← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62058: Heb (Hebrews)

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


03:01 [ai]ܡܶܟܿܺܝܠ ܐܰܚܰܝ̈ ܩܰܕܿܺܝܫܶܐ̈ ܕܶܐܬܼܩܪܺܝܬܿܽܘܢ ܒܩܶܪܝܳܢܳܐ ܕܡܶܢ ܫܡܰܝܳܐ܃ ܚܙܰܐܘܽܗ̱ܝ ܠܗܳܢܳܐ ܫܠܺܝܚܳܐ ܘܪܰܒܼ ܟܿܽܘܡܪ̈ܶܐ ܕܬܰܘܕܿܺܝܬܼܰܢ ܝܶܫܽܘܥ ܡܫܺܝܚܳܐ܃
03:02 [ai]ܕܰܡܗܰܝܡܰܢ ܠܡܰܢ ܕܥܰܒܼܕܿܶܗ ܐܰܝܟܼ ܡܽܘܫܶܐ ܒܟܽܠܶܗ ܒܰܝܬܿܶܗ܂
03:03 [ai]ܣܰܓܿܺܝܳܐܐ ܗ̱ܝ ܓܶܝܪ ܬܶܫܒܿܽܘܚܬܿܶܗ ܕܗܳܢܳܐ ܛܳܒܼ ܡܶܢ ܕܡܽܘܫܶܐ܃ ܐܰܝܟܿܰܢܳܐ ܕܣܰܓܿܺܝ ܐܺܝܩܳܪܳܐ ܕܒܰܢܳܝܶܗ ܕܒܰܝܬܳܐ ܛܳܒܼ ܡܶܢ ܒܶܢܝܳܢܶܗ܂
03:04 [ai]ܟܽܠ ܒܰܝܬܳܐ ܓܶܝܪ ܡܶܢ ܐ̱ܢܳܫ ܗ̱ܽܘ ܡܶܬܼܒܿܢܶܐ܃ ܗܰܘ ܕܶܝܢ ܕܒܳܢܶܐ ܟܽܠ܂ ܐܰܠܳܗܳܐ ܗ̱ܘ܂
03:05 [ai]ܘܡܽܘܫܶܐ ܐܰܝܟܼ ܥܰܒܼܕܿܳܐ ܐܶܬܼܗܰܝܡܰܢ ܒܒܼܰܝܬܳܐ ܟܽܠܶܗ܃ ܠܣܳܗܕܿܽܘܬܼܳܐ ܕܰܐܝܠܶܝܢ ܕܰܥܬܼܺܝܕܼܳܢ̈ ܗ̱ܘܰܝ̈ ܠܡܶܬܼܡܰܠܳܠܽܘ ܒܺܐܝܕܼܶܗ܃
03:06 [ai]ܡܫܺܝܚܳܐ ܕܶܝܢ ܐܰܝܟܼ ܒܪܳܐ ܥܰܠ ܒܰܝܬܿܶܗ܂ ܘܺܐܝܬܼܰܘܗ̱ܝ ܒܰܝܬܿܶܗ ܚܢܰܢ܃ ܐܶܢ ܥܕܼܰܡܳܐ ܠܚܰܪܬܼܳܐ ܢܶܐܚܽܘܕܼ ܓܰܠܝܽܘܬܼ ܐܰܦܿܶܐ̈ ܘܫܽܘܒܼܗܳܪܳܐ ܕܣܰܒܼܪܶܗ܂
03:07 [ai]ܡܶܛܽܠ ܕܶܐܡܪܰܬܼ ܪܽܘܚܳܐ ܕܩܽܘܕܼܫܳܐ܂ ܕܝܰܘܡܳܢܳܐ ܐܶܢ ܒܩܳܠܶܗ ܬܶܫܡܥܽܘܢ܃
03:08 [ai]ܠܳܐ ܬܩܰܫܽܘܢ ܠܶܒܿܰܘܳܬܼܟܼܽܘܢ̈ ܠܡܰܪܓܿܳܙܽܘܬܼܶܗ܃ ܐܰܝܟܼ ܡܡܰܪ̈ܡܪܳܢܶܐ ܘܰܐܝܟܼ ܝܰܘܡܳܐ ܕܢܶܣܝܽܘܢܳܐ ܕܿܰܒܼܡܰܕܼܒܪܳܐ܃
03:09 [ai]ܕܢܰܣܝܽܘܢܝ ܐܰܒܼܳܗܰܝܟܿܽܘܢ̈܃ ܘܰܒܩܰܘ ܚܙܰܘ ܥܒܼܳܕܼܰܝ̈ ܐܰܪܒܥܺܝܢ ܫܢܺܝܢ̈܂
03:10 [ai]ܡܶܛܽܠ ܗܳܢܳܐ ܡܶܐܢܰܬܼ ܠܺܝ ܒܕܳܪܳܐ ܗܰܘ ܘܶܐܡܪܶܬܼ܃ ܕܥܰܡܳܐ ܗ̱ܘ ܕܛܳܥܶܐ ܠܶܒܗܽܘܢ܂ ܘܗܶܢܽܘܢ ܠܳܐ ܺܝܕܼܰܥܘ ܐܽܘܪ̈ܚܳܬܼܝ܂
03:11 [ai]ܘܰܐܝܟܼ ܕܺܝܡܺܝܬܼ ܒܪܽܘܓܼܙܝ ܕܠܳܐ ܢܶܥܠܽܘܢ ܠܰܢܝܳܚܬܿܝ܀
03:12 [ai]ܐܶܙܕܿܰܗ̱ܪܘ ܗܳܟܼܺܝܠ ܐܰܚܰܝ̈܃ ܕܰܠܡܳܐ ܢܶܗܘܶܐ ܒܐ̱ܢܳܫ ܡܶܢܟܼܽܘܢ ܠܶܒܿܳܐ ܒܺܝܫܳܐ ܕܠܳܐ ܡܗܰܝܡܶܢ܃ ܘܬܼܶܦܼܪܩܽܘܢ ܡܶܢ ܐܰܠܳܗܳܐ ܚܰܝܳܐ܂
03:13 [ai]ܐܶܠܳܐ ܒܥܰܘ ܡܶܢ ܢܰܦܼܫܟܼܽܘܢ ܟܽܠܗܽܘܢ ܝܰܘܡܳܬܼܳܐ̈܂ ܥܕܼܰܡܳܐ ܠܝܰܘܡܳܐ ܕܡܶܬܼܩܪܶܐ ܝܰܘܡܳܢܳܐ܃ ܕܠܳܐ ܢܶܬܼܩܰܫܶܐ ܐ̱ܢܳܫ ܡܶܢܟܼܽܘܢ ܒܛܳܥܝܽܘܬܼܳܐ ܕܰܚܛܺܝܬܼܳܐ ܿ܀ܿ܀ܿ
03:14 [ai]ܐܶܬܼܚܰܠܰܛܢ ܓܶܝܪ ܥܰܡ ܡܫܺܝܚܳܐ܃ ܐܶܢ ܡܶܢ ܪܺܝܫܺܝܬܼܳܐ ܘܰܥܕܼܰܡܳܐ ܠܰܐ̱ܚܪܳܝܬܳܐ܃ ܒܶܗ ܒܰܩܝܳܡܳܐ ܗܳܢܳܐ ܫܰܪܺܝܪܳܐ ܢܚܰܡܣܶܢ܂
03:15 [ai]ܐܰܝܟܿܰܢܳܐ ܕܰܐܡܺܝܪ܂ ܕܝܰܘܡܳܢܳܐ ܐܶܢ ܒܰܪ̱ܬܼ ܩܳܠܶܗ ܬܶܫܡܥܽܘܢ܃ ܠܳܐ ܬܩܰܫܽܘܢ ܠܶܒܿܰܘܳܬܼܟܼܽܘܢ̈ ܠܡܰܪܓܿܳܙܽܘܬܼܶܗ܂
03:16 [ai]ܡܰܢ ܐܶܢܽܘܢ ܓܶܝܪ ܗܳܢܽܘܢ ܕܰܫܡܰܥܘ ܘܰܐܪܓܿܙܽܘܗ̱ܝ܂ ܠܳܐ ܟܽܠܗܽܘܢ ܗܳܠܶܝܢ ܕܰܢܦܼܰܩܘ ܡܶܢ ܡܶܨܪܶܝܢ ܒܝܰܕܼ ܡܽܘܫܶܐ܃
03:17 [ai]ܘܒܼܰܐܝܠܶܝܢ ܡܶܐܢܰܬܼ ܠܶܗ ܐܰܪܒܥܺܝܢ ܫܢܺܝܢ̈܂ ܐܶܠܳܐ ܒܗܳܢܽܘܢ ܕܰܚܛܰܘ ܘܓܼܰܪ̈ܡܰܝܗܽܘܢ ܢܦܼܰܠܘ ܒܡܰܕܼܒܪܳܐ܃
03:18 [ai]ܘܥܰܠ ܐܰܝܠܶܝܢ ܺܝܡܳܐ ܕܠܳܐ ܢܶܥܠܽܘܢ ܠܰܢܝܳܚܬܿܶܗ܃ ܐܶܠܳܐ ܥܰܠ ܗܳܢܽܘܢ ܕܠܳܐ ܐܶܬܿܛܦܿܺܝܣܘ܃
03:19 [ai]ܘܚܳܙܶܝܢܰܢ ܕܠܳܐ ܐܶܫܟܿܰܚܘ ܠܡܶܥܰܠ ܡܶܛܽܠ ܕܠܳܐ ܗܰܝܡܶܢܘ܀

next chapter