The Comprehensive Aramaic Lexicon

07:01 [ai]	ܗܳܢܳܐ ܕܶܝܢ ܡܰܠܟܿܺܝܙܕܼܶܩ ܐܺܝܬܼܰܘܗ̱ܝ ܡܠܶܟܼ ܫܳܠܺܝܡ܂ ܟܽܘܡܪܳܐ ܕܰܐܠܳܗܳܐ ܡܪܰܝܡܳܐ܂ ܘܗܽܘ ܐܰܪܥܶܗ ܠܰܐܒܼܪܳܗܳܡ܃ ܟܰܕܼ ܗܦܼܰܟܼ ܡܶܢ ܚܰܪܒܿܳܐ ܕܡܰܠܟܿܶܐ̈܂ ܘܒܼܰܪܟܼܶܗ܂
07:02 [ai]	ܘܠܶܗ ܦܪܰܫ ܐܰܒܼܪܳܗܳܡ ܡܰܥܣܳܪ̈ܶܐ ܡܶܢ ܟܽܠܡܶܕܶܡ ܕܺܐܝܬܼ ܗ̱ܘܳܐ ܥܰܡܶܗ܂ ܡܶܬܼܦܿܰܫܰܩ ܕܶܝܢ ܫܡܶܗ ܡܰܠܟܿܳܐ ܕܟܺܐܢܽܘܬܼܳܐ܂ ܘܬܼܽܘܒܼ ܡܠܶܟܼ ܫܳܠܺܝܡ܂ ܕܺܐܝܬܼܰܘܗ̱ܝ ܡܰܠܟܿܳܐ ܕܰܫܠܳܡܳܐ܂
07:03 [ai]	ܕܠܳܐ ܐܰܒܼܽܘܗ̱ܝ ܘܠܳܐ ܐܶܡܶܗ ܐܶܬܼܟܿܬܼܶܒܼܘ ܒܫܰܪ̈ܒܼܳܬܼܳܐ܂ ܘܠܳܐ ܪܺܝܫܺܝܬܼܳܐ ܕܝܰܘܡܰܘܗ̱ܝ̈ ܘܠܳܐ ܫܽܘܠܳܡܳܐ ܕܚܰܝܰܘܗ̱ܝ̈܃ ܐܶܠܳܐ ܒܰܕܼܡܽܘܬܼܳܐ ܕܰܒܼܪܶܗ ܕܰܐܠܳܗܳܐ܂ ܡܩܰܘܝܳܐ ܟܽܘܡܪܽܘܬܼܶܗ ܠܥܳܠܰܡ܂
07:04 [ai]	ܚܙܰܘ ܕܶܝܢ܃ ܟܡܳܐ ܪܰܒܼ ܗܳܢܳܐ܃ ܕܰܐܒܼܪܳܗܳܡ ܪܺܝܫ ܐܰܒܼܳܗܳܬܼܳܐ̈܂ ܠܶܗ ܝܰܗ̱ܒܼ ܡܰܥܣܳܪ̈ܶܐ ܕܿܪ̈ܺܫܝܳܬܼܳܐ܂
07:05 [ai]	ܐܰܝܠܶܝܢ ܓܶܝܪ ܡܶܢ ܒܢܰܝ ܠܶܘܺܝ ܕܰܡܩܰܒܿܠܺܝܢ ܗ̱ܘܰܘ ܟܽܘܡܪܽܘܬܼܳܐ܃ ܦܽܘܩܕܳܢܳܐ ܐܺܝܬܼ ܗ̱ܘܳܐ ܠܗܽܘܢ ܕܢܳܡܽܘܣܳܐ܃ ܕܢܶܣܒܼܽܘܢ ܡܰܥܣܳܪ̈ܶܐ ܡܶܢ ܥܰܡܳܐ܂ ܗܶܢܽܘܢ ܡܶܢ ܐܰܚܰܝܗܽܘܢ̈܃ ܟܰܕܼ ܐܳܦܼ ܗܶܢܽܘܢ ܡܶܢ ܚܰܨܶܗ ܕܰܐܒܼܪܳܗܳܡ ܢܦܼܰܩܘ܂
07:06 [ai]	ܗܳܢܳܐ ܕܶܝܢ ܕܠܳܐ ܟܬܼܺܝܒܼ ܒܫܰܪ̈ܒܼܳܬܼܗܽܘܢ܃ ܡܰܥܣܳܪ̈ܶܐ ܫܩܰܠ ܡܶܢ ܐܰܒܼܪܳܗܳܡ܂ ܘܒܼܰܪܟܼܶܗ ܠܗܰܘ ܕܩܰܒܿܶܠ ܡܽܘܠܟܿܳܢܳܐ܂
07:07 [ai]	ܕܠܳܐ ܚܶܪܝܳܢܳܐ ܕܶܝܢ ܗܰܘ ܕܰܒܼܨܺܝܪ܃ ܡܶܬܼܒܰܪܰܟܼ ܡܶܢ ܗܰܘ ܕܰܡܝܰܬܿܰܪ ܡܶܢܶܗ܂
07:08 [ai]	ܘܗܳܪܟܿܳܐ ܒܢܰܝܢܳܫܳܐ ܕܡܳܝܬܿܺܝܢ ܢܳܣܒܺܝܢ ܡܰܥܣܳܪ̈ܶܐ܃ ܠܗܰܠ ܕܶܝܢ ܗܰܘ ܕܰܐܣܗܶܕܼ ܥܠܰܘܗ̱ܝ ܟܬܼܳܒܼܳܐ܃ ܕܚܰܝ ܗ̱ܽܘ܂
07:09 [ai]	ܘܰܐܝܟܼ ܐ̱ܢܳܫ ܢܺܐܡܰܪ܂ ܒܝܰܕܼ ܐܰܒܼܪܳܗܳܡ ܐܳܦܼ ܠܶܘܺܝ ܗܰܘ ܕܿܡܰܥܣܳܪ̈ܶܐ ܢܳܣܶܒܼ ܗ̱ܘܳܐ܃ ܐܳܦܼ ܗܽܘ ܐܶܬܼܥܰܣܰܪ܂
07:10 [ai]	ܥܕܼܰܟܿܺܝܠ ܓܶܝܪ ܒܚܰܨܶܗ ܗܘܳܐ ܕܰܐܒܼܽܘܗ̱ܝ܃ ܟܰܕܼ ܐܰܪܥܶܗ ܠܡܰܠܟܿܺܝܙܕܼܶܩ܂
07:11 [ai]	ܐܶܠܽܘ ܗܳܟܼܺܝܠ ܓܡܺܝܪܽܘܬܼܳܐ ܒܝܰܕܼ ܟܽܘܡܪܽܘܬܼܳܐ ܕܠܶܘܳܝܶܐ̈ ܐܺܝܬܼܶܝܗ ܗ̱ܘܳܬܼ܃ ܕܒܳܗ ܣܺܝܡ ܢܳܡܽܘܣܳܐ ܠܥܰܡܳܐ܃ ܠܡܳܢܳܐ ܡܶܬܼܒܿܥܶܐ ܗ̱ܘܳܐ ܟܽܘܡܪܳܐ ܐ̱ܚܪܺܢܳܐ ܕܰܢܩܽܘܡ ܒܰܕܼܡܽܘܬܼܶܗ ܕܡܰܠܟܿܺܝܙܕܼܶܩ܂ ܐܶܡܰܪ ܕܶܝܢ ܕܒܰܕܼܡܽܘܬܼܶܗ ܕܰܐܗܪܽܘܢ ܢܶܗܘܶܐ܂
07:12 [ai]	ܐܶܠܳܐ ܐܰܝܟܿܰܢܳܐ ܕܰܗܘܳܐ ܫܽܘܚܠܳܦܼܳܐ ܒܟܽܘܡܪܽܘܬܼܳܐ܃ ܗܳܟܼܰܢܳܐ ܗܘܳܐ ܫܽܘܚܠܳܦܼܳܐ ܐܳܦܼ ܒܢܳܡܽܘܣܳܐ܂
07:13 [ai]	ܗܰܘ ܓܶܝܪ ܕܶܐܬܼܶܐܡܰܪ ܥܠܰܘܗ̱ܝ ܗܳܠܶܝܢ܃ ܡܶܢ ܫܰܪܒܿܬܼܳܐ ܗ̱ܘ ܐ̱ܚܪܺܬܼܳܐ ܐܶܬܼܺܝܠܶܕܼ܃ ܕܐ̱ܢܳܫ ܡܶܡܬܼܽܘܡ ܡܶܢܳܗ ܠܳܐ ܫܰܡܶܫ ܒܡܰܕܼܒܿܚܳܐ܂
07:14 [ai]	ܓܰܠܝܳܐ ܗ̱ܝ ܓܶܝܪ܃ ܕܡܶܢ ܺܝܗܽܘܕܼܳܐ ܕܢܰܚ ܡܳܪܰܢ܃ ܡܶܢ ܫܰܪܒܿܬܼܳܐ ܕܠܳܐ ܐܶܡܰܪ ܥܠܶܝܗ ܡܽܘܫܶܐ ܡܶܕܶܡ ܥܰܠ ܟܽܘܡܪܽܘܬܼܳܐ܂
07:15 [ai]	ܘܝܰܬܿܺܝܪܳܐܺܝܬܼ ܬܽܘܒܼ ܺܝܕܼܺܝܥܳܐ ܒܗܳܝ ܕܶܐܡܰܪ܃ ܕܒܰܕܼܡܽܘܬܼܶܗ ܕܡܰܠܟܿܺܝܙܕܼܶܩ ܩܳܐܶܡ ܟܽܘܡܪܳܐ ܐ̱ܚܪܺܢܳܐ܃
07:16 [ai]	ܗܰܘ ܕܠܳܐ ܗ̱ܘܳܐ ܒܢܳܡܽܘܣܳܐ ܕܦܽܘܩܕܳܢܶܐ̈ ܦܿܰܓܼܪ̈ܳܢܳܝܶܐ ܗܳܘܶܐ܃ ܐܶܠܳܐ ܒܚܰܝܠܳܐ ܕܚܰܝ̈ܶܐ ܕܠܳܐ ܡܶܫܬܪܶܝܢ܂
07:17 [ai]	ܡܰܣܗܶܕܼ ܓܶܝܪ ܥܠܰܘܗ̱ܝ܃ ܕܰܐܢ̱ܬܿ ܗ̱ܽܘ ܟܽܘܡܪܳܐ ܠܥܳܠܰܡ ܒܰܕܼܡܽܘܬܼܶܗ ܕܡܰܠܟܿܺܝܙܕܼܶܩ܂
07:18 [ai]	ܫܽܘܚܠܳܦܼܳܐ ܕܶܝܢ ܕܰܗܘܳܐ ܠܦܼܽܘܩܕܳܢܳܐ ܩܰܕܼܡܳܝܳܐ܃ ܡܶܛܽܠ ܡܚܺܝܠܽܘܬܼܶܗ܃ ܘܰܕܼܝܽܘܬܼܪܳܢ ܠܰܝܬܿ ܗ̱ܘܳܐ ܒܶܗ܂
07:19 [ai]	ܡܶܕܶܡ ܓܶܝܪ ܠܳܐ ܓܡܰܪ ܢܳܡܽܘܣܳܐ܂ ܥܰܠ ܕܶܝܢ ܚܠܳܦܼܰܘܗ̱ܝ܃ ܣܰܒܼܪܳܐ ܕܰܡܝܰܬܿܰܪ ܡܶܢܶܗ܂ ܕܒܶܗ ܡܶܬܼܩܰܪܒܼܺܝܢܰܢ ܠܰܐܠܳܗܳܐ܂
07:20 [ai]	ܘܫܰܪܪܶܗ ܠܰܢ ܒܡܰܘܡܳܬܼܳܐ̈܂
07:21 [ai]	ܗܳܢܽܘܢ ܓܶܝܪ ܕܠܳܐ ܡܰܘܡܳܬܼܳܐ̈ ܗܘܰܘ ܟܿܽܘܡܪ̈ܶܐ܃ ܗܳܢܳܐ ܕܶܝܢ ܒܡܰܘܡܳܬܼܳܐ̈܃ ܐܰܝܟܼ ܕܶܐܡܰܪ ܠܶܗ ܒܝܰܕܼ ܕܿܰܘܺܝܕܼ܂ ܕܺܝܡܳܐ ܡܳܪܝܳܐ ܘܠܳܐ ܢܕܼܰܓܿܶܠ܃ ܕܰܐܢ̱ܬܿ ܗ̱ܽܘ ܟܽܘܡܪܳܐ ܠܥܳܠܰܡ ܒܰܕܼܡܽܘܬܼܶܗ ܕܡܰܠܟܿܺܝܙܕܼܶܩ܂
07:22 [ai]	ܗܳܢܳܐ ܟܽܠܶܗ ܡܝܰܬܿܪܳܐ ܕܺܝܰܬܼܺܩܺܐ ܗܳܕܼܶܐ ܕܰܗܘܳܐ ܒܿܳܗ ܥܰܪܳܒܼܳܐ ܝܶܫܽܘܥ܂
07:23 [ai]	ܘܗܳܢܽܘܢ ܗܘܰܘ ܟܿܽܘܡܪ̈ܶܐ ܣܰܓܿܺܝܶܐܐ̈܃ ܡܶܛܽܠ ܕܡܳܝܬܿܺܝܢ ܗ̱ܘܰܘ܃ ܘܠܳܐ ܡܶܫܬܿܰܒܼܩܺܝܢ ܗ̱ܘܰܘ ܕܰܢܩܰܘܽܘܢ܂
07:24 [ai]	ܗܳܢܳܐ ܕܶܝܢ ܡܶܛܽܠ ܕܰܠܥܳܠܰܡ ܩܰܝܳܡ܃ ܠܳܐ ܥܳܒܼܪܳܐ ܟܽܘܡܪܽܘܬܼܶܗ܃
07:25 [ai]	ܘܡܶܫܟܿܰܚ ܠܡܰܚܳܝܽܘ ܠܥܳܠܰܡ܃ ܠܰܐܝܠܶܝܢ ܕܡܶܬܼܩܰܪܒܼܺܝܢ ܒܺܐܝܕܼܶܗ ܠܰܐܠܳܗܳܐ܂ ܚܰܝ ܗ̱ܽܘ ܓܶܝܪ ܒܟܽܠܙܒܼܰܢ ܘܡܰܣܶܩ ܨܠܽܘܬܼܳܐ ܚܠܳܦܼܰܝܗܽܘܢ܂
07:26 [ai]	ܕܰܐܝܟܼ ܗܳܢܳܐ ܓܶܝܪ ܟܽܘܡܪܳܐ ܐܳܦܼ ܙܳܕܼܶܩ ܗ̱ܘܳܐ ܠܰܢ܃ ܕܰܟܼܝܳܐ܂ ܕܠܳܐ ܒܺܝܫܽܘ܂ ܘܰܕܼܠܳܐ ܛܽܘܠܫܳܐ܂ ܕܦܰܪܺܝܩ ܡܶܢ ܚܛܳܗܶܐ̈ ܘܰܡܪܰܝܰܡ ܠܥܶܠ ܡܶܢ ܫܡܰܝܳܐ܃
07:27 [ai]	ܘܠܰܝܬܿ ܠܶܗ ܐܽܘܠܨܳܢܳܐ ܟܽܠܝܽܘܡ܂ ܐܰܝܟܼ ܪ̈ܰܒܰܝ ܟܿܽܘܡܪ̈ܶܐ܃ ܕܠܽܘܩܕܼܰܡ ܚܠܳܦܼ ܚܛܳܗܰܘܗ̱ܝ̈ ܢܩܰܪܶܒܼ ܕܶܒܼܚܶܐ̈܂ ܘܗܳܝܕܶܝܢ܂ ܚܠܳܦܼ ܥܰܡܳܐ܂ ܗܳܕܼܶܐ ܓܶܝܪ ܥܰܒܼܕܿܳܗ ܚܕܼܳܐ ܙܒܼܰܢ ܒܢܰܦܼܫܶܗ ܕܩܰܪܶܒܼ܂
07:28 [ai]	ܢܳܡܽܘܣܳܐ ܓܶܝܪ ܒܢܰܝܢܳܫܳܐ ܗܽܘ ܟܿܪ̈ܺܝܗܶܐ ܡܩܺܝܡ ܟܿܽܘܡܪ̈ܶܐ܃ ܡܶܠܬܼܳܐ ܕܶܝܢ ܕܡܰܘܡܳܬܼܳܐ̈ ܕܰܗܘܳܬܼ ܒܳܬܼܰܪ ܢܳܡܽܘܣܳܐ܃ ܒܪܳܐ ܓܡܺܝܪܳܐ ܠܥܳܠܰܡ ܿ܀ܿ܀ܿ

next chapter