The Comprehensive Aramaic Lexicon

09:01 [ai]	ܒܩܰܕܼܡܳܝܬܳܐ ܕܶܝܢ ܐܺܝܬܼ ܗ̱ܘܳܐ ܒܿܳܗ ܦܽܘܩܳܕܼܶܐ̈ ܕܬܶܫܡܶܫܬܳܐ ܘܒܼܶܝܬܼ ܩܽܘܕܼܫܳܐ ܥܳܠܡܳܢܳܝܳܐ܂
09:02 [ai]	ܡܰܫܟܿܢܳܐ ܓܶܝܪ ܩܰܕܼܡܳܝܳܐ ܕܶܐܬܼܥܒܼܶܕܼ܃ ܐܺܝܬܼ ܗ̱ܘܳܐ ܒܶܗ ܡܢܳܪܬܳܐ ܘܦܼܳܬܼܽܘܪܳܐ ܘܰܠܚܶܡ ܐܰܦܿܶܐ̈܃ ܘܡܶܬܼܩܪܶܐ ܗ̱ܘܳܐ ܒܶܝܬܼ ܩܽܘܕܼܫܳܐ܂
09:03 [ai]	ܡܰܫܟܿܢܳܐ ܕܶܝܢ ܓܰܘܳܝܳܐ ܕܰܠܓܼܰܘ ܡܶܢ ܐܰܦܿܰܝ̈ ܬܰܪܥܳܐ ܕܿܰܬܼܪ̈ܶܝܢ܃ ܡܶܬܼܩܪܶܐ ܗ̱ܘܳܐ ܩܕܼܽܘܫ ܩܽܘܕܼܫܶܐ̈܂
09:04 [ai]	ܘܺܐܝܬܼ ܗ̱ܘܳܐ ܒܶܗ ܒܶܝܬܼ ܒܶܣܡܶܐ̈ ܕܕܼܰܗܒܼܳܐ ܘܩܺܒܼܽܘܬܼܳܐ ܕܕܼܺܝܰܬܼܺܩܺܐ ܕܰܩܪܺܝܡܳܐ ܟܽܠܳܗ ܒܕܰܗܒܼܳܐ܂ ܘܺܐܝܬܼ ܒܿܳܗ ܩܶܣܛܳܐ ܕܕܼܰܗܒܼܳܐ܃ ܗܳܝ ܕܺܐܝܬܼ ܗ̱ܘܳܐ ܒܿܳܗ ܡܰܢ̱ܢܳܐ ܘܫܰܒܼܛܳܐ ܕܰܐܗܪܽܘܢ ܗܰܘ ܕܰܐܦܼܪܰܥ܂ ܘܠܽܘܚܶܐ̈ ܕܕܼܺܝܰܬܼܺܩܺܐ܂
09:05 [ai]	ܘܰܠܥܶܠ ܡܶܢܳܗ ܟܿܪ̈ܽܘܒܼܶܐ ܕܫܽܘܒܼܚܳܐ ܕܡܰܛܠܺܝܢ ܥܰܠ ܚܽܘܣܳܝܳܐ܂ ܠܳܐ ܗ̱ܘܳܐ ܕܶܝܢ ܙܰܒܼܢܳܐ ܗ̱ܘ܃ ܕܢܺܐܡܰܪ ܥܰܠ ܚܕܼܳܐ ܚܕܼܳܐ ܡܶܢ ܗܳܠܶܝܢ ܕܗܳܟܼܰܢܳܐ ܡܰܬܼܩܢܳܢ̈ ܗ̱ܘܰܝ̈܂
09:06 [ai]	ܘܰܠܡܰܫܟܿܢܳܐ ܒܰܪܳܝܳܐ ܒܟܽܠܙܒܼܰܢ ܥܳܐܠܺܝܢ ܗ̱ܘܰܘ ܟܿܽܘܡܪ̈ܶܐ ܘܰܡܫܰܠܡܺܝܢ ܗ̱ܘܰܘ ܬܶܫܡܶܫܬܿܗܽܘܢ܂
09:07 [ai]	ܠܡܰܫܟܿܢܳܐ ܕܶܝܢ ܕܰܠܓܼܰܘ ܡܶܢܶܗ܃ ܚܕܼܳܐ ܗ̱ܘ ܒܫܰܢ̱ܬܳܐ ܒܰܠܚܽܘܕܼܰܘܗ̱ܝ ܥܳܐܶܠ ܗ̱ܘܳܐ ܪܰܒܿ ܟܽܘܡ̈̈ܪܶܐ܃ ܒܰܕܼܡܳܐ ܗܰܘ ܕܰܡܩܰܪܶܒܼ ܗ̱ܘܳܐ ܚܠܳܦܼ ܢܰܦܼܫܶܗ ܘܰܚܠܳܦܼ ܣܰܟܼܠܽܘܬܼܶܗ ܕܥܰܡܳܐ܂
09:08 [ai]	ܒܗܳܕܼܶܐ ܕܶܝܢ ܡܰܘܕܿܥܳܐ ܗ̱ܘܳܬܼ ܪܽܘܚܳܐ ܕܩܽܘܕܼܫܳܐ܃ ܕܠܳܐ ܐܶܬܼܓܿܰܠܝܰܬܼ ܥܕܼܰܟܿܺܝܠ ܐܽܘܪܚܳܐ ܕܩܰܕܿܺܝܫܶܐ̈܃ ܟܡܳܐ ܙܰܒܼܢܳܐ ܕܺܐܝܬܼ ܗ̱ܘܳܐ ܩܝܳܡܳܐ ܠܡܰܫܟܿܢܳܐ ܩܰܕܼܡܳܝܳܐ܂
09:09 [ai]	ܘܺܐܝܬܼܰܘܗ̱ܝ ܗ̱ܘܳܐ ܡܰܬܼܠܳܐ ܗܳܢܳܐ܃ ܠܙܰܒܼܢܳܐ ܗܰܘ ܕܒܶܗ ܩܽܘܪ̈ܒܳܢܶܐ ܘܕܼܶܒܼܚܶܐ̈ ܡܶܬܼܩܰܪܒܼܺܝܢ ܗ̱ܘܰܘ܃ ܐܰܝܠܶܝܢ ܕܠܳܐ ܡܶܫܟܿܚܺܝܢ ܗ̱ܘܰܘ ܠܡܶܓܼܡܰܪ ܬܺܐܪܬܿܶܗ ܕܡܰܢ ܕܰܡܩܰܪܶܒܼ ܠܗܽܘܢ܃
09:10 [ai]	ܐܶܠܳܐ ܒܡܶܐܟܼܠܳܐ ܘܰܒܡܰܫܬܿܝܳܐ ܒܰܠܚܽܘܕܼ܂ ܘܰܒܡܰܥܡܽܘܕܼܝܳܬܼܳܐ̈ ܕܰܙܢܺܝܢ̈ ܙܢܺܝܢ̈܂ ܕܺܐܝܬܼܰܝܗܶܝܢ ܦܽܘܩܳܕܼܶܐ̈ ܕܒܶܣܪܳܐ܂ ܕܣܺܝܡܺܝܢ ܥܕܼܰܡܳܐ ܠܙܰܒܼܢܳܐ ܕܬܽܘܪܳܨܳܐ܀
09:11 [ai]	ܡܫܺܝܚܳܐ ܕܶܝܢ ܕܶܐܬܼܳܐ܂ ܗܘܳܐ ܪܰܒܿܟܽܘܡ̈̈ܪܶܐ ܕܛܳܒܼܳܬܼܳܐ̈ ܕܰܣܥܰܪ܃ ܘܥܰܠ ܠܡܰܫܟܿܢܳܐ ܪܰܒܿܳܐ ܘܰܡܫܰܠܡܳܢܳܐ ܕܠܳܐ ܥܒܼܺܝܕܼ ܒܺܐܝܕܼܰܝܳܐ̈܂ ܘܠܳܐ ܗ̱ܘܳܐ ܡܶܢ ܗܳܠܶܝܢ ܒܶܪ̈ܝܳܬܼܳܐ܂
09:12 [ai]	ܘܠܳܐ ܥܰܠ ܒܰܕܼܡܳܐ ܕܿܨܺܦܼܪ̈ܳܝܶܐ ܘܰܕܼܥܶܓܼܠܶܐ̈܃ ܐܶܠܳܐ ܒܰܕܼܡܳܐ ܕܢܰܦܼܫܶܗ ܥܰܠ ܚܕܼܳܐ ܙܒܼܰܢ ܠܒܼܶܝܬܼ ܡܰܩܕܿܫܳܐ܃ ܘܶܐܫܟܿܰܚ ܦܽܘܪܩܳܢܳܐ ܕܰܠܥܳܠܰܡ܂
09:13 [ai]	ܐܶܢ ܓܶܝܪ ܕܡܳܐ ܕܿܨܺܦܼܪ̈ܳܝܶܐ ܘܰܕܼܥܶܓܼܠܶܐ̈ ܘܩܶܛܡܳܐ ܕܰܥܓܼܶܠܬܳܐ ܡܶܬܼܪܣܶܣ ܗ̱ܘܳܐ ܥܰܠ ܐܰܝܠܶܝܢ ܕܡܶܬܿܛܰܡܺܐܝܢ ܗ̱ܘܰܘ܃ ܘܰܡܩܰܕܿܶܫ ܠܗܽܘܢ ܠܕܼܽܘܟܿܳܝܳܐ ܕܒܶܣܪܗܽܘܢ܃
09:14 [ai]	ܟܡܳܐ ܗܳܟܼܺܝܠ ܝܰܬܿܺܝܪܳܐܺܝܬܼ ܕܡܶܗ ܕܰܡܫܺܝܚܳܐ܂ ܕܰܒܼܪܽܘܚܳܐ ܕܰܠܥܳܠܰܡ ܢܰܦܼܫܶܗ ܩܰܪܶܒܼ ܕܠܳܐ ܡܽܘܡ ܠܰܐܠܳܗܳܐ܃ ܢܕܼܰܟܿܶܐ ܬܺܐܪܬܿܰܢ ܡܶܢ ܥܒܼܳܕܼܶܐ̈ ܡܺܝܬܼܶܐ̈܃ ܕܰܢܫܰܡܶܫ ܠܰܐܠܳܗܳܐ ܚܰܝܳܐ܂
09:15 [ai]	ܡܶܛܽܠ ܗܳܢܳܐ ܗܽܘ ܗܘܳܐ ܡܶܨܥܳܝܳܐ ܕܕܼܺܝܰܬܼܺܩܺܐ ܚܕܼܰܬܼܳܐ܃ ܕܰܒܼܡܰܘܬܿܶܗ ܗܽܘ ܗܘܳܐ ܦܽܘܪܩܳܢܳܐ ܠܰܐܝܠܶܝܢ ܕܰܥܒܼܰܪܘ ܥܰܠ ܕܺܝܰܬܼܺܩܺܐ ܩܰܕܼܡܳܝܬܳܐ܃ ܕܢܶܣܒܼܽܘܢ ܡܽܘܠܟܿܳܢܳܐ܂ ܐܰܝܠܶܝܢ ܕܶܐܬܼܩܪܺܝܘ ܠܝܳܪܬܿܽܘܬܼܳܐ ܕܰܠܥܳܠܰܡ܂
09:16 [ai]	ܐܰܝܟܿܳܐ ܓܶܝܪ ܕܺܐܝܬܼ ܕܺܝܰܬܼܺܩܺܐ܃ ܡܰܘܬܳܐ ܗ̱ܘ ܡܚܰܘܝܳܐ ܕܗܰܘ ܕܥܰܒܼܕܿܳܗ܂
09:17 [ai]	ܥܰܠ ܡܺܝܬܼܳܐ ܕܶܝܢ ܒܰܠܚܽܘܕܼ ܡܶܫܬܿܰܪܪܳܐ܃ ܡܶܛܽܠ ܕܰܟܼܡܳܐ ܕܚܰܝ ܗܰܘ ܕܥܰܒܼܕܿܳܗ܂ ܠܰܝܬܿ ܒܿܳܗ ܚܰܫܚܽܘ܂
09:18 [ai]	ܡܶܛܽܠ ܗܳܢܳܐ ܐܳܦܼܠܳܐ ܩܰܕܼܡܳܝܬܳܐ ܕܠܳܐ ܕܡܳܐ ܐܶܫܬܿܰܪܪܰܬܼ܂
09:19 [ai]	ܟܰܕܼ ܐܶܬܼܦܿܩܶܕܼ ܓܶܝܪ ܟܽܠܶܗ ܦܽܘܩܕܳܢܳܐ ܡܶܢ ܡܽܘܫܶܐ ܠܥܰܡܳܐ ܟܽܠܶܗ ܒܢܳܡܽܘܣܳܐ܃ ܢܣܰܒܼ ܗ̱ܘܳܐ ܡܽܘܫܶܐ ܕܡܳܐ ܕܰܥܓܼܶܠܬܳܐ܂ ܘܡܰܝܳܐ̈ ܒܥܰܡܪܳܐ ܕܰܙܚܽܘܪܺܝܬܼܳܐ܂ ܘܙܽܘܦܿܳܐ܃ ܘܪܰܣ ܥܰܠ ܣܶܦܼܪ̈ܶܐ ܘܥܰܠ ܥܰܡܳܐ ܟܽܠܶܗ܂
09:20 [ai]	ܘܶܐܡܰܪ ܠܗܽܘܢ܂ ܗܳܢܳܐ ܗ̱ܘ ܕܡܳܐ ܕܕܼܺܝܰܬܼܺܩܺܐ ܗܳܝ܂ ܕܶܐܬܼܦܿܰܩܕܿܰܬܼ ܠܟܼܽܘܢ ܡܶܢ ܐܰܠܳܗܳܐ܂
09:21 [ai]	ܐܳܦܼ ܥܰܠ ܡܰܫܟܿܢܳܐ܂ ܘܥܰܠ ܟܽܠܗܽܘܢ ܡܳܐܢܶܐ̈ ܕܬܶܫܡܶܫܬܳܐ܃ ܡܶܢܶܗ ܡܶܢ ܕܡܳܐ ܪܰܣ܂
09:22 [ai]	ܡܶܛܽܠ ܕܟܽܠܡܶܕܶܡ ܒܰܕܼܡܳܐ ܗ̱ܘ ܡܶܬܿܕܿܰܟܿܶܐ ܒܢܳܡܽܘܣܳܐ܂ ܘܰܕܼܠܳܐ ܫܽܘܦܿܳܥ ܕܡܳܐ܂ ܠܰܝܬܿ ܫܽܘܒܼܩܳܢܳܐ܂
09:23 [ai]	ܐܰܢܰܢܩܺܐ ܗ̱ܺܝ ܓܶܝܪ܂ ܕܗܳܠܶܝܢ ܕܰܕܼܡܽܘܬܼܳܐ ܐܶܢܶܝܢ̈ ܕܰܫܡܰܝܳܢܝܳܬܼܳܐ̈܃ ܒܗܳܠܶܝܢ ܡܶܬܿܕܿܰܟܿܝܳܢ̈܂ ܗܳܠܶܝܢ ܕܶܝܢ ܫܡܰܝܳܢܝܳܬܼܳܐ̈܂ ܒܕܶܒܼܚܶܐ̈ ܕܰܡܝܰܬܿܪܺܝܢ ܡܶܢ ܗܳܠܶܝܢ ܿ܀ܿ܀ܿ
09:24 [ai]	ܠܳܐ ܗ̱ܘܳܐ ܓܶܝܪ ܠܒܼܶܝܬܼ ܡܰܩܕܿܫܳܐ ܕܰܥܒܼܺܝܕܼ ܒܺܐܝܕܼܰܝܳܐ̈ ܥܰܠ ܡܫܺܝܚܳܐ܃ ܕܺܐܝܬܼܰܘܗ̱ܝ ܕܡܽܘܬܼܳܐ ܕܗܰܘ ܫܰܪܺܝܪܳܐ܃ ܐܶܠܳܐ ܠܶܗ ܠܰܫܡܰܝܳܐ ܥܰܠ܃ ܕܢܶܬܼܚܙܶܐ ܩܕܼܳܡ ܦܰܪܨܽܘܦܿܶܗ ܕܰܐܠܳܗܳܐ ܚܠܳܦܼܰܝܢ܃
09:25 [ai]	ܐܳܦܼܠܳܐ ܕܰܢܩܰܪܶܒܼ ܢܰܦܼܫܶܗ ܙܰܒܼܢܳܬܼܳܐ̈ ܣܰܓܿܺܝܳܐܬܼܳܐ̈܃ ܐܰܝܟܼ ܕܥܳܒܼܶܕܼ ܗ̱ܘܳܐ ܪܰܒܿ ܟܿܽܘܡܪ̈ܶܐ܃ ܘܥܳܐܶܠ ܒܟܽܠ ܫܢܳܐ ܠܒܼܶܝܬܼ ܡܰܩܕܿܫܳܐ ܒܰܕܼܡܳܐ ܕܠܳܐ ܕܺܝܠܶܗ܂
09:26 [ai]	ܘܶܐܢ ܠܳܐ܂ ܚܰܝܳܒܼ ܗ̱ܘܳܐ܃ ܕܙܰܒܼܢܳܬܼܳܐ̈ ܣܰܓܿܺܝܳܐܬܼܳܐ̈ ܢܶܚܰܫ ܡܶܢ ܫܽܘܪܳܝܶܗ ܕܥܳܠܡܳܐ܂ ܗܳܫܳܐ ܕܶܝܢ ܒܚܰܪܬܼܶܗ ܕܥܳܠܡܳܐ܂ ܚܕܼܳܐ ܗ̱ܘ ܙܒܼܰܢ ܩܰܪܶܒܼ ܢܰܦܼܫܶܗ ܒܰܕܼܒܼܺܝܚܽܘܬܼܶܗ܃ ܕܰܢܒܼܰܛܠܺܝܗ ܠܰܚܛܺܝܬܼܳܐ܂
09:27 [ai]	ܘܰܐܝܟܿܰܢܳܐ ܕܣܺܝܡ ܠܰܒܼܢܰܝܢܳܫܳܐ ܕܰܚܕܼܳܐ ܙܒܼܰܢ ܢܡܽܘܬܼܽܘܢ܃ ܘܡܶܢ ܒܳܬܼܰܪ ܡܰܘܬܿܗܽܘܢ ܕܺܝܢܳܐ܃
09:28 [ai]	ܗܳܟܼܰܢܳܐ ܐܳܦܼ ܡܫܺܝܚܳܐ ܚܕܼܳܐ ܙܒܼܰܢ ܐܶܬܼܩܰܪܰܒܼ܃ ܘܒܼܰܩܢܽܘܡܶܗ ܕܒܰܚ ܚܛܳܗܶܐ̈ ܕܣܰܓܿܺܝܶܐܐ̈܂ ܕܿܬܼܰܪ̈ܬܿܶܝܢ ܕܶܝܢ ܙܰܒܼܢܺܝܢ̈ ܕܠܳܐ ܚܛܳܗܺܝܢ̈ ܡܶܬܼܚܙܶܐ ܠܚܰܝܰܝܗܽܘܢ̈ ܕܰܐܝܠܶܝܢ ܕܰܡܣܰܟܿܶܝܢ ܠܶܗ܀

next chapter