← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62058: Heb (Hebrews)

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


02:01 [ai]ܡܶܛܽܠ ܗܳܢܳܐ ܚܰܝܳܒܼܺܝܢܰܢ܃ ܕܝܰܬܿܺܝܪܳܐܺܝܬܼ ܢܶܗܘܶܐ ܙܗܺܝܪܺܝܢ ܒܡܶܕܶܡ ܕܰܫܡܰܥܢ ܕܠܳܐ ܢܶܦܿܶܠ܂
02:02 [ai]ܐܶܢ ܓܶܝܪ ܡܶܠܬܼܳܐ ܕܶܐܬܼܡܰܠܠܰܬܼ ܒܝܰܕܼ ܡܰܠܰܐܟܼܶܐ̈ ܐܶܫܬܿܰܪܪܰܬܼ܃ ܘܟܼܽܠ ܕܫܰܡܥܳܗ ܘܰܥܒܼܰܪ ܥܠܶܝܗ ܩܰܒܿܶܠ ܦܽܘܪܥܳܢܳܐ ܒܟܺܐܢܽܘܬܼܳܐ܃
02:03 [ai]ܐܰܝܟܿܰܢܳܐ ܚܢܰܢ ܢܶܥܪܽܘܩ܃ ܐܶܢ ܢܰܒܼܣܶܐ ܥܰܠ ܐܰܝܠܶܝܢ ܕܗܶܢܽܘܢ ܐܶܢܽܘܢ ܚܰܝܰܝܢ̈܃ ܗܳܢܽܘܢ ܕܫܰܪܺܝܘ ܡܶܢ ܡܳܪܰܢ ܠܡܶܬܼܡܰܠܳܠܽܘ܂ ܘܡܶܢ ܐܰܝܠܶܝܢ ܕܡܶܢܶܗ ܫܡܰܥܘ܂ ܒܰܢ ܐܶܫܬܿܰܪܰܪܘ܃
02:04 [ai]ܟܰܕܼ ܣܳܗܶܕܼ ܥܠܰܝܗܽܘܢ ܐܰܠܳܗܳܐ܂ ܒܳܐܬܼܘܳܬܼܳܐ̈܂ ܘܰܒܬܼܶܕܼܡܪ̈ܳܬܼܳܐ܂ ܘܰܒܚܰܝܠܶܐ̈ ܡܫܰܚܠܦܼܶܐ̈܂ ܘܰܒܦܼܽܘܠܳܓܼܶܐ̈ ܕܪܽܘܚܳܐ ܕܩܽܘܕܼܫܳܐ܃ ܕܶܐܬܼܺܝܗܶܒܼܘ ܐܰܝܟܼ ܨܶܒܼܝܳܢܶܗ܀
02:05 [ai]ܠܳܐ ܗ̱ܘܳܐ ܓܶܝܪ ܠܡܰܠܰܐܟܼܶܐ̈ ܫܰܥܒܿܶܕܼ ܥܳܠܡܳܐ ܕܰܥܬܼܺܝܕܼ܂ ܕܰܥܠܰܘܗ̱ܝ ܡܡܰܠܠܺܝܢܰܢ܃
02:06 [ai]ܐܶܠܳܐ ܐܰܝܟܼ ܕܡܰܣܗܶܕܼ ܟܬܼܳܒܼܳܐ ܘܳܐܡܰܪ܂ ܡܳܢܰܘ ܓܰܒܼܪܳܐ ܕܶܥ̱ܗܰܕܿܬܿܳܝܗ̱ܝ܃ ܘܰܒܪܶܗ ܕܐ̱ܢܳܫܳܐ ܕܰܣܥܰܪܬܿܳܝܗ̱ܝ܂
02:07 [ai]ܐܰܡܶܟܼܬܿܳܝܗ̱ܝ ܩܰܠܺܝܠ ܡܶܢ ܡܰܠܰܐܟܼܶܐ̈܂ ܬܿܶܫܒܿܽܘܚܬܳܐ ܘܺܐܝܩܳܪܳܐ ܣܳܡܬܿ ܒܪܺܝܫܶܗ܂ ܘܰܐܫܠܶܛܬܿܳܝܗ̱ܝ ܒܰܥܒܼܳܕܼܳܐ ܕܺܐܝܕܼܰܝܟܿ̈܂
02:08 [ai]ܘܟܼܽܠ ܡܶܕܶܡ ܫܰܥܒܿܶܕܿܬܿ ܬܚܶܝܬܼ ܪ̈ܶܓܼܠܰܘܗ̱ܝ܂ ܒܗܳܝ ܕܶܝܢ ܕܟܽܠ ܡܶܕܶܡ ܫܰܥܒܿܶܕܼ ܠܶܗ܃ ܠܳܐ ܫܒܼܰܩ ܡܶܕܶܡ ܕܠܳܐ ܡܫܰܥܒܿܰܕܼ܂ ܗܳܫܳܐ ܕܶܝܢ ܠܳܐ ܥܕܼܰܟܿܺܝܠ ܚܳܙܶܝܢܰܢ܃ ܕܟܽܠܡܶܕܶܡ ܡܫܰܥܒܿܰܕܼ ܠܶܗ܂
02:09 [ai]ܗܰܘ ܕܶܝܢ ܕܡܰܟܼ ܩܰܠܺܝܠ ܡܶܢ ܡܰܠܰܐܟܼܶܐ̈܂ ܚܳܙܶܝܢܰܢ܃ ܕܗܽܘܝܽܘ ܝܶܫܽܘܥ ܡܶܛܽܠ ܚܰܫܳܐ ܕܡܰܘܬܿܶܗ܂ ܘܬܼܶܫܒܿܽܘܚܬܳܐ ܘܺܐܝܩܳܪܳܐ ܣܺܝܡ ܒܪܺܝܫܶܗ܂ ܗܽܘ ܓܶܝܪ ܒܛܰܝܒܿܽܘܬܼܶܗ ܐܰܠܳܗܳܐ ܚܠܳܦܼ ܟܽܠܢܳܫ ܛܥܶܡ ܡܰܘܬܳܐ܂
02:10 [ai]ܝܳܐܶܐ ܗ̱ܘܳܐ ܓܶܝܪ ܠܗܰܘ ܕܟܽܠ ܒܺܐܝܕܼܶܗ ܘܟܼܽܠ ܡܶܛܽܠܳܬܼܶܗ܃ ܘܰܒܢܰܝܳܐ ܣܰܓܿܺܝܶܐܐ̈ ܐܰܥܶܠ ܠܬܼܶܫܒܿܽܘܚܬܳܐ܃ ܕܰܠܪܺܝܫܳܐ ܕܚܰܝܰܝܗܽܘܢ̈ ܒܚܰܫܶܗ ܢܶܓܼܡܪܺܝܘܗ̱ܝ
02:11 [ai]ܗܰܘ ܓܶܝܪ ܕܩܰܕܿܶܫ ܘܗܳܢܽܘܢ ܕܶܐܬܼܩܰܕܿܰܫܘ܃ ܡܶܢ ܚܰܕܼ ܐܶܢܽܘܢ ܟܽܠܗܽܘܢ܂ ܡܶܛܽܠ ܗܳܢܳܐ ܠܳܐ ܒܗܶܬܼ ܕܢܶܩܪܶܐ ܐܶܢܽܘܢ ܐܰܚܰܘܗ̱ܝ̈܃
02:12 [ai]ܟܰܕܼ ܐܳܡܰܪ܂ ܐܶܣܰܒܰܪ ܫܡܳܟܼ ܠܰܐܚܰܝ̈܃ ܘܰܒܓܼܰܘܳܗ ܕܥܺܕ̱ܿܬܳܐ ܐܶܫܰܒܿܚܳܟܼ܂
02:13 [ai]ܘܬܼܽܘܒܼ܂ ܕܶܐܢܳܐ ܐܶܗܘܶܐ ܬܟܼܺܝܠ ܥܠܰܘܗ̱ܝ܂ ܘܬܼܽܘܒܼ܂ ܗܳܐ ܐܶܢܳܐ ܘܰܒܢܰܝܳܐ ܕܝܰܗ̱ܒܼ ܠܺܝ ܐܰܠܳܗܳܐ܂
02:14 [ai]ܡܶܛܽܠ ܓܶܝܪ ܕܿܰܒܼܢܰܝܳܐ ܐܶܫܬܰܘܬܿܰܦܼܘ ܒܒܼܶܣܪܳܐ ܘܰܕܼܡܳܐ܃ ܐܳܦܼ ܗܽܘ ܒܿܳܗ ܒܰܕܼܡܽܘܬܼܳܐ ܐܶܫܬܰܘܬܿܰܦܼ ܒܗܶܝܢ ܒܗܳܠܶܝܢ܃ ܕܰܒܼܡܰܘܬܿܶܗ ܢܒܰܛܶܠ ܠܡܰܢ ܕܰܐܚܺܝܕܼ ܫܽܘܠܛܳܢܳܐ ܕܡܰܘܬܳܐ܂ ܕܺܐܝܬܼܰܘܗ̱ܝ ܣܳܛܳܢܳܐ܃
02:15 [ai]ܘܢܶܫܪܶܐ ܠܗܳܢܽܘܢ ܐܰܝܠܶܝܢ ܕܰܒܼܕܼܶܚܠܬܼܳܐ ܕܡܰܘܬܳܐ ܒܟܽܠܗܽܘܢ ܚܰܝܰܝܗܽܘܢ̈ ܡܫܰܥܒܿܕܼܺܝܢ ܗ̱ܘܰܘ ܠܥܰܒܼܕܿܽܘܬܼܳܐ܂
02:16 [ai]ܠܳܐ ܗ̱ܘܳܐ ܓܶܝܪ ܥܰܠ ܡܰܠܰܐܟܼܶܐ̈ ܡܰܫܠܰܛ ܗ̱ܘܳܐ ܡܰܘܬܳܐ܃ ܐܶܠܳܐ ܥܰܠ ܙܰܪܥܶܗ ܕܰܐܒܼܪܳܗܳܡ ܡܰܫܠܰܛ ܗ̱ܘܳܐ܂
02:17 [ai]ܡܶܛܽܠ ܗܳܢܳܐ ܙܳܕܼܶܩ ܗ̱ܘܳܐ܃ ܕܰܒܼܟܼܽܠ ܡܶܕܶܡ ܢܶܬܿܕܰܡܶܐ ܠܰܐܚܰܘܗ̱ܝ̈܃ ܕܢܶܗܘܶܐ ܡܪܰܚܡܳܢܳܐ ܘܪܰܒܼ ܟܿܽܘܡܪ̈ܶܐ ܡܗܰܝܡܢܳܐ ܒܕܰܐܠܳܗܳܐ܃ ܘܢܶܗܘܶܐ ܡܚܰܣܶܐ ܥܰܠ ܚܛܳܗܰܘܗ̱ܝ̈ ܕܥܰܡܳܐ܂
02:18 [ai]ܒܗܳܝ ܓܶܝܪ ܕܗܽܘ ܚܰܫ ܘܶܐܬܼܢܰܣܺܝ܃ ܡܶܫܟܿܰܚ ܕܰܢܥܰܕܿܰܪ ܠܰܐܝܠܶܝܢ ܕܡܶܬܼܢܰܣܶܝܢ܀

next chapter