The Comprehensive Aramaic Lexicon

05:01 [ai]	ܟܽܠ ܪܰܒܿ ܟܿܽܘܡܪ̈ܶܐ ܓܶܝܪ ܕܡܶܢ ܒܢܰܝܢܳܫܳܐ ܗܳܘܶܐ܃ ܚܠܳܦܼ ܒܢܰܝܢܳܫܳܐ ܩܳܐܶܡ ܥܰܠ ܐܰܝܠܶܝܢ ܕܕܼܰܐܠܳܗܳܐ ܐܶܢܶܝܢ̈܃ ܕܰܢܩܰܪܶܒܼ ܩܽܘܪ̈ܒܳܢܶܐ ܘܕܼܶܒܼܚܶܐ̈ ܚܠܳܦܼ ܚܛܳܗܶܐ̈܃
05:02 [ai]	ܐܰܝܢܳܐ ܕܡܶܫܟܿܰܚ ܕܢܰܡܶܟܼ ܢܰܦܼܫܶܗ܃ ܘܢܶܚܰܫ ܥܰܡ ܐܰܝܠܶܝܢ ܕܠܳܐ ܝܳܕܼܥܺܝܢ ܘܛܳܥܶܝܢ܃ ܡܶܛܽܠ ܕܳܐܦܼ ܗܽܘ ܟܪܺܝܗܽܘܬܼܳܐ ܠܒܼܺܝܫ܃
05:03 [ai]	ܘܡܶܛܽܠܳܬܼܳܗ ܚܰܝܳܒܼ ܗ̱ܽܘ܂ ܕܰܐܝܟܿܰܢܳܐ ܕܰܚܠܳܦܼ ܥܰܡܳܐ܃ ܗܳܟܼܰܢܳܐ ܐܳܦܼ ܚܠܳܦܼ ܢܰܦܼܫܶܗ ܢܩܰܪܶܒܼ ܥܰܠ ܚܛܳܗܰܘܗ̱ܝ̈܂
05:04 [ai]	ܘܠܳܐ ܗ̱ܘܳܐ ܠܢܰܦܼܫܶܗ ܐ̱ܢܳܫ ܢܳܣܶܒܼ ܐܺܝܩܳܪܳܐ܃ ܐܶܠܳܐ ܐܰܝܢܳܐ ܕܡܶܬܼܩܪܶܐ ܡܶܢ ܐܰܠܳܗܳܐ܂ ܐܰܝܟܿܰܢܳܐ ܕܰܐܗܪܽܘܢ܂
05:05 [ai]	ܗܳܟܼܰܢܳܐ ܐܳܦܼ ܡܫܺܝܚܳܐ ܠܳܐ ܗ̱ܘܳܐ ܢܰܦܼܫܶܗ ܫܰܒܿܰܚ ܕܢܶܗܘܶܐ ܪܰܒܿ ܟܿܽܘܡܪ̈ܶܐ܃ ܐܶܠܳܐ ܗܰܘ ܕܶܐܡܰܪ ܠܶܗ܂ ܕܒܶܪܝ ܐܰܢ̱ܬܿ܃ ܐܶܢܳܐ ܝܰܘܡܳܢܳܐ ܺܝܠܶܕܿܬܿܳܟܼ܃
05:06 [ai]	ܐܰܝܟܼ ܕܳܐܦܼ ܒܕܽܘܟܿܬܼܳܐ ܐ̱ܚܪܺܬܼܳܐ ܐܶܡܰܪ܂ ܕܰܐܢ̱ܬܿ ܗ̱ܽܘ ܟܽܘܡܪܳܐ ܠܥܳܠܰܡ ܒܰܕܼܡܽܘܬܼܶܗ ܕܡܰܠܟܿܺܝܙܕܼܶܩ܂
05:07 [ai]	ܐܳܦܼ ܟܰܕܼ ܒܶܣܪܳܐ ܠܒܼܺܝܫ ܗ̱ܘܳܐ܃ ܒܳܥܽܘܬܼܳܐ ܘܬܼܰܟܼܫܶܦܼܬܳܐ ܒܰܓܼܥܳܬܼܳܐ ܚܰܝܠܬܼܳܢܺܝܬܼܳܐ ܘܰܒܕܼܶܡܥܶܐ̈ ܩܰܪܶܒܼ ܗ̱ܘܳܐ ܠܡܰܢ ܕܡܶܫܟܿܰܚ ܗ̱ܘܳܐ܃ ܡܶܢ ܡܰܘܬܳܐ ܕܢܰܚܶܝܘܗ̱ܝ܂ ܘܶܐܫܬܿܡܰܥ܂
05:08 [ai]	ܘܟܼܰܕܼ ܛܳܒܼ ܒܪܳܐ ܐܺܝܬܼܰܘܗ̱ܝ܃ ܡܶܢ ܕܶܚܠܬܼܳܐ ܘܚܰܫܶܐ̈ ܕܰܣܒܼܰܠ܃ ܝܰܠܦܿܳܗ ܠܡܶܫܬܿܰܡܥܳܢܽܘܬܼܳܐ܂
05:09 [ai]	ܘܗܳܟܼܰܢܳܐ ܐܶܬܼܓܡܰܪ܃ ܘܰܗܘܳܐ ܠܟܼܽܠܗܽܘܢ ܐܰܝܠܶܝܢ ܕܡܶܫܬܿܰܡܥܺܝܢ ܠܶܗ܂ ܥܶܠܬܼܳܐ ܕܚܰܝ̈ܶܐ ܕܰܠܥܳܠܰܡ܃
05:10 [ai]	ܘܶܐܫܬܿܰܡܰܗ ܡܶܢ ܐܰܠܳܗܳܐ ܪܰܒܿ ܟܿܽܘܡܪ̈ܶܐ ܒܰܕܼܡܽܘܬܼܶܗ ܕܡܰܠܟܿܺܝܙܕܼܶܩ܂
05:11 [ai]	ܥܠܰܘܗ̱ܝ ܕܶܝܢ ܥܰܠ ܗܳܢܳܐ ܡܰܠܟܿܺܝܙܕܼܶܩ܃ ܣܰܓܿܺܝܳܐܐ ܗ̱ܝ ܠܰܢ ܡܶܠܬܼܳܐ ܠܡܺܐܡܪܳܗ ܘܥܰܣܩܳܐ ܠܰܡܦܼܰܫܳܩܽܘܬܼܳܗ܃ ܡܶܛܽܠ ܕܰܗܘܰܝܬܿܽܘܢ ܠܟܼܽܘܢ ܟܿܪ̈ܺܝܗܶܐ ܒܡܰܫܡܰܥܬܼܟܼܽܘܢ܂
05:12 [ai]	ܚܰܝܳܒܼܺܝܢ ܗܘܰܝܬܿܽܘܢ ܓܶܝܪ ܡܰܠܦܼܳܢܶܐ̈ ܠܡܶܗܘܳܐ܃ ܡܶܛܽܠ ܕܙܰܒܼܢܳܐ ܠܟܼܽܘܢ ܒܝܽܘܠܦܿܳܢܳܐ܃ ܗܳܫܳܐ ܕܶܝܢ ܬܽܘܒܼ ܣܢܺܝܩܺܝܢ ܐܢ̱ܬܿܽܘܢ ܕܬܺܐܠܦܿܽܘܢ܃ ܐܰܝܠܶܝܢ ܐܶܢܶܝܢ̈ ܟܬܼܺܝܒܼܳܬܼܳܐ̈ ܩܰܕܼܡܳܝܳܬܼܳܐ̈ ܕܪܺܝܫ ܡܶܠܰܘܗ̱ܝ̈ ܕܰܐܠܳܗܳܐ܂ ܘܰܗܘܰܝܬܿܽܘܢ ܠܟܼܽܘܢ ܣܢܺܝܩܶܐ̈ ܥܰܠ ܚܰܠܒܼܳܐ܃ ܘܠܳܐ ܥܰܠ ܡܶܐܟܼܽܘܠܬܳܐ ܫܰܪܺܝܪܬܳܐ܂
05:13 [ai]	ܟܽܠܢܳܫ ܕܶܝܢ ܕܡܶܐܟܼܽܘܠܬܿܶܗ ܚܰܠܒܼܳܐ ܗ̱ܘ܃ ܠܳܐ ܡܰܦܿܰܣ ܒܡܶܠܬܼܳܐ ܕܟܺܐܢܽܘܬܼܳܐ܂ ܡܶܛܽܠ ܕܫܰܒܼܪܳܐ ܗ̱ܘ܃
05:14 [ai]	ܕܰܓܼܡܺܝܪ̈ܶܐ ܗ̱ܝ ܕܶܝܢ ܡܶܐܟܼܽܘܠܬܳܐ ܫܰܪܺܝܪܬܳܐ܃ ܐܰܝܠܶܝܢ ܕܡܶܛܽܠ ܕܰܡܕܼܰܪܫܺܝܢ܂ ܐܶܬܼܢܰܦܿܰܩܘ ܪ̈ܶܓܼܫܰܝܗܽܘܢ ܠܡܶܦܼܪܰܫ ܛܳܒܼܬܼܳܐ ܘܒܼܺܝܫܬܳܐ܀

next chapter