← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62059: Js (James)

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


02:01 [ai]ܐܰܚܰܝ̈܃ ܠܳܐ ܒܡܰܣܰܒܼ ܒܰܐܦܿܶܐ̈ ܬܶܗܘܽܘܢ ܐܰܚܺܝܕܼܺܝܢ ܠܗܰܝܡܳܢܽܘܬܼܳܐ ܕܬܶܫܒܿܽܘܚܬܿܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܂
02:02 [ai]ܐܶܢ ܓܶܝܪ ܢܶܥܽܘܠ ܠܰܟܼܢܽܘܫܬܿܟܼܽܘܢ ܐ̱ܢܳܫ ܕܥܶܙܩܳܬܼܶܗ̈ ܕܕܼܰܗܒܼܳܐ ܐܰܘ ܕܡܳܐܢܰܘܗ̱ܝ̈ ܫܰܦܿܺܝܪ̈ܶܐ܃ ܘܢܶܥܽܘܠ ܡܶܣܟܿܺܢܳܐ ܒܡܳܐܢܶܐ̈ ܨܳܐܶܐ̈܃
02:03 [ai]ܘܰܬܼܚܽܘܪܽܘܢ ܒܗܰܘ ܕܰܠܒܼܺܝܫ ܡܳܐܢܶܐ̈ ܫܰܦܿܺܝܪ̈ܶܐ ܘܬܼܺܐܡܪܽܘܢ ܠܶܗ܂ ܐܰܢ̱ܬܿ ܗܳܪܟܿܳܐ ܬܶܒܼ ܫܰܦܿܺܝܪ܂ ܘܰܠܡܶܣܟܿܺܢܳܐ ܬܺܐܡܪܽܘܢ ܠܶܗ܂ ܐܰܢ̱ܬܿ ܩܽܘܡ ܠܗܰܠ܃ ܐܰܘ ܬܶܒܼ ܠܳܟܼ ܗܳܪܟܿܳܐ ܩܕܼܳܡ ܟܽܘܒܼܫܳܐ ܕܿܪ̈ܶܓܼܠܰܝܢ܃
02:04 [ai]ܠܳܐ ܗܳܐ ܐܶܬܼܦܿܰܠܰܓܼܬܿܽܘܢ ܠܟܼܽܘܢ ܒܢܰܦܼܫܟܼܽܘܢ܃ ܘܰܗܘܰܝܬܿܽܘܢ ܡܦܼܰܪ̈ܫܳܢܶܐ ܕܡܰܚܫܒܼܳܬܼܳܐ̈ ܒܺܝܫܳܬܼܳܐ̈܂
02:05 [ai]ܫܡܰܥܘ܂ ܐܰܚܰܝ̈ ܚܰܒܺܝܒܼܶܐ̈܂ ܠܳܐ ܗ̱ܘܳܐ ܠܡܶܣܟܿܺܢܶܐ̈ ܕܥܳܠܡܳܐ܃ ܥܰܬܿܺܝܪ̈ܶܐ ܕܶܝܢ ܒܗܰܝܡܳܢܽܘܬܼܳܐ܂ ܓܒܼܳܐ ܐܰܠܳܗܳܐ܃ ܕܢܶܗܘܽܘܢ ܝܳܪ̈ܬܿܶܐ ܒܡܰܠܟܿܽܘܬܼܳܐ ܗܳܝ ܕܰܡܠܰܟܼ ܐܰܠܳܗܳܐ ܠܰܐܝܠܶܝܢ ܕܪܳܚܡܺܝܢ ܠܶܗ܂
02:06 [ai]ܐܰܢ̱ܬܿܽܘܢ ܕܶܝܢ ܫܳܛܬܿܽܘܢܳܝܗ̱ܝ ܠܡܶܣܟܿܺܢܳܐ܂ ܠܳܐ ܗܳܐ ܥܰܬܿܺܝܪ̈ܶܐ ܡܶܫܬܿܰܥܠܶܝܢ ܥܠܰܝܟܿܽܘܢ܃ ܘܗܶܢܽܘܢ ܢܳܓܼܕܺܝܢ ܠܟܼܽܘܢ ܠܒܼܶܝܬܼ ܕܺܝܢܳܐ܂
02:07 [ai]ܠܳܐ ܗܳܐ ܗܶܢܽܘܢ ܡܓܼܰܕܿܦܼܺܝܢ܃ ܥܰܠ ܫܡܳܐ ܛܳܒܼܳܐ ܕܶܐܬܼܩܪܺܝ ܥܠܰܝܟܿܽܘܢ܂
02:08 [ai]ܘܶܐܢ ܢܳܡܽܘܣܳܐ ܕܰܐܠܳܗܳܐ ܒܗܳܕܼܶܐ ܡܫܰܠܡܺܝܬܿܽܘܢ ܐܰܝܟܼ ܕܰܟܼܬܼܺܝܒܼ܃ ܕܬܶܪܚܰܡ ܠܩܰܪܺܝܒܼܳܟܼ ܐܰܝܟܼ ܢܰܦܼܫܳܟܼ܃ ܫܰܦܿܺܝܪ ܥܳܒܼܕܺܝܢ ܐܢ̱ܬܿܽܘܢ܂
02:09 [ai]ܐܶܢ ܕܶܝܢ ܒܰܐܦܿܶܐ̈ ܢܳܣܒܺܝܢ ܐܢ̱ܬܿܽܘܢ܃ ܚܛܺܝܬܼܳܐ ܥܳܒܼܕܺܝܢ ܐܢ̱ܬܿܽܘܢ܂ ܘܡܶܬܼܟܿܰܘܢܺܝܢ ܐܢ̱ܬܿܽܘܢ ܡܶܢ ܢܳܡܽܘܣܳܐ ܐܰܝܟܼ ܥܳܒܼܪ̈ܰܝ ܥܰܠ ܢܳܡܽܘܣܳܐ܂
02:10 [ai]ܐܰܝܢܳܐ ܓܶܝܪ ܕܟܽܠܶܗ ܢܳܡܽܘܣܳܐ ܢܳܛܰܪ ܘܒܼܰܚܕܼܳܐ ܫܳܪܰܥ܃ ܠܟܼܽܠܶܗ ܢܳܡܽܘܣܳܐ ܐܶܬܼܚܰܝܰܒܼ܂
02:11 [ai]ܗܰܘ ܓܶܝܪ ܕܶܐܡܰܪ ܕܠܳܐ ܬܓܼܽܘܪ܃ ܗܽܘ ܐܶܡܰܪ ܕܠܳܐ ܬܶܩܛܽܘܠ܂ ܐܶܢ ܕܶܝܢ ܠܳܐ ܓܳܐܰܪ ܐܰܢ̱ܬܿ ܐܶܠܳܐ ܩܳܛܶܠ ܐܰܢ̱ܬܿ܃ ܗܘܰܝܬܿ ܠܳܟܼ ܥܳܒܼܰܪ ܥܰܠ ܢܳܡܽܘܣܳܐ܂
02:12 [ai]ܗܳܟܼܰܢܳܐ ܗܘܰܝܬܿܽܘܢ ܡܡܰܠܠܺܝܢ ܘܗܳܟܼܰܢܳܐ ܗܘܰܝܬܿܽܘܢ ܣܳܥܪܺܝܢ܃ ܐܰܝܟܼ ܐ̱ܢܳܫܳܐ ܕܰܒܼܢܳܡܽܘܣܳܐ ܕܚܺܐܪܽܘܬܼܳܐ ܥܬܼܺܝܕܼܺܝܢ ܐܢ̱ܬܿܽܘܢ ܠܡܶܬܿܕܼܳܢܽܘ܂
02:13 [ai]ܕܺܝܢܳܐ ܓܶܝܪ ܗܳܘܶܐ ܕܠܳܐ ܪ̈ܰܚܡܶܐ܃ ܥܰܠ ܗܰܘ ܕܠܳܐ ܥܳܒܼܶܕܼ ܪ̈ܰܚܡܶܐ܂ ܡܶܫܬܿܰܥܠܶܝܢ ܐܢ̱ܬܿܽܘܢ ܒܪ̈ܰܚܡܶܐ ܥܰܠ ܕܺܝܢܳܐ܂
02:14 [ai]ܡܳܢܳܐ ܗܶܢܝܳܢܳܐ ܐܰܚܰܝ̈܃ ܐܶܢ ܐ̱ܢܳܫ ܐܳܡܰܪ ܕܺܐܝܬܼ ܠܺܝ ܗܰܝܡܳܢܽܘܬܼܳܐ ܘܰܥܒܼܳܕܼܶܐ̈ ܠܰܝܬܿ ܠܶܗ܃ ܕܰܠܡܳܐ ܡܶܫܟܿܚܳܐ ܗܰܝܡܳܢܽܘܬܼܶܗ ܕܬܰܚܶܝܘܗ̱ܝ܃
02:15 [ai]ܘܶܐܢ ܐܰܚܳܐ ܐܰܘ ܚܳܬܼܳܐ ܢܶܗܘܽܘܢ ܥܰܪܛܶܠܳܝܺܝܢ܃ ܘܚܰܣܺܝܪܺܝܢ ܣܰܝܒܿܳܪܬܳܐ ܕܝܰܘܡܳܐ܃
02:16 [ai]ܘܢܺܐܡܰܪ ܠܗܽܘܢ ܐ̱ܢܳܫ ܡܶܢܟܼܽܘܢ܃ ܙܶܠܘ ܒܰܫܠܳܡܳܐ ܫܚܰܢܘ ܘܰܣܒܼܰܥܘ܃ ܘܠܳܐ ܬܶܬܿܠܽܘܢ ܠܗܽܘܢ ܣܢܺܝܩܽܘܬܼܶܗ ܕܦܰܓܼܪܳܐ܃ ܡܳܢܳܐ ܗܶܢܝܳܢܳܐ܂
02:17 [ai]ܗܳܟܼܰܢܳܐ ܐܳܦܼ ܗܰܝܡܳܢܽܘܬܼܳܐ ܕܠܳܐ ܥܒܼܳܕܼܶܐ̈܂ ܡܺܝܬܼܳܐ ܗ̱ܝ ܒܰܠܚܽܘܕܼܶܝܗ܂
02:18 [ai]ܐܳܡܰܪ ܓܶܝܪ ܐ̱ܢܳܫ܃ ܠܳܟܼ ܐܺܝܬܼ ܠܳܟܼ ܗܰܝܡܳܢܽܘܬܼܳܐ܂ ܘܠܺܝ ܐܺܝܬܼ ܠܺܝ ܥܒܼܳܕܼܶܐ̈܂ ܚܰܘܳܢܝ ܗܰܝܡܳܢܽܘܬܼܳܟܼ ܕܠܳܐ ܥܒܼܳܕܼܶܐ̈܃ ܘܶܐܢܳܐ ܡܚܰܘܶܐ ܐ̱ܢܳܐ ܠܳܟܼ ܗܰܝܡܳܢܽܘܬܼܝ ܡܶܢ ܥܒܼܳܕܼܰܝ̈܂
02:19 [ai]ܡܗܰܝܡܶܢ ܐܰܢ̱ܬܿ ܕܚܰܕܼ ܗ̱ܽܘ ܐܰܠܳܗܳܐ܃ ܫܰܦܿܺܝܪ ܥܳܒܼܶܕܼ ܐܰܢ̱ܬܿ܂ ܐܳܦܼ ܫܺܐܕܼܶܐ̈ ܡܗܰܝܡܢܺܝܢ ܘܪܳܥܠܺܝܢ ܿ܀ܿ܀ܿ
02:20 [ai]ܨܳܒܼܶܐ ܐܰܢ̱ܬܿ ܕܶܝܢ ܕܬܶܕܿܰܥ܃ ܐܳܘ ܒܰܪܢܳܫܳܐ ܚܰܠܳܫܳܐ܃ ܕܗܰܝܡܳܢܽܘܬܼܳܐ ܕܠܳܐ ܥܒܼܳܕܼܶܐ̈ ܡܺܝܬܼܳܐ ܗ̱ܝ܂
02:21 [ai]ܐܰܒܼܽܘܢ ܐܰܒܼܪܳܗܳܡ ܠܳܐ ܗ̱ܘܳܐ ܡܶܢ ܥܒܼܳܕܼܶܐ̈ ܐܶܙܕܿܰܕܿܰܩ܃ ܕܰܐܣܶܩ ܠܺܐܝܣܚܳܩ ܒܪܶܗ ܥܰܠ ܡܰܕܼܒܿܚܳܐ܃
02:22 [ai]ܚܳܙܶܐ ܐܰܢ̱ܬܿ ܕܗܰܝܡܳܢܽܘܬܼܶܗ ܣܰܝܥܰܬܼ ܠܰܥܒܼܳܕܼܰܘܗ̱ܝ̈܃ ܘܡܶܢ ܥܒܼܳܕܼܶܐ̈ ܗܰܝܡܳܢܽܘܬܼܶܗ ܐܶܬܼܓܿܰܡܪܰܬܼ܃
02:23 [ai]ܘܰܫܠܶܡ ܟܬܼܳܒܼܳܐ ܕܶܐܡܰܪ܃ ܕܗܰܝܡܶܢ ܐܰܒܼܪܳܗܳܡ ܒܰܐܠܳܗܳܐ ܘܶܐܬܼܚܰܫܒܿܰܬܼ ܠܶܗ ܠܙܰܕܿܺܝܩܽܘ ܘܪܳܚܡܳܐ ܕܰܐܠܳܗܳܐ ܐܶܬܼܩܪܺܝ܂
02:24 [ai]ܚܳܙܶܐ ܐܰܢ̱ܬܿ ܕܡܶܢ ܥܒܼܳܕܼܶܐ̈ ܡܶܙܕܿܰܕܿܰܩ ܒܰܪܢܳܫܳܐ܃ ܘܠܳܐ ܗ̱ܘܳܐ ܡܶܢ ܗܰܝܡܳܢܽܘܬܼܳܐ ܒܰܠܚܽܘܕܼ܃
02:25 [ai]ܗܳܟܼܰܢܳܐ ܐܳܦܼ ܪܳܚܳܒܼ ܙܳܢܺܝܬܼܳܐ܃ ܠܳܐ ܗ̱ܘܳܐ ܡܶܢ ܥܒܼܳܕܼܶܐ̈ ܐܶܙܕܿܰܕܿܩܰܬܼ܃ ܕܩܰܒܿܠܰܬܼ ܠܓܼܳܫܽܘܫܶܐ̈ ܘܒܼܽܐܘܪܚܳܐ ܐ̱ܚܪܺܬܼܳܐ ܐܰܦܿܩܰܬܼ ܐܶܢܽܘܢ܃
02:26 [ai]ܐܰܝܟܿܰܢܳܐ ܕܦܰܓܼܪܳܐ ܕܠܳܐ ܪܽܘܚܳܐ ܡܺܝܬܼ ܗ̱ܽܘ܃ ܗܳܟܼܰܢܳܐ ܐܳܦܼ ܗܰܝܡܳܢܽܘܬܼܳܐ ܕܠܳܐ ܥܒܼܳܕܼܶܐ̈ ܡܺܝܬܼܳܐ ܗ̱ܝ܀

next chapter