The Comprehensive Aramaic Lexicon

13:01 [ai]	ܚܽܘܒܿܳܐ ܕܰܐܚܶܐ̈ ܢܟܼܰܬܿܰܪ ܒܟܽܘܢ܂
13:02 [ai]	ܘܪܶܚܡܬܼܳܐ ܕܰܐܟܼܣܢܳܝܶܐ̈ ܠܳܐ ܬܶܛܥܽܘܢ܂ ܒܗܳܕܼܶܐ ܓܶܝܪ ܫܘܰܘ ܐ̱ܢܳܫܳܐ܃ ܕܟܰܕܼ ܠܳܐ ܪܓܼܺܝܫܺܝܢ ܢܩܰܒܿܠܽܘܢ ܡܰܠܰܐܟܼܶܐ̈܂
13:03 [ai]	ܥ̱ܶܗܰܕܼܘ ܠܰܐܝܠܶܝܢ ܕܰܐܣܺܝܪܺܝܢ܂ ܐܰܝܟܼ ܗܰܘ ܕܥܰܡܗܽܘܢ ܐܰܣܺܝܪܺܝܢ ܐܢ̱ܬܿܽܘܢ܂ ܐܶܬܿܕܿܰܟܼ̱ܪܘ ܠܰܐܝܠܶܝܢ ܕܰܐܠܺܝܨܺܝܢ܂ ܐܰܝܟܼ ܐ̱ܢܳܫܳܐ ܕܒܶܣܪܳܐ ܠܒܼܺܝܫܺܝܢ ܐܢ̱ܬܿܽܘܢ܂
13:04 [ai]	ܡܝܰܩܰܪ ܗ̱ܽܘ ܙܽܘܘܳܓܼܳܐ ܒܟܽܠ܂ ܘܥܰܪܣܗܽܘܢ ܕܰܟܼܝܳܐ ܗ̱ܝ܂ ܠܙܰܢܳܝܶܐ̈ ܕܶܝܢ ܘܰܠܓܼܰܝܳܪ̈ܶܐ ܕܳܐܶܢ ܐܰܠܳܗܳܐ܂
13:05 [ai]	ܠܳܐ ܗܘܳܐ ܪܳܚܶܡ ܟܶܣܦܿܳܐ ܪܶܥܝܳܢܟܼܽܘܢ܃ ܐܶܠܳܐ ܢܶܣܦܿܰܩ ܠܟܼܽܘܢ ܡܶܕܶܡ ܕܺܐܝܬܼ ܠܟܼܽܘܢ܂ ܗܽܘ ܓܶܝܪ ܡܳܪܝܳܐ ܐܶܡܰܪ܂ ܕܠܳܐ ܐܶܫܒܿܩܳܟܼ ܘܠܳܐ ܐܰܪܦܿܶܐ ܒܳܟܼ ܐܺܝܕܼܰܝܳܐ̈܂
13:06 [ai]	ܘܺܐܝܬܼ ܠܰܢ ܕܢܺܐܡܰܪ ܬܟܼܺܝܠܳܐܺܝܬܼ܂ ܡܳܪܝ ܡܥܰܕܿܪܳܢܝ ܠܳܐ ܐܶܕܼܚܰܠ܂ ܡܳܢܳܐ ܥܳܒܼܶܕܼ ܠܺܝ ܒܰܪܢܳܫܳܐ܀
13:07 [ai]	ܗܘܰܝܬܿܽܘܢ ܥܳܗܕܺܝܢ ܠܰܡܕܼܰܒܿܪ̈ܳܢܰܝܟܿܽܘܢ܂ ܐܰܝܠܶܝܢ ܕܡܰܠܶܠܘ ܥܰܡܟܼܽܘܢ ܡܶܠܬܼܳܐ ܕܰܐܠܳܗܳܐ܂ ܐܶܬܼܒܿܰܩܰܘ ܒܫܽܘܠܳܡܳܐ ܕܿܕܼܽܘܒܿܳܪ̈ܰܝܗܽܘܢ܂ ܘܡܰܪܰܘ ܒܗܰܝܡܳܢܽܘܬܼܗܽܘܢ܂
13:08 [ai]	ܝܶܫܽܘܥ ܡܫܺܝܚܳܐ ܐܶܬܼܡܳܠܝ ܘܝܰܘܡܳܢܳܐ ܗܽܘܝܽܘ ܘܰܠܥܳܠܰܡ܂
13:09 [ai]	ܠܝܽܘܠܦܿܳܢܶܐ̈ ܢܽܘܟܼܪ̈ܳܝܶܐ ܘܰܡܫܰܚܠܦܼܶܐ̈ ܠܳܐ ܬܶܬܿܕܿܰܒܼܪܽܘܢ܂ ܫܰܦܿܺܝܪ ܗ̱ܽܘ ܓܶܝܪ܂ ܕܰܒܼܛܰܝܒܿܽܘܬܼܳܐ ܢܫܰܪܰܪ ܠܶܒܿܰܘܳܬܼܰܢ̈ ܘܠܳܐ ܒܡܶܐܟܼܠܳܬܼܳܐ̈܃ ܡܶܛܽܠ ܕܠܳܐ ܐܶܬܼܥܰܕܿܰܪܘ ܐܰܝܠܶܝܢ ܕܗܰܠܶܟܼܘ ܒܗܶܝܢ܀
13:10 [ai]	ܐܺܝܬܼ ܠܰܢ ܕܶܝܢ ܡܰܕܼܒܿܚܳܐ܂ ܕܠܳܐ ܫܰܠܺܝܛ ܠܡܶܐܟܼܰܠ ܡܶܢܶܗ ܠܗܳܢܽܘܢ ܕܰܒܼܡܰܫܟܿܢܳܐ ܡܫܰܡܫܺܝܢ܂
13:11 [ai]	ܚܰܝܘܳܬܼܳܐ̈ ܓܶܝܪ ܗܳܠܶܝܢ ܕܡܰܥܶܠ ܗ̱ܘܳܐ ܕܶܡܗܶܝܢ ܪܰܒܿ ܟܿܽܘܡܪ̈ܶܐ ܠܒܼܶܝܬܼ ܡܰܩܕܿܫܳܐ ܚܠܳܦܼ ܚܛܳܗܶܐ̈܃ ܒܶܣܪܗܶܝܢ ܝܳܩܶܕܼ ܗ̱ܘܳܐ ܠܒܼܰܪ ܡܶܢ ܡܰܫܪܺܝܬܼܳܐ܂
13:12 [ai]	ܡܶܛܽܠ ܗܳܢܳܐ ܐܳܦܼ ܝܶܫܽܘܥ ܕܰܢܩܰܕܿܶܫ ܠܥܰܡܶܗ ܒܰܕܼܡܶܗ܃ ܠܒܼܰܪ ܡܶܢ ܡܕܼܺܝܢ̱ܬܳܐ ܚܰܫ܂
13:13 [ai]	ܘܳܐܦܼ ܚܢܰܢ ܗܳܟܼܺܝܠ ܢܶܦܽܘܩ ܠܘܳܬܼܶܗ ܠܒܼܰܪ ܡܶܢ ܡܰܫܪܺܝܬܼܳܐ܃ ܟܰܕܼ ܫܩܺܝܠܺܝܢܰܢ ܚܶܣܕܿܶܗ܂
13:14 [ai]	ܠܰܝܬܿ ܠܰܢ ܓܶܝܪ ܡܕܼܺܝܢ̱ܬܳܐ ܕܰܡܩܰܘܝܳܐ ܗܳܪܟܿܳܐ܃ ܐܶܠܳܐ ܠܰܐܝܕܼܳܐ ܕܰܥܬܼܺܝܕܼܳܐ ܡܣܰܟܿܶܝܢܰܢ܂
13:15 [ai]	ܘܒܼܺܐܝܕܼܶܗ ܢܰܣܶܩ ܕܶܒܼܚܶܐ̈ ܕܬܶܫܒܿܽܘܚܬܳܐ ܒܟܽܠܙܒܼܰܢ ܠܰܐܠܳܗܳܐ܂ ܕܺܐܝܬܼܶܝܗ ܦܿܺܐܪ̈ܶܐ ܕܣܶܦܼܘܳܬܼܳܐ̈ ܕܡܰܘܕܿܝܳܢ̈ ܠܰܫܡܶܗ܂
13:16 [ai]	ܘܠܳܐ ܬܶܛܥܽܘܢ ܡܪܰܚܡܳܢܽܘܬܼܳܐ ܘܫܰܘܬܿܳܦܼܽܘܬܼܳܐ ܕܡܶܣܟܿܺܢܶܐ̈܂ ܒܗܳܠܶܝܢ ܓܶܝܪ ܕܶܒܼܚܶܐ̈ ܫܳܦܼܰܪ ܐ̱ܢܳܫ ܠܰܐܠܳܗܳܐ܂
13:17 [ai]	ܐܶܬܿܛܦܿܺܝܣܘ ܠܰܡܕܼܰܒܿܪ̈ܳܢܰܝܟܿܽܘܢ܃ ܘܶܐܫܬܿܰܡ̱ܥܘ ܠܗܽܘܢ܂ ܗܶܢܽܘܢ ܓܶܝܪ ܫܳܗܪܺܝܢ ܚܠܳܦܼ ܢܰܦܼܫܳܬܼܟܼܽܘܢ̈܂ ܐܰܝܟܼ ܐ̱ܢܳܫܳܐ ܕܿܝܳܗܒܺܝܢ ܚܽܘܫܒܿܳܢܟܼܽܘܢ܃ ܕܰܒܼܚܰܕܼܽܘܬܼܳܐ ܢܶܗܘܽܘܢ ܥܳܒܼܕܺܝܢ ܗܳܕܼܶܐ ܘܠܳܐ ܒܬܶܢܚܳܬܼܳܐ̈܃ ܡܶܛܽܠ ܕܠܳܐ ܦܳܩܚܳܐ ܠܟܼܽܘܢ܂
13:18 [ai]	ܨܰܠܰܘ ܥܠܰܝܢ܂ ܬܟܼܺܝܠܺܝܢܰܢ ܓܶܝܪ ܕܬܺܐܪܬܳܐ ܛܳܒܼܬܼܳܐ ܐܺܝܬܼ ܠܰܢ܃ ܕܰܒܼܟܼܽܠܡܶܕܶܡ ܨܳܒܼܶܝܢܰܢ ܕܫܰܦܿܺܝܪ ܢܶܬܿܕܿܰܒܰܪ܂
13:19 [ai]	ܝܰܬܿܺܝܪܳܐܺܝܬܼ ܒܿܳܥܶܐ ܐ̱ܢܳܐ ܡܶܢܟܼܽܘܢ܃ ܕܬܶܥܒܿܕܼܽܘܢ ܗܳܕܼܶܐ܃ ܕܒܰܥܓܼܰܠ ܐܶܬܼܦܿܰܢܶܐ ܠܟܼܽܘܢ܂
13:20 [ai]	ܐܰܠܳܗܳܐ ܕܶܝܢ ܕܰܫܠܳܡܳܐ܂ ܗܰܘ ܕܰܐܣܶܩ ܡܶܢ ܒܶܝܬܼ ܡܺܝܬܼܶܐ̈ ܠܪܳܥܝܳܐ ܪܰܒܿܳܐ ܕܡܰܪܥܺܝܬܼܳܐ ܒܰܕܼܡܳܐ ܕܕܼܺܝܰܬܼܺܩܺܐ ܕܰܠܥܳܠܰܡ܂ ܕܺܐܝܬܼܰܘܗ̱ܝ ܝܶܫܽܘܥ ܡܫܺܝܚܳܐ ܡܳܪܰܢ܃
13:21 [ai]	ܗܽܘ ܢܶܓܼܡܽܘܪܟܼܽܘܢ ܒܟܽܠ ܥܒܼܳܕܼ ܛܳܒܼ܃ ܕܬܶܥܒܿܕܼܽܘܢ ܨܶܒܼܝܳܢܶܗ܂ ܘܗܽܘ ܢܶܣܥܽܘܪ ܒܰܢ ܡܶܕܶܡ ܕܫܰܦܿܺܝܪ ܩܕܼܳܡܰܘܗ̱ܝ ܒܝܰܕܼ ܝܶܫܽܘܥ ܡܫܺܝܚܳܐ܂ ܕܠܶܗ ܫܽܘܒܼܚܳܐ ܠܥܳܠܰܡ ܥܳܠܡܺܝܢ܂ ܐܰܡܺܝܢ܀
13:22 [ai]	ܒܿܳܥܶܐ ܐ̱ܢܳܐ ܕܶܝܢ ܡܶܢܟܼܽܘܢ ܐܰܚܰܝ̈܃ ܕܬܰܓܿܪܽܘܢ ܪܽܘܚܟܼܽܘܢ ܒܡܶܠܬܼܳܐ ܕܒܽܘܝܳܐܳܐ܃ ܡܶܛܽܠ ܕܿܒܼܰܙܥܽܘܪ̈ܝܳܬܼܳܐ ܗ̱ܘ ܟܶܬܼܒܿܶܬܼ ܠܟܼܽܘܢ܀
13:23 [ai]	ܕܰܥܘ ܕܶܝܢ ܠܰܐܚܽܘܢ ܛܺܝܡܳܬܼܶܐܳܘܣ ܕܶܐܫܬܿܪܺܝ܂ ܘܶܐܢ ܒܰܥܓܼܰܠ ܢܺܐܬܼܶܐ ܥܰܡܶܗ܂ ܐܶܚܙܶܝܟܼܽܘܢ܂
13:24 [ai]	ܫܰܐܠܘ ܒܰܫܠܳܡܳܐ ܕܟܽܠܗܽܘܢ ܡܕܼܰܒܿܪ̈ܳܢܰܝܟܿܽܘܢ܃ ܘܰܕܼܟܼܽܠܗܽܘܢ ܩܰܕܿܺܝܫܶܐ̈܂ ܫܳܐܠܺܝܢ ܒܰܫܠܳܡܟܼܽܘܢ ܟܽܠܗܽܘܢ ܕܡܶܢ ܐܺܝܛܰܠܺܝܰܐ܂
13:25 [ai]	ܛܰܝܒܿܽܘܬܼܳܐ ܥܰܡ ܟܽܠܟܼܽܘܢ܂ ܐܰܡܺܝܢ ܿ܀ܿ܀ܿ