← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62059: Js (James)

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܝܰܥܩܽܘܒܼ ܥܰܒܼܕܿܶܗ ܕܰܐܠܳܗܳܐ܃ ܘܰܕܼܡܳܪܰܢ ܝܶܫܽܘܥ ܡܫܺܝܚܳܐ܃ ܠܬܼܰܪ̈ܬܿܰܥܣܪܶܐ ܫܰܪ̈ܒܼܳܢ ܕܿܰܙܪ̈ܺܝܥܳܢ ܒܥܰܡ̱ܡܶܐ̈܂ ܫܠܳܡ܀
01:02 [ai]ܟܽܠ ܚܰܕܼܘܳܐ ܬܶܗܘܶܐ ܠܟܼܽܘܢ ܐܰܚܰܝ̈܃ ܟܰܕܼ ܬܶܥܠܽܘܢ ܠܢܶܣܝܽܘܢܶܐ̈ ܡܫܰܚܠܦܼܶܐ̈ ܘܣܰܓܿܺܝܶܐܐ̈܂
01:03 [ai]ܝܳܕܼܥܺܝܢ ܐܢ̱ܬܿܽܘܢ ܓܶܝܪ ܕܒܽܘܩܝܳܐ ܕܗܰܝܡܳܢܽܘܬܼܳܐ܃ ܡܰܩܢܶܐ ܠܟܼܽܘܢ ܡܣܰܝܒܿܪܳܢܽܘܬܼܳܐ܂
01:04 [ai]ܠܳܗ ܕܶܝܢ ܠܰܡܣܰܝܒܿܪܳܢܽܘܬܼܳܐ܃ ܢܶܗܘܶܐ ܠܳܗ ܥܒܼܳܕܼܳܐ ܡܫܰܡܠܝܳܐ܃ ܕܬܶܗܘܽܘܢ ܓܡܺܝܪܺܝܢ ܘܰܡܫܰܠܡܳܢܺܝܢ܃ ܘܰܒܡܶܕܶܡ ܠܳܐ ܗܘܰܝܬܿܽܘܢ ܚܰܣܺܝܪܺܝܢ܂
01:05 [ai]ܐܶܢ ܐ̱ܢܳܫ ܕܶܝܢ ܡܶܢܟܼܽܘܢ ܚܣܺܝܪ ܡܶܢ ܚܶܟܼܡܬܼܳܐ܃ ܢܶܫܰܐܠ ܡܶܢ ܐܰܠܳܗܳܐ܂ ܕܝܳܗܶܒܼ ܠܟܼܽܠ ܦܫܺܝܛܳܐܺܝܬܼ ܘܠܳܐ ܡܚܰܣܶܕܼ܃ ܘܡܶܬܼܝܰܗܒܿܳܐ ܠܶܗ܂
01:06 [ai]ܢܶܫܰܐܠ ܕܶܝܢ ܒܗܰܝܡܳܢܽܘܬܼܳܐ ܟܰܕܼ ܠܳܐ ܡܶܬܼܦܿܰܠܰܓܼ܂ ܗܰܘ ܓܶܝܪ ܕܡܶܬܼܦܿܰܠܰܓܼ܃ ܕܳܡܶܐ ܠܓܼܰܠ̱ܠܶܐ̈ ܕܝܰܡܳܐ ܕܫܳܓܼܫܳܐ ܠܗܽܘܢ ܪܽܘܚܳܐ܂
01:07 [ai]ܘܠܳܐ ܢܰܣܒܰܪ ܗܰܘ ܒܰܪܢܳܫܳܐ ܕܢܳܣܶܒܼ ܡܶܕܶܡ ܡܶܢ ܡܳܪܝܳܐ܃
01:08 [ai]ܐܰܝܢܳܐ ܕܰܦܼܠܺܝܓܼ ܒܪܶܥܝܳܢܶܗ܂ ܘܰܫܓܼܺܝܫ ܒܟܽܠܗܶܝܢ ܐܽܘܪ̈ܚܳܬܼܶܗ܂
01:09 [ai]ܢܶܫܬܿܰܒܼܗܰܪ ܕܶܝܢ ܐܰܚܳܐ ܡܰܟܿܺܝܟܼܳܐ ܒܪܽܘܡܪܳܡܶܗ܂
01:10 [ai]ܘܥܰܬܿܺܝܪܳܐ ܒܡܽܘܟܿܳܟܼܶܗ܃ ܡܶܛܽܠ ܕܰܐܝܟܼ ܗܰܒܿܳܒܼܳܐ ܕܥܶܣܒܿܳܐ܃ ܗܳܟܼܰܢܳܐ ܥܳܒܼܰܪ܂
01:11 [ai]ܕܳܢܰܚ ܓܶܝܪ ܫܶܡܫܳܐ ܒܚܽܘܡܶܗ ܘܡܰܘܒܿܶܫ ܠܶܗ ܠܥܶܣܒܿܳܐ܂ ܘܗܰܒܿܳܒܼܶܗ ܢܳܦܼܶܠ܂ ܘܫܽܘܦܼܪܳܐ ܕܚܶܙܘܶܗ ܐܳܒܼܶܕܼ܂ ܗܳܟܼܰܢܳܐ ܐܳܦܼ ܥܰܬܿܺܝܪܳܐ ܚܳܡܶܐ ܒܗܽܘܦܿܳܟܼܰܘܗ̱ܝ̈܂
01:12 [ai]ܛܽܘܒܼܰܘܗ̱ܝ ܠܓܼܰܒܼܪܳܐ ܕܰܡܣܰܝܒܰܪ ܢܶܣܝܽܘܢܶܐ̈܃ ܕܡܳܐ ܕܶܐܬܼܒܿܚܰܪ܃ ܢܳܣܶܒܼ ܟܠܺܝܠܳܐ ܕܚܰܝ̈ܶܐ܃ ܗܰܘ ܕܰܡܠܰܟܼ ܐܰܠܳܗܳܐ ܠܰܐܝܠܶܝܢ ܕܪܳܚܡܺܝܢ ܠܶܗ܂
01:13 [ai]ܠܳܐ ܢܺܐܡܰܪ ܐ̱ܢܳܫ ܟܰܕܼ ܡܶܬܼܢܰܣܶܐ܃ ܕܡܶܢ ܐܰܠܳܗܳܐ ܡܶܬܼܢܰܣܶܐ ܐ̱ܢܳܐ܂ ܐܰܠܳܗܳܐ ܓܶܝܪ ܠܳܐ ܡܢܰܣܰܝ ܒܒܼܺܝܫܳܬܼܳܐ̈܂ ܘܗܽܘ ܠܐ̱ܢܳܫ ܠܳܐ ܡܢܰܣܶܐ܂
01:14 [ai]ܐܶܠܳܐ ܐ̱ܢܳܫ ܐ̱ܢܳܫ ܡܶܢ ܪܶܓܿܬܼܶܗ ܗ̱ܽܘ ܡܶܬܼܢܰܣܶܐ ܘܡܶܬܼܪܰܓܼܪܰܓܼ ܘܡܶܬܼܢܓܼܶܕܼ܂
01:15 [ai]ܘܗܳܕܼܶܐ ܪܶܓܿܬܼܳܐ ܒܳܛܢܳܐ ܘܝܳܠܕܿܳܐ ܚܛܺܝܬܼܳܐ܂ ܚܛܺܝܬܼܳܐ ܕܶܝܢ ܡܳܐ ܕܶܐܬܼܓܿܰܡܪܰܬܼ܃ ܝܳܠܕܿܳܐ ܡܰܘܬܳܐ܂
01:16 [ai]ܠܳܐ ܬܶܛܥܽܘܢ܂ ܐܰܚܰܝ̈ ܚܰܒܺܝܒܼܶܐ̈܂
01:17 [ai]ܟܽܠ ܡܰܘܗܰܒܼܬܳܐ ܛܳܒܼܬܼܳܐ ܘܰܡܫܰܡܠܰܝܬܳܐ ܡܶܢ ܠܥܶܠ ܢܳܚܬܳܐ܃ ܡܶܢ ܐܰܒܼܳܐ ܕܿܢܰܗܺܝܪ̈ܶܐ܂ ܗܰܘ ܕܠܰܝܬܿ ܠܘܳܬܼܶܗ ܫܽܘܚܠܳܦܼܳܐ ܡܶܕܶܡ܂ ܐܳܦܼܠܳܐ ܛܶܠܳܢܺܝܬܼܳܐ ܕܫܽܘܓܼܢܳܝܳܐ܂
01:18 [ai]ܗܽܘܝܽܘ ܨܒܼܳܐ ܘܝܰܠܕܿܰܢ ܒܡܶܠܬܼܳܐ ܕܩܽܘܫܬܳܐ܃ ܕܢܶܗܘܶܐ ܪܺܫܺܝܬܼܳܐ ܕܿܒܼܶܪ̈ܝܳܬܼܶܗ܀
01:19 [ai]ܘܰܐܢ̱ܬܿܽܘܢ ܐܰܚܰܝ̈ ܚܰܒܺܝܒܼܶܐ̈܃ ܟܽܠܢܳܫ ܡܶܢܟܼܽܘܢ ܢܶܗܘܶܐ ܡܣܰܪܗܰܒܼ ܠܡܶܫܡܰܥ܂ ܘܡܰܘܚܰܪ ܠܰܡܡܰܠܳܠܽܘ܂ ܘܡܰܘܚܰܪ ܠܡܶܪܓܿܰܙ܂
01:20 [ai]ܪܽܘܓܼܙܶܗ ܓܶܝܪ ܕܓܰܒܼܪܳܐ܃ ܙܰܕܿܺܝܩܽܘܬܼܳܐ ܕܰܐܠܳܗܳܐ ܠܳܐ ܥܳܒܼܶܕܼ܂
01:21 [ai]ܡܶܛܽܠ ܗܳܢܳܐ ܐܰܪܚܶܩܘ ܡܶܢܟܼܽܘܢ ܟܽܠܳܗ ܛܰܢܦܼܽܘܬܼܳܐ ܘܣܽܘܓܼܳܐܐ ܕܒܺܝܫܽܘܬܼܳܐ܃ ܘܰܒܡܰܟܿܺܝܟܼܽܘܬܼܳܐ ܩܰܒܿܶܠܘ ܡܶܠܬܼܳܐ ܕܰܢܨܺܝܒܼܳܐ ܒܰܟܼܝܳܢܰܢ܂ ܕܗܺܝ ܡܶܫܟܿܚܳܐ ܕܬܰܚܶܐ ܐܶܢܶܝܢ̈ ܢܰܦܼܫܳܬܼܟܼܽܘܢ̈܂
01:22 [ai]ܗܘܰܘ ܕܶܝܢ ܥܳܒܼܽܘܕܼܶܐ̈ ܕܡܶܠܬܼܳܐ ܘܠܳܐ ܫܳܡܽܘܥܶܐ̈ ܒܰܠܚܽܘܕܼ܂ ܘܠܳܐ ܬܰܛܥܽܘܢ ܢܰܦܼܫܳܬܼܟܼܽܘܢ̈܂
01:23 [ai]ܐܶܢ ܐ̱ܢܳܫ ܓܶܝܪ ܢܶܗܘܶܐ ܫܳܡܽܘܥܳܗ ܕܡܶܠܬܼܳܐ ܘܠܳܐ ܥܳܒܼܽܘܕܼܳܗ܃ ܗܳܢܳܐ ܕܳܡܶܐ ܠܗܰܘ ܕܰܚܙܳܐ ܐܰܦܿܰܘܗ̱ܝ̈ ܒܡܰܚܙܺܝܬܼܳܐ܂
01:24 [ai]ܚܙܳܐ ܓܶܝܪ ܢܰܦܼܫܶܗ܂ ܘܰܥܒܼܰܪ܂ ܘܰܛܥܳܐ ܕܰܐܝܟܿܰܢܳܐ ܗܘܳܐ܂
01:25 [ai]ܟܽܠ ܕܶܝܢ ܕܚܳܪ ܒܢܳܡܽܘܣܳܐ ܡܫܰܠܡܳܢܳܐ ܕܚܺܐܪܽܘܬܼܳܐ ܘܩܰܘܺܝ ܒܶܗ܃ ܠܳܐ ܗܘܳܐ ܫܳܡܽܘܥܳܐ ܕܫܶܡܥܳܐ ܕܡܶܬܿܛܥܶܐ܃ ܐܶܠܳܐ ܥܳܒܼܽܘܕܼܳܐ ܕܰܥܒܼܳܕܼܶܐ̈܂ ܘܗܳܢܳܐ ܛܽܘܒܼܳܢܳܐ ܢܶܗܘܶܐ ܒܰܥܒܼܳܕܼܶܗ܂
01:26 [ai]ܘܶܐܢ ܐ̱ܢܳܫ ܣܳܒܼܰܪ ܕܰܡܫܰܡܶܫ ܠܰܐܠܳܗܳܐ܃ ܘܠܳܐ ܐܳܚܶܕܼ ܠܶܫܳܢܶܗ܃ ܐܶܠܳܐ ܡܰܛܥܶܐ ܠܶܗ ܠܶܒܶܗ܃ ܕܗܳܢܳܐ܂ ܣܪܺܝܩܳܐ ܗ̱ܝ ܬܶܫܡܶܫܬܿܶܗ܂
01:27 [ai]ܬܿܶܫܡܶܫܬܳܐ ܓܶܝܪ ܕܟܺܝܬܼܳܐ ܘܩܰܕܿܺܝܫܬܳܐ ܩܕܼܳܡ ܐܰܠܳܗܳܐ ܐܰܒܼܳܐ܃ ܗܳܕܼܶܐ ܗ̱ܝ܂ ܠܡܶܣܥܰܪ ܝܰܬܼܡܶܐ̈ ܘܰܐܪ̈ܡܠܳܬܼܳܐ ܒܽܐܘܠܨܳܢܰܝܗܽܘܢ̈܃ ܘܰܠܡܶܛܰܪ ܐ̱ܢܳܫ ܢܰܦܼܫܶܗ ܡܶܢ ܥܳܠܡܳܐ܂ ܕܠܳܐ ܛܽܘܠܫܳܐ܀

next chapter