← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62055: 2Tim

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


04:01 [ai]ܡܣܰܗܶܕܼ ܐ̱ܢܳܐ ܠܳܟܼ ܩܕܼܳܡ ܐܰܠܳܗܳܐ ܘܡܳܪܰܢ ܝܶܫܽܘܥ ܡܫܺܝܚܳܐ܂ ܗܰܘ ܕܰܥܬܼܺܝܕܼ ܠܰܡܕܼܳܢ ܚܰܝ̈ܶܐ ܘܡܺܝܬܼܶܐ̈ ܒܓܶܠܝܳܢܳܐ ܕܡܰܠܟܿܽܘܬܼܶܗ܃
04:02 [ai]ܐܰܟܼܪܶܙ ܡܶܠܬܼܳܐ܂ ܘܩܽܘܡ ܒܰܚܦܼܺܝܛܽܘܬܼܳܐ ܒܙܰܒܼܢܳܐ ܘܰܕܼܠܳܐ ܙܰܒܼܢܳܐ܃ ܐܰܟܿܶܣ ܘܟܼܰܘܶܢ܂ ܒܟܽܠܳܗ ܡܰܓܿܪܰܬܼ ܪܽܘܚܳܐ ܘܝܽܘܠܦܿܳܢܳܐ܂
04:03 [ai]ܢܶܗܘܶܐ ܓܶܝܪ ܙܰܒܼܢܳܐ܃ ܕܰܠܝܽܘܠܦܿܳܢܶܐ ܚܠܺܝܡܳܐ ܠܳܐ ܢܶܫܬܿܰܡܥܽܘܢ܃ ܐܶܠܳܐ ܐܰܝܟܼ ܪ̈ܓܼܺܝܓܼܳܬܼܗܽܘܢ܂ ܢܰܣܓܿܽܘܢ ܠܢܰܦܼܫܗܽܘܢ ܡܰܠܦܼܳܢܶܐ̈ ܒܚܽܘܬܼܚܳܬܼܳܐ̈ ܕܡܰܫܡܰܥܬܼܗܽܘܢ܃
04:04 [ai]ܘܡܶܢ ܫܪܳܪܳܐ ܢܰܗܦܿܟܼܽܘܢ ܐܶܕܿܢܗܽܘܢ܃ ܠܫܽܘܥܝܳܬܼܳܐ̈ ܕܶܝܢ ܢܶܣܛܽܘܢ܀
04:05 [ai]ܐܰܢ̱ܬܿ ܕܶܝܢ ܗܘܰܝܬܿ ܥܺܝܪ ܒܟܽܠܡܶܕܶܡ܂ ܘܣܰܝܒܰܪ ܒܺܝܫܳܬܼܳܐ̈܂ ܘܰܥܒܼܳܕܼܳܐ ܥܒܼܶܕܼ ܕܰܡܣܰܒܿܪܳܢܳܐ܂ ܘܬܼܶܫܡܶܫܬܿܳܟܼ ܫܰܠܶܡ܂
04:06 [ai]ܐܶܢܳܐ ܓܶܝܪ ܡܶܟܿܺܝܠ ܡܶܬܼܢܰܩܶܐ ܐ̱ܢܳܐ܃ ܘܙܰܒܼܢܳܐ ܕܶܐܫܬܿܪܶܐ܃ ܡܛܳܐ܂
04:07 [ai]ܐܰܓܼܽܘܢܳܐ ܫܰܦܿܺܝܪܳܐ ܐܶܬܼܟܿܰܬܿܫܶܬܼ܂ ܘܪܶܗܛܝ ܫܰܠܡܶܬܼ܂ ܘܗܰܝܡܳܢܽܘܬܼܝ ܢܶܛܪܶܬܼ܂
04:08 [ai]ܘܡܶܢ ܗܳܫܳܐ ܢܛܺܝܪ ܠܺܝ ܟܠܺܝܠܳܐ ܕܟܺܐܢܽܘܬܼܳܐ܃ ܕܢܶܦܼܪܥܺܝܘܗ̱ܝ ܠܺܝ ܡܳܪܝ ܒܝܰܘܡܳܐ ܗܰܘ܂ ܕܗܽܘܝܽܘ ܕܰܝܳܢܳܐ ܟܺܐܢܳܐ܃ ܠܳܐ ܕܶܝܢ ܒܰܠܚܽܘܕܼ ܠܺܝ܃ ܐܶܠܳܐ ܐܳܦܼ ܠܰܐܝܠܶܝܢ ܕܰܐܚܶܒܼܘ ܠܓܼܶܠܝܳܢܶܗ܀
04:09 [ai]ܢܶܬܼܒܿܛܶܠ ܠܳܟܼ ܕܬܺܐܬܼܶܐ ܠܘܳܬܼܝ ܒܰܥܓܼܰܠ܂
04:10 [ai]ܕܺܡܰܐ ܓܶܝܪ ܫܰܒܼܩܰܢܝ܃ ܘܰܐܚܶܒܼ ܥܳܠܡܳܐ ܗܳܢܳܐ܂ ܘܶܐܙܰܠ ܠܶܗ ܠܬܼܶܣܰܠܳܘܢܺܝܩܺܐ܂ ܩܪܺܣܩܳܘܣ ܠܓܼܰܠܰܛܺܝܰܐ܂ ܛܺܛܳܘܣ ܠܕܼܰܠܡܰܛܺܝܰܐ܂
04:11 [ai]ܠܽܘܩܳܐ ܗ̱ܽܘ ܒܰܠܚܽܘܕܼܰܘܗ̱ܝ ܥܰܡܝ܂ ܠܡܰܪܩܳܘܣ ܕܒܰܪ ܘܰܐܝܬܿܳܝܗ̱ܝ ܥܰܡܳܟܼ܃ ܥܳܗܶܢ ܠܺܝ ܓܶܝܪ ܠܬܼܶܫܡܶܫܬܳܐ܂
04:12 [ai]ܠܛܽܘܟܼܺܝܩܳܘܣ ܕܶܝܢ ܫܰܕܿܪܶܬܼ ܠܶܐܦܼܶܣܳܘܣ܂
04:13 [ai]ܒܶܝܬܼ ܟܬܼܳܒܼܶܐ̈ ܕܶܝܢ ܕܫܶܒܼܩܶܬܼ ܒܰܛܪܳܘܰܐܘܣ ܠܘܳܬܼ ܩܰܪܦܿܳܘܣ܃ ܡܳܐ ܕܳܐܬܼܶܐ ܐܰܢ̱ܬܿ܂ ܐܰܝܬܿܳܝܗ̱ܝ܃ ܘܰܟܼܬܼܳܒܼܶܐ̈܂ ܝܰܬܿܺܝܪܳܐܺܝܬܼ ܟܿܶܪ̈ܟܿܶܐ ܕܰܡܓܼܰܠܶܐ̈܂
04:14 [ai]ܐܰܠܶܟܿܣܰܢܕܿܪܳܣ ܩܰܝܢܳܝܳܐ ܒܺܝܫܳܬܼܳܐ̈ ܣܰܓܿܺܝܳܐܬܼܳܐ̈ ܚܰܘܝܰܢܝ܃ ܦܪܰܥ ܠܶܗ ܡܳܪܰܢ ܐܰܝܟܼ ܥܒܼܳܕܼܰܘܗ̱ܝ̈܃
04:15 [ai]ܐܳܦܼ ܐܰܢ̱ܬܿ ܕܶܝܢ ܐܶܙܕܿܰܗ̱ܪ ܡܶܢܶܗ܃ ܛܳܒܼ ܓܶܝܪ ܙܩܺܝܦܼ ܠܽܘܩܒܼܰܠ ܡܶܠܰܝܢ̈܂
04:16 [ai]ܒܡܰܦܿܰܩ ܒܪܽܘܚܝ ܩܰܕܼܡܳܝܳܐ ܠܳܐ ܐ̱ܢܳܫ ܗܘܳܐ ܥܰܡܝ܃ ܐܶܠܳܐ ܟܽܠܗܽܘܢ ܫܰܒܼܩܽܘܢܝ܃ ܠܳܐ ܬܶܬܼܚܫܶܒܼ ܠܗܽܘܢ ܗܳܕܼܶܐ܂
04:17 [ai]ܡܳܪܝ ܕܶܝܢ ܩܳܡ ܠܺܝ ܘܚܰܝܠܰܢܝ܃ ܕܒܺܝ ܟܳܪܽܘܙܽܘܬܼܳܐ ܬܶܫܬܿܰܠܰܡ ܘܢܶܫܡܥܽܘܢ ܥܰܡ̱ܡܶܐ̈ ܟܽܠܗܽܘܢ܃ ܕܶܐܬܼܦܰܨܺܝܬܼ ܡܶܢ ܦܽܘܡܳܐ ܕܰܐܪܝܳܐ܂
04:18 [ai]ܘܰܢܦܼܰܨܶܝܢܝ ܡܳܪܝ ܡܶܢ ܟܽܠ ܥܒܼܳܕܼ ܒܺܝܫ܃ ܘܢܰܚܶܝܢܝ ܒܡܰܠܟܿܽܘܬܼܶܗ ܕܒܰܫܡܰܝܳܐ܃ ܕܠܶܗ ܫܽܘܒܼܚܳܐ ܠܥܳܠܰܡ ܥܳܠܡܺܝܢ܂ ܐܰܡܺܝܢ܀
04:19 [ai]ܗܰܒܼ ܫܠܳܡܳܐ ܠܰܦܿܪܺܝܣܩܶܠܰܐ܂ ܘܠܰܐܩܶܠܳܘܣ܂ ܘܰܠܒܼܰܝܬܳܐ ܕܳܐܢܺܣܺܝܦܼܳܘܪܳܘܣ܂
04:20 [ai]ܐܶܪܰܣܛܳܘܣ ܦܳܫ ܠܶܗ ܒܩܳܘܪܺܢܬܼܳܘܣ܂ ܛܪܳܘܦܼܺܝܡܳܘܣ ܕܶܝܢ ܫܒܼܰܩܬܿܶܗ ܟܰܕܼ ܟܪܺܝܗ܂ ܒܡܺܝܠܺܝܛܳܘܣ ܡܕܼܺܝܢ̱ܬܳܐ܂
04:21 [ai]ܢܶܬܼܒܿܛܶܠ ܠܳܟܼ ܕܰܩܕܼܳܡ ܣܰܬܼܘܳܐ ܬܺܐܬܼܶܐ܀ ܫܳܐܶܠ ܒܰܫܠܳܡܳܟܼ ܐܶܘܒܼܽܘܠܳܘܣ ܘܦܿܽܘܕܼܺܣܘܠܺܝܢܳܘܣ܂ ܘܰܩܠܰܘܕܼܺܝܰܐ ܘܰܐܚܶܐ̈ ܟܽܠܗܽܘܢ܂
04:22 [ai]ܡܳܪܰܢ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܟܼ܂ ܛܰܝܒܿܽܘܬܼܳܐ ܥܰܡܳܟܼ ܐܰܡܺܝܢ܀