← Back
The Comprehensive Aramaic Lexicon
← Return to the Text Browser
click on the file description for more information
62058: Heb (Hebrews)

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


10:01 [ai]ܢܳܡܽܘܣܳܐ ܓܶܝܪ܂ ܛܶܠܳܢܺܝܬܼܳܐ ܐܺܝܬܼ ܗ̱ܘܳܐ ܒܶܗ ܕܛܳܒܼܳܬܼܳܐ̈ ܕܰܥܬܼܺܝܕܼܳܢ̈܂ ܠܳܐ ܗ̱ܘܳܐ ܩܢܽܘܡܳܐ ܕܺܝܠܗܶܝܢ ܕܨܶܒܼܘܳܬܼܳܐ̈܂ ܡܶܛܽܠ ܗܳܢܳܐ ܟܰܕܼ ܒܟܽܠ ܫܢܳܐ ܗܶܢܽܘܢ ܟܰܕܼ ܗܶܢܽܘܢ ܕܶܒܼܚܶܐ̈ ܡܶܬܼܩܰܪܒܼܺܝܢ ܗ̱ܘܰܘ܃ ܠܳܐ ܡܶܡܬܼܽܘܡ ܐܶܫܟܿܰܚܘ ܕܢܶܓܼܡܪܽܘܢ ܠܰܐܝܠܶܝܢ ܕܰܡܩܰܪܒܼܺܝܢ ܠܗܽܘܢ܂
10:02 [ai]ܐܶܠܽܘ ܓܶܝܪ ܓܳܡܪܺܝܢ ܗ̱ܘܰܘ܃ ܟܒܼܰܪ ܕܶܝܢ ܐܶܬܿܬܿܢܺܝܚܘ ܡܶܢ ܩܽܘܪ̈ܒܿܳܢܰܝܗܽܘܢ܃ ܡܶܛܽܠ ܕܠܳܐ ܡܶܟܿܺܝܠ ܛܳܪܝܳܐ ܗ̱ܘܳܬܼ ܠܗܽܘܢ ܬܺܐܪܬܿܗܽܘܢ ܒܰܚܛܳܗܶܐ̈܃ ܠܰܐܝܠܶܝܢ ܕܰܚܕܼܳܐ ܙܒܼܰܢ ܐܶܬܿܕܰܟܿܺܝܘ ܠܗܽܘܢ܂
10:03 [ai]ܐܶܠܳܐ ܒܗܽܘܢ ܒܕܶܒܼܚܶܐ̈ ܡܰܕܼܟܿܪܺܝܢ ܚܛܳܗܰܝܗܽܘܢ̈ ܒܟܽܠ ܫܢܳܐ܂
10:04 [ai]ܠܳܐ ܓܶܝܪ ܡܶܫܟܿܰܚ ܕܡܳܐ ܕܿܬܼܰܘܪ̈ܶܐ ܘܰܕܼܨܺܦܼܪ̈ܳܝܶܐ ܠܰܡܕܼܰܟܿܳܝܽܘ ܚܛܳܗܶܐ̈܂
10:05 [ai]ܡܶܛܽܠ ܗܳܢܳܐ ܟܰܕܼ ܥܳܐܶܠ ܠܥܳܠܡܳܐ܂ ܐܶܡܰܪ܂ ܒܕܶܒܼܚܶܐ̈ ܘܩܽܘܪ̈ܒܳܢܶܐ ܠܳܐ ܨܒܼܰܝܬܿ܂ ܦܰܓܼܪܳܐ ܕܶܝܢ ܐܰܠܒܿܶܫܬܿܳܢܝ܂
10:06 [ai]ܘܝܰܩܕܿܶܐ̈ ܫܰܠܡܶܐ̈ ܕܰܚܠܳܦܼ ܚܛܳܗܶܐ̈ ܠܳܐ ܫܶܐܠܬܿ܂
10:07 [ai]ܗܳܝܕܶܝܢ ܐܶܡܪܶܬܼ܂ ܕܗܳܐ ܐܶܢܳܐ ܐܳܬܼܶܐ ܐ̱ܢܳܐ܂ ܕܰܒܼܪܺܝܫ ܟܬܼܳܒܼܶܐ̈ ܟܬܼܺܝܒܼ ܥܠܰܝ܃ ܕܶܐܥܒܿܶܕܼ ܨܶܒܼܝܳܢܳܟܼ ܐܰܠܳܗܳܐ܂
10:08 [ai]ܡܶܢ ܠܥܶܠ ܐܶܡܰܪ܂ ܕܕܼܶܒܼܚܶܐ̈ ܘܩܽܘܪ̈ܒܳܢܶܐ ܘܝܰܩܕܿܶܐ̈ ܫܰܠܡܶܐ̈ ܕܰܚܠܳܦܼ ܚܛܳܗܶܐ̈ ܠܳܐ ܨܒܼܰܝܬܿ܂ ܗܳܢܽܘܢ ܕܡܶܬܼܩܰܪܒܼܺܝܢ ܗ̱ܘܰܘ ܒܢܳܡܽܘܣܳܐ܂
10:09 [ai]ܘܒܼܳܬܼܪܶܗ ܐܶܡܰܪ܂ ܕܗܳܐ ܐܳܬܼܶܐ ܐ̱ܢܳܐ܃ ܕܶܐܥܒܿܶܕܼ ܨܶܒܼܝܳܢܳܟܼ ܐܰܠܳܗܳܐ܂ ܒܗܳܕܼܶܐ ܒܰܛܶܠ ܠܩܰܕܼܡܳܝܬܳܐ܃ ܕܰܢܩܺܝܡ ܠܰܕܿܬܼܰܪ̈ܬܿܶܝܢ܂
10:10 [ai]ܒܗܳܢܳܐ ܓܶܝܪ ܨܶܒܼܝܳܢܶܗ ܐܶܬܼܩܰܕܿܰܫܢ܂ ܒܩܽܘܪܒܿܳܢܳܐ ܕܦܰܓܼܪܶܗ ܕܝܶܫܽܘܥ ܡܫܺܝܚܳܐ ܕܰܚܕܼܳܐ ܙܒܼܰܢ܂
10:11 [ai]ܟܽܠ ܪܰܒܿ ܟܿܽܘܡܪ̈ܶܐ ܓܶܝܪ ܕܩܳܐܶܡ ܗ̱ܘܳܐ ܘܰܡܫܰܡܶܫ ܟܽܠܝܽܘܡ܃ ܗܶܢܽܘܢ ܒܗܶܢܽܘܢ ܕܶܒܼܚܶܐ̈ ܡܩܰܪܶܒܼ ܗ̱ܘܳܐ܂ ܐܰܝܠܶܝܢ ܕܡܶܢ ܡܬܼܽܘܡ ܠܳܐ ܡܶܫܟܿܚܺܝܢ ܗ̱ܘܰܘ ܠܰܡܕܼܰܟܿܳܝܽܘ ܚܛܳܗܶܐ̈܂
10:12 [ai]ܗܳܢܳܐ ܕܶܝܢ ܚܰܕܼ ܕܶܒܼܚܳܐ ܩܰܪܶܒܼ ܚܠܳܦܼ ܚܛܳܗܶܐ̈܂ ܘܺܝܬܼܶܒܼ ܥܰܠ ܝܰܡܺܝܢܳܐ ܕܰܐܠܳܗܳܐ ܠܥܳܠܰܡ܂
10:13 [ai]ܘܰܡܩܰܘܶܐ ܡܶܟܿܺܝܠ܃ ܥܕܼܰܡܳܐ ܕܢܶܬܿܬܣܺܝܡܽܘܢ ܒܥܶܠܕܿܒܼܳܒܼܰܘܗ̱ܝ̈ ܟܽܘܒܼܫܳܐ ܬܚܶܝܬܼ ܪ̈ܶܓܼܠܰܘܗ̱ܝ܂
10:14 [ai]ܒܚܰܕܼ ܓܶܝܪ ܩܽܘܪܒܿܳܢܳܐ ܓܡܰܪ ܠܰܐܝܠܶܝܢ ܕܡܶܬܼܩܰܕܿܫܺܝܢ ܒܶܗ ܠܥܳܠܰܡ܂
10:15 [ai]ܣܳܗܕܿܳܐ ܠܰܢ ܕܶܝܢ ܐܳܦܼ ܪܽܘܚܳܐ ܕܩܽܘܕܼܫܳܐ ܕܶܐܡܪܰܬܼ܂
10:16 [ai]ܗܳܕܼܶܐ ܗ̱ܝ ܕܺܝܰܬܼܺܩܺܐ ܕܶܐܬܿܶܠ ܠܗܽܘܢ ܡܶܢ ܒܳܬܼܰܪ ܝܰܘܡܳܬܼܳܐ̈ ܗܳܢܽܘܢ܂ ܐܳܡܰܪ ܡܳܪܝܳܐ܂ ܐܶܬܿܠܺܝܘܗ̱ܝ ܠܢܳܡܽܘܣܝ ܒܡܰܕܿܥܰܝܗܽܘܢ̈܂ ܘܥܰܠ ܠܶܒܿܰܘܳܬܼܗܽܘܢ̈ ܐܶܟܼܬܿܒܼܺܝܘܗ̱ܝ܂
10:17 [ai]ܘܥܰܘܠܗܽܘܢ ܘܰܚܛܳܗܰܝܗܽܘܢ̈ ܠܳܐ ܐܶܬܿܕܿܟܼܰܪ ܠܗܽܘܢ܂
10:18 [ai]ܐܰܝܟܿܳܐ ܕܶܝܢ ܕܺܐܝܬܼ ܫܽܘܒܼܩܳܢܳܐ ܕܰܚܛܳܗܶܐ̈܃ ܠܳܐ ܡܶܬܼܒܿܥܶܐ ܩܽܘܪܒܿܳܢܳܐ ܕܰܚܠܳܦܼ ܚܛܳܗܶܐ̈܀
10:19 [ai]ܐܺܝܬܼ ܠܰܢ ܗܳܟܼܺܝܠ ܐܰܚܰܝ̈܂ ܓܰܠܝܽܘܬܼ ܐܰܦܿܶܐ̈ ܒܡܰܥܠܳܢܳܐ ܕܒܶܝܬܼ ܩܽܘܕܼܫܳܐ ܒܰܕܼܡܶܗ ܕܝܶܫܽܘܥ܂
10:20 [ai]ܘܽܐܘܪܚܳܐ ܕܚܰܝ̈ܶܐ܂ ܕܚܰܕܿܶܬܼ ܠܰܢ ܗܳܫܳܐ܃ ܒܰܐܦܿܰܝ̈ ܬܰܪܥܳܐ܂ ܕܺܐܝܬܼܰܘܗ̱ܝ ܒܶܣܪܶܗ܂
10:21 [ai]ܘܺܐܝܬܼ ܠܰܢ ܟܽܘܡܪܳܐ ܪܰܒܿܳܐ ܥܰܠ ܒܰܝܬܿܶܗ ܕܰܐܠܳܗܳܐ܂
10:22 [ai]ܢܶܩܪܽܘܒܼ ܗܳܟܼܺܝܠ ܒܠܶܒܿܳܐ ܫܰܪܺܝܪܳܐ ܘܰܒܬܼܽܘܟܼܠܳܢܳܐ ܕܗܰܝܡܳܢܽܘܬܼܳܐ܃ ܟܰܕܼ ܪܣܺܝܣܺܝܢ ܠܶܒܿܰܘܳܬܼܰܢ̈ ܘܰܕܼܟܼܶܝܢ ܡܶܢ ܬܿܺܐܪܬܳܐ ܒܺܝܫܬܳܐ܂ ܘܡܰܣܚܰܝ ܦܰܓܼܪܰܢ ܒܡܰܝܳܐ̈ ܕܟܰܝܳܐ̈܂
10:23 [ai]ܘܰܢܚܰܡܣܶܢ ܒܬܰܘܕܿܺܝܬܼܳܐ ܕܣܰܒܼܪܰܢ ܘܠܳܐ ܢܶܨܛܠܶܐ܂ ܡܗܰܝܡܰܢ ܗ̱ܽܘ ܓܶܝܪ ܡܰܢ ܕܰܡܠܰܟܼ ܠܰܢ܂
10:24 [ai]ܘܰܢܚܽܘܪ ܚܰܕܼ ܒܚܰܕܼ܃ ܒܓܽܘܪܳܓܼܳܐ ܕܚܽܘܒܿܳܐ ܘܕܼܰܥܒܼܳܕܼܶܐ̈ ܛܳܒܼܶܐ̈܂
10:25 [ai]ܘܠܳܐ ܢܶܗܘܶܐ ܫܳܒܼܩܺܝܢ ܟܢܽܘܫܝܰܢ܃ ܐܰܝܟܼ ܕܺܐܝܬܼ ܥܝܳܕܼܳܐ ܠܐ̱ܢܳܫ ܐ̱ܢܳܫ܃ ܐܶܠܳܐ ܒܥܰܘ ܚܰܕܼ ܡܶܢ ܚܰܕܼ܃ ܝܰܬܿܺܝܪܳܐܺܝܬܼ ܟܡܳܐ ܕܚܳܙܶܝܬܿܽܘܢ ܕܰܩܪܶܒܼ ܝܰܘܡܳܐ ܗܰܘ܂
10:26 [ai]ܐܶܢ ܓܶܝܪ ܒܨܶܒܼܝܳܢܶܗ ܢܶܚܛܶܐ ܐ̱ܢܳܫ ܡܶܢ ܒܳܬܼܰܪ ܕܩܰܒܿܶܠ ܺܝܕܼܰܥܬܼܳܐ ܕܰܫܪܳܪܳܐ܃ ܠܰܝܬܿ ܡܶܟܿܺܝܠ ܕܶܒܼܚܬܼܳܐ ܕܬܶܬܼܩܰܪܰܒܼ ܚܠܳܦܼ ܚܛܳܗܶܐ̈܂
10:27 [ai]ܐܶܠܳܐ ܥܬܼܺܝܕܼ ܗ̱ܽܘ ܕܺܝܢܳܐ ܕܚܺܝܠܳܐ܂ ܘܰܛܢܳܢܳܐ ܕܢܽܘܪܳܐ ܕܳܐܟܼܶܠ ܠܰܒܼܥܶܠܕܿܒܼܳܒܼܶܐ̈܂
10:28 [ai]ܐܶܢ ܓܶܝܪ ܐܰܝܢܳܐ ܕܰܥܒܼܰܪ ܥܰܠ ܢܳܡܽܘܣܳܐ ܕܡܽܘܫܶܐ܂ ܥܰܠ ܦܽܘܡ ܬܿܪ̈ܶܝܢ ܘܰܬܼܠܳܬܼܳܐ ܣܳܗܕܺܝܢ̈ ܕܠܳܐ ܪ̈ܰܚܡܺܝܢ ܡܳܐܶܬܼ܃
10:29 [ai]ܟܡܳܐ ܣܳܒܼܪܺܝܢ ܐܢ̱ܬܿܽܘܢ ܝܰܬܿܺܝܪܳܐܺܝܬܼ ܡܣܳܡ ܒܪܺܫܳܐ܂ ܢܩܰܒܿܶܠ ܐܰܝܢܳܐ ܕܕܼܳܫܶܗ ܠܰܒܼܪܶܗ ܕܰܐܠܳܗܳܐ܂ ܘܰܚܫܰܒܼ ܕܡܳܐ ܕܕܼܺܝܰܬܼܺܩܺܐ ܕܺܝܠܶܗ ܐܰܝܟܼ ܕܟܽܠܢܳܫ܂ ܕܒܳܗ ܐܶܬܼܩܰܕܿܰܫ܂ ܘܨܰܥܰܪ ܠܪܽܘܚܳܐ ܕܛܰܝܒܿܽܘܬܼܳܐ܂
10:30 [ai]ܝܳܕܼܥܺܝܢܰܢ ܠܗܰܘ ܕܶܐܡܰܪ܂ ܕܕܼܺܝܠܝ ܗ̱ܺܝ ܬܒܼܰܥܬܼܳܐ ܘܶܐܢܳܐ ܐܶܦܼܪܽܘܥ܂ ܘܬܼܽܘܒܼ܂ ܕܰܢܕܼܽܘܢ ܡܳܪܝܳܐ ܠܥܰܡܶܗ܂
10:31 [ai]ܕܶܚܠܬܼܳܐ ܗ̱ܝ ܪܰܒܿܬܼܳܐ ܠܡܶܦܿܰܠ ܒܺܐܝܕܼܰܘܗ̱ܝ̈ ܕܰܐܠܳܗܳܐ ܚܰܝܳܐ܀
10:32 [ai]ܐܶܬܿܕܿܰܟܼ̱ܪܘ ܗܳܟܼܺܝܠ ܠܝܰܘܡܳܬܼܳܐ̈ ܩܰܕܼܡܳܝ̈ܶܐ܂ ܗܳܢܽܘܢ ܕܰܒܼܗܽܘܢ ܩܰܒܿܶܠܬܿܽܘܢ ܡܰܥܡܽܘܕܼܺܝܬܼܳܐ܂ ܘܰܐܓܼܽܘܢܳܐ ܪܰܒܿܳܐ ܣܰܝܒܰܪܬܿܽܘܢ ܕܚܰܫܶܐ̈ ܒܚܶܣܕܿܳܐ ܘܒܼܽܐܘܠܨܳܢܶܐ̈܃
10:33 [ai]ܘܕܼܰܗܘܰܝܬܿܽܘܢ ܚܶܙܘܳܢܶܐ̈܂ ܘܳܐܦܼ ܐܶܫܬܰܘܬܿܰܦܼܬܿܽܘܢ ܠܐ̱ܢܳܫܳܐ ܕܗܳܠܶܝܢ ܣܰܝܒܰܪܘ܂
10:34 [ai]ܘܟܼܶܐܒܼ ܠܟܼܽܘܢ ܥܰܠ ܐܰܝܠܶܝܢ ܕܰܐܣܺܝܪܺܝܢ܂ ܘܰܚܛܽܘܦܼܝܳܐ ܕܢܶܟܼܣܰܝܟܿܽܘܢ̈ ܒܚܰܕܼܽܘܬܼܳܐ ܣܰܝܒܰܪܬܿܽܘܢ܃ ܡܶܛܽܠ ܕܝܳܕܼܥܺܝܢ ܐܢ̱ܬܿܽܘܢ ܕܺܐܝܬܼ ܠܟܼܽܘܢ ܩܶܢܝܳܢܳܐ ܒܰܫܡܰܝܳܐ܃ ܕܰܡܝܰܬܿܰܪ ܗ̱ܽܘ ܘܠܳܐ ܥܳܒܼܰܪ܂
10:35 [ai]ܠܳܐ ܗܳܟܼܺܝܠ ܬܰܘܒܿܕܼܽܘܢ ܓܰܠܝܽܘܬܼ ܐܰܦܿܶܐ̈ ܕܺܐܝܬܼ ܠܟܼܽܘܢ܂ ܕܰܥܬܼܺܝܕܼ ܠܳܗ ܐܰܓܼܪܳܐ ܣܰܓܿܺܝܳܐܐ܂
10:36 [ai]ܡܣܰܝܒܿܪܳܢܽܘܬܼܳܐ ܗ̱ܘ ܓܶܝܪ ܡܶܬܼܒܿܰܥܝܳܐ ܠܟܼܽܘܢ܃ ܕܬܶܥܒܿܕܼܽܘܢ ܨܶܒܼܝܳܢܳܐ ܕܰܐܠܳܗܳܐ ܘܬܼܶܣܒܼܽܘܢ ܡܽܘܠܟܿܳܢܳܐ܂
10:37 [ai]ܡܶܛܽܠ ܕܩܰܠܺܝܠ ܗܽܘ ܙܰܒܼܢܳܐ ܘܛܳܒܼ ܙܥܽܘܪ܃ ܕܢܺܐܬܼܶܐ ܗܰܘ ܕܳܐܬܼܶܐ ܘܠܳܐ ܢܰܘܚܰܪ܂
10:38 [ai]ܟܺܐܢܳܐ ܕܶܝܢ ܡܶܢ ܗܰܝܡܳܢܽܘܬܼܳܐ ܕܺܝܠܝ ܢܺܚܶܐ܂ ܘܶܐܢ ܡܶܬܼܩܰܛܥܳܐ ܠܶܗ܃ ܠܳܐ ܨܳܒܼܝܳܐ ܒܶܗ ܢܰܦܼܫܝ܂
10:39 [ai]ܚܢܰܢ ܕܶܝܢ ܠܳܐ ܗܘܰܝܢ ܕܩܽܘܛܳܥܳܐ ܕܿܡܰܘܒܠܳܐ ܠܰܐܒܼܕܼܳܢܳܐ܃ ܐܶܠܳܐ ܕܗܰܝܡܳܢܽܘܬܼܳܐ ܕܡܰܩܢܝܳܐ ܠܰܢ ܢܰܦܼܫܰܢ܀

next chapter