The Comprehensive Aramaic Lexicon

05:01 [ai]	ܐܳܘ ܥܰܬܿܺܝܪ̈ܶܐ܃ ܐܰܝܠܶܠܘ ܘܰܒܟܼܰܘ ܥܰܠ ܕܽܘܘܳܢܶܐ̈ ܕܳܐܬܼܶܝܢ ܥܠܰܝܟܿܽܘܢ܂
05:02 [ai]	ܥܽܘܬܼܪܟܼܽܘܢ ܓܶܝܪ ܐܶܬܼܚܰܒܿܰܠ ܘܰܣܪܺܝ܂ ܘܡܳܐܢܰܝܟܿܽܘܢ̈ ܐܶܬܼܶܐܟܼܶܠܘ ܡܶܢ ܣܳܣܳܐ܂
05:03 [ai]	ܘܕܼܰܗܒܼܟܼܽܘܢ ܘܣܺܐܡܟܼܽܘܢ ܐܰܫܚܶܬܼ ܠܶܗ܂ ܘܫܽܘܚܬܿܗܽܘܢ ܗܳܘܝܳܐ ܠܣܳܗܕܿܽܘܬܼܳܐ ܥܠܰܝܟܿܽܘܢ܂ ܘܗܺܝ ܥܬܼܺܝܕܼܳܐ ܕܬܶܐܟܼܽܘܠ ܒܶܣܪܟܼܽܘܢ܂ ܢܽܘܪܳܐ ܟܰܢܶܫܬܿܽܘܢ ܠܟܼܽܘܢ ܠܝܰܘܡܳܬܼܳܐ̈ ܐ̱ܚܪ̈ܳܝܶܐ܂
05:04 [ai]	ܗܳܐ ܐܰܓܼܪܳܐ ܕܦܳܥܠܶܐ̈ ܕܰܚܨܰܕܼܘ ܐܰܪ̈ܥܳܬܼܟܼܽܘܢ܃ ܗܰܘ ܕܰܛܠܰܡܬܿܽܘܢ܂ ܩܳܥܶܐ܂ ܘܰܓܼܥܳܬܼܳܐ ܕܚܳܨܽܘܕܼܶܐ̈܂ ܠܶܐܕܼܢܰܘܗ̱ܝ̈ ܕܡܳܪܝܳܐ ܨܒܼܰܐܘܽܬܼ ܥܶܠܰܬܼ܂
05:05 [ai]	ܒܣܶܡܬܿܽܘܢ ܓܶܝܪ ܥܰܠ ܐܰܪܥܳܐ ܘܶܐܬܼܠܰܥܰܒܼܬܿܽܘܢ܂ ܘܬܼܰܪܣܺܝܬܿܽܘܢ ܦܿܰܓܼܪ̈ܰܝܟܿܽܘܢ ܐܰܝܟܼ ܕܰܠܝܰܘܡܳܐ ܕܢܶܟܼܣܬܼܳܐ܂
05:06 [ai]	ܚܰܝܶܒܼܬܿܽܘܢ ܘܰܩܛܰܠܬܿܽܘܢ ܠܙܰܕܿܺܝܩܳܐ܃ ܘܠܳܐ ܩܳܡ ܠܽܘܩܒܼܰܠܟܼܽܘܢ ܿ܀ܿ܀ܿ
05:07 [ai]	ܐܰܢ̱ܬܿܽܘܢ ܕܶܝܢ ܐܰܚܰܝ̈܃ ܐܰܓܿܰܪܘ ܪܽܘܚܟܼܽܘܢ܂ ܥܕܼܰܡܳܐ ܠܡܶܐܬܼܺܝܬܼܶܗ ܕܡܳܪܝܳܐ܂ ܐܰܝܟܼ ܐܰܟܿܳܪܳܐ ܕܰܡܣܰܟܿܶܐ ܠܦܼܺܐܪ̈ܶܐ ܝܰܩܺܝܪ̈ܶܐ ܕܰܐܪܥܶܗ܃ ܘܡܰܓܿܰܪ ܪܽܘܚܶܗ ܥܠܰܝܗܽܘܢ܃ ܥܕܼܰܡܳܐ ܕܢܳܣܶܒܼ ܡܶܛܪܳܐ ܒܟܺܝܪܳܝܳܐ ܘܰܠܩܺܝܫܳܝܳܐ܃
05:08 [ai]	ܗܳܟܼܰܢܳܐ ܐܳܦܼ ܐܰܢ̱ܬܿܽܘܢ ܐܰܓܿܰܪܘ ܪܽܘܚܟܼܽܘܢ܃ ܘܠܶܒܿܰܘܳܬܼܟܼܽܘܢ̈ ܫܰܪܰܪܘ܂ ܩܶܪܒܿܰܬܼ ܠܳܗ ܓܶܝܪ ܡܶܐܬܼܺܝܬܼܶܗ ܕܡܳܪܰܢ܂
05:09 [ai]	ܠܳܐ ܬܶܬܿܰܢܚܽܘܢ ܚܰܕܼ ܥܰܠ ܚܰܕܼ ܐܰܚܰܝ̈܃ ܕܠܳܐ ܬܶܬܿܕܼܺܝܢܽܘܢ܂ ܗܳܐ ܓܶܝܪ ܕܺܝܢܳܐ ܩܕܼܳܡ ܬܰܪܥܳܐ ܩܳܐܶܡ܂
05:10 [ai]	ܕܡܽܘܬܼܳܐ ܠܰܢܒܼܺܝܶܐ̈ ܣܰܒܼܘ ܠܟܼܽܘܢ ܐܰܚܰܝ̈܃ ܠܡܰܓܿܪܰܬܼ ܪܽܘܚܳܐ ܕܽܐܘܠܨܳܢܰܝܟܿܽܘܢ̈܂ ܗܳܢܽܘܢ ܕܡܰܠܶܠܘ ܒܰܫܡܶܗ ܕܡܳܪܝܳܐ܂
05:11 [ai]	ܗܳܐ ܓܶܝܪ ܝܳܗܒܺܝܢܰܢ ܛܽܘܒܼܳܐ ܠܰܐܝܠܶܝܢ ܕܿܣܰܝܒܰܪܘ܂ ܫܡܰܥܬܿܽܘܢ ܡܣܰܝܒܿܪܳܢܽܘܬܼܶܗ ܕܺܐܝܳܘܒܼ܃ ܘܚܰܪܬܼܳܐ ܕܰܥܒܼܰܕܼ ܠܶܗ ܡܳܪܝܳܐ܂ ܚܙܰܝܬܿܽܘܢ܂ ܡܶܛܽܠ ܕܰܡܪܰܚܡܳܢ ܗ̱ܽܘ ܡܳܪܝܳܐ ܘܰܡܪܰܚܦܼܳܢ܂
05:12 [ai]	ܩܕܼܳܡ ܟܽܠ ܡܶܕܶܡ ܕܶܝܢ ܐܰܚܰܝ̈܃ ܠܳܐ ܗܘܰܝܬܿܽܘܢ ܝܳܡܶܝܢ܂ ܠܳܐ ܒܰܫܡܰܝܳܐ ܘܠܳܐ ܒܰܐܪܥܳܐ܂ ܐܳܦܼܠܳܐ ܒܡܰܘܡܳܬܼܳܐ ܐ̱ܚܪܺܬܼܳܐ܂ ܐܶܠܳܐ ܬܶܗܘܶܐ ܡܶܠܰܬܼܟܼܽܘܢ܃ ܐܺܝܢ ܐܺܝܢ ܘܠܳܐ ܠܳܐ܃ ܕܠܳܐ ܬܶܬܼܚܰܝܒܼܽܘܢ ܬܚܶܝܬܼ ܕܺܝܢܳܐ܂
05:13 [ai]	ܘܶܐܢ ܐ̱ܢܳܫ ܡܶܢܟܼܽܘܢ ܢܶܗܘܶܐ ܒܽܐܘܠܨܳܢܳܐ܃ ܢܶܗܘܶܐ ܡܨܰܠܶܐ܂ ܘܶܐܢ ܚܳܕܼܶܐ܃ ܢܶܗܘܶܐ ܡܙܰܡܰܪ܂
05:14 [ai]	ܘܶܐܢ ܟܪܺܝܗ܃ ܢܶܩܪܶܐ ܠܩܰܫܺܝܫܶܐ̈ ܕܥܺܕ̱ܿܬܳܐ ܘܰܢܨܰܠܽܘܢ ܥܠܰܘܗ̱ܝ܃ ܘܢܶܡܫܚܽܘܢܶܗ ܡܶܫܚܳܐ ܒܰܫܡܶܗ ܕܡܳܪܰܢ܂
05:15 [ai]	ܘܰܨܠܽܘܬܼܳܐ ܕܗܰܝܡܳܢܽܘܬܼܳܐ ܡܰܚܠܡܳܐ ܠܶܗ ܠܗܰܘ ܕܰܟܼܪܺܝܗ܂ ܘܰܡܩܺܝܡ ܠܶܗ ܡܳܪܰܢ܂ ܘܶܐܢ ܚܛܳܗܶܐ̈ ܥܒܼܺܝܕܼܺܝܢ ܠܶܗ܃ ܡܶܫܬܿܰܒܼܩܺܝܢ ܠܶܗ܂
05:16 [ai]	ܗܘܰܝܬܿܽܘܢ ܕܶܝܢ ܡܰܘܕܶܝܢ ܣܰܟܼܠܘܳܬܼܟܼܽܘܢ̈ ܚܰܕܼ ܠܚܰܕܼ܂ ܘܰܗܘܰܝܬܿܽܘܢ ܡܨܰܠܶܝܢ ܚܰܕܼ ܥܰܠ ܚܰܕܼ܃ ܕܬܶܬܼܰܐܣܽܘܢ܂ ܪܰܒܼ ܗ̱ܽܘ ܓܶܝܪ ܚܰܝܠܳܗ ܕܰܨܠܽܘܬܼܳܐ ܐܰܝܕܼܳܐ ܕܙܰܕܿܺܝܩܳܐ ܡܨܰܠܶܐ ܠܳܗ܂
05:17 [ai]	ܐܳܦܼ ܐܺܠܺܝܳܐ ܒܰܪܢܳܫܳܐ ܗܘܳܐ ܚܳܫܽܘܫܳܐ ܐܰܟܼܘܳܬܼܰܢ܂ ܘܨܰܠܺܝ ܕܠܳܐ ܢܶܚܽܘܬܼ ܡܶܛܪܳܐ ܥܰܠ ܐܰܪܥܳܐ܃ ܘܠܳܐ ܢܚܶܬܼ ܬܠܳܬܼ ܫܢܺܝܢ̈ ܘܶܫܬܳܐ ܝܰܪ̈ܚܺܝܢ܂
05:18 [ai]	ܘܬܼܽܘܒܼ ܨܰܠܺܝ܃ ܘܰܫܡܰܝܳܐ ܝܰܗ̱ܒܼܘ ܡܶܛܪܳܐ܂ ܘܰܐܪܥܳܐ ܝܶܗܒܿܰܬܼ ܦܿܺܐܪ̈ܶܝܗ܀
05:19 [ai]	ܐܰܚܰܝ̈܃ ܐܶܢ ܐ̱ܢܳܫ ܡܶܢܟܼܽܘܢ ܢܶܛܥܶܐ ܡܶܢ ܐܽܘܪܚܳܐ ܕܩܽܘܫܬܳܐ܃ ܘܢܰܦܼܢܶܝܘܗ̱ܝ ܐ̱ܢܳܫ ܡܶܢ ܛܳܥܝܽܘܬܼܶܗ܃
05:20 [ai]	ܢܶܕܿܰܥ ܕܗܰܘ ܕܡܰܗܦܿܶܟܼ ܠܚܰܛܳܝܳܐ ܡܶܢ ܛܳܥܝܽܘܬܼܳܐ ܕܽܐܘܪܚܶܗ܃ ܡܰܚܶܐ ܢܰܦܼܫܶܗ ܡܶܢ ܡܰܘܬܳܐ܃ ܘܥܳܛܶܐ ܣܽܘܓܼܳܐܐ ܕܰܚܛܳܗܰܘܗ̱ܝ̈܀