← Back
The Comprehensive Aramaic Lexicon
← Return to the Text Browser
click on the file description for more information
62058: Heb (Hebrews)

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


12:01 [ai]ܡܶܛܽܠ ܗܳܢܳܐ ܐܳܦܼ ܚܢܰܢ ܕܺܐܝܬܼ ܠܰܢ ܗܳܠܶܝܢ ܟܽܠܗܽܘܢ ܣܳܗܕܿܶܐ̈܂ ܕܰܐܝܟܼ ܥܢܳܢܳܐ ܚܕܼܺܝܪܺܝܢ ܠܰܢ܃ ܢܶܫܕܿܶܐ ܡܶܢܰܢ ܟܽܠ ܝܽܘܩܪ̈ܺܝܢ܂ ܐܳܦܼ ܚܛܺܝܬܼܳܐ ܕܰܒܼܟܼܽܠܙܒܼܰܢ ܡܛܰܝܒܼܳܐ ܗ̱ܝ ܠܰܢ܃ ܘܒܼܰܡܣܰܝܒܿܪܳܢܽܘܬܼܳܐ ܢܶܪܗܛܺܝܘܗ̱ܝ ܠܰܐܓܼܽܘܢܳܐ ܗܳܢܳܐ ܕܣܺܝܡ ܠܰܢ܃
12:02 [ai]ܘܰܢܚܽܘܪ ܒܝܶܫܽܘܥ܂ ܕܗܽܘ ܗܘܳܐ ܪܺܝܫܳܐ ܘܓܼܳܡܽܘܪܳܐ ܠܗܰܝܡܳܢܽܘܬܼܰܢ܂ ܕܰܚܠܳܦܼ ܚܰܕܼܽܘܬܼܳܐ ܕܺܐܝܬܼ ܗ̱ܘܳܐ ܠܶܗ ܣܰܝܒܰܪ ܨܠܺܝܒܼܳܐ܂ ܘܥܰܠ ܒܶܗܬܿܬܼܳܐ ܐܰܡܣܰܪ܂ ܘܥܰܠ ܝܰܡܺܝܢܳܐ ܕܟܽܘܪܣܝܶܗ ܕܰܐܠܳܗܳܐ ܺܝܬܼܶܒܼ ܿ܀ܿ܀ܿ
12:03 [ai]ܚܙܰܘ ܗܳܟܼܺܝܠ ܟܡܳܐ ܣܰܝܒܰܪ ܡܶܢ ܚܰܛܳܝܶܐ̈ ܗܳܢܽܘܢ܃ ܕܗܶܢܽܘܢ ܗܘܰܘ ܣܰܩܽܘܒܼܠܳܐ ܠܢܰܦܼܫܗܽܘܢ܃ ܕܠܳܐ ܬܶܡܰܐܢ ܠܟܼܽܘܢ ܘܠܳܐ ܬܶܬܼܪܰܦܿܶܐ ܢܰܦܼܫܟܼܽܘܢ܂
12:04 [ai]ܠܳܐ ܥܕܼܰܟܿܺܝܠ ܡܰܛܺܝܬܿܽܘܢ ܥܕܼܰܡܳܐ ܠܰܕܼܡܳܐ ܒܰܐܓܼܽܘܢܳܐ ܕܠܽܘܩܒܼܰܠ ܚܛܺܝܬܼܳܐ܂
12:05 [ai]ܘܰܛܥܰܝܬܿܽܘܢܳܝܗ̱ܝ ܠܝܽܘܠܦܿܳܢܳܐ ܐܰܝܢܳܐ ܕܰܐܝܟܼ ܕܿܠܰܒܼܢܰܝܳܐ ܐܶܡܰܪ ܠܟܼܽܘܢ܂ ܒܶܪܝ܂ ܠܳܐ ܬܰܗܡܶܐ ܡܶܢ ܡܰܪܕܿܽܘܬܼܶܗ ܕܡܳܪܝܳܐ ܘܠܳܐ ܬܪܰܦܿܶܐ ܢܰܦܼܫܳܟܼ܂ ܐܶܡܰܬܼܝ ܕܡܶܢܶܗ ܡܶܬܼܟܿܰܘܰܢ ܐܰܢ̱ܬܿ܂
12:06 [ai]ܠܡܰܢ ܕܪܳܚܶܡ ܓܶܝܪ ܡܳܪܝܳܐ܂ ܪܳܕܼܶܐ ܠܶܗ܂ ܘܰܡܢܰܓܿܶܕܼ ܠܰܒܼܢܰܝܳܐ ܐܰܝܠܶܝܢ ܕܗܽܘ ܨܳܒܼܶܐ ܒܗܽܘܢ܂
12:07 [ai]ܣܰܝܒܰܪܘ ܗܳܟܼܺܝܠ ܡܰܪܕܿܽܘܬܼܳܐ܃ ܡܶܛܽܠ ܕܰܐܝܟܼ ܕܰܠܘܳܬܼ ܒܢܰܝܳܐ ܣܳܥܰܪ ܨܶܐܕܼܰܝܟܿܽܘܢ ܐܰܠܳܗܳܐ܂ ܐܰܝܢܰܘ ܓܶܝܪ ܒܪܳܐ ܕܠܳܐ ܪܳܕܼܶܐ ܠܶܗ ܐܰܒܼܽܘܗ̱ܝ܂
12:08 [ai]ܘܶܐܢ ܕܠܳܐ ܡܰܪܕܿܽܘܬܼܳܐ ܐܰܢ̱ܬܿܽܘܢ܃ ܗܳܝ ܕܒܳܗ ܡܶܬܼܪܕܼܶܐ ܟܽܠܢܳܫ܃ ܗܘܰܝܬܿܽܘܢ ܠܟܼܽܘܢ ܢܽܘܟܼܪ̈ܳܝܶܐ ܘܠܳܐ ܒܢܰܝܳܐ܂
12:09 [ai]ܘܶܐܢ ܐܰܒܼܳܗܰܝܢ̈ ܕܒܶܣܪܳܐ ܪܳܕܼܶܝܢ ܗ̱ܘܰܘ ܠܰܢ ܘܒܼܳܗܬܿܺܝܢ ܗܘܰܝܢ ܡܶܢܗܽܘܢ܃ ܟܡܳܐ ܗܳܟܼܺܝܠ ܚܰܝܳܒܼܺܝܢܰܢ ܕܢܶܫܬܿܰܥܒܿܰܕܼ ܠܰܐܒܼܽܘܗܶܝܢ ܕܿܪ̈ܽܘܚܳܬܼܳܐ ܘܢܺܚܶܐ܂
12:10 [ai]ܗܳܢܽܘܢ ܓܶܝܪ ܠܰܙܒܼܰܢ ܗ̱ܽܘ ܙܥܽܘܪ ܐܰܝܟܼ ܕܨܳܒܼܶܝܢ ܗ̱ܘܰܘ܂ ܪܳܕܼܶܝܢ ܗ̱ܘܰܘ ܠܰܢ܃ ܐܰܠܳܗܳܐ ܕܶܝܢ ܠܥܽܘܕܼܪܳܢܰܢ ܕܢܶܫܬܰܘܬܿܰܦܼ ܠܩܰܕܿܺܝܫܽܘܬܼܶܗ܂
12:11 [ai]ܟܽܠ ܡܰܪܕܿܽܘܬܼܳܐ ܕܶܝܢ ܒܙܰܒܼܢܳܗ ܠܳܐ ܡܶܣܬܿܰܒܼܪܳܐ܂ ܕܰܕܼܚܰܕܼܽܘܬܼܳܐ ܗ̱ܝ ܐܶܠܳܐ ܕܟܰܪܝܽܘܬܼܳܐ܃ ܠܚܰܪܬܼܳܐ ܕܶܝܢ ܦܿܺܐܪ̈ܶܐ ܕܰܫܠܳܡܳܐ ܘܰܕܼܙܰܕܿܺܝܩܽܘܬܼܳܐ ܝܳܗܒܿܳܐ ܠܰܐܝܠܶܝܢ ܕܒܳܗ ܐܶܬܿܕܿܰܪܰܫܘ܂
12:12 [ai]ܡܶܛܽܠ ܗܳܢܳܐ ܐܺܝܕܼܰܝܟܿܽܘܢ̈ ܡܫܰܪ̈ܝܳܬܼܳܐ ܘܒܼܽܘܪ̈ܟܰܝܟܿܽܘܢ ܪ̈ܳܥܠܳܬܼܳܐ ܫܰܪܰܪܘ܂
12:13 [ai]ܘܰܫܒܼܺܝܠܶܐ̈ ܬܿܪ̈ܺܝܨܶܐ ܥܒܼܶܕܼܘ ܠܪ̈ܶܓܼܠܰܝܟܿܽܘܢ܃ ܕܗܰܕܿܳܡܳܐ ܕܰܚܓܼܺܝܪ ܠܳܐ ܢܶܛܥܰܫ܃ ܐܶܠܳܐ ܢܶܬܼܰܐܣܶܐ܀
12:14 [ai]ܗܰܪ̱ܛܘ ܒܳܬܼܰܪ ܫܠܳܡܳܐ ܥܰܡ ܟܽܠ ܐ̱ܢܳܫ܃ ܘܒܼܳܬܼܰܪ ܩܰܕܿܺܝܫܽܘܬܼܳܐ ܕܒܶܠܥܳܕܼܶܝܗ ܐ̱ܢܳܫ ܠܡܳܪܰܢ ܠܳܐ ܚܳܙܶܐ܂
12:15 [ai]ܘܰܗܘܰܝܬܿܽܘܢ ܙܗܺܝܪܺܝܢ܃ ܕܰܠܡܳܐ ܐ̱ܢܳܫ ܢܶܫܬܿܟܼܰܚ ܒܟܽܘܢ ܕܚܰܣܺܝܪ ܡܶܢ ܛܰܝܒܿܽܘܬܼܳܐ ܕܰܐܠܳܗܳܐ܃ ܐܰܘ ܕܰܠܡܳܐ ܥܶܩܳܪܳܐ ܕܰܡܪ̈ܳܪܶܐ ܢܰܦܿܶܩ ܥܽܘܦܼܝܳܐ ܘܢܰܗܰܪܟܼܽܘܢ܂ ܘܒܼܶܗ ܣܰܓܿܺܝܶܐܐ̈ ܢܶܣܬܿܰܝܒܼܽܘܢ܃
12:16 [ai]ܐܰܘ ܠܡܳܐ ܐ̱ܢܳܫ ܢܶܫܬܿܟܼܰܚ ܒܟܽܘܢ ܕܙܰܢܳܝ ܘܰܪܦܼܶܐ ܐܰܝܟܼ ܥܺܣܽܘ܂ ܕܒܰܚܕܼܳܐ ܡܶܐܟܼܽܘܠܬܳܐ ܙܰܒܿܶܢ ܒܽܘܟܼܪܽܘܬܼܶܗ܂
12:17 [ai]ܝܳܕܼܥܺܝܢ ܐܢ̱ܬܿܽܘܢ ܓܶܝܪ ܕܳܐܦܼ ܡܶܢ ܒܳܬܼܰܪܟܿܶܢ ܨܒܼܳܐ ܗ̱ܘܳܐ܂ ܕܢܺܐܪܰܬܼ ܒܽܘܪܟܿܬܼܳܐ܃ ܘܶܐܣܬܿܠܺܝ܂ ܐܰܬܼܪܳܐ ܓܶܝܪ ܠܰܬܼܝܳܒܼܽܘܬܼܳܐ ܠܳܐ ܐܶܫܟܿܰܚ܃ ܟܰܕܼ ܒܕܶܡܥܶܐ̈ ܒܥܳܗ܀
12:18 [ai]ܠܳܐ ܓܶܝܪ ܐܶܬܼܩܰܪܰܒܼܬܿܽܘܢ ܠܢܽܘܪܳܐ ܕܝܳܩܕܿܳܐ ܘܡܶܬܼܓܿܰܫܳܐ܂ ܐܳܦܼܠܳܐ ܠܚܶܫܽܘܟܼܳܐ ܘܰܠܥܰܪܦܿܶܠܳܐ ܘܠܰܥܪܽܘܪܳܐ܂
12:19 [ai]ܘܠܳܐ ܠܩܳܠܳܐ ܕܩܰܪܢܳܐ ܘܰܠܩܳܠܳܐ ܕܡܶܠܶܐ̈܂ ܗܰܘ ܕܗܳܢܽܘܢ ܕܫܰܡܥܽܘܗ̱ܝ܂ ܐܶܫܬܿܶܐܠܘ܃ ܕܠܳܐ ܢܶܬܿܬܰܘܣܰܦܼ ܢܶܬܼܡܰܠܰܠ ܥܰܡܗܽܘܢ܂
12:20 [ai]ܠܳܐ ܓܶܝܪ ܡܶܫܟܿܚܺܝܢ ܗ̱ܘܰܘ ܠܰܡܣܰܝܒܿܳܪܽܘ ܡܶܕܶܡ ܕܶܐܬܼܦܿܰܩܰܕܼܘ܂ ܕܳܐܦܼܶܢ ܚܰܝܽܘܬܼܳܐ ܬܶܬܼܩܰܪܰܒܼ ܠܘܳܬܼ ܛܽܘܪܳܐ܂ ܬܶܬܼܪܓܼܶܡ܂
12:21 [ai]ܘܗܳܟܼܰܢܳܐ ܕܚܺܝܠ ܗܘܳܐ ܚܶܙܘܳܐ܃ ܕܡܽܘܫܶܐ ܐܶܡܰܪ܂ ܕܕܼܰܚܺܝܠ ܐ̱ܢܳܐ ܘܪܰܬܿܺܝܬܼ ܐ̱ܢܳܐ܂
12:22 [ai]ܐܰܢ̱ܬܿܽܘܢ ܕܶܝܢ ܐܶܬܼܩܰܪܰܒܼܬܿܽܘܢ ܠܛܽܘܪܳܐ ܕܨܶܗܝܽܘܢ܂ ܘܠܰܡܕܼܺܝܢ̱ܬܳܐ ܕܰܐܠܳܗܳܐ ܚܰܝܳܐ܂ ܠܽܐܘܪܺܫܠܶܡ ܕܒܰܫܡܰܝܳܐ܂ ܘܰܠܟܼܶܢܫܶܐ̈ ܕܿܪ̈ܶܒܿܘܳܬܼܳܐ ܕܡܰܠܰܐܟܼܶܐ̈܂
12:23 [ai]ܘܰܠܥܺܕ̱ܿܬܳܐ ܕܿܒܼܽܘܟܼܪ̈ܶܐ ܕܿܡܶܬܼܟܿܰܬܼܒܺܝܢ ܒܰܫܡܰܝܳܐ܂ ܘܠܰܐܠܳܗܳܐ ܕܰܝܳܢܳܐ ܕܟܽܠ܂ ܘܰܠܪ̈ܽܘܚܳܬܼܳܐ ܕܟܺܐܢܶܐ̈ ܕܶܐܬܼܓܡܰܪܘ܂
12:24 [ai]ܘܰܠܝܶܫܽܘܥ ܡܶܨܥܳܝܳܐ ܕܕܼܺܝܰܬܼܺܩܺܐ ܚܕܼܰܬܼܳܐ܂ ܘܠܰܪܣܳܣ ܕܡܶܗ ܕܰܡܡܰܠܶܠ ܛܳܒܼ ܡܶܢ ܗܰܘ ܕܗܳܒܼܶܝܠ܀
12:25 [ai]ܐܶܙܕܿܰܗ̱ܪܘ ܗܳܟܼܺܝܠ܃ ܕܰܠܡܳܐ ܬܶܫܬܿܰܐܠܽܘܢ ܡܶܢ ܡܰܢ ܕܡܰܠܶܠ ܥܰܡܟܼܽܘܢ܂ ܐܶܢܓܶܝܪ ܗܳܢܽܘܢ ܠܳܐ ܐܶܬܼܦܰܨܺܝܘ܃ ܕܶܐܫܬܿܶܐܠܘ ܡܶܢ ܕܡܰܠܶܠ ܥܰܡܗܽܘܢ ܒܰܐܪܥܳܐ܃ ܚܰܕܼ ܟܡܳܐ ܚܢܰܢ܂ ܐܶܢ ܢܶܫܬܿܶܐܠ ܡܶܢ ܡܰܢ ܕܡܰܠܶܠ ܥܰܡܰܢ ܡܶܢ ܫܡܰܝܳܐ܂
12:26 [ai]ܐܰܝܢܳܐ ܕܩܳܠܶܗ ܐܰܪܥܳܐ ܐܰܙܺܝܥ܂ ܗܳܫܳܐ ܕܶܝܢ ܡܠܰܟܼ ܘܶܐܡܰܪ܂ ܕܬܽܘܒܼ ܚܕܼܳܐ ܙܒܼܰܢ ܐܶܢܳܐ ܐܰܙܺܝܥ܃ ܠܳܐ ܒܰܠܚܽܘܕܼ ܐܰܪܥܳܐ܂ ܐܶܠܳܐ ܐܳܦܼ ܫܡܰܝܳܐ܂
12:27 [ai]ܗܳܕܼܶܐ ܕܶܝܢ ܕܶܐܡܰܪ ܚܕܼܳܐ ܙܒܼܰܢ܂ ܡܚܰܘܝܳܐ ܫܽܘܚܠܳܦܼܳܐ ܕܗܳܢܽܘܢ ܕܡܶܬܿܙܺܝܥܺܝܢ܃ ܡܶܛܽܠ ܕܰܥܒܼܺܝܕܼܶܐ̈ ܐܶܢܽܘܢ܃ ܕܰܢܩܰܘܽܘܢ ܗܳܢܽܘܢ ܕܠܳܐ ܡܶܬܿܙܺܝܥܺܝܢ܀
12:28 [ai]ܡܶܛܽܠ ܗܳܟܼܺܝܠ ܕܩܰܒܿܶܠܢ ܡܰܠܟܿܽܘܬܼܳܐ ܕܠܳܐ ܡܶܬܿܙܺܝܥܳܐ܃ ܢܶܐܚܽܘܕܼ ܛܰܝܒܿܽܘܬܼܳܐ ܕܒܳܗ ܢܫܰܡܶܫ ܘܢܶܫܦܿܰܪ ܠܰܐܠܳܗܳܐ܂ ܒܬܰܚܡܶܨܬܳܐ ܘܰܒܕܼܶܚܠܬܼܳܐ܂
12:29 [ai]ܐܰܠܳܗܰܢ ܓܶܝܪ ܢܽܘܪܳܐ ܗ̱ܘ ܐܳܟܼܶܠܬܼܳܐ܀

next chapter