The Comprehensive Aramaic Lexicon

0201 [ai]	ܐܰܢ̱ܬܿ ܕܶܝܢ ܡܰܠܶܠ ܡܶܕܶܡ ܕܝܳܐܶܐ ܠܝܽܘܠܦܿܳܢܳܐ ܚܠܺܝܡܳܐ܂
0202 [ai]	ܘܰܐܠܶܦܼ܂ ܕܢܶܗܘܽܘܢ ܩܰܫܺܝܫܶܐ̈ ܥܺܝܪܺܝܢ ܒܪ̈ܶܥܝܳܢܰܝܗܽܘܢ܂ ܘܢܶܗܘܽܘܢ ܢܰܟܼܦܿܺܝܢ܂ ܘܢܶܗܘܽܘܢ ܕܟܶܝܢ܂ ܘܢܶܗܘܽܘܢ ܚܠܺܝܡܺܝܢ ܒܗܰܝܡܳܢܽܘܬܼܳܐ ܘܰܒܚܽܘܒܿܳܐ ܘܒܼܰܡܣܰܝܒܿܪܳܢܽܘܬܼܳܐ܂
0203 [ai]	ܘܳܐܦܼ ܩܰܫܺܝܫܳܬܼܳܐ̈ ܗܳܟܼܰܢܳܐ܃ ܕܢܶܗܘܝܳܢ̈ ܒܶܐܣܟܿܺܡܳܐ ܕܝܳܐܶܐ ܠܕܼܶܚܠܰܬܼ ܐܰܠܳܗܳܐ܂ ܘܠܳܐ ܢܶܗܘܝܳܢ̈ ܐܳܟܼܠܳܢ̈ ܩܰܪ̈ܨܶܐ܂ ܘܠܳܐ ܢܶܗܘܝܳܢ̈ ܡܫܰܥܒܿܕܼܳܢ̈ ܠܚܰܡܪܳܐ ܣܰܓܿܺܝܳܐܐ܂ ܘܢܶܗܘܝܳܢ̈ ܡܰܠܦܼܳܢ̈ ܫܰܦܿܺܝܪ̈ܳܬܼܳܐ܂
0204 [ai]	ܘܰܡܢܰܟܿܦܼܳܢ̈ ܠܰܐܝܠܶܝܢ ܕܛܰܠܝܳܢ̈܂ ܕܿܢܶܪ̈ܚܡܳܢ ܒܰܥܠܰܝܗܶܝܢ̈ ܘܰܒܢܰܝܗܶܝܢ܂
0205 [ai]	ܘܢܶܗܘܝܳܢ̈ ܢܰܟܼܦܿܳܢ̈ ܘܩܰܕܿܺܝܫܳܢ̈܂ ܘܢܶܗܘܝܳܢ̈ ܝܳܨܦܿܳܢ̈ ܫܰܦܿܺܝܪ ܕܒܳܬܿܰܝܗܶܝܢ̈ ܘܡܶܫܬܿܰܥܒܿܕܼܳܢ̈ ܠܒܼܰܥܠܰܝܗܶܝܢ̈܃ ܕܠܳܐ ܐ̱ܢܳܫ ܢܓܼܰܕܿܶܦܼ ܥܰܠ ܡܶܠܬܼܶܗ ܕܰܐܠܳܗܳܐ܂
0206 [ai]	ܘܡܶܢ ܐܰܝܠܶܝܢ ܕܰܛܠܶܝܢ܂ ܗܳܟܼܰܢܳܐ ܒܥܺܝ܃ ܕܢܶܗܘܽܘܢ ܢܰܟܼܦܿܺܝܢ܂
0207 [ai]	ܒܟܽܠܡܶܕܶܡ ܕܶܝܢ ܕܡܽܘܬܼܳܐ ܒܢܰܦܼܫܳܟܼ ܚܰܘܳܐ ܒܟܽܠ ܥܒܼܳܕܼܶܐ̈ ܛܳܒܼܶܐ̈܃ ܘܰܒܡܰܠܦܼܳܢܽܘܬܼܳܟܼ ܬܶܗܘܶܐ ܠܳܟܼ ܡܶܠܬܼܳܐ ܚܠܺܝܡܬܳܐ܂
0208 [ai]	ܕܢܰܟܼܦܿܳܐ ܘܠܳܐ ܡܚܰܒܠܳܐ܂ ܘܠܳܐ ܐ̱ܢܳܫ ܒܳܣܰܪ ܠܳܗ܃ ܕܰܐܝܢܳܐ ܕܩܳܐܶܡ ܠܩܽܘܒܼܠܰܢ ܢܶܒܼܗܰܬܼ܃ ܟܰܕܼ ܠܳܐ ܢܶܫܟܿܰܚ ܕܢܺܐܡܰܪ ܥܠܰܝܢ ܡܶܕܶܡ ܕܰܣܢܶܐ ܿ܀ܿ܀ܿ
0209 [ai]	ܥܰܒܼܕܿܶܐ̈ ܠܡܳܪ̈ܰܝܗܽܘܢ ܢܶܫܬܿܰܥܒܿܕܼܽܘܢ ܒܟܽܠܡܶܕܶܡ ܘܢܶܫܬܿܰܦܼܪܽܘܢ܂ ܘܠܳܐ ܗܘܰܘ ܡܥܰܨܶܝܢ܂
0210 [ai]	ܘܠܳܐ ܗܘܰܘ ܓܿܳܢܒܺܝܢ܃ ܐܶܠܳܐ ܢܚܰܘܽܘܢ ܫܪܳܪܗܽܘܢ ܛܳܒܼܳܐ ܒܟܽܠܡܶܕܶܡ܃ ܕܰܢܨܰܒܿܬܼܽܘܢ ܒܟܽܠ ܡܶܕܶܡ ܝܽܘܠܦܿܳܢܶܗ ܕܰܐܠܳܗܳܐ ܡܰܚܝܳܢܰܢ܀
0211 [ai]	ܐܶܬܼܓܿܰܠܝܰܬܼ ܓܶܝܪ ܛܰܝܒܿܽܘܬܼܶܗ ܕܰܐܠܳܗܳܐ܂ ܡܰܚܝܰܬܼ ܟܽܠ ܠܰܒܼܢܰܝܢܳܫܳܐ ܟܽܠܗܽܘܢ܂
0212 [ai]	ܘܪܳܕܼܝܳܐ ܠܰܢ܃ ܕܢܶܟܼܦܿܽܘܪ ܒܪܽܘܫܥܳܐ ܘܒܼܰܪ̈ܓܼܺܝܓܼܳܬܼܳܐ ܕܥܳܠܡܳܐ܃ ܘܢܺܚܶܐ ܒܥܳܠܡܳܐ ܗܳܢܳܐ܂ ܒܢܰܟܼܦܿܽܘܬܼܳܐ܂ ܘܰܒܟܼܺܐܢܽܘܬܼܳܐ܂ ܘܰܒܕܼܶܚܠܰܬܼ ܐܰܠܳܗܳܐ܃
0213 [ai]	ܟܰܕܼ ܡܣܰܟܿܶܝܢܰܢ ܠܣܰܒܼܪܳܐ ܒܪܺܝܟܼܳܐ ܘܰܠܓܼܶܠܝܳܢܳܐ ܕܬܶܫܒܿܽܘܚܬܿܶܗ ܕܰܐܠܳܗܳܐ ܪܰܒܿܳܐ ܘܡܰܚܝܳܢܰܢ ܝܶܫܽܘܥ ܡܫܺܝܚܳܐ܂
0214 [ai]	ܕܗܽܘ ܝܰܗ̱ܒܼ ܢܰܦܼܫܶܗ ܚܠܳܦܼܰܝܢ܃ ܕܢܶܦܼܪܩܰܢ ܡܶܢ ܟܽܠ ܥܰܘܠܳܐ܃ ܘܰܢܕܼܰܟܿܶܝܢ ܠܢܰܦܼܫܶܗ ܥܰܡܳܐ ܚܰܕܼ̱ܬܼܳܐ ܕܚܳܣܶܡ ܒܰܥܒܼܳܕܼܶܐ̈ ܛܳܒܼܶܐ̈܀
0215 [ai]	ܗܳܠܶܝܢ ܡܰܠܶܠ ܘܰܒܥܺܝ܂ ܘܟܼܰܘܶܢ ܒܟܽܠ ܦܽܘܩܕܳܢ܂ ܘܠܳܐ ܐ̱ܢܳܫ ܢܰܒܼܣܶܐ ܒܳܟܼ܂

next chapter