ܐܰܝܟܼ ܚܰܠܳܕܼܺܝܬܼܳܐ܂ ܢܳܘܡܺܐ ܬܶܐܚܽܘܕܼ ܒܣܰܓܿܺܝܶܐܐ̈܂ ܐܺܝܬܼܰܘܗ̱ܝ ܕܶܝܢ ܚܰܕܼ ܡܶܢܗܽܘܢ ܗܽܘܡܶܢܶܐܳܘܣ܃ ܘܰܐ̱ܚܪܺܢܳܐ ܦܿܺܝܠܺܛܳܘܣ܃
02:18 [ai]ܗܳܠܶܝܢ ܕܰܛܥܰܘ ܡܶܢ ܫܪܳܪܳܐ ܟܰܕܼ ܐܳܡܪܺܝܢ܂ ܕܰܩܝܳܡܬܳܐ ܕܡܺܝܬܼܶܐ̈ ܗܘܳܬܼ ܠܳܗ܃ ܘܗܰܝܡܳܢܽܘܬܼܳܐ ܕܐ̱ܢܳܫ ܐ̱ܢܳܫ ܡܰܗܦܿܟܼܺܝܢ܂
02:19 [ai]ܫܶܬܼܶܐܣܬܳܐ ܕܶܝܢ ܫܰܪܺܝܪܬܳܐ ܕܰܐܠܳܗܳܐ ܩܰܝܳܡܳܐ ܗ̱ܝ܃ ܘܺܐܝܬܼ ܠܳܗ ܚܳܬܼܡܳܐ ܗܳܢܳܐ܂ ܘܝܳܕܼܰܥ ܡܳܪܝܳܐ ܠܰܐܝܠܶܝܢ ܕܕܼܺܝܠܶܗ ܐܶܢܽܘܢ܃ ܘܢܶܦܼܪܽܘܩ ܡܶܢ ܥܰܘܠܳܐ܂ ܟܽܠ ܕܩܳܪܶܐ ܠܰܫܡܶܗ ܕܡܳܪܝܳܐ܀
02:20 [ai]ܒܒܼܰܝܬܳܐ ܕܶܝܢ ܪܰܒܿܳܐ ܠܳܐ ܗ̱ܘܳܐ ܡܳܐܢܶܐ̈ ܕܕܼܰܗܒܼܳܐ ܒܰܠܚܽܘܕܼ ܐܰܘ ܕܣܺܐܡܳܐ ܐܺܝܬܼ ܒܶܗ܃ ܐܶܠܳܐ ܐܳܦܼ ܕܩܰܝܣܳܐ ܐܳܦܼ ܕܦܰܚܳܪܳܐ܃ ܡܶܢܗܽܘܢ ܠܺܐܝܩܳܪܳܐ܂ ܘܡܶܢܗܽܘܢ ܠܨܰܥܪܳܐ܂
02:21 [ai]ܐܶܢ ܐ̱ܢܳܫ ܗܳܟܼܺܝܠ ܢܕܼܰܟܿܶܐ ܢܰܦܼܫܶܗ ܡܶܢ ܗܳܠܶܝܢ܃ ܗܳܘܶܐ ܡܳܐܢܳܐ ܕܰܟܼܝܳܐ ܠܺܐܝܩܳܪܳܐ܃ ܕܥܳܗܶܢ ܠܚܽܘܫܳܚܳܐ ܕܡܳܪܶܗ܂ ܘܰܡܛܰܝܰܒܼ ܠܟܼܽܠ ܥܒܼܳܕܼ ܛܳܒܼ܀
02:22 [ai]ܡܶܢ ܟܽܠܗܶܝܢ ܪ̈ܓܼܺܝܓܼܳܬܼܳܐ ܕܛܰܠܝܽܘܬܼܳܐ ܥܪܽܘܩ܃ ܘܗܰܪ̱ܛ ܒܳܬܼܰܪ ܟܺܐܢܽܘܬܼܳܐ܂ ܘܗܰܝܡܳܢܽܘܬܼܳܐ܂ ܘܚܽܘܒܿܳܐ܂ ܘܰܫܠܳܡܳܐ ܥܰܡ ܐܰܝܠܶܝܢ ܕܩܳܪܶܝܢ ܠܡܳܪܰܢ ܒܠܶܒܿܳܐ ܕܰܟܼܝܳܐ܂
02:23 [ai]ܚܶܪ̈ܝܳܢܶܐ ܣܰܟܼܠܶܐ̈ ܐܰܝܠܶܝܢ ܕܰܕܼܠܳܐ ܡܰܪܕܿܽܘ ܐܶܢܽܘܢ܃ ܐܶܫܬܿܰܐ̱ܠ ܡܶܢܗܽܘܢ܂ ܝܳܕܼܰܥ ܐܰܢ̱ܬܿ ܓܶܝܪ܃ ܕܬܰܟܼܬܿܽܘܫܶܐ̈ ܡܰܘܠܕܼܺܝܢ܂
02:24 [ai]ܥܰܒܼܕܿܶܗ ܕܶܝܢ ܕܡܳܪܰܢ ܠܳܐ ܚܰܝܳܒܼ ܠܡܶܬܼܟܿܰܬܿܳܫܽܘ܃ ܐܶܠܳܐ ܕܢܶܗܘܶܐ ܡܰܟܿܺܝܟܼ ܠܘܳܬܼ ܟܽܠ ܢܳܫ ܘܡܰܠܦܼܳܢ܂ ܘܢܰܓܿܺܝܪܳܐ ܪܽܘܚܶܗ܃
02:25 [ai]ܕܢܶܗܘܶܐ ܪܳܕܼܶܐ ܠܰܐܝܠܶܝܢ ܕܡܶܬܼܚܪܶܝܢ ܠܩܽܘܒܼܠܶܗ ܒܡܰܟܿܺܝܟܼܽܘܬܼܳܐ܃ ܕܰܠܡܳܐ ܢܶܬܿܶܠ ܠܗܽܘܢ ܐܰܠܳܗܳܐ ܬܝܳܒܿܽܘܬܼܳܐ܂ ܘܢܶܕܿܥܽܘܢ ܫܪܳܪܳܐ܂
02:26 [ai]ܘܢܶܥ̱ܗܕܿܽܘܢ ܢܰܦܼܫܗܽܘܢ܂ ܘܢܶܦܼܪܩܽܘܢ ܡܶܢ ܦܰܚܶܗ ܕܣܳܛܳܢܳܐ܂ ܕܒܶܗ ܐܶܬܿܬܿܨܺܝܕܼܘ ܠܨܶܒܼܝܳܢܶܗ܀

next chapter