The Comprehensive Aramaic Lexicon

0301 [ai]	ܘܰܗܘܰܝܬܿ ܡܰܥ̱ܗܶܕܼ ܠܗܽܘܢ܃ ܕܿܰܠܪ̈ܺܫܶܐ ܘܰܠܫܰܠܺܝܛܳܢܶܐ̈ ܢܶܫܬܿܰܡܥܽܘܢ ܘܢܶܫܬܿܰܥܒܿܕܼܽܘܢ܂ ܘܰܕܼܢܶܗܘܽܘܢ ܥܬܼܺܝܕܼܺܝܢ ܠܟܼܽܠ ܥܒܼܳܕܼ ܛܳܒܼ܂
0302 [ai]	ܘܥܰܠ ܐ̱ܢܳܫ ܠܳܐ ܢܓܼܰܕܿܦܼܽܘܢ܂ ܘܠܳܐ ܢܶܗܘܽܘܢ ܡܶܬܼܟܿܰܬܿܫܺܝܢ܃ ܐܶܠܳܐ ܢܶܗܘܽܘܢ ܡܰܟܿܺܝܟܼܺܝܢ܂ ܘܰܒܟܼܽܠ ܡܶܕܶܡ ܢܚܰܘܽܘܢ ܒܰܣܺܝܡܽܘܬܼܗܽܘܢ ܠܘܳܬܼ ܟܽܠܗܽܘܢ ܒܢܰܝܢܳܫܳܐ܂
0303 [ai]	ܐܳܦܼ ܚܢܰܢ ܓܶܝܪ ܡܶܢ ܩܕܼܺܝܡ ܕܠܳܐ ܪܶܥܝܳܢܳܐ ܗ̱ܘܰܝܢ܂ ܘܰܕܼܠܳܐ ܦܝܳܣܳܐ܂ ܘܛܳܥܶܝܢ܂ ܗ̱ܘܰܝܢ܂ ܘܰܡܫܰܥܒܿܕܼܺܝܢ ܗ̱ܘܰܝܢ ܠܰܐܪ̈ܓܼܺܝܓܼܳܬܼܳܐ ܡܫܰܚܠܦܼܳܬܼܳܐ̈܂ ܘܰܒܒܼܺܝܫܽܘܬܼܳܐ ܘܒܼܰܚܣܳܡܳܐ ܡܶܬܼܗܰܦܿܟܼܺܝܢ ܗ̱ܘܰܝܢ܂ ܘܰܣܢܺܝܐܺܝܢ ܗ̱ܘܰܝܢ܂ ܐܳܦܼ ܚܰܕܼ ܠܚܰܕܼ ܣܳܢܶܝܢ ܗ̱ܘܰܝܢ܂
0304 [ai]	ܟܰܕܼ ܕܶܝܢ ܐܶܬܼܓܿܰܠܝܰܬܼ ܒܰܣܺܝܡܽܘܬܼܶܗ ܘܰܡܪܰܚܡܳܢܽܘܬܼܶܗ ܕܰܐܠܳܗܳܐ ܡܰܚܝܳܢܰܢ܃
0305 [ai]	ܠܳܐ ܒܰܥܒܼܳܕܼܶܐ̈ ܕܙܰܕܿܺܝܩܽܘܬܼܳܐ ܕܰܥܒܼܰܕܼܢ܃ ܐܶܠܳܐ ܒܪ̈ܰܚܡܰܘܗ̱ܝ ܕܺܝܠܶܗ܃ ܐܰܚܝܰܢ ܒܰܣܚܳܬܼܳܐ ܕܡܰܘܠܳܕܼܳܐ ܕܡܶܢ ܕܪܺܝܫ܂ ܘܰܒܚܽܘܕܿܳܬܼܳܐ ܕܪܽܘܚܳܐ ܕܩܽܘܕܼܫܳܐ܂
0306 [ai]	ܗܳܝ ܕܶܐܫܰܕܼ ܥܠܰܝܢ ܥܰܬܿܺܝܪܳܐܺܝܬܼ ܒܝܰܕܼ ܝܶܫܽܘܥ ܡܫܺܝܚܳܐ ܡܰܚܝܳܢܰܢ܃
0307 [ai]	ܕܰܒܼܛܰܝܒܿܽܘܬܼܶܗ ܢܶܙܕܿܰܕܿܰܩ܃ ܘܢܶܗܘܶܐ ܝܳܪ̈ܬܿܶܐ ܒܣܰܒܼܪܳܐ ܒܚܰܝ̈ܶܐ ܕܰܠܥܳܠܰܡ܀
0308 [ai]	ܡܗܰܝܡܢܳܐ ܗ̱ܝ ܡܶܠܬܼܳܐ܂ ܘܰܒܗܳܠܶܝܢ ܨܳܒܼܶܐ ܐ̱ܢܳܐ܃ ܕܳܐܦܼ ܐܰܢ̱ܬܿ ܗܘܰܝܬܿ ܡܫܰܪܰܪ ܠܗܽܘܢ܃ ܕܢܶܬܼܒܿܛܶܠ ܠܗܽܘܢ ܠܡܶܦܼܠܰܚ ܥܒܼܳܕܼܶܐ̈ ܛܳܒܼܶܐ̈܃ ܐܰܝܠܶܝܢ ܕܗܰܝܡܶܢܘ ܒܰܐܠܳܗܳܐ܂ ܗܳܠܶܝܢ ܐܶܢܶܝܢ̈ ܛܳܒܼܳܢ̈ ܘܡܰܘܬܿܪ̈ܳܢ ܠܰܒܼܢܰܝܢܳܫܳܐ܂
0309 [ai]	ܡܶܢ ܒܥܳܬܼܳܐ ܕܶܝܢ ܣܰܟܼܠܬܼܳܐ܂ ܘܡܶܢ ܬܰܫܥܝܳܬܼܳܐ̈ ܕܿܫܰܪ̈ܒܼܳܬܼܳܐ܂ ܘܡܶܢ ܚܶܪ̈ܝܳܢܶܐ܂ ܘܡܶܢ ܬܰܟܼܬܿܽܘܫܶܐ̈ ܕܿܣܳܦܼܪ̈ܶܐ܃ ܐܶܫܬܿܰܐ̱ܠ܂ ܝܽܘܬܼܪܳܢ ܓܶܝܪ ܠܰܝܬܿ ܒܗܶܝܢ܃ ܘܰܣܪ̈ܺܝܩܳܢ ܐܶܢܶܝܢ̈܂
0310 [ai]	ܡܶܢ ܓܰܒܼܪܳܐ ܗܶܪܶܣܺܝܰܘܛܳܐ܃ ܡܶܢ ܒܳܬܼܰܪ ܚܕܼܳܐ ܙܒܼܰܢ ܘܬܼܰܪܬܿܶܝܢ ܕܡܰܪܬܿܶܐ ܐܰܢ̱ܬܿ ܠܶܗ܃ ܐܶܫܬܿܰܐ̱ܠ܂
0311 [ai]	ܘܰܗܘܰܝܬܿ ܝܳܕܼܰܥ܃ ܕܡܰܢ ܕܗܳܟܼܰܢܳܐ ܗ̱ܘ܂ ܡܥܰܩܰܡ ܗ̱ܽܘ ܘܚܳܛܶܐ܂ ܘܗܽܘ ܚܰܝܶܒܼ ܢܰܦܼܫܶܗ܀
0312 [ai]	ܡܳܐ ܕܫܰܕܿܪܶܬܼ ܠܘܳܬܼܳܟܼ ܠܰܐܪܛܶܡܰܐ ܐܰܘ ܠܛܽܘܟܼܺܝܩܳܘܣ܃ ܢܶܬܼܒܿܛܶܠ ܠܳܟܼ܃ ܕܬܺܐܬܼܶܐ ܠܘܳܬܼ ܠܢܺܝܩܳܦܿܳܘܠܺܝܣ܂ ܬܰܡܳܢ ܓܶܝܪ ܣܳܡܶܬܼ ܒܪܶܥܝܳܢܝ ܕܰܐܣܬܿܶܐ܂
0313 [ai]	ܥܰܠ ܙܺܢܰܐ ܕܶܝܢ ܣܳܦܼܪܳܐ ܘܥܰܠ ܐܰܦܿܳܠܳܘ܂ ܢܶܬܼܒܿܛܶܠ ܠܳܟܼ܃ ܕܰܬܼܠܰܘܶܐ ܐܶܢܽܘܢ ܫܰܦܿܺܝܪ܃ ܕܿܡܶܕܶܡ ܠܳܐ ܢܶܚܣܰܪ ܠܗܽܘܢ܂
0314 [ai]	ܘܢܺܐܠܦܿܽܘܢ ܐܳܦܼ ܐܰܝܠܶܝܢ ܕܕܼܺܝܠܰܢ ܐܶܢܽܘܢ܃ ܕܢܶܗܘܽܘܢ ܦܳܠܚܺܝܢ ܥܒܼܳܕܼܶܐ̈ ܛܳܒܼܶܐ̈ ܒܨܶܒܼܘܳܬܼܳܐ̈ ܕܳܐܠܨܳܢ̈܃ ܕܠܳܐ ܢܶܗܘܽܘܢ ܕܠܳܐ ܦܿܺܐܪ̈ܶܐ܀
0315 [ai]	ܫܳܐܠܺܝܢ ܒܰܫܠܳܡܳܟܼ ܟܽܠܗܽܘܢ ܐܰܝܠܶܝܢ ܕܥܰܡܝ ܐܶܢܽܘܢ܀ ܫܰܐܠ ܒܰܫܠܳܡܳܐ ܕܟܽܠܗܽܘܢ ܐܰܝܠܶܝܢ ܕܪܳܚܡܺܝܢ ܠܰܢ ܒܗܰܝܡܳܢܽܘܬܼܳܐ܂ ܛܰܝܒܿܽܘܬܼܳܐ ܥܰܡ ܟܽܠܟܼܽܘܢ܂ ܐܰܡܺܝܢ܀